Lolotonga ʻene ngāue ki hono liliu ʻo e Tohi Tapú ʻi he ʻaho 16 ʻo Fēpueli 1832, naʻe fai ʻe Siosefa Sāmita ha ngaahi liliu fakalaumālie ki he Sione 5:29 kau ki he toetuʻu ʻa e kau angatonú pea mo e taʻe-angatonú. Hili ʻena mamata ʻi ha mata meʻa-hā-mai ki he nāunau ʻo e Tamaí mo e ʻAló, tō ʻa Lusifaá, mo e ngaahi foha ʻo e malaʻiá, naʻe fakahā kia Siosefa Sāmita mo Sitenei Likitoni ʻa kinautolu ʻe kau ʻi he toetuʻu ʻa e kau angatonú: ko e kakai ʻo e puleʻanga fakasilesitialé mo e fakatelesitialé.
ʻOku fakahā ʻe he ʻEikí e ngaahi fie maʻu mo e ngaahi tāpuaki ʻo hono maʻu ʻo e puleʻanga fakasilesitialé
Haʻu mo ha konga mā ki he kalasí mo e ngaahi meʻa ke taʻo ʻaki e maá. (Pe, te ke lava ʻo fakaʻaongaʻi ha faʻahinga meʻa taʻo kehe ʻoku fie maʻu ki ai ha ngaahi meʻa lahi.) Hiki ʻa e Ngaahi Fie Maʻu ki he Taʻo Maá ʻi he palakipoé. Kole ki he kau akó ke nau talamai ʻa e ngaahi meʻa ʻoku fie maʻu ki hono taʻo e maá, pea fakaʻaliʻali ʻa e ngaahi meʻa ko iá ʻi hono talaatu ʻe he kau akó. (Kapau ʻoku ʻikai ke ke maʻu e ngaahi meʻa ʻoku fie maʻú, te ke lava ke hiki kinautolu ʻi he palakipoé ʻi hono lau atú.) Talaange ki he kau akó ʻe lava ke tokoni ʻa e founga hono ngaohi ʻo e maá ke mahino kiate kinautolu ʻa e ngaahi moʻoni te nau ʻiloʻi ʻi heʻenau ako ʻa e Tokāteline mo e Ngaahi Fuakava 76:50–80.
Ko e hā naʻe fai ʻe Siosefa Sāmita mo Sitenei Likitoni kimuʻa pea toki maʻu ʻa e meʻa-hā-mai ne lekooti ʻi he Tokāteline mo e Ngaahi Fuakava 76? (Ko hono liliu mo fakalaulauloto ki he Sione 5:29. Kapau ʻoku fie maʻu tokoni ʻa e kau akó ʻi hono manatuʻi ʻa e ʻuhinga ko ʻení, fakaafeʻi kinautolu ke nau lau fakavave pē ʻa e sētesi fakaʻosi ʻo e talateú.)
Fakaafeʻi ha tokotaha ako ke lau leʻolahi ʻa e Sione 5:29. Fakamatalaʻi ange naʻe fakalaulauloto ʻa Siosefa Sāmita mo Sitenei Likitoni ki he fakamatala ʻa Sione ki he toetuʻu ʻa kinautolu kuo faileleí mo e toetuʻu ʻa kinautolu kuo faikoví ʻi heʻena maʻu ʻa e meʻa-hā-mai ne lekooti ʻi he Tokāteline mo e Ngaahi Fuakava 76.
Fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 76:50. Kole ki he kalasí ke kumi e meʻa naʻe fakahā kia Siosefa Sāmita mo Sitenei Likitoni hili ʻa e meʻa-hā-mai ʻo e ngaahi foha ʻo e malaʻiá. (Mahako te ke fie fakamatalaʻi ange ʻoku ʻuhinga ʻa e foʻi lea ko e angatonu ʻi he veesi ko ʻení ki he māʻoniʻoni.)
Fakatatau ki he veesi 50, ko hai naʻe mamata ki ai e Palōfitá mo Sitenei Likitoni hili e meʻa-hā-mai ʻo e ngaahi foha ʻo e malaʻiá? (Ko kinautolu ʻe kau ʻi he toetuʻu ʻa e kau angatonú.)
Fakamatalaʻi ange ʻoku fakamatalaʻi ʻi he Tokāteline mo e Ngaahi Fuakava 76:50–80 ʻa kinautolu ʻe toetuʻu ʻi he toetuʻu ʻa e angatonú. Kole ki he kau akó ke nau lau fakavave ʻa e Tokāteline mo e Ngaahi Fuakava 76:70 pea ʻiloʻi ʻa e fuofua kulupu ʻo e kakai ʻe toetuʻu lolotonga e toetuʻu ʻa e angatonú. Kole ki he kau akó ke nau lipooti e meʻa ʻoku nau maʻú.
Hiki ʻa e Fie Maʻu ke Hoko Ko ha Tokotaha Fakasilesitialé ʻi he palakipoé. Fakamatalaʻi ange ko e konga ʻo e meʻa-hā-mai ko ʻení, naʻe fakahā ʻe he ʻEikí kia Siosefa Sāmita mo Sitenei Likitoni ha fakamatala ʻo kinautolu te nau maʻu e hakeakiʻí ʻi he puleʻanga fakasilesitialé. Fakaafeʻi e kau akó ke nau lau fakalongolongo ʻa e Tokāteline mo e Ngaahi Fuakava 76:51–53 ʻo kumi ʻa e ngaahi fie maʻu ke hoko ko ha tokotaha fakasilesitialé. Fakahinohinoʻi e kau akó ko e taimi ʻoku nau ʻilo ai ha fie maʻú, ʻoku fakaafeʻi kinautolu ke omi ki he palakipoé, ʻo hiki ʻa e meʻa kuo nau maʻú.
Hili hono hiki ʻe he kau akó e ngaahi fie maʻú ʻi he palakipoé, mahalo te ke fie tokoni ke mahino ange kiate kinautolu ha niʻihi ʻo e ngaahi lea ʻi he ngaahi veesi ko ʻení.
ʻOkú ke pehē ʻoku ʻuhinga ki he hā ke “[maʻu] ʻa e fakamoʻoni ʻo Sīsuú”? (T&F 76:51). (ʻE ala kau ʻi he ngaahi talí hono maʻu ʻa e tui ki he misiona fakalangi ʻa e Fakamoʻuí pea muimui ki Heʻene ongoongoleleí.)
Ko e hā e founga ʻoku “ikuna [ai ha taha] ʻi he tuí”? (T&F 76:53). (ʻOku ʻuhinga ʻa e “ikuna ʻi he tuí,” ke ikunaʻi ʻa e ngaahi ʻahiʻahi mo e ngaahi angahalá ʻi hono ngāue ʻaki ʻa e tui kia Sīsū Kalaisí pea kātekina ʻa e ngaahi faingataʻa kotoa pē.)
ʻOku ʻuhinga ki he hā ʻa e “fakamaʻu … ʻe he Laumālie Māʻoniʻoni ʻo e talaʻofá”? (T&F 76:53). (Mahalo te ke fie fakamatalaʻi ange ko e Laumālie Māʻoniʻoni ʻo e Talaʻofá ʻa e Laumālie Māʻoniʻoní. ʻOku fakamaʻu kitautolu ʻe he Laumālie Māʻoniʻoni ʻo e Talaʻofá ʻi he fakamoʻoni ʻa e Laumālie Māʻoniʻoní ki he Tamai Hēvaní ko e ngaahi ouau ko ia kuo tau maʻú kuo fakahoko totonu pea kuo tau tauhi faivelenga ki he ngaahi fuakava kuo tau faí. ʻE lava foki ke fakapapauʻi mai ʻe he Laumālie Māʻoniʻoní ʻoku tali ʻe he ʻOtuá ʻetau faivelenga ki he ngaahi ouaú mo e ngaahi fuakavá.)
Fakamatalaʻi fakanounouʻi ʻa e Tokāteline mo e Ngaahi Fuakava 76:54–68 ʻaki hano fakamatalaʻi ange ʻoku lisi mai ʻe he potufolofola ko ʻení ha ngaahi tāpuaki lahi ʻe maʻu ʻe he kakai hakeakiʻi ʻo e puleʻanga fakasilesitialé. Kapau ʻoku maʻu ha taimi feʻunga, te ke fie fakaafeʻi ha niʻihi ʻo e kau akó ke nau taufetongi hono lau leʻolahi ʻa e Tokāteline mo e Ngaahi Fuakava 76:54–68. Kole ki he kalasí ke muimui ki ai, ʻo fekumi ki he ngaahi tāpuaki ko ʻení. Mahalo te ke fie fokotuʻu ange ke fakaʻilongaʻi ʻe he kau akó ha faʻahinga tāpuaki ʻoku mahuʻinga makehe kiate kinautolu.
Ko e fē ngaahi tāpuaki ʻoku mahuʻinga makehe kiate koé? Ko e hā hono ʻuhingá?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 76:69-70. Kole ki he kalasí ke nau muimui ki ai, ʻo fekumi ki ha meʻa kehe ʻoku fie maʻu ke fakafeʻungaʻi ai ha taha fakafoʻituitui ki he puleʻanga fakasilesitialé.
Neongo ʻoku tau faifeinga ke maʻu ʻa e ngaahi fie maʻu ʻaonga kotoa pē ʻi heʻetau moʻuí, ko e hā ʻoku pehē ʻe he ngaahi veesi ko ʻení ʻoku tau kei fie maʻu kae lava ke tau taau ke maʻu ʻa e puleʻanga fakasilesitialé? (Hili e tali ʻa e kau akó, hiki e tokāteline ko ʻení he palakipoé ʻi lalo ʻi he Fie Maʻu ke Hoko Ko ha Tokotaha Fakasilesitialé: ʻE lava ke fakahaohaoaʻi pē kitautolu ʻi he Fakalelei ʻa Sīsū Kalaisí.)
Fakamatalaʻi ange neongo ʻoku ʻikai fakahaohaoaʻi kitautolu ʻi heʻetau ngaahi feinga lelei taha ke tauhi kotoa e ngaahi fekaú, ka ʻoku tokoni ʻetau ngaahi ngāué ke fakafeʻungaʻi kitautolu ke maʻu ʻa e ʻaloʻofa ʻa e Fakamoʻuí pea ke fakamaʻa ʻe Heʻene “fakalelei haohaoa … ʻi he lilingi hono taʻataʻá” (T&F 76:69). ʻE lava ke poupouʻi kitautolu ʻe he foʻi moʻoni ko ʻení ke tau tauhi e ngaahi fekaú mo maʻu ʻa e ngaahi ouau ʻo e fakamoʻuí kae lava ke tau maʻu ʻa e ngaahi tāpuaki taʻengata ko ʻení. Fakaafeʻi e kau akó ke nau fakalaulauloto ki he fehuʻi ko ʻení pea tohi leva ʻenau ngaahi talí ʻi heʻenau pepa ki he kalasí pe tohinoa ako folofolá:
ʻE tokoni fēfē nai ʻa e tokāteline ʻi he veesi 69 ke tau ikunaʻi ʻa e loto-foʻí ʻi heʻetau feinga ki he hakeakiʻí ʻi he puleʻanga fakasilesitialé?
Hili ha taimi feʻunga, fakaafeʻi ha kau ako ʻe niʻihi ke vahevahe ʻenau ngaahi talí. Fakakaukau ke vahevahe hoʻo fakamoʻoni fekauʻaki mo e fatongia ʻa e Fakamoʻuí ʻi hono tokoniʻi ke tau hoko ʻo haohaoá.
ʻOku fakahā kia Siosefa Sāmita mo Sitenei Likitoni ha meʻa-hā-mai ʻo e puleʻanga fakatelesitialé
Fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 76:71. Kole ki he kalasí ke nau muimui ki ai, ʻo kumi ki he meʻa naʻe fakahā hono hoko kia Siosefa Sāmita mo Sitenei Likitoní. Kole ki he kau akó ke nau lipooti e meʻa ʻoku nau maʻú.
Fakatatau ki he veesi ko ʻení, ʻoku fakafehoanaki fēfē ʻa e nāunau ʻo e puleʻanga fakatelesitialé ki he nāunau ʻo e puleʻanga fakasilesitialé?
Fakamatalaʻi ange ʻoku ngāue ʻaki ʻe he folofolá ʻa e mālohi kehekehe ʻo e maama mei he māhiná mo e laʻaá ke fakatātaaʻi ʻa e faikehekehe ʻi he vahaʻa ʻo e ngaahi nāunau ʻo e puleʻanga fakatelesitialé mo e fakasilesitialé. Neongo ʻoku fakatou kau pē ʻa e kakai ʻo e nāunau fakasilesitialé mo e nāunau fakatelesitialé ʻi he toetuʻu ʻa e kau angatonú, ka ʻe toetuʻu ʻa kinautolu ʻoku maʻu ʻa e sino fakasilesitialé mo e nāunau mo e tāpuaki lahi ange ʻiate kinautolu ʻoku nau maʻu ʻa e ngaahi sino fakatelesitialé.
Kole ki he kau akó ke lau fakalongolongo ʻa e Tokāteline mo e Ngaahi Fuakava 76:72–80, ʻo kumi ki he founga ʻe kehe ai e kakai ʻo e puleʻanga fakatelesitialé mei he kakai ʻo e puleʻanga fakasilesitialé. Hili hono maʻu ʻe he kau akó ha taimi feʻunga ke lau aí, kole ange ke nau fakamatalaʻi ʻa e ngaahi faikehekehe naʻa nau maʻú.
Fakatatau ki he ngaahi veesi ko ʻení, ko e hā ha ngaahi fakamatala fakalūkufua ʻo kinautolu te nau maʻu ʻa e puleʻanga fakatelesitialé? (ʻE lava ke kau ʻi he ngaahi talí e ngaahi meʻa ko ʻení: ko kinautolu “naʻe mate taʻe ʻi ai ʻa e fonó” [veesi 72]; ko kinautolu “naʻe ʻikai te nau maʻu ʻa e fakamoʻoni ʻo Sīsuú ʻi he kakanó, ka naʻa nau toki tali ia ki mui” [veesi 73–74]; “kakai anga-fakaʻeiʻeiki ʻo e māmaní, ʻa ia naʻe fakakuihi ʻe he olopoto ʻa e tangatá” [veesi 75]; mo “kinautolu ʻoku ʻikai ke nau toʻa ʻi he fakamoʻoni ʻo Sīsuú” [veesi 79].)
Ke tokoni ke mahino lelei ange ki he kau akó ʻa e fakamoʻoni fakafolofola ki he niʻihi ʻoku mate taʻe ʻi ai e fonó pe ʻoku nau tali ʻa e ongoongoleleí hili ʻenau maté (vakai, veesi 72–74,), fakamatalaʻi ange naʻe foaki ʻe he ʻEikí ha ʻilo lahi ange ki he niʻihi fakafoʻituitui ko ʻení ʻi Heʻene fakahā kia Siosefa Sāmita ʻa e ikuʻanga fakaʻosi ʻo hono tokoua ko ʻAlaviní, ʻa ia naʻe mate kimuʻa pea lava ke ne papitaisó. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 137:7–9. Hili iá pea fai ange ʻa e ngaahi fehuʻi ko ʻení:
Ko e hā ha toe fakamahino naʻe fai ʻe he ʻEikí kau kiate kinautolu ne nau mei tali ʻa e ongoongoleleí kapau naʻe fakaʻatā ke nau moʻui?
Fakatatau ki he Tokāteline mo e Ngaahi Fuakava 137:9, ko hai te ne fakamaauʻi kitautolu ʻo fakatatau ki heʻetau ngaahi ngāué mo e ngaahi holi ʻa hotau lotó?
Lau leʻolahi ʻa e fakamatala ko ʻení: “Manatuʻi ko e ʻOtuá pē taha, ʻokú Ne tokaimaʻananga ki he loto fakatāutahá, mo Ne fai ʻa e fakamaau aofangatuku ʻo e kakaí fakafoʻituitui” (Tuʻu Maʻu ʻi he Tuí: Ko ha Huluhulu Ki he Ongoongoleleí [2004], 37). Fakamamafaʻi ange koeʻuhí ko e ʻEikí pē ʻe lava ke ʻafioʻi hotau lotó, ʻoku ʻikai totonu ke tau fakamaau ʻo kau ki he puleʻanga ʻe maʻu ʻe he niʻihi kehé.
ʻOkú ke pehē ʻoku ʻuhinga ki he hā ke “fakakuihi ʻe he olopoto ʻo e tangatá”? (T&F 76:75). (ʻOku kui ha kakai ʻe niʻihi ki he mahuʻinga ʻo e ongoongolelei ʻo Sīsū Kalaisí koeʻuhí ko e ngaahi ivi tākiekina fakamāmaní.) ʻOku fakakuihi fēfē ha kakai ʻe niʻihi he ʻahó ni ʻe he olopoto ʻa e tangatá?
Ke tokoni ke mahino ki he kau akó ʻa e kupuʻi lea “ʻikai ke nau toʻa ʻi he fakamoʻoni ʻo Sīsuú” (T&F 76:79), fakaafeʻi ha tokotaha ako ke lau leʻolahi ʻa e lea ko ʻeni ʻa ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá:
ʻĪmisi
ʻEletā Bruce R. McConkie
“ʻOku ʻuhinga ki he hā ke loto-toʻa ʻi he fakamoʻoni ʻo Sīsuú? …
“Ko e talangofua kakato ki he fono kotoa ʻo e ongoongoleleí ʻa e makatuliki maʻongoʻonga ʻo e loto-toʻa ʻi he ngāue ʻo e māʻoniʻoní. …
“ʻOku ʻuhinga e toʻa ʻi he fakamoʻoni ʻo Sīsuú ke tui kia Kalaisi mo ʻEne ongoongoleleí ʻaki ha loto fakapapau taʻeueʻia. …
“Ka ʻoku ʻikai ko ia pē. ʻOku lahi ange ia ʻi he tuí mo hono ʻiloʻí. Kuo pau ke tau hoko ko e kau fakahoko ʻo e folofolá kae ʻikai ko e kau fanongo pē. ʻOku lahi ange ia ʻi he lea pē; ʻoku ʻikai ko hono fakamatala ngutu pē ʻa e faka-ʻOtua ʻo e Fakamoʻuí. Ko e talangofua ia mo e uouangataha mo e angatonu fakatāutaha. …
“ʻOku ʻuhinga e loto-toʻa ʻi he fakamoʻoni ʻo Sīsuú ke … ‘kātaki ki he ngataʻangá.’ (2 Nī. 31:20.) Ko e moʻui ʻaki ia ʻetau tui fakalotú, ke fakahoko ʻa e meʻa ʻoku tau lea ʻakí, ke tauhi e ngaahi fekaú” (“Be Valiant in the Fight of Faith,” Ensign, Nov. 1974, 35).
Fakakaukau ki ha taha ʻokú ke ʻiloʻi ʻpea ʻokú ke pehē ʻoku toʻa ʻi he fakamoʻoni kia Sīsū Kalaisí. Ko e hā e ngaahi ʻulungaanga mo e ngaahi ngāue ʻoku fakahaaʻi ai ʻene toʻá?
Ko e hā kuó ne tokoniʻi koe ke ke toʻa ʻi hoʻo fakamoʻoni kia Sīsū Kalaisí?
Kapau ʻoku tau loto-toʻa ʻi he fakamoʻoni kia Sīsū Kalaisí, ko e hā te tau maʻú? (ʻI he tali ʻa e kau akó, ʻoku totonu ke nau ʻiloʻi ʻa e tefitoʻi moʻoni ko ʻení: Kapau ʻoku tau toʻa ʻi he fakamoʻoni kia Sīsū Kalaisí, te tau lava ʻo maʻu ʻa e puleʻanga fakasilesitiale ʻo e ʻOtuá. Tānaki atu ʻa e foʻi moʻoni ko ʻení ki he Fie Maʻu ke Hoko Ko ha Tokotaha Fakasilesitialé ʻi he palakipoé.)
Fakaafeʻi ʻa e kau akó ke nau tohi ʻi heʻenau pepa ki he kalasí pe tohinoa ako folofolá ha meʻa ʻe taha te nau lava ʻo fai ke loto-toʻa ange ai ʻi heʻenau fakamoʻoni kia Sīsū Kalaisí. Vahevahe hoʻo fakamoʻoní ʻoku nau takitaha malava ke maʻu ʻa e puleʻanga fakasilesitialé.
Naʻe fakamatalaʻi ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fatongia ʻo e talangofuá mo e Fakaleleí ʻi hono fakaʻatā ke tau moʻui taau mo e puleʻanga fakasilesitialé:
ʻĪmisi
ʻEletā Dallin H. Oaks
“Ko e Fakamaau Fakaʻosí ʻoku ʻikai ko hano fakafuofuaʻi pē ʻo hono fakakātoa ʻo ʻetau ngaahi ngāue leleí mo e ngāue koví—ʻo e meʻa kuo tau faí. Ko hano fakahaaʻi ia ʻo e ola aofangatuku ʻo ʻetau ngaahi ngāué mo ʻetau ngaahi fakakaukaú—mo ia kuo tau aʻusiá. ʻOku ʻikai feʻunga ki ha taha ke ne fakahoko pē e ngāué. Ko e ngaahi fekaú, ngaahi ouaú, mo e ngaahi fuakava ʻo e ongoongoleleí, ʻoku ʻikai ko ha lisi ia ʻo e ngaahi meʻa ʻoku fie maʻu ke fakahū ki ha ʻakauni fakalangi. …
“Ko e ongoongolelei ʻo Sīsū Kalaisí ko e palani ia ʻe lava ai ke tau aʻusia ʻa e meʻa ʻoku totonu ke aʻusia ʻe he fānau ʻa e ʻOtuá. ʻE hoko ʻa e tuʻunga taʻe-ha-mele mo haohaoa ko ʻení mei ha ngaahi fuakava, ngaahi ouau, mo e ngaahi ngāue ʻoku toutou fakahoko, pea mo e toutou fai ʻo ha ngaahi fili ʻoku totonu, pea mo e fakatomala hokohoko. …
“… ʻOku ou fakamoʻoni ʻi he loto houngaʻia ki he palani ʻo e Tamaí ʻa ia ʻoku fakafou ʻi he Toetuʻú mo e Fakalelei ʻa hotau Fakamoʻuí, ʻoku tau maʻu ai ʻa e fakapapau ʻo e moʻui taʻe-faʻamaté mo e faingamālie ke hoko ki he meʻa ʻoku fie maʻu ki he moʻui taʻengatá” (“The Challenge to Become,” Ensign, Nov. 2000, 32, 33, 34).
Naʻe fokotuʻu lelei ʻe ʻĪnoke mo hono kakaí, ʻa ia ʻe lava ke ui ko e siasi, fakatahaʻanga, pe feohiʻanga ʻo ʻĪnoké, ʻa Saione pea ʻohake kinautolu ki he langí. Ko e hoko ko ha mēmipa ʻo e siasi ʻo e ʻUluaki Fānaú, ʻoku fie maʻu ke tau taau mo e nofo ʻi he sosaieti ʻa ʻĪnoké, ʻa ia ʻoku malava pē ʻi he anga-māʻoniʻoni fakatāutahá, talangofua ki he ngaahi ouau ʻo e fale ʻo e ʻEikí, mo e Fakalelei ʻa Sīsū Kalaisí.
Naʻe fakamatalaʻi ʻe ʻEletā Pulusi R. Makongikī ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ke hoko ko ha mēmipa ʻo e siasi ʻo e ʻUluaki Fānaú:
ʻĪmisi
ʻEletā Bruce R. McConkie
“ʻOku hoko ʻa e Kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻoku līʻoa ki he māʻoniʻoní ʻo nau maʻu ai ʻa e ngaahi ouau māʻolunga ange ʻo e hakeakiʻí ko e kau mēmipa ʻo e Siasi ʻo e ʻUluaki Fānaú. Ko e papitaisó ʻa e matapā ki he Siasí ʻiate ia pē, ka ko e mali fakasilesitialé ʻa e matapā ki he kau ki he Siasi ʻo e ʻUluaki Fānaú, ko e siakale ʻo e kau māʻoniʻoni faivelenga ʻa ia ko e kau ʻea hoko ki he hakeakiʻí mo e kakato ʻo e puleʻanga ʻo e Tamaí” (Mormon Doctrine, 2nd ed. [1966], 139).
Naʻe fakamatalaʻi ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ʻuhinga ʻo e haohaoá ʻi he palani ʻa e ʻEikí:
ʻĪmisi
ʻEletā Russell M. Nelson
“ʻOku lahi hake ʻa e haohaoa ʻoku ʻamanaki mai ki ai ʻa e Fakamoʻuí maʻatautolú ʻi he ngāue pē taʻe ha fehalākí. Ko e ʻamanaki taʻengatá ia ʻo hangē ko hono fakamatalaʻi ʻe he ʻEikí ʻi heʻene lotu hufekina ki heʻene Tamaí—ke lava ke fakahaohaoaʻi kitautolu mo lava ʻo nofo fakataha mo Kinaua ʻi he taʻengatá he kahaʻú [vakai, Sione 17:23–24]. …
“… Ko e haohaoá ʻoku kau ki ai hono maʻu ʻo e moʻui taʻengatá—ʻa e faʻahinga moʻui ʻoku moʻui ai ʻa e ʻOtuá. …
“… ʻI heʻetau hoko ko e fānau fakatupu ʻo ha mātuʻa fakalangí, ʻoku fakakoloaʻi ai kitautolu ʻaki e malava ke hoko ʻo tatau mo kinauá, hangē pē ko e hoko ʻa e fānau fakamatelié ko ʻenau mātuʻa fakamatelié.
“Naʻe fakafoki mai ʻe he ʻEikí hono siasí ke tokoni ki heʻetau teuteu ki he haohaoá. …
“Ko e tangata haohaoá ko e tokotaha kakató ia … ko e laumālie nāunauʻiá! …
“ʻOku ʻikai fie maʻu ke tau lotosiʻi kapau ʻoku ngali faingataʻa mo ʻikai hano ngataʻanga he taimí ni ʻetau feinga fakamātoato ki he haohaoá. ʻOku fakatatali ʻa e haohaoá. ʻE lava ke toki hoko kakato mai ia hili pē ʻa e Toetuʻú pea ʻi he ʻEikí pē. ʻOku fakatatali ia kiate kinautolu kotoa pē ʻoku ʻofa kiate Ia mo tauhi ʻEne ngaahi fekaú. ʻOku kau ai ʻa e ngaahi taloni, puleʻanga, fonua, mālohi, mo e ngaahi pule [vakai, T&F 132:19]. Ko e fakaʻosinga ia kuo pau ke tau kātaki ki aí. Ko e haohaoa taʻengata ia kuo teuʻi ʻe he ʻOtuá maʻatautolu takitaha” (“Perfection Pending,” Ensign, Nov. 1995, 87, 88).
Naʻe akoʻi ʻe Palesiteni Siaosi ʻAlipate Sāmita ʻa e malava e tokotaha kotoa pē ke maʻu ʻa e puleʻanga fakasilesitialé:
ʻĪmisi
Palesiteni George Albert Smith
“Ko e taha ʻo e ngaahi meʻa fakaʻofoʻofa kiate au ʻi he Ongoongolelei ʻo Sīsū Kalaisí, ko ʻene ʻomi kitautolu kotoa pē ki ha tuʻunga ʻoku tataú. ʻOku ʻikai fie maʻu ke hoko ha tangata ko ha palesiteni fakasiteiki, pe mēmipa ʻo e Kōlomu ʻo e Toko Hongofulu Mā Uá, kae lava ke tau maʻu ha feituʻu māʻolunga ʻi he puleʻanga fakasilesitialé. ʻE maʻu ʻe he mēmipa anga fakatōkilalo taha ʻo e Siasí, ʻa e hākeakiʻí ʻo hangē pē ko ha toe tangata kehe ʻi he puleʻanga fakasilesitialé kapau te ne tauhi ʻa e ngaahi fekau ʻa e ʻOtuá. Ko e fakaʻofoʻofa ʻo e Ongoongolelei ʻo Sīsū Kalaisí ko ʻene ʻai ke tau tatau kotoa pē ʻi heʻetau tauhi e ngaahi fekau ʻa e ʻEikí. … ʻOku tau maʻu ʻa e ngaahi faingamālie tatau ki he hakeakiʻí” (ʻi he Conference Report, Oct. 1933, 25).
Naʻe fakamoʻoni ʻa Pīsope Siosefa L. Uefilini ʻo e Kau Pīsopelikí ʻo pehē: “Ko e kau kanititeiti kotoa pē kitautolu ki he nāunau fakasilesitialé” (ʻi he Conference Report, Apr. 1952, 118).
ʻI heʻetau hoko ko ha hako moʻoni ʻo e ʻOtua ko e Tamaí, ko e meʻa te tau malavá ke hoko ʻo hangē pē ko Iá. Ke maʻu ʻa e kakato ʻo e Tamaí ko hono tali kakato ia Hono nāunaú mo e ngaahi tāpuakí. Kapau te tau moʻui ʻaki ʻa e akonaki ʻa e Fakamoʻuí, tauhi ʻEne ngaahi fekaú, mo fakaʻaongaʻi ʻEne Fakaleleí ʻi heʻetau moʻuí, ʻe lava ʻe he Tamaí ke hiki hake kitautolu ke tau hangē pē ko Iá, moʻui hangē ko Iá, pea fiefia ʻi he fiefia taʻengata ʻokú Ne fiefia aí.
Naʻe fakamatalaʻi ʻe Palesiteni ʻEselā Tafu Penisoni hono ʻuhinga ke toʻa ʻi he fakamoʻoni ʻo Sīsuú ʻi he konifelenisi lahi ʻo e Siasí ʻi ʻEpeleli 1982. Vakai, “Valiant in the Testimony of Jesus,” Ensign, May 1982, 62–64.