ʻI he faʻahitaʻu failau ʻo e 1834, naʻe faingataʻaʻia fakapaʻanga ʻa e Siasí, pea naʻe ʻikai lava e ngaahi feinga ke tānaki ha paʻanga ʻo tokoní. ʻI Māʻasi 1832, naʻe fokotuʻu ʻe he kau taki ʻo e Siasí ʻi ʻOhaioó ha kautaha naʻe ui ko e Pisinisi Fāitahá ke tokangaʻi ʻa e meʻa fakakomēsiale, fale koloa, mo e ngaahi taumuʻa fakapisinisi ʻo e Siasí ʻi ha founga ʻe tokoni ke fokotuʻu ʻa Saione mo tokangaʻi e masivá (vakai, T&F 78). ʻI ʻEpeleli 1832, naʻe fakataha ʻa Siosefa Sāmita mo ha niʻihi kehe mo e kau taki ʻo e Siasí ʻi Mīsulí pea fokotuʻu ha kiʻi vaʻa ʻo e Pisinisi Fāitahá ʻi he Vahefonua Siakisoní (vakai, T&F 82). Naʻe hokohoko atu e ongo vaʻa ʻe ua ko ʻení—taha ʻi ʻOhaiō mo e taha ʻi Mīsulí—ʻi ha taʻu ʻe ua. ʻI ha fakataha naʻe fai ʻi he ʻaho 10 ʻo ʻEpeleli, 1834, naʻe fakakaukau e kau mēmipa ʻo e kautahá ke taʻofi ʻa e kautahá. Ka neongo ia, naʻe maʻu ʻe Siosefa Sāmita ha fakahā ʻi ha uike nai ʻe ua mei ai “ʻe toe fokotuʻu foʻou [ʻa e kautahá]” pea “ke vahevahe ʻa e ngaahi koloá ki he ngaahi tufakanga tauhi ʻi he kau mēmipa ʻo e kautahá” (talateu ki he T&F 104). ʻI he malumalu ʻo e fakahinohino ʻa Siosefa Sāmitá, naʻe fetongi kimui ʻa e foʻi lea “Pisinisi Fāitahá (United Firm)” ʻaki ʻa e “Kautaha Uouangatahá” ʻi he fakahā ko ʻení. Naʻe toe faleʻi foki ʻe he ʻEikí ʻa e kau taki ʻo e Siasí fekauʻaki mo honau ngaahi moʻuá mo fakahinohinoʻi e kāingalotu kotoa pē ʻo e Siasí ʻi he founga ne pau ke nau tokangaʻi ʻaki ʻa e masivá.
ʻOku ʻomi ʻe he ʻEikí ha ngaahi fakahinohino fekauʻaki mo e Kautaha Uouangatahá
Tuku ha meʻa mamafa (hangē ko ha fuʻu tohi pe foʻi maka) ʻi muʻa ʻi he loki akó. Fakaafeʻi ha tokotaha ako ke hiki hake ʻa e meʻá ʻo fakaʻaongaʻi pē ʻa e foʻi tuhu ʻe taha. ʻOku totonu ke faingataʻa pe ʻikai malava ʻeni, kae tuku ke feinga ʻa e tokotaha akó. Fakangofua leva ʻa e tokotaha akó ke ne fakaafeʻi ha kaungā ako ke tokoni ʻi hono hiki hake ʻa e meʻa ko iá. Kuo pau ke palōmesi ʻa e kau ako ʻoku nau tokoní ke tokoni kae ʻoua kuo hiki hake ʻa e meʻa ko iá, pea kuo pau foki ke nau ngāue ʻaki pē ʻa e foʻi tuhu ʻe taha. Fakaʻatā ʻa e tokotaha ako ʻuluakí ke ne kei hokohoko atu pē hono fakaafeʻi ʻa e kau ako lahi ange kae ʻoua kuo nau lava ʻo hiki hake ʻa e meʻa ko iá.
Ko e hā naʻe fie maʻu ke hiki hake ʻaki ʻa e meʻa mamafá? (ʻE ala kau ʻi he ngaahi talí ʻa e ngāue fakatahá, uouangatahá, mo e ngaahi meʻa pehē.)
Fakamatalaʻi ange ʻi he ngaahi fuofua ʻaho ʻo e Siasí, ne hoko ʻa e ngaahi palopalema fakapaʻangá ko ha kavenga mamafa ki he Siasí. ʻI Māʻasi mo ʻEpeleli 1832, naʻe fakahinohinoʻi ʻe he ʻEikí ʻa e kau taki ʻo e Siasí ke fokotuʻu ʻa e Pisinisi Fāitahá, ʻa ia ne fuakava hono kau mēmipá ke ngāue fakataha pea fatongia ʻaki hono tokangaʻi ʻo e falekoloa mo e ngaahi ngāue pulusi ʻa e Siasí kae lava ʻo fakasiʻisiʻi ʻa e moʻua ʻo e Siasí, tokangaʻi e masivá, pea paotoloaki e ngāue ʻa e ʻEikí. Naʻe ui ʻa e kautaha ko ʻení ʻi he kamataʻangá ko e Pisinisi Fāitahá (vakai ki he talateu ki he vahe 78, 82, mo e 104 ʻi he pulusinga ʻi he 2013 ʻo e Tokāteline mo e Ngaahi Fuakavá). ʻI he faʻahitaʻu failau ʻo e 1834, naʻe fakatupu ʻe he moʻuá ʻa e kau taki ʻo e Siasí ke nau fakakaukau ki hono taʻofi ʻa e kautahá. ʻI he ʻaho 23 ʻo ʻEpeleli 1834, naʻe maʻu ʻe he Palōfita ko Siosefa Sāmitá ʻa e fakahā ʻoku lekooti ʻi he Tokāteline mo e Ngaahi Fuakava 104, ʻa ia naʻe fakahā ai ʻe he ʻEikí e meʻa naʻe pau ke fai ki he Pisinisi Fāitahá mo hono ngaahi koloá.
Fakaafeʻi ha tokotaha ako ke lau leʻolahi e talateu ki he vahé ʻo e Tokāteline mo e Ngaahi Fuakava 104. Kole ki he kalasí ke muimui ki ai pea kumi e meʻa naʻe fie maʻu ʻe he ʻEikí ke fai ʻe he kau taki ʻo e Siasí ki he Kautaha Uouangatahá. (Kimuʻa pea lau ʻa e kau akó, fakamatalaʻi ange naʻe fakahinohino kimui ʻe Siosefa Sāmita ke fetongi ʻa e foʻi lea “Pisinisi Fāitahá” ʻaki ʻa e “Kautaha Uouangatahá” ʻi he fakahā naʻe pulusí.) Kole ki he kau akó ke lipooti e meʻa ʻoku nau maʻú.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 104:1–4. Kole ki he kalasí ke muimui ki ai pea feinga ke ʻiloʻi ʻa e taha ʻo e ngaahi ʻuhinga ki he ngaahi faingataʻa ʻa e Kautaha Uouangatahá. Te ke fie fakamatalaʻi ange ʻoku ʻuhinga e foʻi lea ʻi he veesi 4, ko e mānumanú ki ha holi siokita ke maʻu ha meʻa, ʻoku angamaheni ʻaki ko ha meʻa ʻa ha taha kehe.
Ko e hā ha ngaahi meʻa naʻe maumauʻi ʻe he kau taki e niʻihi koeʻuhí ko e mānumanú?
Fakamanatu ange ki he kau akó ʻa e lēsoni fakataumuʻa ʻi he kamataʻanga ʻo e lēsoní. Kole ange ke nau fakakaukau ki he meʻa ne mei hoko kapau naʻe palōmesi e kau ako tokolahi ke tokoni kae liliu ʻenau fakakaukaú mo fakakaukau ke nau ʻalu ʻi hono hiki hake ʻa e meʻá.
Fakamatalaʻi fakanounou ʻa e Tokāteline mo e Ngaahi Fuakava 104:5–10 ʻaki hano fakamatalaʻi ange naʻe fakahā ʻe he ʻEikí ʻe kau ʻi he ngaahi nunuʻa ʻo hono maumauʻi ʻo e fuakava naʻe fekauʻaki mo e Kautaha Uouangatahá pea fakamalaʻiaʻi mo hono motuhi atu mei he Siasí (vakai foki, T&F 78:11–12; 82:11–21).
Fakaafeʻi e kau akó ke lau fakalongolongo e Tokāteline mo e Ngaahi Fuakava 104:11–13, ʻo fekumi ki he meʻa naʻe folofola ʻa e ʻEikí ne pau ke maʻu ʻe he mēmipa takitaha ʻo e Kautaha Uouangatahá. Kole ki he kau akó ke lipooti e meʻa ʻoku nau maʻú. ʻE ala fie maʻu ke ke fakamatalaʻi ange ko e tauhí ko ha tokotaha ʻoku foaki ange ha fatongia ki ha koloa ʻa ha taha kehe.
Fakatatau ki he veesi 12–13, ko e hā naʻe vaheʻi ai ʻe he ʻEikí ha lakanga tauhi ki he mēmipa takitaha ʻo e Kautaha Uouangatahá?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 104:14. Kole ki he kalasí ke muimui ki ai, ʻo kumi pe ko hai naʻá ne maʻu e koloa naʻe fekauʻaki mo e Kautaha Uouangatahá.
Ko hai naʻá ne maʻu e kelekele ne ʻai ke ʻoange ki he kau mēmipa ʻo e Kautaha Uouangatahá? (Hili e tali ʻa e kau akó, hiki e moʻoni ko ʻení ʻi he palakipoé: Naʻe fakatupu ʻe he ʻEikí ʻa e māmaní, pea ʻoku ʻAʻana ʻa e ngaahi meʻa kotoa pē ʻi aí.)
ʻE ala tākiekina fēfē ʻe he foʻi moʻoni ko ʻení e founga hoʻo vakai mo ngāue ʻaki hoʻo koloá?
Fakaafeʻi e kau akó ke lau fakalongolongo e Tokāteline mo e Ngaahi Fuakava 104:15–18. Kole ange ke nau feinga ke ʻiloʻi e founga naʻe fakahinohino ʻe he ʻEikí ki Heʻene kau tauhí ke fakaʻaongaʻi e ngaahi meʻa ʻo e māmaní.
Ko e hā e founga ʻoku finangalo e ʻEikí ke tokangaʻi ʻaki ʻEne Kāingalotú?
ʻOkú ke pehē ʻoku ʻuhinga ki he hā ʻa e “[ʻoku] hakeakiʻi ʻa e kakai masivá, ʻi hono fakatōkilaloʻi ʻo e kakai koloaʻiá”?
Ke tokoni ke mahino ki he kau akó e ʻuhinga ʻo e leá ni, fakaafeʻi ha tokotaha ako ke lau leʻolahi ʻa e fakamatala ko ʻeni ʻa ʻEletā Siosefa B. Uefilini ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
ʻEletā Joseph B. Wirthlin
“Ko e founga ʻa e ʻEikí ʻoku kau ai hono tokoniʻi ʻo e kakaí ke nau tokoniʻi pē kinautolú. ʻOku hakeakiʻi e masivá koeʻuhí he ʻoku nau ngāue ki he tokoni fakataimi ʻoku nau maʻú, ʻoku akoʻi kiate kinautolu ʻa e ngaahi tefitoʻi moʻoni totonú, pea ʻoku nau lava ʻo hiki hake mei he masivá ki he fakafalala pē kiate kitá. ʻOku fakatōkilaloʻi ʻa e koloaʻiá koeʻuhí he ʻoku nau fakavaivaiʻi ʻa kinautolu ke foaki lahi mei he meʻa ʻoku nau maʻú ki he niʻihi faingataʻaʻiá” (Inspired Church Welfare,”Ensign, May 1999, 77).
Ko e hā e ngaahi tefitoʻi moʻoni ʻoku akoʻi ʻe he veesi 17–18 fekauʻaki mo hotau fatongia ke tokoniʻi e niʻihi kehé? (ʻE ala ʻiloʻi ʻe he kau akó ha ngaahi tefitoʻi moʻoni kehekehe, kau ai ʻa e meʻá ni: ʻOku tau haʻisia ke ngāue ʻaki e meʻa kuo ʻomi ʻe he ʻEikí kiate kitautolú ke tokoniʻi e niʻihi kehé. Tohi ʻa e tefitoʻi moʻoni ko ʻení ʻi he palakipoé.)
Fakaafeʻi e kau akó ke fakakaukau ki he “masivá mo e paeá” ʻo ʻikai ngata pē ʻiate kinautolu ʻoku fie maʻu tokoni fakapaʻangá ka kiate kinautolu foki ʻoku fie maʻu tokoni fakalaumālie, fakaeloto, fakaʻatamai, mo fakasōsialé. Ko e meʻa tatau pē, te tau lava ʻo fakakaukau ki heʻetau koloá ʻo lahi ange ʻi he paʻanga pe koloa fakamāmani ʻoku tau maʻú. ʻOku kau ʻi heʻetau koloá ʻa hotau taimí, ngaahi talēnití, ʻiló, fakamoʻoní, mo e ngaahi pōtoʻi ngāué.
ʻOkú ke pehē ko e hā ʻoku mahuʻinga ai ke tau foaki mei heʻetau koloá kiate kinautolu ʻoku faingataʻaʻiá?
Te tau lava ʻo tokoniʻi fēfē e niʻihi kehé ʻi he founga ʻa e ʻEikí?
Fakaafeʻi e kau akó ke fakalaulauloto ki heʻenau ngaahi feinga ke tokoniʻi e masivá mo e faingataʻaʻiá. Kole ange ke nau tohi ha taumuʻa ki he founga te nau fakaʻaongaʻi ai e meʻa kuo foaki ange ʻe he ʻEikí ke tokoniʻi ha taha ʻoku faingataʻaʻiá.
ʻOku ʻomi ʻe he ʻEikí ha ngaahi fakahinohino fekauʻaki mo e Kautaha Uouangatahá, ngaahi lakanga tauhí, pea mo e fale tauhiʻanga koloá
Fakamatalaʻi fakanounou ʻa e Tokāteline mo e Ngaahi Fuakava 104:19–53 ʻaki hano fakamatalaʻi ange naʻe foaki ʻe he ʻEikí ha ngaahi fakahinohino pau kau ki he ngaahi lakanga tauhi naʻe vahe ki he kau mēmipa ʻo e Kautaha Uouangatahá. Hiki e meʻá ni ʻi he palakipoé: Tokāteline mo e Ngaahi Fuakava 104:23, 25, 31, 33, 35, 38, 42, 46. Kole ki he kau akó ke lau fakalongolongo ʻa e ngaahi veesi ko ʻení, ʻo kumi ha sīpinga ʻi he ngaahi talaʻofa ʻa e ʻEikí ki he mēmipa takitaha ʻo e kautahá. Fakaafeʻi e kau akó ke lipooti e meʻa ʻoku nau maʻú.
ʻEke ange ki he kau akó pe ko e fē ngaahi foʻi lea pe kupuʻi lea ʻoku toutou hā ʻi he ngaahi veesi ko ʻení. Fakamahinoʻi ange ʻoku ʻuhinga e kupuʻi lea “kapau” ki he “hangē ʻoku” pe “ki he tuʻunga ko ia.”
Ko e hā ʻe lava ke akoʻi kiate kitautolu ʻe he kupuʻi lea ko ʻení fekauʻaki mo e founga ʻoku kaunga ai ʻetau talangofuá ki he ngaahi tāpuaki ʻoku tau maʻú?
Hiki ʻi he palakipoé Pea hangē ko ia ko ʻetau loto fakatōkilalo mo faivelengá, ʻe … ʻe he ʻEikí
ʻEke ki he kau akó pe te nau fakakakato fēfē ʻa e tefitoʻi moʻoni ko ʻení. (Fakaʻaongaʻi ʻenau ngaahi leá ke fakaʻosi ʻaki ʻa e tefitoʻi moʻoni taʻe kakato ʻi he palakipoé. Hangē ko ʻení: Pea hangē ko ia ko ʻetau loto fakatōkilalo mo faivelengá, ʻe liunga lahi ʻe he ʻEikí hotau ngaahi tāpuakí.)
Ko e fē taimi kuó ke mamata ai ki ha taha naʻe tāpuekina ʻi he faivelenga ʻi honau ngaahi fatongia ki he ʻEikí?
Fakaafeʻi e kau akó ke fakakaukau ki he founga te nau lava ai ʻo faivelenga ʻi he ngaahi fatongia kuo foaki ange kiate kinautolu ʻe he ʻEikí.
Fakamatalaʻi fakanounou ʻa e Tokāteline mo e Ngaahi Fuakava 104:54–77 ʻaki hano fakamatalaʻi ange naʻe ʻomi ʻe he ʻEikí ʻa e ngaahi fakahinohino ki hono fokotuʻu ʻo e ngaahi fale tukuʻanga koloá ke maluʻi e paʻanga ʻe fakaʻaongaʻi ki he lelei ʻa e Siasí, hangē ko hono paaki ʻo e folofolá.
ʻOku fakahinohinoʻi ʻe he ʻEikí ʻa e kau taki ʻo e Siasí fekauʻaki mo e ngaahi moʻua ʻo e Kautaha Uouangatahá
Kole ki he kau akó ke fakalaulauloto pe kuo ʻi ai ha taimi ne kole ange ai ke nau fai ha meʻa naʻa nau fakakaukau naʻe ʻikai malava. Fakaafeʻi ha niʻihi tokosiʻi ke vahevahe ʻenau ngaahi aʻusiá.
Fakamatalaʻi ange ʻoku ʻi he talangofua ki he ngaahi fekau ʻa e ʻEikí, naʻe fai ai ʻe he Kautaha Uouangatahá ha fakamoʻua lahi. Naʻe taʻofi ʻe ha ngaahi meʻa ʻe niʻihi ne hokó ʻa e kautahá mei hono totongi fakafoki e ngaahi noó. Hangē ko ʻení, naʻe tokoni ʻa e fakaʻauha ʻe he kau fakatangá ʻa e fale pākí ʻi he Vahefonua Siakisoni, Mīsulí, ki he hokohoko atu ʻa e ngaahi faingataʻa fakaʻekonōmiká, pea naʻe taʻofi ʻe he kau fakatangá e Kāingalotú mei hono fakaʻaongaʻi ʻo e fale tukuʻanga koloa ʻi Tauʻatāiná.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 104:78. Kole ki he kalasí ke muimui ki ai, ʻo kumi ʻa e fakahinohino ʻa e ʻEikí fekauʻaki mo e ngaahi moʻua ʻo e Siasí.
Ko e hā naʻe fakahinohino ʻe he ʻEikí ki he kau mēmipa ʻo e Kautaha Uouangatahá ke faí?
Fakamahinoʻi ange ne ngali taʻe malava ki he Kāingalotú hono totongi e moʻuá, ka naʻe ʻoange ʻe he ʻEikí ha ngaahi fakahinohino ke tokoni kiate kinautolu. Hiki e KAPAU mo e PEA ʻE ʻi he konga ki ʻolunga ʻo e ongo ʻotu ʻe ua ʻi he palakipoé. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 104:80–82. Kole ki he vaheua ʻe taha ʻo e kalasí ke muimui ki ai, ʻo fekumi ki he meʻa naʻe kole ʻe he ʻEikí ki he kau mēmipa ʻo e kautahá ke nau fai kae lava ke maʻu ʻEne tokoní ʻi hono totongi honau ngaahi moʻuá. Kole ki he vaeua ʻe tahá ke muimui ki ai, ʻo fekumi ki he meʻa naʻe talaʻofa ʻa e ʻEikí te Ne fai ke tokoniʻi e Kāingalotú ʻi heʻenau totongi honau ngaahi moʻuá. Fakaafeʻi e kulupu ʻuluakí ke hiki ʻenau ngaahi talí ʻi he palakipoé ʻi lalo ʻi he “KAPAU”, pea ʻai ke hiki ʻe he kulupu hono uá ʻenau ngaahi talí ʻi lalo ʻi he “PEA ʻE.”
Ko e hā e tefitoʻi moʻoni te tau lava ʻo ako mei he Tokāteline mo e Ngaahi Fuakava 104:80–82? (ʻE ala fakaʻaongaʻi ʻe he kau akó ha ngaahi lea kehe, ka ʻoku totonu ke nau ʻiloʻi ha meʻa hangē ko e tefitoʻi moʻoni ko ʻení: Kapau ʻoku tau loto-fakatōkilalo mo faivelenga pea ui ki he huafa ʻo e ʻEikí, te Ne tokoniʻi leva kitautolu ke tau lavaʻi e meʻa kuó Ne kole mai ke tau faí.)
Ko e hā ʻoku kole ʻe he ʻEikí ki he kāingalotu ʻo e Siasí ke fai he ʻaho ní ʻe lava ke pehē ʻoku faingataʻa? ʻOkú ke pehē ko e hā e fatongia ʻo e loto-fakatōkilaló, faivelengá, mo e lotú ʻi hono fakahoko e ngaahi meʻa kuo kole atu ʻe he ʻEikí ke ke faí?
Ko hai mei he folofolá ko ha sīpinga ʻo e tefitoʻi moʻoni naʻa tau ʻiloʻi ʻi he veesi 80–82? Ko hai ʻokú ke ʻiloʻi he ʻahó ni ko ha sīpinga ia ʻo e tefitoʻi moʻoni ko ʻení?
Fakaafeʻi e kau akó ke hiki ʻi heʻenau pepa ki he kalasí pe tohinoa ako folofolá ha founga te nau lava ai ʻo loto-fakatōkilalo, faivelenga, pe faʻa lotu ange kae lava ke tokoniʻi kinautolu ʻe he ʻEikí ke nau fakahoko ʻa e ngaahi meʻa kuó Ne kole ange ke nau faí.
Naʻe lea ʻa Palesiteni Melioni G. Lomenī ʻo e Kau Palesitenisī ʻUluakí ʻo kau ki he ngaahi tāpuaki ʻoku tau maʻu ʻi heʻetau tokangaʻi e masivá mo e faingataʻaʻiá:
ʻĪmisi
Palesiteni Marion G. Romney
“ʻE faingofua pē ia ki he ʻEikí ke fakahā ki [he Palesiteni ʻo e Siasí] ʻa e feituʻu ʻoku tānaki ai ʻa e loló mo e ngaahi maka mahuʻingá. Te tau lava leva ʻo totongi ha taha ke ne keli hake kinautolu pea te tau tuʻumālie ʻaupito—pea ʻe ʻave kitautolu ʻe he tuʻumālié ki Heli. ʻIkai, ʻoku ʻikai fie maʻu ʻe he ʻEikí ke tau tokangaʻi e masivá, ka ʻoku tau fie maʻu ʻa e aʻusia ko ʻení; he ʻoku makatuʻunga pē ʻi heʻetau ako ki he founga ke tokangaʻi ai e niʻihi kehé ʻetau fakatupulaki ʻiate kitautolu ʻa e ʻofa faka-Kalaisí mo e ʻulungaanga ʻoku fie maʻu ke fakafeʻungaʻi ai kitautolu ke tau toe foki hake ki hono ʻaó” (Living Welfare Principles,”Ensign, Nov. 1981, 92).
Naʻe ako ʻa Palesiteni Tieta F. ʻUkitofa ʻo e Kau Palesitenisī ʻUluakí kau ki he founga ʻa e ʻEikí ki hono tokoniʻi ʻo e Kāingalotú ʻo pehē:
ʻĪmisi
Palesiteni Dieter F. Uchtdorf
“ʻOku tokolahi ha kakai pea lahi mo e ngaahi kautaha lelei ʻi he māmaní ʻoku nau feinga ke feau e ngaahi fie maʻu vivili ʻa e kakai masiva mo faingataʻaʻiá ʻi he feituʻu kotoa pē. ʻOku tau fakamālō ai, ka ʻoku kehe ʻa e founga ia ʻa e ʻEikí ki hono tokangaʻi ʻo e faingataʻaʻiá mei he founga ʻa e māmaní. Kuo folofola ʻa e ʻEikí ʻo pehē, ‘kuo pau ke fai ia ʻi heʻeku founga pē ʻaʻakú’ [T&F 104:16]. ʻOku ʻikai ngata pē ʻi Heʻene tokanga ki heʻetau ngaahi fie maʻu fakavavevave tahá; ka ʻokú Ne tokanga ki heʻetau fakalakalaka taʻengatá. Ko hono ʻuhinga ʻeni kuo kau maʻu ai pē ʻi he founga ʻa e ʻEikí ʻa e moʻui fakafalala pē kiate kitá mo e tokoni ki hotau kaungāʻapí ʻo tānaki atu ki hono tokangaʻi ʻo e masivá” (Tokoniʻi ʻi he Founga ʻa e ʻEikí,”Ensign pe Liahona, Nōvema 2011, 54).
ʻĪmisi
Palesiteni Marion G. Romney
Naʻe ako foki ʻa Palesiteni Melioni G. Lomenī ʻo e Kau Palesitenisī ʻUluakí fekauʻaki mo e ngaahi taumuʻa lahi ange ʻo e tokoni ʻi he founga ʻa e ʻEikí ʻo pehē: “Ko e tefitoʻi fatongia ʻo e tokoni ʻa e Siasí ki he masivá ʻoku ʻikai ke ʻomi ʻa e fakafiemālie fakatuʻasino ki heʻenau ngaahi fie maʻú, ka ko e fakamoʻui ki honau laumālié” (The Roles of Bishops in Welfare Services,”Ensign, Nov. 1977, 81).