Ang Basahon ni Mormon nagtudlo nga ang “tanan managsama ngadto sa Dios,” lakip ang mga “itom ug puti, ulipon ug gawasnon, lalaki ug babaye” (2 Nephi 26:33). Sa tibuok nga kasaysayan sa Simbahan, ang tanang tawo sa tanang kaliwat ug kultura sa daghang kanasoran nabunyagan ug nagpakabuhi isip matinud-anong mga miyembro sa Simbahan. Sa buhi pa si Joseph Smith, pipila sa itom nga mga lalaki nga miyembro sa Simbahan gi-orden sa pagkapari. Sa nahaunang kasaysayan niini, ang mga lider sa Simbahan mihunong sa pagtugyan sa pagkapari ngadto sa itom nga kalalakin-an nga kaliwat sa taga-Africa. Ang rekord sa Simbahan wala mohatag og klaro nga pagpasabot sa sinugdanan niini nga buhat. Ang mga lider sa Simbahan mituo nga ang usa ka pagpadayag gikan sa Dios gikinahanglan aron mausab kini nga buhat ug mainampoong nangita og giya. Ang pagpadayag miabot sa Presidente sa Simbahan nga si Spencer W. Kimball ug gipamatud-an sa ubang mga lider sa Simbahan didto sa Templo sa Salt Lake niadtong Hunyo 1, 1978. Ang pagpadayag mitangtang sa tanang restriksiyon mahitungod sa kaliwat nga kanhi gihimo ngadto sa pagkapari.