Seksiyon 119
Pagpadayag nga gihatag pinaagi ni Joseph Smith ang Propeta, sa Far West, Missouri, Hulyo 8, 1838, agi og tubag sa iyang pangamuyo: “O Ginoo! Ipakita sa imong mga sulugoon kon pila ang imong gikinahanglan gikan sa mga kabtangan sa imong katawhan alang sa ikapulo.” Ang balaod sa ikapulo, sama sa nasabtan karon, wala ihatag sa Simbahan sa wala pa kini nga pagpadayag. Ang pulong nga ikapulo sa pag-ampo nga bag-o lamang gikutlo ug sa nangaging mga pagpadayag (64:23; 85:3; 97:11) nagpasabot nga dili lamang ikanapulo, apan sa tanang kaugalingon nga kinabubut-ong mga halad, o mga amot, ngadto sa mga pundo sa Simbahan. Ang Ginoo kaniadto mihatag sa Simbahan sa balaod sa pagpahinungod sa kaugalingon ug pagkatinugyanan sa kabtangan, nga ang mga miyembro (labi na sa nangulong mga elder) misulod pinaagi sa usa ka pakigsaad nga walay kataposan. Tungod sa pagkapakyas sa bahin sa kadaghanan sa pagsunod niini nga pakigsaad, ang Ginoo mibakwi niini sa makadiyot ug mihatag sa balaod sa ikapulo ngadto sa tibuok Simbahan. Ang Propeta nangutana sa Ginoo kon pila sa ilang kabtangan ang Iyang gikinahanglan alang sa sagradong mga katuyoan. Ang tubag mao kini nga pagpadayag.
1–5, Ang mga Santos magbayad sa ilang mga sobra nga kabtangan ug unya mohatag, isip ikapulo, sa ikanapulo nga bahin sa ilang kinitaan matag tuig; 6–7, Ang maong paagi makabalaan sa yuta sa Zion.
1 Sa pagkatinuod, sa ingon niini miingon ang Ginoo, gikinahanglan nako ang ilang tanang sobra nga kabtangan nga ihatag ngadto sa mga kamot sa bishop sa akong simbahan sa Zion,
2 Alang sa pagtukod sa akong balay, ug alang sa pagpahiluna sa pundasyon sa Zion ug alang sa pagkapari, ug alang sa mga utang sa Kapangulohan sa akong Simbahan.
3 Ug kini ang sinugdanan sa ikapulo sa akong katawhan.
4 Ug human niana, kinsa kadtong nagbayad og ikapulo mobayad sa ikanapulo sa ilang tanang tubo sa matag tuig; ug kini mao ang mahangtorong balaod ngadto kanila hangtod sa kahangtoran, alang sa akong balaan nga pagkapari, miingon ang Ginoo.
5 Sa pagkatinuod sultihan ko kamo, mahitabo nga kadtong tanan nga nagpundok sa yuta sa Zion mobayad sa ikapulo sa sobra nilang mga kabtangan, ug mosunod niini nga balaod, o sila dili makita nga takos nga magpabilin uban kaninyo.
6 Ug sultihan ko kamo, kon ang akong katawhan dili mosunod niini nga balaod, sa pagbalaan niini, ug pinaagi niini nga balaod mobalaan sa yuta sa Zion ngari kanako, nga ang akong mga balaod ug ang akong mga paghukom masunod unta, nga kini mahimo nga labing balaan, tan-awa sa pagkatinuod sultihan ko kamo, kini dili mahimo nga usa ka yuta sa Zion nganha kaninyo.
7 Ug mahimo kining panig-ingnan ngadto sa tanang stake sa Zion. Mao gayod kana. Amen.