មេរៀន ទី ៥
ការសិក្សាព្រះគម្ពីរ
សេចក្តីផ្តើម
មេរៀននេះនឹងជួយសិស្សឲ្យរៀនរបៀបយល់ដឹងបរិបទ និងមាតិកាបទគម្ពីរកាន់តែប្រសើរ ស្គាល់គោលលទ្ធិ និងគោលការណ៍ដំណឹងល្អ ដែលមានក្នុងបទគម្ពីរ ហើយអនុវត្តសេចក្ដីពិតទាំងនោះក្នុងជីវិតរបស់ពួកគេ ។ នៅពេលសិស្សរកឃើញ ហើយធ្វើតាមសេចក្ដីពិតដ៏អស់កល្បជានិច្ច ដែលមាននៅក្នុងបទគម្ពីរទាំងឡាយ នោះដំណឹងល្អអាចចាក់ចូលកាន់តែជ្រៅទៅក្នុងដួងចិត្តរបស់ពួកគេ ។ សូមពិចារណាអំពីរបៀបនានា ដើម្បីមើលសម្ភារក្នុងមេរៀននេះនៅពេញមួយឆ្នាំ ។
យោបល់សម្រាប់ការបង្រៀន
គោលបំណងនៃការសិក្សាបទគម្ពីរ
មុនពេលចូលរៀន សូមដាក់វត្ថុសាមញ្ញមួយនៅក្នុងថ្នាក់ ដូចជា ខ្មៅដៃ សៀវភៅកត់ចំណាំ ឬសៀវភៅទំនុកដំកើង នៅកន្លែងណាមួយក្នុងបន្ទប់ ដែលមើលឃើញច្បាស់ ។ សូមជ្រើសរើសកន្លែងមួយដែលវត្ថុនោះ នឹងពុំរញ៉េរញ៉ៃ ឬដាក់នៅកន្លែងដែលសិស្សងាយឃើញ ។ សូមចាប់ផ្ដើមមេរៀនដោយប្រាប់សិស្សថា អ្នកបានបាត់អ្វីមួយ ហើយអ្នកត្រូវការជំនួយពីពួកគេឲ្យជួយរក ។ សូមឲ្យពួកគេរកមើលក្នុងបន្ទប់ ប៉ុន្តែកុំប្រាប់ពួកគេនូវអ្វីដែលពួកគេត្រូវរកនោះឡើយ ។ បន្ទាប់ពីសិស្សរកមិនឃើញក្នុងរយៈពេលខ្លីមក សូមពិពណ៌នាអំពីអ្វីដែលពួកគេគូរស្វែងរក ហើយសុំឲ្យពួកគេព្យាយាមរកម្ដងទៀត ។
-
ហេតុអ្វីបានជាវាងាយស្រួលជាង ដើម្បីរកអ្វីដែលអ្នកកំពុងរកជាលើកទីពីរនេះ ?
លើកគម្ពីរអ្នកឡើង ។ សូមចង្អុលបង្ហាញថា វាងាយស្រួលជាងដើម្បីរកអ្វីមួយ ដែលយើងដឹងថាត្រូវរកអ្វី ការសិក្សាព្រះគម្ពីររបស់យើង អាចកាន់តែមានអត្ថន័យ ពេលយើងថាត្រូវរកអ្វី ពេលយើងសិក្សានោះ ។
ដើម្បីជួយសិស្សស្គាល់នូវអ្វីដែលយើងគួរតែស្រាវជ្រាវ ពេលយើងសិក្សាបទគម្ពីរ សូមអញ្ជើញសិស្សម្នាក់ឲ្យអានសេចក្ដីថ្លែងដូចខាងក្រោម ដោយប្រធាន ម៉ារ៉ុន ជី រ៉មនី នៃគណៈប្រធានទីមួយ ។ មុនពេលសិស្សអាន សូមឲ្យសិស្សក្នុងថ្នាក់ផ្ទៀងស្ដាប់រកអ្វីដែលពួកគេគួរតែអាចរកបានជានិច្ចនៅក្នុងបទគម្ពីរ ពេលពួកគេស្វែងរកវា ។ ( អ្នកអាចនឹងចង់ផ្ដល់ដល់សិស្សនូវច្បាប់ចម្លងនៃសេចក្ដីថ្លែងរបស់ព្យាការីមួយនេះ និងសេចក្ដីថ្លែងដទៃៗទៀត នៅក្នុងមេរៀននេះ ) ។
« មនុស្សម្នាក់ពុំអាចសិក្សាបទគម្ពីរដោយស្មោះ ដោយពុំរៀនគោលការណ៍នានានៃដំណឹងល្អទេ ដោយសារតែបទគម្ពីរ ត្រូវបានសរសេរទុក ដើម្បីរក្សាគោលការណ៍នានានោះ» ( « The Message of the Old Testament » [ address to CES religious educators ថ្ងៃទី ១៧ ខែ សីហា ឆ្នាំ ១៩៧៩ ] ទំព័រ ៣ LDS.org) ។
-
ផ្អែកទៅលើការពន្យល់របស់ប្រធាន រ៉មនី តើយើងគួរស្វែងរកអ្វី នៅពេលយើងសិក្សាបទគម្ពីរ ?
-
តើគោលការណ៍មួយគឺជាអ្វី ?
សូមបញ្ជាក់ ឬបំពេញបន្ថែមចម្លើយរបស់សិស្ស តាមរយៈការអញ្ជើញសិស្សម្នាក់ឲ្យអានឮៗនូវការពន្យល់ដូចខាងក្រោមដោយ អែលឌើរ រីឆាដ ជី ស្កត នៃកូរ៉ុមនៃពួកសាវកដប់ពីរនាក់ ។ មុនពេលសិស្សអាន សូមឲ្យសិស្សពាក់កណ្ដាលថ្នាក់ស្ដាប់ថាគោលការណ៍គឺជាអ្វី ។ សូមសិស្សពាក់កណ្ដាលថ្នាក់ទៀត ស្ដាប់ពីមូលហេតុនៃការស្រាវជ្រាវគោលការណ៍នានាក្នុងបទគម្ពីរ គឺសំខាន់ខ្លាំងណាស់ ។
« គោលការណ៍ទាំងឡាយ ជាសេចក្តីពិតបរិសុទ្ធ បានរៀបចំសម្រាប់ការអនុវត្តចំពោះស្ថានភាពផ្សេងៗគ្នាដ៏ទូលំទូលាយ ។ គោលការណ៍ពិត ធ្វើឲ្យការសម្រេចចិត្តច្បាស់លាស់ ទោះជាស្ថិតនៅក្រោមស្ថានភាពច្របូកច្របល់ និងការបង្ខិតបង្ខំដ៏ខ្លាំងបំផុតក្ដី » ( Acquiring Spiritual Knowledge » Ensign ខែ វិច្ឆិកា ឆ្នាំ ១៩៩៣ ទំព័រ ៨៦ ) ។
-
ស្របតាមអែលឌើរ ស្កត តើគោលការណ៍គឺជាអ្វី ? ហេតុអ្វីការស្វែងរកគោលការណ៍នៅក្នុងបទគម្ពីរសំខាន់ខ្លាំងម៉្លេះ ?
សូមពន្យល់ថា គោលការណ៍ និងគោលលទ្ធិទាំងឡាយនៃដំណឹងល្អរបស់ព្រះយេស៊ូវគ្រីស្ទ គឺជាសេចក្ដីពិតគ្រឹះ ពុំផ្លាស់ប្ដូរ ដែលផ្ដល់ការដឹកនាំនៅក្នុងជីវិតរស់នៅរបស់យើង ។ គោលលទ្ធិ និងគោលការណ៍ គឺជាអ្វីដែលព្រះអម្ចាស់ និងពួកព្យាការីរបស់ទ្រង់ មានបំណងចង់ឲ្យយើងរៀនមកពីវិវរណៈ ទេសនកថា និងព្រឹត្តការណ៍នានាដែលបានកត់ត្រានៅក្នុងបទគម្ពីរ ។
ដើម្បីជួយសិស្សរកឃើញគំរូមួយនៃគោលលទ្ធិ និងគោលការណ៍ ដែលបានបង្រៀននៅក្នុងបទគម្ពីរ សូមអញ្ជើញពួកគេឲ្យនឹកគិតទៅលើការនិមិត្តដំបូងរបស់យ៉ូសែប ស្ម៊ីធ ។ សូមសួរដល់ពួកគេ បើពួកគេអាចប្រាប់សេចក្ដីពិតសាមញ្ញមួយ ដែលយើងអាចរៀនមកពីបទពិសោធន៍របស់យ៉ូសែប ស្ម៊ីធបានឬទេ ។ សិស្សអាចនឹងប្រាប់ពីគោលលទ្ធិ និងគោលការណ៍ផ្សេងៗ ។ សេចក្ដីពិតដូចខាងក្រោម គឺជាគំរូមួយ ៖ បើយើងអធិស្ឋានដោយសេចក្ដីជំនឿ នោះព្រះនឹងឆ្លើយតបការអធិស្ឋានរបស់យើង ។
ការយល់ដឹងអំពីបរិបទ និង មាតិកានៃបទគម្ពីរ
សូមបង្ហាញចំណិតផ្លែឈើ ដែលត្រូវតែបកសំបកពីមុនអាចបរិភោគបាន ( ឧទាហរណ៍ ផ្លែចេក ឬផ្លែក្រូច ) ។
-
តើអ្នកត្រូវធ្វើអ្វីខ្លះ ពីមុនអ្នកអាចប្រើវត្ថុនេះ សម្រាប់គោលបំណងដែលចង់បាន ? ( បកសំបកចេញ ) ។
-
បើផ្នែកសំខាន់ និងមានប្រយោជន៍របស់វា គឺស្ថិតនៅផ្នែកខាងក្នុង តើគោលបំណងនៃសំបកផ្នែកខាងក្រៅគឺជាអ្វី ? ( ដើម្បីរក្សា និងបញ្ជូនមាតិកា ) ។
សូមពន្យល់ថា ផ្លែឈើនៅក្នុងសំបក អាចប្រៀបដូចជាគោលលទ្ធិ និងគោលការណ៍ទាំងឡាយ ដែលមាននៅក្នុងបទគម្ពីរដែរ ។ សំបកខាងក្រៅ អាចប្រៀបទៅនឹងព្រឹត្តការណ៍ មនុស្ស និងទេសនកថាបទគម្ពីរ ។ ក៏ដូចជាសំបកដែលរក្សា និងជួយបញ្ជូនសាច់ផ្លែឈើនៅខាងក្នុងដែរ ដំណើររឿងបទគម្ពីរទាំងនេះ បញ្ជូនគោលលទ្ធិ និងគោលការណ៍នៃដំណឹងល្អដល់យើង តាមរបៀបមួយ ដែលជួយយើងឲ្យយល់ ចងចាំ និងអនុវត្តវាក្នុងជីវិតរបស់យើង ។
សូមឲ្យសិស្សចែកចាយនូវអ្វីដែលពួកគេបានធ្វើ ដើម្បីជួយពួកគេទទួលបានការយល់ដឹងកាន់តែប្រសើរអំពីទីតាំង តំណររឿង ព្រឹត្តការណ៍ និងព័ត៌មានលម្អិតដទៃទៀតនៃបទគម្ពីរ ។ ( អ្នកអាចរៀបរាប់គំនិតមួយចំនួនរបស់ពួកគេនៅលើក្តារខៀន ) ។ បន្ទាប់ពីសិស្សបានចែកចាយគំនិតមួយចំនួនហើយ សូមពន្យល់អំពីជំនាញការសិក្សាបទគម្ពីរដូចខាងក្រោមទៅដល់សិស្សក្នុងថ្នាក់ ហើយចំណាយពេលពីរបីនាទីដើម្បីអនុវត្តវា ។
ទីតាំងប្រវត្តិសាស្ត្រ ៖ សូមពន្យល់ថា កណ្ឌនីមួយៗនៃ គោលលទ្ធិ និង សេចក្ដីសញ្ញា រួមមាននូវបុព្វកថាមួយ ដែលពិពណ៌នាអំពីកង្វល់ សំណួរ ឬព្រឹត្តការណ៍ជាប្រវត្តិសាស្ត្រ ដែលទាក់ទងនឹងវិវរណៈក្នុងកណ្ឌនោះ ។ ការដឹងអំពីព័ត៌មានលម្អិតទាំងនេះ អាចជួយយើងឲ្យយល់វិវរណៈ ។
ដើម្បីបង្ហាញពីរបៀបដែលការដឹងអំពីព័ត៌មានលម្អិតទាំងនេះ អាចបង្កើនការយល់ដឹងអំពីវិវរណៈមួយ សូមអញ្ជើញសិស្សមួយចំនួនដើម្បីផ្លាស់វេណគ្នាអានឲ្យឮៗដកស្រង់ពី គោលលទ្ធិ និង សេចក្ដីសញ្ញា ១២១:១-៨ ។ បន្ទាប់មកសុំសិស្សឲ្យអានផ្នែកបុព្វកថាដោយស្ងៀមស្ងាត់ ស្វែងរកព័ត៌មានដែលជួយពួកគេយល់អំពីខទាំងនេះ ។
-
តើការដឹងថាយ៉ូសែប ស្ម៊ីធ ត្រូវបានជាប់ក្នុងគុគលីបឺធីអស់ជាច្រើនខែ ជួយយើងឲ្យយល់ខទាំងនេះកាន់តែប្រសើរដោយរបៀបណា ?
និយមន័យពាក្យ ៖ សូមចង្អុលបង្ហាញថា ពាក្យខ្លះ បានប្រើនៅក្នុងបទគម្ពីរ អាចនឹងមិនដែលស្គាល់ ។ វចនានុក្រមព្រះគម្ពីរប៊ីប សេចក្ដីណែនាំដល់បទគម្ពីរទាំងឡាយ លេខយោងបទគម្ពីរ និងវចនានុក្រមធម្មតា អាចជួយយើងរៀននិយមន័យនៃពាក្យនានា ហើយយល់ពីអត្ថន័យរបស់វាបាន ។
ដើម្បីបង្ហាញឧទាហរណ៍ សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ១២១:២ ដោយស្ងាត់ស្ងៀម ។ សូមពន្យល់ថា ពាក្យស្នាក់នៅ អាចមានន័យថា ពន្យាពេល ឬផ្អាក ។
-
តើការដឹងនិយមន័យនេះ ជួយយើងឲ្យយល់ខនេះកាន់តែច្បាស់យ៉ាងដូចម្ដេច ?
ការស្គាល់គោលលទ្ធិ និងគោលការណ៍ទាំងឡាយ
សូមពន្យល់ថា នៅពេលយើងបង្កើនការយល់ដឹងរបស់យើងអំពីបរិបទ និងមាតិកានៃវគ្គបទគម្ពីរ នោះយើងត្រូវបានត្រៀមខ្លួនដើម្បីស្គាល់សេចក្ដីពិតនៃដំណឹងល្អ ដែលមាននៅក្នុងនោះហើយ ។ សូមអញ្ជើញសិស្សម្នាក់អានសេចក្ដីថ្លែងការណ៍ខាងក្រោមឲ្យឮៗ ដោយអែលឌើរ រីឆាដ ជី ស្កត ៖ សូមឲ្យសិស្សក្នុងថ្នាក់ស្ដាប់មើលឃ្លាដែលពិពណ៌នាអំពីអ្វី ដែលយើងគួរធ្វើដើម្បីស្គាល់សេចក្ដីពិតនានា ពេលយើងសិក្សាបទគម្ពីរ ។
« នៅពេលអ្នកស្វែងរកចំណេះដឹងខាងវិញ្ញាណ សូមស្វែងរកគោលការណ៍នានា ។ សូមបែងចែកវាចេញពីព័ត៌មានលម្អិត ដែលបានប្រើដើម្បីពន្យល់វានោះដោយប្រុងប្រយ័ត្ន ។… .វាសក្តិសមនឹងកិច្ចខិតខំដ៏មហិមាដើម្បីរៀបចំសេចក្តីពិតដែលយើងប្រមូលផ្ដុំ ដើម្បីបង្កើតសេចក្តីថ្លែងការណ៍សាមញ្ញអំពីគោលការណ៍ »(« Acquiring Spiritual Knowledge » ទំព័រ ៨៦ ) ។
-
តើឃ្លាដែលអែលឌើរ ស្កត បានប្រើដើម្បីពិពណ៌នាអំពីការស្គាល់សេចក្ដីពិតនៅក្នុងបទគម្ពីរមានអ្វីខ្លះ ? ( «សូមញែកវាចេញពីព័ត៌មានលម្អិតដែលបានប្រើដើម្បីពន្យល់វានោះដោយប្រុងប្រយ័ត្ន » « រៀបចំសេចក្តីពិតដែលយើងប្រមូលផ្ដុំ ដើម្បីបង្កើតជាសេចក្តីថ្លែងការណ៍សាមញ្ញៗអំពីគោលការណ៍ » ) ។
-
ហេតុអ្វីក៏អ្នកគិតថាវាសំខាន់ដើម្បី « រៀបចំសេចក្ដីពិត » ដែលយើងរៀនមកពីវគ្គបទគម្ពីរឲ្យទៅជាសេចក្ដីថ្លែងការសាមញ្ញមួយអំពីគោលលទ្ធិ ឬ គោលការណ៍ដូច្នេះ ?
សូមចង្អុលបង្ហាញថា គោលលទ្ធិ និងគោលការណ៍ដំណឹងល្អមួយចំនួន គឺងាយស្រួលដើម្បីស្គាល់ ដោយសារវាត្រូវបានថ្លែងដោយចំៗនៅក្នុងបទគម្ពីរ ។ សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១២១ :៧-៨ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម និងប្រាប់សេចក្ដីពិតនានា ដែលត្រូវបានថ្លែងដោយចំៗនៅក្នុងខគម្ពីរទាំងនេះ ។ សិស្សអាចនឹងប្រើពាក្យផ្សេង ប៉ុន្តែពួកគេគួរប្រាប់នូវគោលការណ៍ដូចខាងក្រោម ៖ បើយើងស៊ូទ្រាំការណ៍នេះដោយហ្មត់ចត់ នោះព្រះនឹងដំកើងយើងឡើង ហើយជួយយើងឲ្យមានជ័យជំនះលើពួកខ្មាំងសត្រូវរបស់យើង ។
សូមពន្យល់ថា គោលលទ្ធិ និងគោលការណ៍ជាច្រើន ពុំបានថ្លែងចំៗនៅក្នុងអត្ថបទគម្ពីរទេ ប៉ុន្តែផ្ទុយទៅវិញត្រូវបានបង្ហាញ ឬពិពណ៌នាទៅក្នុងខគម្ពីរជាច្រើនទៀត ។ ការស្គាល់ប្រភេទនៃគោលលទ្ធិ និងគោលការណ៍នេះ តម្រូវឲ្យមានការស្គាល់សេចក្ដីពិត ដែលបានបង្ហាញនៅក្នុងវគ្គបទគម្ពីរ ហើយថ្លែងសេចក្ដីពិតទាំងនោះតាមរបៀបដ៏ច្បាស់លាស់ និងសាមញ្ញ ។ ដើម្បីជួយសិស្សឲ្យរៀនស្គាល់គោលលទ្ធិ និងគោលការណ៍ទាំងឡាយដែលពុំបានថ្លែងដោយចំៗ សូមផ្ដល់យោបល់ឲ្យពួកគេសួរសំណួរដូចជា « តើខ្ញុំអាចរៀនអ្វីខ្លះមកពីរឿងនេះ ? » « តើសារលិខិត ឬចំនុចសំខាន់នៃខគម្ពីរទាំងនេះជាអ្វី ? » ឬ « តើព្រះអម្ចាស់ មានបំណងចង់ឲ្យខ្ញុំរៀនអ្វីខ្លះមកពីរឿងនេះ ? »
សូមអញ្ជើញសិស្សឲ្យហាត់រៀនស្គាល់គោលលទ្ធិ និងគោលការណ៍ទាំងឡាយ ដោយការមើលគោលលទ្ធិ និង សេចក្ដីសញ្ញា ១២១:១-៨ ។ សូមឲ្យសិស្សសរសេរនៅក្នុងសៀវភៅកំណត់ចំណាំរបស់ពួកគេ ឬសៀវភៅកំណត់ត្រាការសិក្សាបទគម្ពីរនូវសេចក្ដីពិតដំណឹងល្អមួយ ដែលយើងអាចរៀនមកពីការអធិស្ឋានរបស់យ៉ូសែប និងចម្លើយរបស់ព្រះអម្ចាស់ចំពោះការអធិស្ឋាននោះ ។ បន្ទាប់ពីផ្ដល់ពេលគ្រប់គ្រាន់ហើយ សូមអញ្ជើញសិស្សមួយចំនួនឲ្យអានគោលលទ្ធិ ឬគោលការណ៍ ដែលពួកគេបានស្គាល់ចេញមកពីខគម្ពីរទាំងនេះ ។ សេចក្ដីពិតទាំងឡាយ ដែលសិស្សបានប្រាប់ អាចរួមមានដូចខាងក្រោម ៖
ព្រះស្ដាប់ឮការអធិស្ឋានរបស់យើង ។
បើយើងទូលហៅទ្រង់នៅក្នុងគ្រាលំបាក នោះទ្រង់អាចប្រទានក្ដីសុខសាន្ដដល់យើង ។
ការអនុវត្តគោលលទ្ធិ និងគោលការណ៍ទាំងឡាយក្នុងជីវិតរបស់យើង
សូមយោងទៅរឿងចំណិតផ្លែឈើ ដែលសិស្សក្នុងថ្នាក់បានពិភាក្សាកាលពីមុនក្នុងមេរៀនម្ដងទៀត ។
-
តើផ្លែឈើមានតម្លៃទេ បើវាពុំដែលបកសំបកមកបរិភោគផងនោះ ?
-
បើគោលលទ្ធិ និងគោលការណ៍ទាំងឡាយ ដែលយើងស្គាល់ក្នុងបទគម្ពីរ អាចប្រៀបប្រដូចទៅនឹងចំណិតផ្លែឈើ ដែលយើងបានបក តើយើងគួរធ្វើអ្វីខ្លះ នៅពេលយើងស្គាល់សេចក្ដីពិតទាំងនោះ ? ( អនុវត្តវាក្នុងជីវិតរបស់យើង ) ។
សូមពន្យល់ថា នៅពេលយើងដឹងពីសេចក្ដីពិត និងសារៈសំខាន់នៃគោលលទ្ធិ និងគោលការណ៍ទាំងឡាយដែលយើងបានស្គាល់នៅក្នុងបទគម្ពីរ នោះយើងនឹងមានបំណងប្រាថ្នាដើម្បីអនុវត្តវាក្នុងជីវិតរបស់យើង ។ សូមអញ្ជើញសិស្សឲ្យចែកចាយជាមួយដៃគូ អំពីរបៀបដែលពួកគេអាចអនុវត្តសេចក្ដីពិតមួយ ដែលពួកគេបានប្រាប់នៅក្នុង គោលលទ្ធិ និង សេចក្ដីសញ្ញា ១២១:១-៨ ។
សូមអញ្ជើញឲ្យសិស្សម្នាក់ អានសេចក្ដីថ្លែងការណ៍ខាងក្រោមដោយប្រធាន ប៊យដ៏ ឃេ ផាកកឺ នៃកូរ៉ុមនៃពួកសាវកដប់ពីរនាក់ឲ្យឮៗ ។ សូមឲ្យសិស្សផ្ទៀងតាម ហើយប្រាប់ឃ្លានានា ដែលមានអត្ថន័យចំពោះពួកគេ ។
« បើ [ អ្នក ] បានស្គាល់វិវរណៈ នោះអ្នកគ្មានការសង្ស័យទេ--ទោះជាផ្ទាល់ខ្លួន ជាសង្គម ឬនយោបាយ ឬវិជ្ជាជីវៈ-- ដែលចាំបាច់ត្រូវទៅដោយគ្មានចម្លើយនោះឡើយ ។ វាមាននូវភាពពោរពេញនៃដំណឹងល្អដ៏អស់កល្បជានិច្ច ។ នៅក្នុងនោះ យើងរកឃើញគោលការណ៍នៃសេចក្ដីពិត ដែលនឹងដោះស្រាយរាល់ការច្របូកច្របល់ និងរាល់បញ្ហា និងរាល់ទ្វេគ្រោះ ដែលនឹងប្រឈមមុខចំពោះគ្រួសារមនុស្ស ឬបុគ្គលម្នាក់ៗ » ( « Teach the Scriptures » [ address to CES religious educators ថ្ងៃទី ១៤ ខែ តុលា ឆ្នាំ ១៩៧៧ ] ទំព័រ ៣–៤ »LDS.org ។
-
តើឃ្លាណាដែលអ្នកចាប់អារម្មណ៍ ? ហេតុអ្វី ?
សូមបញ្ចប់មេរៀនដោយការចែកចាយអំពីរបៀបដែលគោលលទ្ធិ និងគោលការណ៍ទាំងឡាយក្នុងបទគម្ពីរ បានប្រទានពរដល់ជីវិតរបស់អ្នក ពេលអ្នកបានរកឃើញ ហើយអនុវត្តវាក្នុងជីវិត ។ សូមពិចារណាធ្វើការអញ្ជើញដល់សិស្សឲ្យចែកចាយគោលលទ្ធិ ឬគោលការណ៍មួយ ដែលពួកគេបានរកឃើញនៅក្នុងបទគម្ពីរ និងរបៀបដែលវាបានប្រទានពរដល់ជីវិតរបស់ពួកគេ ។ សូមលើកទឹកចិត្តសិស្សឲ្យស្វែងរកសេចក្ដីពិតដ៏អស់កល្បជានិច្ចទាំងនេះដោយឧស្សាហ៍ព្យាយាម នៅពេលពួកគេសិក្សាបទគម្ពីរ ហើយអនុវត្តវាក្នុងជីវិតរបស់ពួកគេ ។
សេចក្តីអធិប្បាយនិង ព័ត៌មានសាច់រឿង
ការរកឃើញ និងការអនុវត្តគោលលទ្ធិ និងគោលការណ៍ដំណឹងល្អ
ប្រធាន អ៊ែសរ៉ា ថាហ្វ ប៊ែនសឹន បានផ្ដល់ការណែនាំនេះ អំពីការសិក្សាព្រះគម្ពីរ ៖
« រឿងដ៏សំខាន់បំផុតមួយដែលអ្នកអាចធ្វើ…គឺត្រូវជ្រមុជខ្លួនអ្នកទៅក្នុងបទគម្ពីរ ។ ស្រាវជ្រាវវាដោយឧស្សាហ៍ព្យាយាម ។ ទទួលទាននូវព្រះបន្ទូលទាំងឡាយនៃព្រះគ្រីស្ទ ។ រៀនគោលលទ្ធិ។ ទន្ទេញចាំគោលការណ៍ទាំងឡាយដែលមាននៅក្នុងនោះ » ( The Power of the Word » Ensign ខែ ឧសភា ឆ្នាំ ១៩៨៦ ទំព័រ ៨១ ) ។