Lēsoni 158: Ko Hono Fakavaveʻi e Ngāue ʻo e Fakamoʻuí
Lēsoni 158
Ko Hono Fakavaveʻi e Ngāue ʻo e Fakamoʻuí
Talateú
Talu mei he kamataʻanga ʻo hono Fakafoki Mai ʻo e ongoongoleleí, kuo tupulaki e ngāue ʻa e ʻEikí ʻi he funga māmaní. ʻOku tau moʻui ʻi ha taimi ʻoku fakavaveʻi ai ʻe he ʻEikí ʻa ʻEne ngāué. Kuo maʻu ʻe he toʻu tupu ʻo e Siasí ha ngaahi maʻuʻanga tokoni mo ha ngaahi faingamālie lahi ke tokoni ki hono fakavaveʻi e ngāue ʻa e ʻEikí.
Ngaahi Fokotuʻu ki hono Akoʻí
ʻOku fakavaveʻi ʻe he ʻEikí ʻa ʻEne ngāué
Fakaafeʻi ha tokotaha ako ke lue mei he tafaʻaki ʻe taha ʻo e lokí ki he tafaʻaki ʻe taha ʻi he angamahení. Pea kole leva ki he tokotaha akó ke toe kolosi ʻi he lokí pea ke fakavaveʻi ʻene lué. Lolotonga e kolosi tuʻo ua ʻa e tokotaha akó ʻi he lokí, fai e fehuʻi ko ʻení ki he kalasí:
Ko e hā hono ʻuhinga ke fakavaveʻi ha meʻa? (Ke fakavavevaveʻi ia.) Ko e hā ha ngaahi ʻuhinga naʻe mei fakavaveʻi, pe fakavavevaveʻi ai ʻe ha niʻihi ha ngāue?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 88:73. Kole ki he kalasí ke muimui ki ai, ʻo kumi e meʻa naʻe folofola ʻa e ʻEikí te Ne fakavaveʻí. Kole ki he kau akó ke lipooti e meʻa ʻoku nau maʻú.
ʻOkú ke pehē ko e hā ʻene ʻuhinga ke fakavaveʻi ʻe he ʻEikí ʻa ʻEne ngāué?
ʻI he ʻuhinga ki he Tokāteline mo e Ngaahi Fuakava 88:73, naʻe pehē ʻe ʻEletā Lāsolo M. Nalesoni, “Ko e taimi ʻeni ʻo hono fakavaveʻí” (“Thus Shall My Church Be Called,” Ensign, May 1990, 17). Hiki ʻa e tokāteline ko ʻení ʻi he palakipoé: ʻOku tau moʻui ʻi ha taimi ʻoku fakavaveʻi ai ʻe he ʻEikí ʻa ʻEne ngāué.
Ko e hā ha niʻihi ʻo e ngaahi founga kuó ke fakamoʻoniʻi ai hono fakavaveʻi ʻe he ʻEikí ʻa ʻEne ngāué?
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 133:10. Kole ki he kalasí ke muimui ki ai, ʻo kumi e meʻa ʻoku fokotuʻu mai ʻe he veesi ko ʻení ʻo kau ki he ʻuhinga ʻe fakavaveʻi ai ʻe he ʻEikí ʻa ʻEne ngāué.
Ko e hā ʻoku fokotuʻu mai ʻe he veesi ko ʻení ʻo kau ki he ʻuhinga ʻe fakavaveʻi ai ʻe he ʻEikí ʻa ʻEne ngāué? (Ke tokoniʻi e kakaí ke teuteu ki Heʻene Hāʻele ʻAngaua Maí.)
Fakaʻaliʻali ha fakatātā ʻo [Palesiteni] Sipenisā W. Kimipolo (Tohi Fakatātā ʻo e Ongoongoleleí [2009], fika 133; vakai foki, LDS.org). Fakamatalaʻi ange lolotonga e ngāue ʻa Palesiteni Sipenisā W. Kimipolo ko e Palesiteni ʻo e Siasí, naʻe fakavaveʻi ʻe he ʻEikí ʻa ʻEne ngāué. Hangē ko ʻení, naʻe fakalahi atu ʻa e ngāue fakafaifekaú, pea naʻe pulusi ʻe he Siasí ha ngaahi tatau foʻou ʻo e folofolá. ʻI heʻene poupouʻi e kāingalotu ʻo e Siasí ke vilitaki atu ki muʻá, naʻe pehē ʻe Palesiteni Kimipolo ne “kiʻi nofo fuoloa [ʻa e Siasí] ʻi he ngaahi tafaʻaki” (“Let Us Move Forward and Upward,” Ensign, May 1979, 82). Naʻá ne akonaki foki ʻo pehē, “Kuo pau ke tau fakalōlōa ʻetau laká pea kuo pau ke fai ia he taimí ni” (“Always a Convert Church: Some Lessons to Learn and Apply This Year,” Ensign, Sept. 1975, 3).
ʻĪmisi
Palesiteni Spencer W. Kimball
ʻOkú ke pehē ko e hā naʻe ʻuhinga ki ai ʻa Palesiteni Kimipolo ʻi heʻene pehē kuo pau ke tau “fakalōloa ʻetau laká”?
Ke tokoni ke mahino ki he kau akó ha niʻihi ʻo e ngaahi founga ʻoku fakavaveʻi ai ʻe he ʻEikí ʻEne ngāué he ʻaho ní mo ha niʻihi ʻo e ngaahi founga te nau lava ai ʻo kau ʻi Heʻene ngāué, fakahoko ʻa e ʻekitivitī ko ʻení:
Vahevahe e kalasí ki ha kulupu ʻe tolu, pea ʻoange ki he kau ako ʻi he kulupu takitaha ha tatau ʻo ha taha ʻo e ngaahi ngāue faiako ko ʻení. ʻOange ki he kau akó ha ngaahi miniti siʻi ke ako mo teuteu ai ke akoʻi ʻenau ngāue ne vahe angé ki honau kaungā-kalasí. Hili ha taimi feʻunga, fokotuʻutuʻu e kau akó ki ha ngaahi kulupu tautau toko tolu, ʻo toʻo ha tokotaha ako ʻe taha mei he ngaahi kulupu totonu takitaha. Fakaafeʻi e kau akó ke taufetongi ʻi hono akoʻi ʻenau kulupú fekauʻaki mo e founga ʻoku fakavaveʻi ai ʻe he ʻEikí ʻEne ngāué pea mo e founga te nau lava ai ʻo kau ʻi he ngāue ko iá.
Kaveinga Faiako Fika 1: Ko hono fakavaveʻi e ngāue fakafaifekaú
Naʻe fakahā ʻe Palesiteni Sipenisā W. Kimipolo ki he Kāingalotú naʻe mateuteu ʻa e ʻEikí ke fakaava ʻa e ngaahi matapā kiate kinautolu ke vahevahe ʻa e ongoongoleleí, kau ai ʻi he ngaahi puleʻanga naʻe ʻikai fakangofua ai ʻa e ngāue fakafaifekaú. Neongo ia, naʻá ne pehē foki naʻe fie maʻu ke teuteuʻi ʻe he Kāingalotú kinautolu ke maʻu ʻa e ngaahi faingamālie ko iá. Naʻe fakamoʻoni foki ʻa Palesiteni Kimipolo kapau naʻe teuteu ʻa e talavou kotoa pē ke ʻalu ʻo ngāue fakafaifekau taimi kakato, ʻe fakaava ʻe he ʻEikí e ngaahi matapaá pea ʻomi ha founga ke laka ki muʻa ʻa e ngāue fakafaifekaú ki he māmaní kotoa. Naʻá ne pehē:
ʻĪmisi
Palesiteni Spencer W. Kimball
“ʻOku ou ʻilo ʻoku ʻi ai hanau ngaahi ʻā vahevahe, ʻo hangē ko e ʻā ukameá mo e ʻā kofé. ʻOku ou ʻilo ʻa hono faingataʻá koeʻuhí kuo tau fai ha ngaahi feinga. … Ka ʻoku ʻikai te u lava ʻo vakai ki ha ʻuhinga lelei ʻe fakaava ai ʻe he ʻEikí ʻa e ngaahi matapā ʻoku ʻikai ke tau mateuteu ke hū aí. Ko e hā ʻoku totonu ke ne holoki hifo ai ʻa e ʻĀ Ukameá pe ko e ʻĀ Kofé pe ko ha toe ʻā kehe ʻo kapau ʻoku tau kei taʻemateuteu ke hū ai?” “When the World Will Be Converted,” Ensign, Oct. 1974, 5, 7).
Naʻe muimui e kāingalotu ʻo e Siasí ki he faleʻi ʻa Palesiteni Kimipoló pea teuteu ke vahevahe ʻa e ongoongoleleí. Lolotonga e pule ʻa Palesiteni Kimipoló naʻe hiki hake e tokolahi ʻo e kau faifekau taimi kakató ʻo laka hake ʻi he peseti ʻe 50. Naʻe kamata hono fakangofua ʻa e kau faifekaú ʻi he konga kimui ʻo e 1980 tupú mo e konga kimuʻa ʻo e 1900 tupú, ʻe he ngaahi puleʻanga ʻo Siamane Hahaké, ngaahi puleʻanga ʻi he Sovieti ʻIunioní, mo e ngaahi puleʻanga kehe ʻa ia naʻe taʻofi ai ʻa e ngāue fakafaifekaú ke vahevahe ʻa e ongoongoleleí ʻi he ngaahi fonuá ni. Naʻe fakahoko ʻa e kikite ʻa Palesiteni Kimipoló.
ʻI ʻOkatopa ʻo e 2008, naʻe toe fakaongo mai ʻe Palesiteni Tōmasi S. Monisoni ʻa e faleʻi ko ia naʻe fai ʻe Palesiteni Kimipoló:
ʻĪmisi
Palesiteni Thomas S. Monson
“ʻOku kei ʻi ai pē ha ngaahi feituʻu he māmaní ʻoku fakangatangata ai hotau mālohí pea he ʻikai ngofua ke tau vahevahe tauʻatāina ai ʻa e ongoongoleleí. Hangē ko e lea ʻa Palesiteni Sipenisā W. Kimipolo he taʻu ʻe 32 kuohilí, ʻoku ou tapou kiate kimoutolu ke mou lotua ke fakaava mai e ngaahi feituʻu ko ʻení, ke tau lava ʻo vahevahe atu kiate kinautolu ʻa e fiefia ʻo e ongoongoleleí. ʻI heʻetau lotu he taimi ko iá ko e tali ki he kole ʻa Palesiteni Kimpoló, ʻoku tau mātā ai ha ngaahi mana lahi ʻi he hokohoko fakaava mai e ngaahi fonua, ʻa ia ne tāpuni kimuʻa ki he Siasí. ʻE toe hoko ha meʻa pehē pē ʻi heʻetau lotu ʻi he tuí” ( “ʻOku Mau Talitali Lelei Kimoutolu ki he Konifelenisí,” Ensign pe Liahona, Nōv. 2008, 6).
Fakamahinoʻi ange ʻi he fakalotolahiʻi ko ia ʻe Palesiteni Kimipolo ʻa e kāingalotu ʻo e Siasí ke fakalōloa ʻenau laká, naʻá ne fakamahinoʻi mai ha fatongia ʻo e talavou kotoa pē ʻi he Siasí. Fakaafeʻi ha mēmipa hoʻo kulupú ke lau leʻolahi ʻa e lea ko ʻení:
ʻĪmisi
Palesiteni Spencer W. Kimball
“ʻOku toutou ʻeke e fehuʻi, ʻOku totonu nai ke ʻalu ʻa e talavou kotoa pē ʻo ngāue fakafaifekau? Pea kuo ʻomi ʻe he ʻEikí ʻa e talí. Ko e ‘ʻIo.’ ʻOku totonu ke ngāue fakafaifekau ʻa e talavou kotoa pē” (“When the World Will Be Converted,” 8).
Fakamanatu ki he kau mēmipa ʻo hoʻo kulupú kuo hokohoko atu ʻa e kau palōfitá ke fakalotolahiʻi ʻa e talavou moʻui taau, mo malava kotoa pē ke ngāue fakafaifekau taimi kakato. Kuo talitali lelei foki ʻe he kau palōfitá ʻa e kau finemuí ke ngāue fakafaifekau taimi kakato ʻo kapau ʻoku nau holi ke fai ia. Naʻe fanongonongo ʻe Palesiteni Tōmasi S. Monisoni ʻi ʻOkatopa 2012, ha liliu ʻi he taʻu ngāue fakafaifekaú, ʻo fakaʻatā ai ʻa e kau talavoú ke kamata ngāue ʻi he taʻu 18 pea mo e kau finemuí ʻi he taʻu 19.
Aleaʻi fakakulupu e ngaahi fehuʻi ko ʻení:
Fakatatau ki he kau palōfita ʻo e ngaahi ʻaho kimui ní, ko e hā ʻa e ʻamanaki ʻa e ʻEikí ki he kau talavoú ʻo fakafekauʻaki mo e ngāue fakafaifekau taimi kakató? (Neongo ʻe lava ke fakaʻaongaʻi ʻe he kau mēmipa ʻo e kulupú ha ngaahi lea kehe, ka ʻoku totonu ke fakahaaʻi ʻe heʻenau ngaahi talí ʻa e tefitoʻi moʻoni ko ʻení: ʻOku totonu ke teuteu ʻa e talavou kotoa pē ke ngāue fakafaifekau taimi kakato pea moʻui taau ke ngāue.)
Ko e hā ʻoku totonu ai ke teuteu ʻa e talavou kotoa pē ke ngāue fakafaifekau taimi kakató?
ʻE lava fēfē ʻe he teuteu he taimí ni ki he ngāue fakafaifekaú ʻo tokoniʻi koe ke tokoni ki he ngāue ʻa e ʻEikí?
ʻOkú ke pehē kuo tokoni fēfē ʻa e liliu ne ueʻi fakalaumālie ki he taʻu ngāue fakafaifekaú ki hono fakavaveʻi e ngāue ʻa e ʻEikí?
Kaveinga Faiako Fika 2: Ko e pulusinga foʻou ʻo e folofolá
Kole ki he kau mēmipa hoʻo kulupú ke fakakaukau ki he meʻa te nau fai kapau ʻe fehuʻi ange ʻe ha kaungāmeʻa ofi, “ʻOku ou fie ofi ange ki he ʻOtuá. Ko e hā ʻoku totonu keu faí?” Fehuʻi leva ʻa e ngaahi fehuʻi ko ení:
Ko e hā te ke talaange ki ho kaungāmeʻá?
Lau ʻa e lea ko ʻeni naʻe fai ʻe Palesiteni Sipenisā W. Kimipoló:
ʻĪmisi
Palesiteni Spencer W. Kimball
“ʻOku ou ʻilo ko e taimi ko ē ʻoku ou fakavaʻivaʻinga ai ʻi heʻeku ngaahi fetuʻutaki mo e ʻOtuá pea mo e taimi ʻoku hangē ai ʻoku ʻikai fanongo mai ʻa langi pea ʻikai fanafana mai ʻa e laumālié, ʻoku ou fuʻu mamaʻo ʻaupito mei he ʻOtuá. Kapau te u moʻui ʻaki e folofolá, ʻoku ou vāofi ange ai mo e ʻOtuá pea foki mai hoku tuʻunga fakalaumālié” (The Teachings of Spencer W. Kimball, ed. Edward L. Kimball [1982], 135).
Fakahā ki he kau mēmipa hoʻo kulupú ʻoku fakamatalaʻi ʻe he lea ʻa Palesiteni Kimipoló ʻa e fie maʻu lahi ke tau lava ʻo maʻu e ngaahi folofolá. Fakaafeʻi ha mēmipa ʻo hoʻo kulupú ke lau leʻolahi e Tokāteline mo e Ngaahi Fuakava 104:58–59. Kole ki he kulupú ke muimui ki ai pea feinga ke ʻiloʻi e ʻuhinga naʻe finangalo ai ʻa e ʻEikí ke pulusi ʻe he kau taki ʻo e Siasí ʻa e ngaahi fakahaá.
ʻE lava fēfē ʻe hono ako ʻa e folofolá ʻo tokoni ke fakalōloa ʻetau laká pea tokoni ki hono fakavaveʻi e ngāue ʻa e ʻEikí?
Fakamatalaʻi ange ʻi he konga kimuʻa ʻo e 1970 tupú, naʻe fakatokangaʻi ʻe he kau taki ʻo e Siasí ʻa e fie maʻu ke maheni ange e kāingalotu ʻo e Siasí mo e ngaahi folofolá pea ke ʻi ai ha Tohi Tapu ʻoku fakaʻaongaʻi ki he akó mo e faiakó. ʻI he 1979, hili ha ngaahi taʻu ʻo e ngaahi feinga fakalaumālie, faivelenga, naʻe paaki ʻe he Siasí ha tatau fakalao ʻi he lea faka-Pilitāniá ʻo e Tohi Tapu ʻa Kingi Sēmisí. Naʻe ʻi he Tohi Tapu ko ʻení ha ngaahi tokoni fakaako lahi naʻe ʻikai maʻu kimuʻa, kau ai ha ngaahi futinouti fakalahi mo e ngaahi potufolofola fekauʻaki mo e ngaahi tokoni kehe; ngaahi ʻuluʻi fakamatala ne fakaleleiʻi; ngaahi konga naʻe toʻo mei he Liliu ʻa Siosefa Sāmitá; ko e Topical Guide; mo e Bible Dictionary. ʻI he 1981, naʻe pulusi ai ʻe he Siasí ha pulusinga foʻou ʻo e folofola ʻe tolu kuo fakatahaʻí ʻi he lea faka-Pilitāniá naʻe kau ai ha ngaahi futinouti naʻe fakaleleiʻi, ngaahi ʻuluʻi fakamatala, ngaahi mape, mo ha fakahokohoko fakamotuʻalea. ʻI he 2009, naʻe pulusi ai ʻe he Siasí ʻa e pulusinga ʻo e Siasí ʻo e Tohi Tapu Leina-Valelá (Reina-Valera) ʻi he lea faka-Sipeiní.
Fakaafeʻi ha tokotaha ako ke lau ʻa e lea ko ʻeni ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe fai ʻi he taʻu ʻe taha hili hono tuku mai ʻo e folofola ʻe tolu ne fakatahaʻí ʻo e 1981 ʻi he lea faka-Pilitāniá. Kole ki he kau akó ke fakafanongo ki he founga naʻá ne kikiteʻi ai hono tāpuekina ʻe he ngaahi pulusinga foʻou ko ʻeni ʻo e folofolá ʻa e moʻuí mo hono teke ki muʻa e ngāue ʻa e ʻOtuá.
ʻĪmisi
Palesiteni Boyd K. Packer
“ʻI he fakalau atu ʻa e ngaahi taʻú, ʻe hanga ʻe he ngaahi folofola ko ʻení ʻo ʻomi ha toʻu tangata ʻo ha kau Kalisitiane lelei mo faivelenga te nau ʻilo ʻa e ʻEiki ko Sīsū Kalaisí mo nau feinga ke talangofua ki Hono finangaló.
“… Te nau fakatupulaki ha ʻilo ʻo e ongoongoleleí ʻo mahulu hake ʻi he meʻa ʻe lava ke maʻu heʻenau ngaahi kuí. Te nau maʻu ʻa e fakamoʻoni ko Sīsū ʻa e Kalaisí pea malava ke fakahaaʻi mo taukaveʻi Ia” (“Scriptures,” Ensign, Nov. 1982, 53).
Vahevahe hoʻo fakamoʻoní ʻoku fakamoʻoniʻi ʻe he folofolá ko Sīsū ʻa e Kalaisí. ʻE lava ke tokoni hono ako e folofolá ke tau maʻu ha fakamoʻoni kia Sīsū Kalaisi pea tokoni ke fakafonu ʻetau moʻuí ʻaki ʻa e Laumālie Māʻoniʻoní.
Fakamatalaʻi ange kuo fai ha ngaahi ngāue lahi pea kei hokohoko atu pē ke foaki ki he kāingalotu ʻo e Siasí ʻa e ngaahi folofolá mo e ngaahi tokoni fakaakó ʻi honau ngaahi lea fakafonuá.
Aleaʻi fakakulupu e ngaahi fehuʻi ko ʻení:
Ko e hā ʻoku mahuʻinga ai ʻa e ako fakaʻaho ʻo e folofolá?
Kuo tokoni fēfē hoʻo ako folofola fakatāutahá ke ke tokoni ʻi he ngāue ʻa e ʻEikí?
Kaveinga Faiako Fika 3: Ko hono fakavaveʻi ʻo e ngāue fakatemipalé mo e hisitōlia fakafāmilí
Kole ki hoʻo kulupú ke mateʻi mai e lahi ʻo e ngaahi temipale naʻe langa ʻi he taʻu ʻe 143 ʻi he vahaʻa ʻo hono fokotuʻu ʻo e Siasí ʻi he 1830 mo e uiuiʻi ʻo Palesiteni Sipenisā W. Kimipolo ʻi he 1973 (ngaahi temipale ʻe 17). Pea kole leva ki he kulupú ke mateʻi mai pe ko e temipale ʻe fiha naʻe fanongonongo pe langa ʻi he taʻu ʻe 40 ʻi he vahaʻa ʻo e 1973 mo e 2013 (ngaahi temipale ʻe 153).
Fakamatalaʻi ange naʻe tupulaki lahi taha hono langa ʻo e temipalé ʻi he malumalu ʻo e fakahinohino ʻa Palesiteni Kōtoni B. Hingikelií. Fakaafeʻi ha taha ʻi hoʻo kulupú ke lau ʻa e lea ko ʻeni naʻe fai ʻe Palesiteni Hingikelií:
ʻĪmisi
Palesiteni Gordon B. Hinckley
“ʻOku ou maʻu ha holi mālohi ke tuʻu ha temipale ʻi ha feituʻu ʻe faingofua ke ʻalu ki ai ʻa e Kāingalotú ʻi he funga māmaní. … ʻOku laka ki muʻa ʻa e ngāué ʻo hangē ko e vave ʻo ʻetau laká. ʻOku ou lotua maʻu pē ke ʻi ai ha founga ʻe lava ʻo fakavaveʻi ai koeʻuhí ke lahi ange hotau kakai te nau ʻalu faingofua ange ki ha fale toputapu ʻo e ʻEikí” (“Of Missions, Temples, and Stewardship,” Ensign, Nov. 1995, 52, 53).
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 128:15, 17. Kole ki he kulupú ke muimui ki ai, ʻo kumi e fatongia ʻoku tau maʻu ki hotau ngaahi kuí. Hili iá pea lau leʻolahi ʻa e fakamatala fakatokāteline ko ʻeni naʻe fai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tau maʻu ʻa e fatongia fakafuakava ke fekumi ki heʻetau ngaahi kuí pea fakahoko e ngaahi ouau fakahaofi ʻo e ongoongoleleí maʻanautolu” ( “ʻE Liliu ʻa e Loto ʻo e Fānaú,” Ensign pe Liahona, Nōv. 2011, 25).
Fakamahinoʻi ange ko e langa ʻo e ngaahi temipalé mo e ngaahi fakalakalaka ʻi he ngāue hisitōlia fakafāmilí ko ha fakamoʻoni ia ʻoku fakavaveʻi ʻe he ʻOtuá ʻa ʻEne ngāué ʻi he tafaʻaki ʻe taha ʻo e veilí. Fakaafeʻi ha tokotaha ako ke lau e lea ko ʻeni naʻe fai ʻe ʻEletā Petinaá. Kole ki he kulupú ke fakafanongo ki he founga te nau lava ke tokoni ai ki he ngāue ʻa e ʻEikí.
ʻĪmisi
ʻEletā David A. Bednar
“ʻOku ʻikai tupukoso pē hono ʻomi ʻo e FamilySearch mo e ngaahi meʻangāue kehe ʻi ha kuonga ʻoku maheni ai e toʻu tupú mo e ngaahi tekinolosia kehekehe ʻo e fakamatalá mo e fetuʻutakí. Kuo mou ako ke ʻave (text) e ngaahi pōpoaki ʻi hoʻomou telefoni toʻotoʻó mo tweet ke toe vave mo fakalakalaka ange e ngāue ʻa e ʻEikí—kae ʻikai ke fetuʻutaki vave ange mo homou ngaahi kaungāmeʻá. ʻOku hā mahino e ngaahi pōtoʻi ngāue mo e mohu founga ʻa ha toʻu tupu tokolahi he ʻahó ni ko ha teuteu ia ke tokoni ki he ngāue faifakamoʻuí” ( “ʻE Liliu ʻa e Loto ʻo e Fānaú,” Ensign pe Liahona, Nōv. 2011, 26).
Aleaʻi ʻa e fehuʻi ko ʻení mo hoʻo kulupú:
Ko e hā ha ngaahi aʻusia lelei kuó ke maʻu ʻi hono fai e ngāue hisitōlia fakafāmilí pe ʻalu ki he temipalé ke kau ʻi he ngaahi ouau maʻá e kakai pekiá?
Ko hotau fatongia ʻi hono paotoloaki ʻo e ngāué
Hili hono fakakakato ʻe he kau akó ʻenau faiako ʻi he fanga kiʻi kulupu iiki, fakaafeʻi ha niʻihi ʻo e kau akó ke vahevahe ʻenau fakakaukaú mo e ngaahi ongo fekauʻaki mo fakavaveʻi ʻo e ngāue ʻa e ʻEikí.
Fakaafeʻi ha tokotaha ako ke lau ʻa e lea ko ʻeni naʻe fai ʻe ʻEletā Tēvita B. Haiti ʻo e Kōlomu ʻo e Kau ʻAposetolo ʻe Toko Hongofulu Mā Uá. Kole ki he kalasí ke fakafanongo ki he meʻa ʻe lava ke hoko ʻi heʻetau kau ʻi he ngāue ʻa e ʻEikí.
ʻĪmisi
ʻEletā David B. Haight
“Ngaahi tokoua mo e tuofāfine, ʻoku fakaava ʻe he ʻEikí ʻa e halá ke lava ʻo mafola ʻEne ngāué ki he funga ʻo e māmaní, pea ko ha tāpuaki ia kiate kitautolu hono kotoa—ʻi heʻetau ngaahi founga takitaha—ke kau ki ai. …
“Ko hai kuó ne lava ʻo kikiteʻi, tukukehe ʻa e kau palōfita ʻa e ʻOtuá, ʻa e mana ʻo e mafola vave ʻo e ngāue ʻa e ʻEikí? Ko e moʻoni, ʻo hangē ko ia naʻe tomuʻa fakahā ʻe he ʻEikí ʻi he vahe 88 ʻo e Tokāteline mo e Ngaahi Fuakavá, ʻokú Ne fakavaveʻi ʻa ʻEne ngāué ʻi hono taimí (vakai, T&F 88:73)” (“Missionary Work—Our Responsibility,” Ensign, Nov. 1993, 61, 62).
Fakatatau kia ʻEletā Haiti, ko e hā ʻe lava ke hoko ʻi heʻetau kau ʻi he ngāue ʻa e ʻEikí? (ʻI he tali ʻa e kau akó, hiki e moʻoni ko ʻení ʻi he palakipoé: ʻE lava ke faitāpuekina kitautolu ʻi he kau ʻi hono fakavaveʻi e ngāue ʻa e ʻEikí.)
Ko e hā ha ngaahi tāpuaki kuó ke aʻusia ʻi hoʻo kau ʻi hono fakavaveʻi e ngāue ʻa e ʻEikí?
Fakaafeʻi e kau akó ke fakakaukau ki he ngaahi faingamālie ʻoku nau maʻu ke tokoni ai ki hono fakavaveʻi e ngāue ʻa e ʻEikí. Kole ange ke nau tali ʻa e fehuʻi ko ʻení ʻi heʻenau pepa ki he kalasí pe tohinoa ako folofolá:
Ko e hā ha ngaahi founga te ke lava ai ʻo tokoni ki hono fakavaveʻi e ngāue ʻa e ʻEikí?
Hili ha taimi feʻunga, fakaafeʻi e kau akó ke fokotuʻu ha taumuʻa ke muimuiʻi e meʻa kuo nau hikí. Fakaʻosi ʻaki hono fakamoʻoni ki hono fakavaveʻi e ngāue ʻa e ʻEikí pea mo hotau ngaahi fatongia mo e ngaahi faingamālie ke kau ai ʻi Heʻene ngāué.
Ngaahi Fakamatala Fakamahino mo e Puipuituʻá
“Kuo pau ke tau fakalahi ʻetau laká”
Naʻe akonaki ʻa Palesiteni Sipenisā W. Kimipolo ʻo pehē:
ʻĪmisi
Palesiteni Spencer W. Kimball
“ʻOku tau maʻu nai mo ha meʻa ʻoku fie maʻu ke tau vahevahe? ʻIo! ʻOku tau maʻu ʻa e ongoongolelei ʻo Sīsū Kalaisí, ʻa e ongoongolelei ʻo e melinó, ʻa e ongoongolelei ʻo e fiefiá. ʻOku tau maʻu ʻa e ngaahi moʻoni ʻe lava ke ngaohi ke toe lelei ange ai ha taha mo ongoʻi lavameʻa ange, fiefia mo fakaʻofoʻofa ange ai ha nofo-mali, pea toe fakalangi ange ha ʻapi. ʻOku tau maʻu e mālohi ʻo e lakanga fakataulaʻeiki ʻo e ʻOtuá ke faitāpuekina hotau ʻapí mo e moʻuí pea mo e moʻui ʻa e niʻihi kehé. ʻIo, kuo pau ke tau fakahoko loto vēkeveke ange ʻa e ngaahi meʻa ko ia kuo tau maʻú, ʻi hotau ʻapí, ʻetau kōlomú, ngaahi kalasí, mo hotau ngaahi fatongia ʻi he Siasí. Pea ki hotau kaungāʻapi mo e kaungāmeʻa ʻoku ʻikai kau ki he siasí ʻa ia kuo kole mai ke tau ʻfoaki ʻo hangē ko ia ʻoku tau maʻú’ foki. Kuo fekauʻi kitautolu ʻe he ʻEikí ke tau fai pehē. Kuo pau ke tau fakalahi ʻetau laká pea kuo pau ke tau fai ia he taimí ni” (“Always a Convert Church: Some Lessons to Learn and Apply This Year,” Ensign, Sept. 1975, 3).
Ko e Ngaahi Kōlomu ʻo e Kau Fitungofulú
Ko e fakalahi ko ia ʻo e ngaahi Kōlomu ʻo e Kau Fitungofulú ʻa e fakamoʻoni ʻoku fakavaveʻi ʻe he ʻEikí ʻa ʻEne ngāué.
Naʻe fokotuʻu ʻe Palesiteni Sipenisā W. Kimipolo ʻi he 1976, ʻa e Kōlomu ʻUluaki ʻo e Kau Fitungofulú, pea kuo kuo tānaki atu e ngaahi kōlomu lahi ange ʻo e Kau Fitungofulú ʻi he tupulaki e Siasí. ʻE lava ke hokohoko atu hono fakalahi ʻo e ngaahi kōlomú ʻo ka fie maʻu.
“[ʻI he aʻu ki he 2014] ʻoku ʻi ai … ha ngaahi Kōlomu ʻe valu ʻo e Kau Fitungofulú. ʻE lava ke aʻu ki he kau mēmipa ʻe 70 ʻi he kōlomu takitaha. ʻOku faʻa ui ʻa e kau mēmipa ʻo e ngaahi Kōlomu ʻo e Kau Fitungofulú ko e ‘Kau Fitungofulu.’ ʻOku ui ʻa e Kau Fitungofulú ke malanga ʻaki ʻa e ongoongoleleí mo langa hake ʻa e Siasí. ʻOku nau ngāue ʻi he malumalu ʻo e fakahinohino ʻa e Kōlomu ʻo e Kau ʻAposetolo ʻe Toko Hongofulu Mā Uá mo e Kau Palesitenisī ʻo e Kau Fitungofulú. …
“… ʻOku lau ʻa e kau mēmipa ʻo e Kōlomu ʻUluaki mo e Ua ʻo e Kau Fitungofulú ko e Kau Taki Māʻolunga, ko hono ʻuhingá ʻoku nau maʻu ʻa e mafai ke ngāue ʻi ha feituʻu pē ʻi he māmaní. ʻOku ui ʻa e kau mēmipa ʻo e ngaahi kōlomu ʻoku toé ko e Kau Fitungofulu Fakaʻēlia, pea ʻoku fakangatangata pē honau mafaí ki he feituʻu ʻoku nau ngāue aí” (“Quorums of the Seventy,” LDS.org).