ព្រះគម្ពីរ
យ៉ូសែប ស៊្មីធ—ម៉ាថាយ 1


យ៉ូសែប ស៊្មីធ — ម៉ាថាយ

ជា​ការ​ដកស្រង់​ចេញ​ពី​ការ​បកប្រែ​ព្រះ​គម្ពីរ​ប៊ីប ដូចដែល​បាន​បើក​សម្ដែង​ប្រាប់​ដល់ យ៉ូសែប ស៊្មីធ នៅ​ឆ្នាំ ១៨៣១ ៖ ម៉ាថាយ ២៣:៣៩ និង​ជំពូក​ទី ២៤

ជំពូក​ទី ១

ព្រះ​យេស៊ូវ​ទ្រង់​ប្រាប់​ទុកជាមុន អំពី​ការ​បំផ្លិចបំផ្លាញ​ដែល​នឹង​កើត​ឡើង​ដល់​ក្រុង​យេរូសាឡិម — ទ្រង់​ព្រម​ទាំង​បរិយាយ​ប្រាប់​ពី​ការ​យាង​មក​លើក​ទី​ពីរ​របស់​កូន​មនុស្ស និង​ការ​បំផ្លិចបំផ្លាញ​ពួក​ទុច្ចរិត។

ត្បិត​ខ្ញុំ​ប្រាប់​អ្នក​រាល់​គ្នា​ថា អ្នក​រាល់​គ្នា​នឹង​លែង​ឃើញ​ខ្ញុំ​ទៀត​ហើយ​ពី​នេះ​ទៅ​មុខ ហើយ​នឹង​ដឹង​ថា ខ្ញុំ​នេះ​ហើយ​ជា​អ្នក​នោះ ដែល​ត្រូវ​សរសេរ​ទុក​ដោយ​ព្យាការី ដរាប​ដល់​អ្នក​រាល់​គ្នា​នឹង​និយាយ​ថា ៖ សូម​មាន​ព្រះ​ពរ​ដល់​ព្រះ​អង្គ​ដែល​យាង​មក​ដោយ​នូវ​ព្រះ​នាម​ព្រះ​អម្ចាស់ មក​លើ​ពពក​នៅ​លើ​មេឃ មាន​ទាំង​ពួក​ទេវតា​បរិសុទ្ធ​ទាំង​អស់​គ្នា​មក​ជា​មួយ​ទ្រង់​ផង។ ខណៈ​នោះ ស្រាប់​តែ​ពួក​សិស្ស​ទ្រង់​យល់​ថា ព្រះ​អង្គ​នឹង​យាង​មក​លើ​ផែនដី​ម្ដង​ទៀត បន្ទាប់​ពី​ទ្រង់​បាន​ទទួល​ការ​រុងរឿង ហើយ​បាន​ពាក់​មកុដ​នៅ​ខាង​ស្ដាំ​ព្រះ​ហស្ត​នៃ​ព្រះ

ហើយ​ព្រះ​យេស៊ូវ​បាន​យាង​ចេញ​ពី​ព្រះ​វិហារ​ទៅ ហើយ​ពួក​សិស្ស​ទ្រង់​បាន​មក​រក​ទ្រង់​ដើម្បី​ស្ដាប់​ទ្រង់​ដោយ​ទូល​ថា ៖ លោកគ្រូ សូម​បង្ហាញ​ដល់​យើង​ខ្ញុំ​ពី​ការ​សាង​ព្រះ​វិហារ ដូចដែល​ព្រះ​អង្គ​បាន​មាន​ព្រះ​បន្ទូល​ថា — របស់​ទាំង​នោះ​នឹង​ត្រូវ​ទម្លាក់​ចុះ ហើយ​ចោល​ស្ងាត់​ទុក​ឲ្យ​អ្នក។

ហើយ​ព្រះ​យេស៊ូវ​ទ្រង់​មាន​ព្រះ​បន្ទូល​ទៅ​គេ​ថា ៖ តើ​អ្នក​រាល់​គ្នា​មើល​មិន​ឃើញ​ការណ៍​ទាំង​អស់​នេះ​ឬ​ទេ ហើយ​តើ​អ្នក​រាល់​គ្នា​មិន​យល់​ទេ​ឬ​អី? ខ្ញុំ​ប្រាប់​អ្នក​រាល់​គ្នា​ជា​ប្រាកដ​ថា នៅ​ទី​នេះ គឺ​នៅ​លើ​ព្រះ​វិហារ​នេះ​នឹង​គ្មាន​ថ្ម​នៅ​ត្រួត​លើ​ថ្ម ដែល​មិន​ត្រូវ​ទម្លាក់​ចុះ​នោះ​ទេ។

ហើយ​ព្រះ​យេស៊ូវ​បាន​ចេញ​ពី​ពួក​គេ ហើយ​ទៅ​លើ​ភ្នំ​ដើម​អូលីវ។ ហើយ​កាល​ទ្រង់​គង់នៅ​លើ​ភ្នំ​ដើម​អូលីវ នោះ​ពួក​សិស្ស​បាន​មក​ឯ​ទ្រង់​ដោយ​ឡែក ដោយ​ទូល​ថា ៖ សូម​ប្រាប់​យើង​ខ្ញុំ តើ​កាលណា​ការណ៍​ទាំង​នេះ​ដែល​ព្រះ​អង្គ​បាន​មាន​ព្រះ​បន្ទូល​ពី​ការ​បំផ្លិចបំផ្លាញ​ព្រះ​វិហារ និង​ពួក​សាសន៍​យូដា​នឹង​មក​ដល់ ហើយ​តើ​មាន​ទី​សម្គាល់​ណា​ប្រាប់​ពី​ការ​យាង​មក​របស់​ទ្រង់ និង​ពី​ចុង​បំផុត​នៃ​ពិភពលោក ឬ​ការ​បំផ្លិចបំផ្លាញ​នៃ​ពួក​ទុច្ចរិត ដែល​ជា​ចុង​បំផុត​នៃ​ពិភពលោក​នោះ?

ហើយ​ព្រះ​យេស៊ូវ​ទ្រង់​ឆ្លើយ ហើយ​មាន​ព្រះ​បន្ទូល​ទៅ​ពួក​គេ​ថា ៖ ចូរ​ប្រយ័ត្ន ដើម្បី​កុំ​ឲ្យ​អ្នក​ណា​បញ្ឆោត​អ្នក​ឡើយ

ត្បិត​នឹង​មាន​មនុស្ស​ជា​ច្រើន​មក​ដោយ​នូវ​ឈ្មោះ​ខ្ញុំ ដោយ​និយាយ​ថា — ខ្ញុំ​ជា​ព្រះ​គ្រីស្ទ — ហើយ​នឹង​បញ្ឆោត​មនុស្ស​ជា​ច្រើន

គ្រា​នោះ គេ​នឹង​បញ្ជូន​អ្នក​រាល់​គ្នា​ទៅ​ឲ្យ​មាន​សេចក្ដី​វេទនា ហើយ​ព្រម​ទាំង​សម្លាប់​អ្នក​រាល់​គ្នា ហើយ​អ្នក​រាល់​គ្នា​នឹង​ត្រូវ​គ្រប់​ទាំង​សាសន៍​ស្អប់ ដោយ​ព្រោះ​ឈ្មោះ​ខ្ញុំ

ហើយ​នៅ​គ្រា​នោះ មនុស្ស​ជា​ច្រើន​នឹង​រវាត​ចិត្ត​ចេញ ហើយ​នឹង​ក្បត់​គ្នា​ទៅ​វិញ​ទៅ​មក ហើយ​នឹង​ស្អប់​គ្នា​ទៅ​វិញ​ទៅ​មក

ហើយ​នឹង​មាន​ព្យាការី​ក្លែងក្លាយ​ជា​ច្រើន​កើត​ឡើង ហើយ​នឹង​បញ្ឆោត​មនុស្ស​ជា​ច្រើន​ដែរ

១០ហើយ​ពី​ព្រោះ​សេចក្ដី​ទុច្ចរិត​នឹង​ចម្រើន​ជា​ច្រើន​ឡើង បាន​ជា​សេចក្ដី​ស្រឡាញ់​នៃ​មនុស្ស​ជា​ច្រើន​នឹង​រសាយ​អស់​ទៅ

១១ប៉ុន្តែ​អ្នក​ណា​ដែល​កាន់ខ្ជាប់ ហើយ​មិន​ព្រម​ចុះ​ចាញ់​ទេ អ្នក​នោះ​នឹង​បាន​សង្គ្រោះ។

១២ហេតុ​ដូច្នេះ​ហើយ កាលណា​អ្នក​រាល់​គ្នា​ឃើញ​សេចក្ដី​ខ្ពើម​ឆ្អើម​នៃ​ការ​បង្ខូច​បំផ្លាញ ដែល​បាន​ពោល​ដល់​ដោយ​ព្យាការី​ដានីយ៉ែល អំពី​សេចក្ដី​បំផ្លិចបំផ្លាញ​ក្រុង​យេរូសាឡិម គ្រា​នោះ អ្នក​រាល់​គ្នា​នឹង​ឈរ​នៅ​ក្នុង​ទី​បរិសុទ្ធ អ្នក​ណា​ដែល​អាន​មើល សូម​យល់​ចុះ។

១៣គ្រា​នោះ ចូរ​ឲ្យ​ពួក​អ្នក​ដែល​នៅ​ស្រុក​យូដា​រត់​ចេញ​ទៅ​ឯ​ភ្នំ​ទាំង​ឡាយ​ចុះ

១៤ចូរ​ឲ្យ​អ្នក​ណា​ដែល​នៅ​លើ​ដំបូល​ផ្ទះ​រត់​ចេញ​ទៅ ហើយ​ចូរ​កុំ​ឲ្យ​ត្រឡប់​ទៅ​យក​របស់​អ្វី​ពី​ផ្ទះ​របស់​ខ្លួន​ឡើយ

១៥ឬ​មិន​ឲ្យ​អ្នក​ណា​ដែល​នៅ​ស្រែ​ចម្ការ​ត្រឡប់​មក​វិញ ដើម្បី​នឹង​យក​សំលៀកបំពាក់​របស់​ខ្លួន​ឡើយ

១៦ហើយ​នៅ​គ្រា​នោះ វេទនា​ហើយ ដល់​អស់​អ្នក​ណា​ដែល​មាន​ផ្ទៃ​ពោះ ហើយ​ដល់​អស់​អ្នក​ណា​ដែល​បំបៅ​កូន

១៧ហេតុ​ដូច្នេះ​ហើយ ចូរ​អ្នក​រាល់​គ្នា​អធិស្ឋាន​ដល់​ព្រះ​អម្ចាស់ សូម​កុំ​ឲ្យ​អ្នក​ត្រូវ​រត់​នៅ​រដូវរងា ឬ​នៅ​ថ្ងៃ​ឈប់​សម្រាក​ឡើយ

១៨ត្បិត​នៅ​គ្រា​នោះ នឹង​មាន​សេចក្ដី​វេទនា​ជា​ខ្លាំង​ណាស់​ដល់​ពួក​សាសន៍​យូដា និង​មក​លើ​បណ្ដាជន​នៅ​ក្រុង​យេរូសាឡិម ដូច​មិនដែល​បាន​ចាត់​ពី​ព្រះ​មក​លើ​សាសន៍​អ៊ីស្រាអែល​ដល់​ម្ល៉េះ​ឡើយ តាំង​ពី​ដើម​កំណើត​នគរ​របស់​ពួក​គេ រហូត​មក​ដល់​សព្វ​ថ្ងៃ​នេះ ទេ មិនដែល​មាន​យ៉ាង​ដូច្នោះ​ឡើយ ហើយ​នឹង​មិន​ចាត់​មក​លើ​សាសន៍​អ៊ីស្រាអែល​ទៀត​ដែរ។

១៩គ្រប់​ការណ៍​ទាំង​អស់​ដែល​ធ្លាក់​លើ​ពួក​គេ នោះ​គ្រាន់តែ​ជា​ការ​ចាប់​ផ្ដើម​នៃ​សេចក្ដី​ទុក្ខ​សោក ដែល​នឹង​ធ្លាក់​មក​លើ​គេ។

២០ហើយ​លើក​លែងតែ​បន្ថយ​គ្រា​នោះ​ឲ្យ​ខ្លី​ចុះ នោះ​គ្មាន​មនុស្ស​ណា​នឹង​បាន​សង្គ្រោះ​នៅ​ក្នុង​សាច់​ឈាម​ឡើយ ប៉ុន្តែ​ដោយ​ព្រោះ​យល់​ដល់​ពួក​រើស​តាំង ស្រប​តាម​សេចក្ដី​សញ្ញា ទើប​ថ្ងៃ​នោះ​នឹង​បាន​បន្ថយ​ឲ្យ​ខ្លី​ចុះ។

២១មើល​ចុះ ការណ៍​ទាំង​នេះ​ខ្ញុំ​បាន​ប្រាប់​ដល់​អ្នក​រាល់​គ្នា អំពី​ពួក​សាសន៍​យូដា ហើយ​ជា​ថ្មី​ទៀត បន្ទាប់​ពី​សេចក្ដី​វេទនា​នៅ​គ្រា​នោះ​នឹង​កើត​មក​លើ​ក្រុង​យេរូសាឡិម បើ​សិន​ជា​មាន​អ្នក​ណា​មួយ​ប្រាប់​អ្នក​រាល់​គ្នា​ថា មើល ព្រះ​គ្រីស្ទ​គង់នៅ​ទី​នេះ ឬ​នៅ​ទី​នោះ នោះ​កុំ​ឲ្យ​ជឿ​គេ​ឡើយ

២២ត្បិត​នៅ​គ្រា​នោះ​នឹង​មាន​ព្រះ​គ្រីស្ទ​ក្លែងក្លាយ ហើយ​ព្យាការី​ក្លែងក្លាយ​កើត​ឡើង ហើយ​នឹង​បង្ហាញ​ទី​សម្គាល់​យ៉ាង​ធំ និង​ការ​អស្ចារ្យ ដរាប​ដល់​ពួក​គេ​អាច​បញ្ឆោត​ទាំង​ពួក​រើស​តាំង ដែល​ជា​ពួក​រើស​តាំង ស្រប​តាម​សេចក្ដី​សញ្ញា បើ​សិន​ជា​ធ្វើ​ទៅ​បាន។

២៣មើល​ចុះ ខ្ញុំ​និយាយ​ពី​ការណ៍​ទាំង​នេះ​ប្រាប់​ដល់​អ្នក​រាល់​គ្នា ដោយ​ព្រោះ​យល់​ដល់​ពួក​រើស​តាំង ហើយ​អ្នក​រាល់​គ្នា​ក៏​នឹង​ឮ​អំពី​សង្គ្រាម និង​ពាក្យ​ចចាម​អារាម​អំពី​សង្គ្រាម​ទាំង​ឡាយ ចូរ​មើល​ឲ្យ​ឃើញ​ថា​អ្នក​រាល់​គ្នា​កុំ​ខ្វល់​ឡើយ ត្បិត​គ្រប់​អ្វីៗ​ទាំង​អស់​ដែល​ខ្ញុំ និយាយ​ប្រាប់​អ្នក​រាល់​គ្នា នោះ​ច្បាស់​ជា​នឹង​បាន​សម្រេច ប៉ុន្តែ​ពុំ​ទាន់​ដល់​ចុង​បំផុត​នៅ​ឡើយ​ទេ។

២៤មើល​ចុះ ខ្ញុំ​បាន​ប្រាប់​អ្នក​រាល់​គ្នា​ទុកជាមុន

២៥ហេតុ​ដូច្នោះ​ហើយ បើ​ពួក​គេ​នឹង​ប្រាប់​អ្នក​រាល់​គ្នា​ថា ៖ មើល​ចុះ ទ្រង់​គង់នៅ​ទី​រហោស្ថាន ចូរ​កុំ​ឲ្យ​ទៅ​ឡើយ ៖ មើល​ចុះ ទ្រង់​គង់នៅ​ក្នុង​បន្ទប់​សម្ងាត់ ចូរ​កុំ​ឲ្យ​ជឿ​ឡើយ

២៦ត្បិត​ដូច​ជា​ពន្លឺ​នៅ​ពេល​ព្រលឹម​ស្រាង កំពុងតែ​រះ​ឡើង​ពី​ទិស​ខាង​កើត ហើយ​ភ្លឺ​ដល់​ទិស​ខាង​លិច ហើយ​គ្រប​ដណ្ដប់​មក​លើ​ផែនដី​ទាំង​មូល​ជា​យ៉ាង​ណា នោះ​ការ​យាង​មក​នៃ​កូន​មនុស្ស​ក៏​នឹង​ទៅ​ជា​យ៉ាង​ដូច្នោះ​ដែរ។

២៧ហើយ​ឥឡូវ​នេះ ខ្ញុំ​បង្ហាញ​ដល់​អ្នក​រាល់​គ្នា​នូវ​ពាក្យ​ប្រៀប​ប្រដូច​មួយ។ មើល​ចុះ នៅ​កន្លែង​ណា​ដែល​មាន​ខ្មោច នោះ​ឥន្ទ្រី​នឹង​ប្រជុំ​គ្នា​នៅ​កន្លែង​នោះ​ឯង ដំណើរ​នេះ​ក៏​បែប​ដូច្នោះ​ដែរ គឺ​ពួក​រើស​តាំង​របស់​យើង​នឹង​ប្រជុំ​គ្នា​ពី​ទិស​ទាំង​បួន​នៃ​ផែនដី។

២៨ហើយ​ពួក​គេ​នឹង​ឮ​ពី​សង្គ្រាម និង​ពាក្យ​ចចាម​អារាម​អំពី​សង្គ្រាម​ទាំង​ឡាយ។

២៩មើល​ចុះ ខ្ញុំ​និយាយ​ដោយ​យល់​ដល់​ពួក​រើស​តាំង​របស់​ខ្ញុំ ពី​ព្រោះ​សាសន៍​មួយ​នឹង​លើក​គ្នា​ទាស់​នឹង​សាសន៍​មួយ នគរ​មួយ​នឹង​ទាស់​នឹង​នគរ​មួយ នឹង​មាន​អំណត់ និង​ជំងឺ​អាសន្នរោគ និង​ផែនដី​កក្រើក​នៅ​កន្លែង​ផ្សេងៗ។

៣០ហើយ​ជា​ថ្មី​ទៀត ពី​ព្រោះ​សេចក្ដី​ទុច្ចរិត​នឹង​ចម្រើន​ជា​ច្រើន​ឡើង បាន​ជា​សេចក្ដី​ស្រឡាញ់​នៃ​មនុស្ស​នឹង​រសាយ​អស់​ទៅ ប៉ុន្តែ​អ្នក​ណា​ដែល​នឹង​មិន​ព្រម​ចុះ​ចាញ់​ទេ អ្នក​នោះ​នឹង​បាន​សង្គ្រោះ។

៣១ហើយ​ជា​ថ្មី​ទៀត ដំណឹង​ល្អ​នៃ​នគរ​នេះ​នឹង​ត្រូវ​បាន​ផ្សាយ​នៅ​ពាស​ពេញ​ពិភពលោក ទុក​ជាទី​បន្ទាល់​ដល់​គ្រប់​ទាំង​សាសន៍ ហើយ​នៅ​គ្រា​នោះ ទើប​ចុង​បំផុត​មក​ដល់ ឬ​សេចក្ដី​បំផ្លិចបំផ្លាញ​ដល់​ពួក​ទុច្ចរិត

៣២ហើយ​ជា​ថ្មី​ទៀត សេចក្ដី​ខ្ពើម​ឆ្អើម​នៃ​ការ​បង្ខូច​បំផ្លាញ ដែល​បាន​ពោល​ដល់​ដោយ​ព្យាការី​ដានីយ៉ែល​នឹង​បាន​សម្រេច។

៣៣ហើយ​ក្រោយ​សេចក្ដី​វេទនា​របស់​ថ្ងៃ​នោះ​មក ស្រាប់​តែ​ព្រះ​អាទិត្យ​នឹង​ទៅ​ជា​ងងឹត ហើយ​ព្រះ​ចន្ទ​នឹង​លែង​ភ្លឺ ហើយ​អស់​ទាំង​តារា​នឹង​ធ្លាក់​ចុះ​ពីលើ​មេឃ ហើយ​អំណាច​ទាំង​ឡាយ​នៅ​លើ​មេឃ​នឹង​ត្រូវ​កក្រើករំពើក។

៣៤ខ្ញុំ​ប្រាប់​អ្នក​រាល់​គ្នា​ជា​ប្រាកដ​ថា មនុស្ស​តំណ​នេះ ដែល​ការណ៍​ទាំង​នេះ​នឹង​ត្រូវ​បាន​បង្ហាញ​មក នោះ​នឹង​មិន​កន្លង​ហួស​បាត់​ទៅ​ឡើយ ទាល់​តែ​គ្រប់​ទាំង​អស់​ដែល​ខ្ញុំ​បាន​ប្រាប់​អ្នក​រាល់​គ្នា​នឹង​បាន​សម្រេច​សិន។

៣៥ទោះ​ជា​គ្រា​នោះ​នឹង​មក​ដល់​ក៏​ដោយ កាល​ផ្ទៃ​មេឃ ហើយ​ផែនដី​នឹង​កន្លង​បាត់​ទៅ គង់តែ​ពាក្យ​ខ្ញុំ​មិនដែល​បាត់​ឡើយ ប៉ុន្តែ​គ្រប់​ទាំង​អស់​នឹង​បាន​សម្រេច​វិញ។

៣៦ហើយ​ដូច​ជា​ខ្ញុំ​បាន​ប្រាប់​អ្នក​រាល់​គ្នា​ពី​មុន​មក​ហើយ​ថា ក្រោយ​សេចក្ដី​វេទនា​របស់​គ្រា​នោះ​មក ហើយ​អំណាច​ទាំង​ឡាយ​នៅ​លើ​មេឃ​នឹង​ត្រូវ​កក្រើករំពើក គ្រា​នោះ​ទើប​ទី​សម្គាល់​របស់​កូន​មនុស្ស​នឹង​លេច​មក​នៅ​លើ​មេឃ ហើយ​នៅ​គ្រា​នោះ គ្រប់​ពូជ​អំបូរ​មនុស្ស​នៅ​ផែនដី​នឹង​គក់​ទ្រូង​យំ ហើយ​ពួក​គេ​នឹង​ឃើញ​កូន​មនុស្ស​មក​លើ​ពពក​នៅ​លើ​មេឃ មាន​ទាំង​ព្រះ​ចេស្ដា និង​សិរី​ល្អ​ជា​ខ្លាំង

៣៧ហើយ​អស់​អ្នក​ណា​ដែល​រក្សា​ពាក្យ​ខ្ញុំ​ទុក នោះ​នឹង​មិន​ត្រូវ​បញ្ឆោត​ឡើយ ពី​ព្រោះ​កូន​មនុស្ស​នឹង​មក ហើយ​ទ្រង់​នឹង​ចាត់​ពួក​ទេវតា​របស់ទ្រង់​ឲ្យ​មក​មុនទ្រង់ ដោយ​សូរ​ផ្លុំ​ត្រែ​ជា​ខ្លាំង ហើយ​ពួក​គេ​នឹង​ប្រមូល​ពួក​រើស​តាំង​របស់​ទ្រង់ ដែល​នៅ​សល់​ទាំង​ប៉ុន្មាន​ពី​ទិស​ទាំង​បួន ចាប់​តាំង​ពី​ជើង​មេឃ​ម្ខាង រហូត​ដល់​ជើង​មេឃ​ម្ខាង។

៣៨ឥឡូវ​នេះ ចូរ​រៀន​សេចក្ដី​ប្រៀបប្រដូច​អំពី​ដើម​ល្វា​ថា — កាលណា​មែក​វា​នៅ​ទន់​នៅ​ឡើយ ហើយ​វា​ចាប់​ផ្ដើម​ដុះ​ស្លឹក​ឡើង នោះ​អ្នក​រាល់​គ្នា​ដឹង​ថា រដូវ​ក្ដៅ​នៅ​ជិត​ដៃ​បង្កើយ

៣៩ដំណើរ​នេះ​ក៏​បែប​ដូច្នោះ​ដែរ គឺ​ពួក​រើស​តាំង​របស់​ខ្ញុំ កាលណា​ពួក​គេ​នឹង​ឃើញ​គ្រប់​ការណ៍​ទាំង​នេះ នោះ​ពួក​គេ​ក៏​នឹង​ដឹង​ថា លោក​ជិត​មក​ដល់​ហើយ ក៏​នៅ​មាត់ទ្វារ​ផង

៤០ប៉ុន្តែ​ត្រង់​ថ្ងៃ​នោះ និង​ម៉ោង​នោះ គ្មាន​អ្នក​ណា​ដឹង​ទេ ទេ ទោះ​ទាំង​ពួក​ទេវតា​នៃ​ព្រះ​ដែល​នៅ​លើ​ស្ថាន​សួគ៌​ក៏​មិន​ដឹង​ដែរ ប៉ុន្តែ​មាន​តែ​ព្រះ​វរបិតា​របស់​ខ្ញុំ​ប៉ុណ្ណោះ។

៤១ប៉ុន្តែ​ដូច​ជា​នៅ​ជំនាន់​លោក​ណូអេ​យ៉ាង​ណា នោះ​កូន​មនុស្ស​ក៏​នឹង​មក​ជា​យ៉ាង​ដូច្នោះ​ដែរ

៤២ត្បិត​នឹង​កើត​ដល់​ពួក​គេ​ដូច​ជា​នៅ​គ្រា​មុន​ទឹក​លិច​ដែរ ត្បិត​ដរាប​ដល់​ថ្ងៃ​ដែល​លោក​ណូអេ​ចូល​ទៅ​ក្នុង​ទូក​ធំ នោះ​ពួក​គេ​កំពុងតែ​ស៊ីផឹក ហើយ​រៀបការ​ប្ដី​ប្រពន្ធ

៤៣ហើយ​ឥត​បាន​ដឹង​ខ្លួន​ឡើយ ទាល់​តែ​ទឹក​ជន់​ឡើង ហើយ​យក​គេ​ទៅ​ទាំង​អស់​គ្នា នោះ​ដល់​កាល​កូន​មនុស្ស​មក ក៏​នឹង​មាន​ដូច្នោះ​ដែរ។

៤៤នៅ​គ្រា​នោះ អ្វីៗ​ដែល​បាន​សរសេរ​ទុក​នឹង​បាន​សម្រេច គឺ​នៅ​ថ្ងៃ​ចុង​ក្រោយ​បង្អស់​នឹង​មាន​មនុស្ស​ពីរ​នាក់​នៅ​ចម្ការ ម្នាក់​នឹង​បាន​យក​ទៅ ហើយ​ម្នាក់​ទុក​នៅ

៤៥មនុស្ស​ពីរ​នាក់​កំពុងតែ​កិន​ម្សៅ ម្នាក់​នឹង​បាន​យក​ទៅ ហើយ​ម្នាក់​ទុក​នៅ

៤៦ហើយ​អ្វី​ក៏​ដោយ​ដែល​ខ្ញុំ​ប្រាប់​ដល់​មនុស្ស​ម្នាក់ នោះ​ខ្ញុំ​ប្រាប់​ដល់​មនុស្ស​ទាំង​អស់ ដូច្នេះ​ហើយ ឲ្យ​ចាំ​យាម ត្បិត​អ្នក​រាល់​គ្នា​មិន​ដឹង​ជា​ពេល​ណា ដែល​ព្រះ​អម្ចាស់​នៃ​អ្នក​រាល់​គ្នា​នឹង​យាង​មក​ទេ។

៤៧ប៉ុន្តែ​ចូរ​ដឹង​សេចក្ដី​នេះ​ចុះ បើ​សិន​ជា​ម្ចាស់​ផ្ទះ​ដែល​ល្អ​បាន​ដឹង​ថា​ចោរ​នឹង​មក​នៅ​យាម​ណា នោះ​គាត់​នឹង​បាន​ចាំ​យាម ហើយ​មិន​ទ្រាំ​ឲ្យ​ចោរ​ទំ​លុះ​ចូល​ផ្ទះ​គាត់​បាន​ទេ ប៉ុន្តែ​ច្បាស់​ជា​បាន​រង់ចាំ​ជាស្រេច។

៤៨ហេតុ​ដូច្នេះ​ហើយ ឲ្យ​អ្នក​រាល់​គ្នា​ប្រុងប្រៀប​ខ្លួន​ជាស្រេច​ដែរ ត្បិត​កូន​មនុស្ស​នឹង​មក​នៅ​វេលា​ដែល​អ្នក​រាល់​គ្នា​មិន​គិត។

៤៩ខណៈ​នោះ តើ​អ្នក​ណា​ជា​អ្នក​បម្រើ​ស្មោះត្រង់ ហើយ​មាន​មារយាទ ដែល​ចៅហ្វាយ​បាន​តាំង​ឲ្យ​ត្រួត​លើ​ពួក​ផ្ទះ​លោក និង​ឲ្យ​អាហារ​គេ​បរិភោគ តាម​ត្រូវ​ពេល?

៥០មាន​ពរ​ហើយ​ដល់​អ្នក​បម្រើ​នោះ ដែល​ចៅហ្វាយ​ខ្លួន​ឃើញ​ថា​កំពុងតែ​ធ្វើ​ការ ក្នុង​កាល​លោក​មក​ដល់ ហើយ​ខ្ញុំ​ប្រាប់​អ្នក​រាល់​គ្នា​ជា ប្រាកដ​ថា លោក​នឹង​តាំង​អ្នក​នោះ​ឡើង​ឲ្យ​ត្រួត​លើ​របស់​ទ្រព្យ​លោក​ទាំង​អស់។

៥១ប៉ុន្តែ​បើ​សិន​ជា​អ្នក​បម្រើ​អាក្រក់​នោះ​នឹង​គិត​ក្នុង​ចិត្ត​ថា ចៅហ្វាយ​អញ​ក្រ​មក

៥២ហើយ​ក៏​តាំង​វាយ​ដំ​ពួក​គូកន​ខ្លួន ហើយ​ព្រម​ទាំង​ស៊ីផឹក​ជាមួយ​នឹង​ពួក​មនុស្ស​ប្រមឹក​ផង

៥៣ចៅហ្វាយ​នៃ​អ្នក​បម្រើ​នោះ​នឹង​មក​ដល់ នៅ​ថ្ងៃ​ណា​ដែល​វា​មិន​នៅ​ចាំ ជា​វេលា​ណា​ដែល​វា​មិន​ដឹង

៥៤ហើយ​នឹង​កាត់​វា​ជា​ដុំៗ ហើយ​នឹង​ឲ្យ​វា​មាន​ចំណែក​ជាមួយ​នឹង​ពួក​មនុស្ស​មាន​ពុត​ផង នៅ​ទី​នោះ​នឹង​យំ ហើយ​សង្កៀត​ធ្មេញ។

៥៥ហើយ​ទើប​ចុង​បំផុត​នៃ​ពួក​ទុច្ចរិត​មក​ដល់ ស្រប​តាម​ពាក្យ​ព្យាករណ៍​នៃ​លោក​ម៉ូសេ ដែល​ថា ៖ ពួក​គេ​នឹង​ត្រូវ​កាត់កាល់​ចេញ​ពី​ចំណោម​មនុស្ស ប៉ុន្តែ​ពុំ​ទាន់​ដល់​ចុង​បំផុត​នៃ​ផែនដី​នៅ​ឡើយ​ទេ ប៉ុន្តែ​ជា​ឆាប់ៗ ៕