Seksiyon 68
Pagpadayag nga gihatag pinaagi ni Joseph Smith ang Propeta, sa Hiram, Ohio, Nobiyembre 1, 1831, agi og tubag sa pag-ampo nga ang hunahuna sa Ginoo ipahibalo mahitungod ni Orson Hyde, Luke S. Johnson, Lyman E. Johnson, ug William E. McLellin. Bisan tuod og ang uban niini nga pagpadayag gitumong ngadto niining upat ka tawo, kadaghanan sa sulod may kalabotan sa tibuok Simbahan. Kini nga pagpadayag gidugangan pa ubos sa direksyon ni Joseph Smith sa dihang gimantala kini sa 1835 nga edisyon sa Doktrina ug mga Pakigsaad.
1–5, Ang mga pulong sa mga elder kon gidasig pinaagi sa Espiritu Santo mamahimong kasulatan; 6–12, Ang mga elder kinahanglan nga mosangyaw ug mobunyag, ug ang mga timailhan mosunod sa tinuod nga mga tumutuo; 13–24, Ang unang natawo sa mga anak ni Aaron moserbisyo isip Tigdumalang Bishopric (kana, naghupot sa mga yawe sa kapangulohan ingon sa usa ka bishop) ubos sa direksyon sa Unang Kapangulohan; 25–28, Ang mga ginikanan gisugo sa pagtudlo sa ebanghelyo ngadto sa ilang mga anak; 29–35, Ang mga Santos kinahanglan nga motahod sa Adlaw nga Igpapahulay, maghago nga makugihon, ug mag-ampo.
1 Ang akong sulugoon, nga si Orson Hyde, gitawag pinaagi sa iyang ordinasyon sa pagsangyaw sa walay kataposan nga ebanghelyo, pinaagi sa Espiritu sa buhi nga Dios, gikan sa usa ka katawhan ngadto sa laing katawhan, ug gikan sa usa ka yuta ngadto sa laing yuta, diha sa mga kongregasyon sa mga daotan, sa ilang mga sinagoga, mangatarongan ug magpatin-aw sa tanang kasulatan ngadto kanila.
2 Ug, tan-awa, ug sud-onga, mao kini ang sumbanan ngadto sa tanan niadtong gi-orden ngadto niini nga pagkapari, kansang misyon gipili kon asa sila magsangyaw—
3 Ug mao kini ang sumbanan ngadto kanila, nga ilang ipamulong kon gidasig sila sa Espiritu Santo.
4 Ug bisan unsa ang ilang ipamulong kon gidasig sa Espiritu Santo mahimong kasulatan, mahimong kabubut-on sa Ginoo, mahimong hunahuna sa Ginoo, mahimong pulong sa Ginoo, mahimong tingog sa Ginoo, ug ang gahom sa Dios ngadto sa kaluwasan.
5 Tan-awa, mao kini ang saad sa Ginoo nganha kaninyo, O kamo nga akong mga sulugoon.
6 Mao nga, paglipay, ug ayaw kahadlok, kay ako ang Ginoo anaa uban kaninyo, ug mobarog uban kaninyo; ug kamo magpamatuod kanako, gani si Jesukristo, nga ako ang Anak sa buhi nga Dios, nga ako mao kaniadto, nga ako mao karon, ug nga ako mao ang moabot.
7 Mao kini ang pulong sa Ginoo nganha kaninyo, akong sulugoon nga Orson Hyde, ug usab sa akong sulugoon nga Luke Johnson, ug ngadto sa akong sulugoon nga Lyman Johnson, ug ngadto sa akong sulugoon nga si William E. McLellin, ug ngadto sa tanang matinud-anon nga mga elder sa akong simbahan—
8 Panglakaw kamo sa tibuok kalibotan, isangyaw ang ebanghelyo ngadto sa matag nilalang, maglihok pinaagi sa awtoridad nga akong gihatag kaninyo, magbunyag pinaagi sa ngalan sa Amahan, ug sa Anak, ug sa Espiritu Santo.
9 Ug siya nga motuo ug mabunyagan maluwas, ug siya nga dili motuo panghimaraoton.
10 Ug siya nga motuo mapanalanginan sa mga timailhan nga mosunod, bisan sumala sa nahisulat.
11 Ug kini ihatag kaninyo aron makahibalo sa mga timailhan sa mga panahon, ug sa mga timailhan sa pag-anhi sa Anak sa Tawo;
12 Ug kutob sa ipamatuod sa Amahan, nganha kaninyo ihatag ang gahom sa pagselyo kanila ngadto sa kinabuhing dayon. Amen.
13 Ug karon, mahitungod sa mga butang nga idugang sa mga pakigsaad ug mga sugo, mao kini—
14 Adunay magpabilin human niini, sa tukma nga panahon sa Ginoo, nga ang ubang mga bishop sangonan og buluhaton sa simbahan, sa pagpangalagad bisan sumala sa nahauna;
15 Mao nga mahimo silang mga high priest nga mga takos, ug pilion sila sa Unang Kapangulohan sa Melchizedek nga Pagkapari, gawas kon tinuod silang mga kaliwat ni Aaron.
16 Ug kon tinuod silang mga kaliwat ni Aaron sila adunay legal nga katungod sa bishopric, kon mga unang natawo sila sa mga anak ni Aaron;
17 Kay ang unang natawo naghupot sa katungod sa kapangulohan niini nga pagkapari, ug ang mga yawe o sa awtoridad niini.
18 Walay tawo nga adunay legal nga katungod niini nga buhatan, sa paghupot sa mga yawe niini nga pagkapari, gawas kon siya usa ka tinuod nga kaliwat ug ang unang natawo nga anak ni Aaron.
19 Apan, isip usa ka high priest sa Melchizedek nga Pagkapari anaa ang awtoridad sa pagdumala sa tanang mas ubos nga mga buhatan aron mahimo siyang modumala sa buhatan sa bishop kon walay tinuod nga kaliwat ni Aaron nga makita, gawas kon gitawag siya ug gigahin ug gi-orden ngadto niini nga gahom, ubos sa mga kamot sa Unang Kapangulohan sa Melchizedek nga Pagkapari.
20 Ug ang usa ka tinuod nga kaliwat ni Aaron, usab, kinahanglan nga tawagon niini nga Kapangulohan, ug makita nga takos, ug dinihogan, ug i-orden ubos sa mga kamot niini nga Kapangulohan, kondili sila walay legal nga awtoridad sa pagpahigayon sa ilang pagkapari.
21 Apan, pinaagi sa gahom nga gitakda sa balaod mahitungod sa ilang katungod sa pagkapari nga gipasa gikan sa amahan ngadto sa anak nga lalaki, magtinguha sila sa ilang pagdihog sa bisan unsang panahon nga mapamatud-an nila ang ilang kaliwatan, o kon matino kini pinaagi sa pagpadayag gikan sa Ginoo ubos sa mga kamot sa gihisgotan sa ibabaw nga Kapangulohan.
22 Ug usab, walay bishop o labaw nga pari ang igahin alang niini nga pangalagad ang pagahusayon o silotan alang sa bisan unsa nga krimen, gawas lang kon kini adto sa atubangan sa Unang Kapangulohan sa simbahan;
23 Ug kon ugaling makita siya nga sad-an sa atubangan niini nga Kapangulohan, pinaagi sa pagpamatuod nga dili ikapanghimakak, siya pagasilotan;
24 Ug kon maghinulsol siya mapasaylo siya sumala sa mga pakigsaad ug mga sugo sa simbahan.
25 Ug usab, kon ugaling ang mga ginikanan adunay mga anak sa Zion, o sa bisan asa sa iyang mga stake nga natukod, nga wala magtudlo kanila sa pagsabot sa doktrina sa paghinulsol, pagtuo diha ni Kristo ang Anak sa buhi nga Dios, ug sa bunyag ug sa gasa sa Espiritu Santo pinaagi sa pagpandong sa mga kamot, kon nag-edad na og otso anyos, ang sala anaa sa mga ulo sa mga ginikanan.
26 Kay mao kini ang balaod ngadto sa mga lumulupyo sa Zion, o sa bisan asa sa iyang mga stake nga natukod.
27 Ug ang ilang mga anak pagabunyagan alang sa kapasayloan sa ilang mga sala kon nag-edad na og otso anyos, ug makadawat sa pagpandong sa mga kamot.
28 Ug tudloan usab nila ang ilang mga anak sa pag-ampo, ug sa paglakaw nga matarong atubangan sa Ginoo.
29 Ug ang mga lumulupyo sa Zion usab motahod sa adlaw nga Igpapahulay sa pagbalaan niini.
30 Ug ang mga lumulupyo sa Zion usab mahinumdom sa ilang mga buluhaton, kon ugaling pilion sila alang sa buluhaton, sa tumang pagkamatinud-anon; kay ang tapolan hinumdoman sa atubangan sa Ginoo.
31 Karon, ako, ang Ginoo, wala mahimuot sa mga lumulupyo sa Zion, kay adunay mga tapolan diha kanila; ug ang ilang mga anak usab nagtubo sa pagkadaotan; sila usab wala magtinguha nga ampingan ang mga katigayonan sa kahangtoran, apan ang ilang mga mata napuno sa kahakog.
32 Kining mga butanga kinahanglan nga dili mao ang mahitabo, ug kinahanglan gayod nga hunongon diha kanila; mao nga, himoa nga ang akong sulugoon nga si Oliver Cowdery modala niini nga mga pulong ngadto sa yuta sa Zion.
33 Ug usa ka sugo ang akong ihatag kanila—nga siya nga wala mohimo sa iyang mga pag-ampo sa atubangan sa Ginoo nianang panahona, himoa nga siya mahinumdoman sa atubangan sa maghuhukom sa akong katawhan.
34 Kini nga mga pulong tinuod ug matinud-anon; mao nga, ayaw kini supaka, ni kuhaa gikan niini nga pulong.
35 Tan-awa, ako ang Alpha ug Omega, ug ako moabot sa dili madugay. Amen.