គោលលទ្ធិ និង សេចក្ដីសញ្ញា ៤៥:៦០-៧៥

បុព្វកថា

នៅពេលពួកបរិសុទ្ធបានប្រមូលគ្នីគ្នានៅក្នុងក្រុងខឺតឡង់ នោះមានដំណើររឿង និងពាក្យចចាមរាមតាមកាសែតក្លែងបន្លំជាច្រើន ដែលរាយការណ៍ខុស និង និយាយបង្កាច់បង្ខូចសាសនាចក្រ ។ នៅក្នុងវិវរណៈបានកត់ត្រានៅក្នុង គោលលទ្ធិ និង សេចក្ដីសញ្ញា ៤៥ ព្រះអម្ចាស់ បានចាប់ផ្ដើមបើកសម្ដែងលម្អិតអំពីទីកន្លែងប្រមូលផ្ដុំដែលបានកំណត់ទុក ជាកន្លែងដែលមានសេចក្ដីសុខសាន្ដ និងសុវត្ថិភាព នៅក្នុងថ្ងៃចុងក្រោយ ដែលត្រូវបានសន្យានៅក្នុងព្រះគម្ពីរមរមន និងបានរៀបរាប់ប្រាប់ពីដំបូងនៅក្នុងវិវរណៈឆ្នាំ ១៨៣០ ( សូមមើលគ. និង ស. ២៨ ) ។ ព្រះអម្ចាស់ បានពិពណ៌នាលម្អិតអំពីដែនដីនៃការប្រមូលផ្ដុំគ្នានេះ ដែលត្រូវបានស្គាល់ថាជា ទីក្រុងយេរូសាឡិមថ្មី ឬ ស៊ីយ៉ូន ។ ព្រះអម្ចាស់ក៏បានណែនាំព្យាការី យ៉ូសែប ស៊្មីធ ឲ្យចាប់ផ្ដើមផ្ដោតយកចិត្តទុកដាក់ទៅលើកិច្ចខិតខំធ្វើការបកប្រែព្រះគម្ពីរសញ្ញាថ្មីរបស់លោក ដើម្បីត្រៀមខ្លួនពួកបរិសុទ្ធចំពោះអ្វីដែលនឹងកើតឡើង ។

យោបល់សម្រាប់ការបង្រៀន

គោលលទ្ធិ និង សេចក្ដីសញ្ញា ៤៥:៦០-៦១

ព្រះអម្ចាស់ណែនាំព្យាការី យ៉ូសែប ស៊្មីធ ឲ្យចាប់ផ្ដើមការបកប្រែព្រះគម្ពីសញ្ញាថ្មីរបស់លោក

សូមសួរដល់សិស្ស បើសិនជាពួកគេណាម្នាក់អាចសូត្រមាត្រានៃសេចក្ដីជំនឿទីប្រាំបីបាន ។ បើពួកគេត្រូវការជំនួយ សូមឲ្យសិស្សម្នាក់ឲ្យបើកទៅមាត្រានៃសេចក្ដីជំនឿ ហើយអានខទីប្រាំបីឲ្យឮៗ ។

តើឃ្លា « បើសិនជាបានបកប្រែត្រឹមត្រូវ » បានផ្តល់ជាយោបល់អ្វីខ្លះដល់យើង អំពីព្រះគម្ពីរប៊ីប ?

សូមរំឭកដល់សិស្សថា យ៉ូសែប ចូលចិត្តការសិក្សាព្រះគម្ពីរប៊ីប ហើយបានរកឃើញនូវការលួងលោមចិត្តដ៏អស្ចារ្យពីព្រះបន្ទូលទាំងឡាយនៅក្នុង ព្រះគម្ពីរនោះ ។ ទោះជាយ៉ាងណាក៏ដោយ នៅពេលលោកបានសិក្សាវា លោកបានកត់សម្គាល់ឃើញមាននូវកំហុសជាច្រើន ហើយលោកមានអារម្មណ៍ថា ព័ត៌មានមួយចំនួនត្រូវបានបាត់ ឬមានពុំពេញលេញ ។ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ដូចខាងក្រោម ដោយព្យាការី យ៉ូសែប ស៊្មីធ ស្ដីអំពីព្រះគម្ពីរប៊ីបឲ្យឮៗ ។ សូមឲ្យសិស្សក្នុងថ្នាក់ស្ដាប់នូវអ្វីដែលបានបណ្ដាលឲ្យមានបញ្ហាជាច្រើន ដែលយ៉ូសែប បានកត់សម្គាល់នោះ ៖

រូបភាព
ព្យាការី យ៉ូសែប ស្ម៊ីធ

« វាបង្ហាញឲ្យឃើញថា មានចំណុចសំខាន់ៗជាច្រើន ដែលមានឥទ្ធិពលដល់សេចក្ដីសង្រ្គោះរបស់មនុស្ស ត្រូវបានដកចេញពីព្រះគម្ពីរបរិសុទ្ធ ឬ ត្រូវបានបាត់ មុនពេលវាត្រូវបានគេចងក្រង » ( ការបង្រៀនរបស់ប្រធាននៃសាសនាចក្រ ៖ យ៉ូសែប ស៊្មីធឆ្នាំ ២០០៧ ]ទំព័រ ២១៧

រូបភាព
ព្យាការី យ៉ូសែប ស្ម៊ីធ

លោកក៏បានមានប្រសាសន៍ផងដែរថា ៖ « ខ្ញុំជឿលើព្រះគម្ពីរប៊ីប បើសិនជាវាត្រូវបានសរសេរដោយដងប៉ាកានៃអ្នកនិពន្ធដើម ។ អ្នកបកប្រែដែលគ្មានវិជ្ជាជីវៈ អ្នកចម្លងខ្ជីខ្ជា ឬ ពួកសង្ឃដែលក្លែងបន្លំ និង ពុករលួយ បានបង្កើតឲ្យមានកំហុសជាច្រើន » ( Teachings: Joseph Smith,ទំព័រ ២០៧) ។

ស្របតាម យ៉ូសែប ស៊្មីធ តើមូលហេតុ យ៉ាងហោចណាស់ចំនួនបី ដែលបណ្ដាលឲ្យព្រះគម្ពីរបរិសុទ្ធ មានកំហុសឆ្គង គឺអ្វីខ្លះ ?

សូមរំឭកសិស្សថា នៅក្នុងមេរៀនគោលលទ្ធិ និង សេចក្ដីសញ្ញា ៤៥:១៦-៥៩ ពួកគេបានសិក្សានូវអ្វីដែលព្រះយេស៊ូវគ្រីស្ទ បានប្រាប់ដល់ពួកសិស្សរបស់ទ្រង់ អំពីការយាងមកជាលើកទីពីររបស់ទ្រង់ ។ វិវរណៈ បានរៀបរាប់នូវអ្វីៗជាច្រើន ដែលត្រូវបានកត់ត្រានៅក្នុងម៉ាថាយ ២៤ ។ នៅពេលវិវរណៈនេះត្រូវបានសរសេរឡើងវិញនៅក្នុងឆ្នាំ ១៨៣១ នោះយ៉ូសែបស៊្មីធ កំពុងធ្វើការកែកំណែរថ្មីដ៏បំផុសគំនិត ទៅលើព្រះគម្ពីរសញ្ញាចាស់ ។ សូមអញ្ជើញសិស្សឲ្យអានគោលលទ្ធិ និង សេចក្ដីសញ្ញា ៤៥:៦០-៦១ឲ្យឮៗ ។ សូមសិស្សក្នុងថ្នាក់ផ្ទៀងតាម រកមើលនូវអ្វីដែលព្រះអម្ចាស់ចង់ឲ្យព្យាការីមានចំណាប់អារម្មណ៍ទៅលើនោះ ។

តើព្រះអម្ចាស់បានមានបន្ទូលថា ការបកប្រែនៃព្រះគម្ពីរសញ្ញាថ្មី នឹងប្រទានពរដល់ពួកបរិសុទ្ធយ៉ាងដូចម្ដេច ? ( វានឹងបើកសម្ដែងច្រើនអំពីព្រះឆន្ទៈរបស់ព្រះ ដើម្បីរៀបចំពួកបរិសុទ្ធ ) ។

សូមឲ្យសិស្សម្នាក់សង្ខេបនូវព័ត៌មានដូចខាងក្រោមដល់សិស្សក្នុងថ្នាក់ ។ ( ដើម្បីទុកពេលឲ្យសិស្សបានរៀបចំខ្លួន សូមផ្ដល់ព័ត៌មានដល់គាត់ មុនចាប់ផ្ដើមថ្នាក់រៀន ) ។ អ្នកអាចនឹងចង់បំពេញព័ត៌មានលម្អិត ដែលសិស្សពុំបានផ្តល់ព័ត៌មាន ។

នៅក្នុងរដូវស្លឹកឈើជ្រុះ ឆ្នាំ ១៨៣០ យ៉ូសែប ស៊្មីធ ត្រូវបានបញ្ជាដោយព្រះអម្ចាស់បកប្រែព្រះគម្ពីរប៊ីប ។ លោកពុំបានបកប្រែព្រះគម្ពីរប៊ីបចេញពីភាសាមួយទៅភាសាមួយទៀតនោះទេ ហើយលោកក៏ពុំមានឯកសារសរសេរដោយដៃនៃព្រះគម្ពីរប៊ីបដើម មកធ្វើការបកប្រែដែរ ។ ផ្ទុយទៅវិញ លោកបានអាន ហើយសិក្សាវគ្គបទគម្ពីរចេញមកពីកំណែថ្មីនៃព្រះគម្ពីរប៊ីបដោយស្តេចជេមស៍ ហើយបានធ្វើកំណែ និងបន្ថែម ទៅតាមការបំផុសគំនិតពីព្រះវិញ្ញាណបរិសុទ្ធ ។ ដូច្នេះ ការបកប្រែកំណែថ្មីនោះគឺកាន់តែមានការបំផុសគំនិតខ្លាំងជាងការបកប្រែតាមទម្លាប់ ។

ការបកប្រែរបស់យ៉ូសែប ស៊្មីធ ត្រូវបានប៉ាន់ស្មានថា បានរងឥទ្ធិពលយ៉ាងហោចណាស់ចំនួន ៣៤០០ ខគម្ពីរ នៅក្នុងកំណែថ្មីនៃព្រះគម្ពីរប៊ីបរបស់ស្តេចជេមស៍ ។ ភាពខុសគ្នាទាំងនេះ មានរួមទាំង ការបន្ថែម ( ដើម្បីបញ្ជាក់ពីអត្ថន័យ ឬបរិបទឲ្យច្បាស់ ) ការលុបចោល ការរៀបចំខគម្ពីរឡើងវិញ និងការរៀបចំរចនាសម្ព័ន្ធនៃជំពូកជាក់លាក់ឲ្យបានពេញលេញ ។ ការបកប្រែរបស់ យ៉ូសែប ស៊្មីធ បានបញ្ជាក់យ៉ាងច្បាស់អំពីមាតិកាខាងគោលលទ្ធិ ជាពិសេស បេសកកម្មរបស់ព្រះយេស៊ូវគ្រីស្ទ និស្ស័យនៃព្រះ លក្ខណៈធម្មជាតិរបស់មនុស្ស សេចក្ដីសញ្ញារបស់អ័ប្រាហាំ បព្វជិតភាព និងការស្ដារឡើងវិញនៃដំណឹងល្អ ។

ពួកបរិសុទ្ធថ្ងៃចុងក្រោយ បានកែសម្រួលកំណែថ្មីនៃព្រះគម្ពីរប៊ីបរបស់ស្តេចជេមស៍ ដែលបានបោះពុម្ពបន្ទាប់ពីឆ្នាំ ១៩៧៩ រួមមានទាំងការផ្លាស់ប្ដូរច្រើនជាង ៦០០ កន្លែងមកពីការបកប្រែរបស់ យ៉ូសែប ស៊្មីធ ។ ការផ្លាស់ប្ដូរខ្លីៗ ត្រូវបានកត់ចំណាំនៅលេខយោង និងការជ្រើសរើសកាន់តែធំ គឺត្រូវបានរកឃើញនៅក្នុងសេចក្ដីបន្ថែមនៃព្រះគម្ពីរប៊ីប ។

សូមអញ្ជើញសិស្សឲ្យរកមើលយ៉ូសែប ស្ម៊ីធ--ម៉ាថាយនៅក្នុងព្រះគម្ពីរមុក្ដារដ៏មានតម្លៃមហិមា ។ សូមពន្យល់ថា ចំណែកនៃការបកប្រែរបស់ យ៉ូសែប ស្ម៊ីធ មាននូវព័ត៌មានច្រើនចេញមកពីម៉ាថាយ ២៤អំពីការយាងមកជាលើកទីពីររបស់ព្រះអម្ចាស់ ហើយត្រូវបានបំពេញតាមគោលលទ្ធិ និង សេចក្ដីសញ្ញា ៤៥:៦០-៦១ ។

អ្នកអាចចង់សុំឲ្យសិស្សម្នាក់ដើម្បីថាឡើងវិញឲ្យឮៗនូវអ្វីដែលគាត់យល់អំពីការបកប្រែរបស់យ៉ូសែប ស៊្មីធ ។ បើសិស្សរបស់អ្នកមានកំណែថ្មីនៃព្រះគម្ពីរប៊ីបរបស់ស្តេចជេមស៍ របស់ពួកបរិសុទ្ធថ្ងៃចុងក្រោយ នោះអ្នកអាចបង្ហាញដល់ពួកគេនូវគំរូនៃលេខយោងការបកប្រែរបស់យ៉ូសែប ស្ម៊ីធ នៅក្នុងព្រះគម្ពីរសញ្ញាថ្មី ឬជម្រើសដ៏ធំនៅក្នុងសេចក្ដីបន្ថែមនៃព្រះគម្ពីរប៊ីប ។ ឧទាហរណ៍ ម៉ាថាយ ៤:១ លេខយោងខ ថ្លែងថា ព្រះយេស៊ូវបានយាង « ទៅគង់នៅជាមួយនឹងព្រះ » ជាជាង « ឲ្យត្រូវអារក្សល្បួង » ។ បន្ទាប់ពីបានបង្ហាញដល់សិស្សនូវឧទាហរណ៍មួយចំនួនរួចហើយ សូមសួរដល់ពួកគេអំពីរបៀបដែលការបកប្រែរបស់ យ៉ូសែប ស៊្មីធ អាចបានជួយដល់ការសិក្សា និងការយល់ដឹងរបស់ពួកគេ អំពីព្រះគម្ពីរប៊ីប ។

គោលលទ្ធិ និង សេចក្ដីសញ្ញា ៤៥:៦២-៦៥

ពួកបរិសុទ្ធត្រូវបានព្រមានទុកជាមុន ឲ្យទៅជួបជុំគ្នានៅភូមិភាគខាងលិចនៃប្រទេស

សូមពន្យល់ថា ព្រះអម្ចាស់បានណែនាំឲ្យពួកបរិសុទ្ធផ្លាស់ទៅភូមិភាគខាងលិច« ពីដែនដីខាងកើត » ( គ. និង ស. ៤៥:៦៤ ) ។ ដើម្បីជួយសិស្សមើលឃើញនឹងភ្នែកអំពីការផ្លាស់លំនៅឆ្ពោះទៅកាន់ទិសខាងលិច របស់ពួកសមាជិកនៃសាសនាចក្រនៅគ្រាដែលវិវរណៈនេះ ត្រូវបានផ្ដល់ឲ្យ (ចេញពីរដ្ឋ នូវ យ៉ោក ទៅរដ្ឋ អូហៃអូ ) អ្នកអាចនឹងសុំឲ្យពួកគេបើកទៅទំព័រ ផែនទី ៣ (« រដ្ឋនូវយ៉ោក ផែនស៊ិលវេញ៉ា និងតំបន់អូហៃអូនៃសហរដ្ឋអាមេរិក ») នៅក្នុងផ្នែកនៃផែនទីប្រវត្តិសាស្ត្រសាសនាចក្រក្នុងព្រះគម្ពីររបស់ពួកគេ ។ សូមអញ្ជើញសិស្សឲ្យអានគោលលទ្ធិ និង សេចក្ដីសញ្ញា ៤៥:៦២-៦៤ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយប្រាប់ពីមូលហេតុដែលព្រះអម្ចាស់បានបញ្ជាឲ្យពួកបរិសុទ្ធប្រមូលគ្នីគ្នាឆ្ពោះទៅ « ភាគខាងលិចនៃប្រទេស » (គ. និង ស. ៤៥:៦៤) ។

តើព្រះអម្ចាស់មានព្រះបន្ទូលអំពីអ្វី « នៅមាត់ទ្វារ » ? តើអ្នកគិតថា រូបភាពនេះមានន័យដូចម្ដេចដែរ ?

សូមពន្យល់ថា នៅក្នុងឆ្នាំ ១៨៦១ ជិតរយៈពេល ១៧ ឆ្នាំ បន្ទាប់ពីការស្លាប់របស់ យ៉ូសែប ស៊្មីធ នោះសង្គ្រាមស៊ីវិលមួយបានចាប់ផ្ដើមកើតមានឡើងនៅក្នុងសហរដ្ឋអាមេរិក ។ វាត្រូវបានធ្វើការប៉ាន់ស្មានថា សង្គ្រាមនេះបានបណ្ដាលឲ្យប្រជាជនជាង ១ លាននាក់ រងរបួស និងស្លាប់ ហើយទ្រព្យសម្បត្តិជាច្រើនក៏ត្រូវបានបំផ្លិចបំផ្លាញផងដែរ ដែលធ្វើឲ្យក្រុមគ្រួសាររងទុក្ខលំបាក និងសហគមន៍ជាច្រើននៅទូទាំងប្រទេស ។ ពួកបរិសុទ្ធទាំងឡាយដែលបានបន្ដធ្វើតាមដំបូន្មានរបស់ព្រះអម្ចាស់ ឲ្យប្រមូលគ្នីគ្នាចេញពីភាគខាងកើត ត្រូវបានប្រទានពរដោយមានសេចក្ដីសុខសាន្ដ និងសុវត្ថិភាពជាមួយសាច់ញ្ញាតិនៅក្នុងរដ្ឋយូថាហ៍ ។

បទបង្ហាញអំពីសម្ភាររបស់គ្រូបង្រៀន

ខណៈដែលសិស្សចូលរួមយ៉ាងសកម្មនៅក្នុងដំណើរការនៃការ រៀនសូត្រ នោះគឺជាការចាំបាច់ណាស់ ដែលពួកគេត្រូវយល់ និង អនុវត្តខគម្ពីរទាំងឡាយ ប៉ុន្ដែវាពុំបានជំនួសឲ្យតម្រូវការ ដែល គ្រូបង្រៀនត្រូវប្រាប់ អំពីព័ត៌មានក្នុងពេលផ្សេងៗគ្នា ខណៈដែល សិស្សស្ដាប់នោះឡើយ ។ ការធ្វើបទបង្ហាញរបស់គ្រូបង្រៀនដោយសង្ខេបខ្លីៗ អាចនឹងមានប្រសិទ្ធភាព ខណៈដែលយើងត្រូវការសង្ខេបឯកសារក្នុងមេរៀនដែលមាននូវដំណើររឿងដ៏វែង ដើម្បីបង្ហាញព័ត៌មានដែលថ្មីសម្រាប់សិស្ស ធ្វើការផ្លាស់ប្ដូរនៅក្នុងមេរៀន ឬឈានទៅដល់ការធ្វើការសន្និដ្ឋាន ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ៤៥:៦៥ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលនូវអ្វីដែលព្រះអម្ចាស់ចង់ឲ្យពួកបរិសុទ្ធធ្វើ នៅពេលពួកគេប្រជុំគ្នានៅភាគខាងលិចនៃប្រទេស ។

ហេតុអ្វីពួកគេត្រូវប្រមូលនូវទ្រព្យសម្បត្តិរបស់ពួកគេ ? ( ដើម្បីទិញដីដែលពួកបរិសុទ្ធអាចរស់នៅក្នុងសាមគ្គីភាព សេចក្ដីសុខសាន្ដ និងសុវត្ថិភាព ) ។ សូមពន្យល់ថា មរតក សំដៅទៅលើទឹកដីដែលពួកបរិសុទ្ធ អាចរស់នៅ ហើយថ្វាយបង្គំដល់ព្រះអម្ចាស់ ) ។

គោលលទ្ធិ និង សេចក្ដីសញ្ញា ៤៥:៦៦-៧៥

ព្រះអម្ចាស់ពិពណ៌នាអំពីទីក្រុង យេរ៉ូសាឡិមថ្មី ឬទីក្រុង ស៊ីយ៉ូន

សូមឲ្យសិស្សគិតពិចារណាអំពីសំណួរខាងក្រោម ៖

បើអ្នកអាចជ្រើសរើសកន្លែងណាមួយក្នុងពិភពលោកដើម្បីរស់នៅ តើអ្នកនឹងរើសយកកន្លែងណា ? ហេតុអ្វីអ្នកចង់រស់នៅទីនោះ ?

សូមអញ្ជើញសិស្សពីរបីនាក់ឲ្យឆ្លើយនឹងសំណួរ ។ នៅពេលពួកគេឆ្លើយ សូមគូសបន្ទាត់មួយនៅពាក់កណ្ដាលក្ដារខៀន បង្កើតជាពីរកូឡោន ។ នៅផ្នែកខាងលើនៃកូឡោនមួយ សូមសរសេរឈ្មោះទីតាំងមួយចំនួនដែលសិស្សបានប្រាប់ ។ នៅក្នុងកូឡោនដដែលនោះ សូមសរសេរនូវមូលហេតុដែលពួកគេចង់រស់នៅក្នុងទីតាំងទាំងនោះនៅក្រោមឈ្មោះទីតាំងទាំងនោះ ។

សូមអញ្ជើញសិស្សឲ្យអាន គោលលទ្ធិ និង សេចក្តីសញ្ញា ៤៥:៦៦–៦៧ ដោយស្ងាត់ស្ងៀម រកមើលឈ្មោះនៃដែនដីកេរអាករ និង មូលហេតុនានារបស់ពួកបរិសុទ្ធ ដែលជាដែនដីដែលគួរឲ្យចង់រស់នៅ ។ អ្នកអាចផ្ដល់យោបល់ថា សិស្សគួរគូសចំណាំអ្វីដែលពួកគេរកឃើញ ។

តើដែនដីកេរអាកររបស់ពួកបរិសុទ្ធត្រូវបានហៅថាអ្វី ? ( ទីក្រុងយេរូសាឡិមថ្មី ឬទីក្រុងស៊ីយ៉ូន ។ សូមសរសេរនៅផ្នែកខាងលើនៃកូឡោនទីពីរនៅលើក្ដារខៀន ) ។

សូមពន្យល់ថា នៅក្នុងព្រះគម្ពីរ ពាក្យ ស៊ីយ៉ូន ពេលខ្លះ ត្រូវបានប្រើជាន័យផ្សេងៗពីគ្នាបន្ដិច ។ ពេលខ្លះ ពាក្យនោះសំដៅទៅលើប្រជាជននៃស៊ីយ៉ូន ហើយពិពណ៌នាវាថាជា « ចិត្តល្អសុទ្ធសាធ » (គ. និង ស. ៩៧:២១) ។ កន្លែងផ្សេងទៀត ពាក្យ ស៊ីយ៉ូន សំដៅទៅលើសាសនាចក្រទាំងមូល និងស្ដេកទាំងអស់នៅទូទាំងពិភពលោក ( សូមមើលគ. និង ស. ៨២:១៤) ។ ពាក្យ ស៊ីយ៉ូន ក៏អាចសំដៅទៅលើទីតាំងភូមិសាស្ត្រជាក់លាក់ផងដែរ ។ នៅក្នុងវិវរណៈនេះ ពាក្យស៊ីយ៉ូន សំដៅទៅលើទីក្រុងខាងសាច់ឈាមមួយ ដែលពួកបរិសុទ្ធនឹងស្ថាបនាឡើង ហើយប្រមូលផ្ដុំគ្នា ។

តើព្រះអម្ចាស់បានពិពណ៌នាអំពីទីក្រុង យេរ៉ូសាឡិមថ្មី ( ទីក្រុង ស៊ីយ៉ូន ) យ៉ាងដូចម្ដេច ? ( សូមសរសេរចម្លើយរបស់សិស្សនៅក្នុងកូឡោនទីពីរ នៅលើក្ដារខៀន ) ។ ពួកគេអាចនឹងប្រើពាក្យផ្សេងៗគ្នា ប៉ុន្តែពួកគេគួរតែប្រាប់នូវគោលលទ្ធិដូចខាងក្រោម ៖ ទីក្រុងយេរូសាឡិមថ្មី នឹងជាកន្លែងនៃសេចក្ដីសុខសាន្ដ និងសុវត្ថិភាព ហើយសិរីល្អរបស់ព្រះអម្ចាស់ នឹងគង់នៅទីនោះ) ។

សូមអញ្ជើញសិស្សឲ្យប្រៀបធៀបទីតាំងដែលពួកគេបានជ្រើសរើសសម្រាប់គេហដ្ឋានអនាគតដ៏ល្អរបស់ពួកគេទៅតាមការពិពណ៌នាអំពីទីក្រុងស៊ីយ៉ូននោះ ។

ផ្អែកទៅលើការពិពណ៌នារបស់ព្រះអម្ចាស់អំពីទីក្រុងស៊ីយ៉ូន ហេតុអ្វីក៏អ្នកចង់មានចំណែកនៅក្នុងទីក្រុងនេះ ?
តើអ្នកធ្លាប់បានទទួលបទពិសោធន៍នៃសេចក្ដីសុខសាន្ដ និងសុវត្ថិភាពនៅកន្លែងណា ? ហេតុអ្វីក៏វាសំខាន់ដើម្បីមានកន្លែងជាច្រើន ដែលអ្នកអាចមានសុវត្ថិភាព និងសេចក្ដីសុខសាន្ដនោះ ?

សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ៤៥:៦៨-៧១ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលមូលហេតុបន្ថែម ដែលពួកគេអាចនឹងចង់រស់នៅក្នុងទីក្រុងយេរូសាឡិមថ្មី ។ អ្នកអាចផ្ដល់យោបល់ឲ្យសិស្សថា ពួកគេគួរគូសចំណាំអ្វីដែលពួកគេរកឃើញ ។ សូមឲ្យពួកគេរៀបរាប់អំពីអ្វីដែលពួកគេបានរកឃើញ ហើយបន្ថែមចម្លើយរបស់ពួកគេចូលទៅក្នុងកូឡោនទីពីរនៅលើក្ដារខៀន ។

តើពួកទុច្ចរិតនឹងមានអារម្មណ៍យ៉ាងណាអំពីទីក្រុងស៊ីយ៉ូន ?
ស្របតាម ខ ៧១ តើមនុស្សសុចរិតនៃទីក្រុងស៊ីយ៉ូននឹងចេញមកពីកន្លែងណា ? ( បើវាពុំទាន់បានពិពណ៌នាទេ សូមសរសេរគោលលទ្ធិដូចខាងក្រោមនៅក្នុងកូឡោនទីពីរនៅលើក្ដារខៀន ៖ មនុស្សសុចរិតមកពីគ្រប់ជាតិសាសន៍នឹងប្រមូលផ្ដុំគ្នាទៅកាន់ស៊ីយ៉ូន ។ អ្នកអាចនឹងចង់ពន្យល់ថា នេះគឺជាការពិតចំពោះទីក្រុងស៊ីយ៉ូន ដែលបានសំដៅទៅលើ នៅក្នុងវិវរណៈនេះ ហើយគឺជាការពិតចំពោះស្ដេកនៃស៊ីយ៉ូន ដែលត្រូវបានស្ថាបនាឡើងនៅទូទាំងពិភពលោកសព្វថ្ងៃនេះ ) ។

សូមអាននូវសេចក្ដីថ្លែងការដូចខាងក្រោម ដោយព្យាការី យ៉ូសែប ស៊្មីធ អំពីប្រធានបទនៃស៊ីយ៉ូន ៖

រូបភាព
ព្យាការី យ៉ូសែប ស្ម៊ីធ

« ស៊ីយ៉ូន … គឺជាកន្លែងរបស់ពួកសុចរិត ហើយមនុស្សទាំងអស់ ដែលស្ថាបនានៅលើនោះ គឺត្រូវថ្វាយបង្គំដល់ព្រះពិត និងមានព្រះជន្មរស់ ហើយជាអស់អ្នកដែលជឿទៅលើគោលលទ្ធិមួយ ជាគោលលទ្ធិនៃព្រះអម្ចាស់របស់យើង និងព្រះអង្គសង្គ្រោះ ព្រះយេស៊ូវគ្រីស្ទ » ( នៅក្នុងHistory of the Church២:២៥៤ ) ។

សូមអញ្ជើញសិស្សឲ្យអាន គោលលទ្ធិ និង សេចក្តីសញ្ញា ៤៥:៧២-៧៣ ដោយស្ងៀមស្ងាត់ រកមើលអ្វីដែលព្រះអម្ចាស់បានព្រមានដល់ពួកបរិសុទ្ធកុំឲ្យធ្វើ ។ បន្ទាប់មក សូមសង្ខេបខគម្ពីរពីរចុងក្រោយនៃវិវរណៈនេះ ដោយពន្យល់ថា ព្រះអម្ចាស់រំឭកពួកបរិសុទ្ធថា ការយាងមកជាលើកទីពីរនឹងធ្វើឲ្យពួកមារសត្រូវរបស់ពួកគេជួបនូវបញ្ហាធំ ។

អ្នកអាចនឹងរំឭកដល់សិស្សថា ព្រះអម្ចាស់បានជម្រុញឲ្យពួកបរិសុទ្ធជំនាន់មុន និងពួកយើងឲ្យ « ប្រុងស្ដាប់ » តាមសំឡេងរបស់ទ្រង់នៅក្នុងវិវរណៈនេះ ។ សូមអញ្ជើញសិស្សឲ្យមើលត្រឡប់ទៅក្រោយវិញ ក្នុងគោលលទ្ធិ និង សេចក្ដីសញ្ញា ៤៥ ហើយរំឭកនូវអ្វីដែលព្រះអម្ចាស់ បានបើកសម្ដែងដល់ពួកបរិសុទ្ធ អំពីការយាងមកជាលើកទីពីររបស់ទ្រង់ និងទីក្រុងយេរូសាឡិមថ្មី ។ អ្នកអាចនឹងលើកទឹកចិត្តពួកគេឲ្យបំពេញសេចក្ដីថ្លែងការណ៍ដូចខាងក្រោមនៅក្នុងសៀវភៅកត់ចំណាំក្នុងថ្នាក់របស់ពួកគេ ឬសៀវភៅកត់ត្រាការសិក្សាព្រះគម្ពីររបស់ពួកគេថា ៖ « ដោយសារតែអ្វីដែលយើងរៀននៅក្នុងគោលលទ្ធិ និង សេចក្ដីសញ្ញា ៤៥ ខ្ញុំនឹងរៀបចំខ្លួនចំពោះរឿងទាំងឡាយដែលនឹងកើតមាន ដោយ … » សូមបញ្ចប់ដោយការលើកទឹកចិត្តដល់សិស្សឲ្យពិភាក្សានូវអ្វីដែលពួកគេបានរៀននៅក្នុងមេរៀនសព្វថ្ងៃនេះ ជាមួយនឹងសមាជិកគ្រួសារ ។

សេចក្តីអធិប្បាយ និង ព័ត៌មានសាច់រឿង

គោលលទ្ធិ និង សេចក្តីសញ្ញា ៤៥:៦០-៦១។ ការបកប្រែរបស់ យ៉ូសែប ស្ម៊ីធ

ការបកប្រែរបស់ យ៉ូសែប ស្ម៊ីធ គឺជា « ការធ្វើកំណែ ឬការបកប្រែនៃកំណែថ្មីនៃព្រះគម្ពីរបរិសុទ្ធ ដោយសេ្ដចជែមស៍ ដែលបានចាប់ផ្ដើមដោយព្យាការី យ៉ូសែប ស្ម៊ីធ នៅខែ មិថុនា ឆ្នាំ ១៨៣០ ។ លោកត្រូវបានដាក់បញ្ញត្តិដោយព្រះ ឲ្យធ្វើការបកប្រែ និង ចាត់ទុកវាជា ‹ ផ្នែកមួយនៃការហៅបម្រើរបស់លោក › ក្នុងនាមជាព្យាការីម្នាក់ ។ ទោះជាកិច្ចការត្រូវបានបញ្ចប់ត្រឹម ខែ កក្កដា ឆ្នាំ ១៨៣៣ ជាពិសេសក្ដី ក៏ព្យាការីបានបន្ដធ្វើការកែសម្រួលតូចៗជាច្រើន រហូតដល់ពេលលោកស្លាប់នៅឆ្នាំ ១៨៤៤ ។ « ចំណែកមួយចំនួននៃការបកប្រែត្រូវបានបោះពុម្ពអំឡុងពេលលោកនៅមានជីវិត » ។ ( សូមមើល Bible Dictionary « Joseph Smith Translation » ) ។

ទោះជាយ៉ាងណាក៏ដោយ ដោយសារការបៀតបៀន ការខ្វះធនធានខាងហិរញ្ញវត្ថុ និងទំនួលខុសត្រូវរបស់លោកដើម្បីគ្រប់គ្រងលើសាសនាចក្រនោះ យ៉ូសែប ស៊្មីធ ពុំអាចធ្វើការបោះពុម្ពនូវកំណែថ្មីនៃព្រះគម្ពីរប៊ីបទាំងអស់របស់លោក ពីមុនការស្លាប់របស់លោកទេ ។ បន្ថែមពីលើនោះ សាសនាចក្រខ្វះឯកសារសរសេរដោយដៃ ។ វាគឺស្ថិតនៅក្នុងដៃរបស់ស្ដ្រីមេម៉ាយរបស់គ្រួសារ យ៉ូសែប ឈ្មោះ អិមម៉ា ស៊្មីធ បន្ទាប់ពីការស្លាប់របស់លោក ។ នៅក្នុងឆ្នាំ ១៨៦៦ អិមម៉ា បានប្រគល់ឯកសារសរសេរដោយដៃនេះ ទៅដល់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែលរៀបចំសារជាថ្មី (RLDS) ដែលឥឡូវត្រូវបានស្គាល់ថាជា សមាគមនៃព្រះគ្រីស្ទ ដែលបានទទួលសិទ្ធិអ្នកនិពន្ធ និងបានបោះពុម្ពការបកប្រែនៅក្នុងឆ្នាំ ១៨៦៧ ។ ( សូមមើល Robert J. Matthews, « Q and A,» New Era, ខែ មេសា ឆ្នាំ ១៩៧៧, ទំព័រ ៤៦–៤៧ ) ។

នៅទីបំផុត ព្រះគម្ពីរម៉ូសេ និង យ៉ូសែប ស្ម៊ីធ--ម៉ាថាយ ត្រូវបានបោះពុម្ពជាចំណែកនៃការបកប្រែរបស់ យ៉ូសែប ស៊្មីធ ។ ទោះជាយ៉ាងណាក៏ដោយ អ្វីដែលយើងប្រើនៅក្នុងព្រះគម្ពីររបស់យើងសព្វថ្ងៃនេះ គឺជាចំណែកមួយនៃការបកប្រែព្រះគម្ពីរប៊ីបរបស់ យ៉ូសែប ស៊្មីធ ប៉ុណ្ណោះ ។ « ខណៈដែលមានមូលហេតុមួយចំនួនថា មូលហេតុអ្វីដែលអត្ថបទទាំងស្រុងនៃការបកប្រែរបស់ យ៉ូសែប ស៊្មីធ ពុំត្រូវបានចងក្រងនៅក្នុងឆ្នាំ ១៩៧៩ ការបោះពុម្ពព្រះគម្ពីរប៊ីប អិល.ឌី.អេស ដូច្នេះ ភាពពុំពិតប្រាកដនៃអត្ថបទការបកប្រែរបស់យ៉ូសែប ស្ម៊ីធ នេះ គឺពុំមែនជាមូលហេតុតែមួយនោះទេ ។ អត្ថបទសំខាន់ៗខាងគោលលទ្ធិ ត្រូវបានផ្ដល់ឲ្យតាមចំណូលចិត្ត ហើយដោយសារការដកឃ្លាគឺជាកត្តាចម្បងមួយ នោះគ្មានអ្វីត្រូវបានដាក់បញ្ចូលទេ » ( Robert J. Matthews, I Have a Question,» Ensign, ខែ មិថុនា ឆ្នាំ ១៩៩២, ទំព័រ ២៩ ) ។