គោលលទ្ធិ និង សេចក្តីសញ្ញា ៨៤-៨៧ ( មេរៀនទី ១៨ )

ការរៀបចំសម្ភារសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

ខាងក្រោម នេះគឺជាសេចក្តីសង្ខេបនៃគោលលទ្ធិ និងគោលការណ៍ដែលសិស្សបានរៀន នៅពេលពួកគេបានសិក្សា គោលលទ្ធិ និង សេចក្ដីសញ្ញា ៨៤-៨៧ ( មេរៀនទី ១៨ ) មិនមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតលើគោលលទ្ធិ និង គោលការណ៍តែពីរបីទាំងនេះប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ (គោលលទ្ធិ និង សេចក្តីសញ្ញា ៨៤:១-៤២)

សិស្សបានសិក្សាពីវិវរណៈមួយអំពីព្រះវិហារបរិសុទ្ធ ដែលត្រូវបានសាងសង់ឡើងនៅក្នុងទីក្រុងយេរ៉ូសាឡិមថ្មី ហើយពួកគេក៏បានអានផងដែរអំពីកិច្ចខិតខំរបស់ម៉ូសេ ដើម្បីរៀបចំប្រជាជនរបស់លោកឲ្យចូលទៅក្នុងវត្តមានរបស់ព្រះ ។ សិស្សបានរៀនគោលការណ៍ខាងក្រោម ៖ ដើម្បីប្រែក្លាយដូចជាព្រះ ហើយរស់នៅក្នុងវត្តមានរបស់ទ្រង់បាន នោះយើងត្រូវតែទទួលពិធីបរិសុទ្ធនានានៃបព្វជិតភាពមិលគីស្សាដែក ហើយប្រសិនបើអស់អ្នកដែលបានទទួលបព្វជិតភាពតម្កើងការហៅបម្រើរបស់ខ្លួន នោះព្រះនឹងញែកពួកគេចេញឲ្យបានបរិសុទ្ធ ហើយប្រទានដល់ពួកគេនូវអ្វីៗទាំងអស់ដែលទ្រង់មាន ។

ថ្ងៃទី ២ (គោលលទ្ធិ និង សេចក្តីសញ្ញា ៨៤:៤៣-១២០)

នៅក្នុងមេរៀននេះសិស្សបានរៀនអំពីគោលការណ៏ពីរ ដែលអាចជួយពួកគេឲ្យត្រឡប់ទៅក្នុងវត្តមានរបស់ព្រះវិញ៖ ប្រសិនបើយើងព្យាយាមស្តាប់តាមព្រះបន្ទូលរបស់ព្រះ នោះយើងនឹងត្រូវបានបំភ្លឺដោយព្រះវិញ្ញាណនៃព្រះគ្រីស្ទ ហើយប្រសិនបើយើងស្តាប់តាមព្រះវិញ្ញាណនៃព្រះយេស៊ូវគ្រីស្ទ នោះយើងនឹងអាចទៅកាន់ព្រះវរបិតា ។ សិស្សក៏បានរៀនផងដែរថាដួងចិត្តរបស់យើងនឹងត្រូវក្លាយជាងងឹត ហើយយើងនឹងត្រូវបានដាក់នៅក្នុងក្រោមការកាត់ទោស ប្រសិនបើយើងចាត់ទុកព្រះបន្ទូលនៃព្រះគ្មានប្រយោជន៍នោះ ។ ព្រះឱវាទឲ្យសិក្សាព្រះគម្ពីរដោយស្មោះត្រង់ ហើយរស់នៅតាមអ្វីដែលពួកគេរៀនក៏ត្រូវបានបញ្ជាក់ម្តងទៀតនៅក្នុងមេរៀននេះ ។ លើសពីនោះទៀត សិស្សបានរៀនថាពួកបរិសុទ្ធថ្ងៃចុងក្រោយគ្រប់រូបមានទំនួលខុសត្រូវ ដើម្បីធ្វើនូវចំណែករបស់ខ្លួន ក្នុងការជួយឲ្យដំណឹងល្អឆ្ពោះទៅកាន់ពិភពលោកទាំងមូល ។

ថ្ងៃទី ៣ (គោលលទ្ធិ និង សេចក្តីសញ្ញា ៨៥-៨៦)

នៅក្នុងមេរៀននេះសិស្សបានពិចារណាអំពីសារៈសំខាន់នៃកំណត់ត្រារបស់សាសនាចក្រ ។ ពួកគេបានរៀនថា ប្រសិនបើយើងរស់នៅតាមក្រឹត្យវិន័យនៃព្រះ នោះឈ្មោះរបស់យើងនឹងត្រូវបានសរសេរនៅក្នុងកំណត់ត្រានៃសាសនាចក្រក្នុងនាមជាសមាជិកស្មោះត្រង់ ។ សិស្សក៏ទទួលបាននូវការយល់ដឹងបន្ថែមទៀតផងដែរនៅក្នុងការប្រៀបធៀបរវាងស្រូវសាលី និង ដើមស្រងែ ព្រមទាំងបានឃើញថាព្រះអម្ចាស់នឹងប្រមូលពួកសុចរិតអំឡុងពេលថ្ងៃចុងក្រោយ ហើយបំផ្លាញពួកទុច្ចរិតនៅក្នុងការយាងមកជាលើកទីពីររបស់ទ្រង់ ។ ក្រៅពីនោះសិស្សបានរៀនថា យើងអាចនាំសេចក្ដីសង្គ្រោះដល់អ្នកដទៃដោយការជួយពួកគេឲ្យទទួលពរជ័យនៃដំណឹងល្អ ។

ថ្ងៃទី ៤ (គោលលទ្ធិ និង សេចក្តីសញ្ញា ៨៧)

សិស្សបានសិក្សាការព្យាកររបស់ព្យាការីយ៉ូសែប ស្ម៊ីធទាក់ទងនឹងសង្គ្រាមនៅក្នុងថ្ងៃចុងក្រោយ ហើយបានរៀនថា ព្រះអម្ចាស់អាចបើកសម្ដែងអំពីអនាគតកាលដល់យើង តាមរយៈពួកព្យាការីរបស់ទ្រង់ ។ សិស្សក៏បានរៀនផងដែរថា ព្រះបន្ទូលរបស់ព្រះអម្ចាស់តាមរយៈព្យាការីយ៉ូសែប ស្ម៊ីធ ត្រូវបានបំពេញ និង អំពីរបៀបដែលព្រះបន្ទូលទាំងនោះត្រូវបានបំពេញ ។ ពួកគេក៏គិតផងដែរពីសារៈសំខាន់នៃការឈរនៅទីបរិសុទ្ធនានា ហើយកុំរើឡើយរហូតដល់ព្រះអម្ចាស់យាងមក ។

សេចក្តីផ្ដើម

មេរៀននេះនឹងជួយសិស្សឲ្យយល់ និង ពន្យល់កាន់តែច្រើនអំពីគោលលទ្ធិនៃបព្វជិតភាព ។ មេរៀននេះក៏ផ្តល់ឱកាសឲ្យសិស្សចែកចាយនូវអ្វីដែលពួកគេបានរៀននៅសប្តាហ៍នេះ ពីការសិក្សារបស់ពួកគេស្តីពីរបៀបដែលពួកយើងអាចធ្វើកាន់តែប្រសើរឡើង ក្នុងនាមឧបករណ៍នៃព្រះ ហើយតម្កើងបព្វជិតភាពរបស់យើង ។

យោបល់សម្រាប់ការបង្រៀន

កំណត់ចំណាំ ៖ នៅក្នុងការរៀបចំសម្រាប់មេរៀននេះ សូមអញ្ជើញសិស្សម្នាក់ឲ្យយកក្រដាសតំណនៃសិទ្ធិអំណាចបព្វជិតភាពមកកាន់ថ្នាក់រៀន ( ជារបស់សមាជិកគ្រួសារ ឬ ប្រហែលជារបស់ផ្ទាល់ខ្លួនពួកគេ ) ។ ក្រដាសក្រដាសតំណនៃសិទ្ធិអំណាចបព្វជិតភាពផ្ទាល់ខ្លួនរបស់សមាជិកម្នាក់ អាចទទួលបានពីកំណត់ត្រាសមាជិក និង ស្ថិតិនៃសាសនាចក្រដោយអ៊ីម៉ែលស្នើសុំទៅ lineofauthority@ldschurch.org ជាមួយ PLA នៅក្នុងបន្ទាត់នៃប្រធានបទ ។ សារឆ្លើយតបដោយស្វ័យប្រវត្តិមួយនឹងផ្ញើទម្រង់បែបបទមួយដើម្បីបំពេញ ហើយបញ្ជូនត្រឡប់ទៅវិញ ។

គោលលទ្ធិ និង សេចក្តីសញ្ញា ៨៤

ព្រះអម្ចាស់ស្គាល់តំណបព្វជិតភាពរបស់ម៉ូសេ

សូមជួយសិស្សឲ្យរំឭកពីសារព័ន្ធសព្ទមួយចំនួនដែលពួកគេបានរៀននៅសប្តាហ៍នេះ ដោយចែកសិស្សជាគូៗ ។ ក្នុងដៃគូនិមួយៗ សូមឲ្យសិស្សម្នាក់បែរចេញពីក្តារខៀន ដើម្បីគាត់ពុំអាចឃើញវាឡើយ ។ សូមពន្យល់ថាអ្នកនឹងសរសេរពាក្យគន្លឹះ ឬ ឃ្លាមួយនៅលើក្តារខៀនទាក់ទងនឹងគោលលទ្ធិគ្រឹះនៃដំណឹងល្អ ។ សិស្សដែលកំពុងមើលទៅក្តារខៀននឹងផ្តល់និយមន័យ ឬ ពិពណ៌នាពាក្យគន្លឹះ ឬ ឃ្លានោះស្ងាត់ៗដល់ដៃគូរបស់ខ្លួន ហើយដៃគូរបស់គាត់នឹងទាយពីពាក្យ ឬ ឃ្លានោះ ។ ក្រោយមកសិស្សនឹងផ្លាស់ប្តូរតួនាទីគ្នា ហើយអ្នកអាចបន្តសកម្មភាពនេះដោយសរសេរពាក្យ ឬ ឃ្លាថ្មីមួយនៅលើក្តារខៀន ។

សូមចាប់ផ្ដើមសកម្មភាព ហើយសរសេរពាក្យ បព្វជិតភាព នៅលើក្តារខៀន ។ នៅពេលសិស្សបានរកឃើញពាក្យនេះ សូមបន្តសកម្មភាពនេះដោយប្រើពាក្យ និង ឃ្លាខាងក្រោមនេះ ៖ ពិធីបរិសុទ្ធ បព្វជិតភាពអើរ៉ុន សេចក្តីសញ្ញា បព្វជិតភាពមិលគីស្សាដែក ពិធីបរិសុទ្ធនៃសេចក្តីសង្គ្រោះ ។ ( ប្រសិនបើអ្នកមានអារម្មណ៍ថាមានប្រយោជន៍ អ្នកអាចចង់ឈប់បន្ទាប់ពីសិស្សបានរកឃើញពាក្យ ឬ ឃ្លាគន្លឹះនោះ ហើយរំឭកខ្លីៗពីនិយមន័យរបស់វាជាមួយសិស្សក្នុងថ្នាក់ ។ និយមន័យខ្លីៗសម្រាប់ពាក្យមួយចំនួននេះមាននៅក្នុងសកម្មភាពផ្គូរផ្គងនៅក្នុងមេរៀនទៅ ១៨ ៖ ថ្ងៃទី ១ នៅក្នុងសៀវភៅមគ្គុទេសន៍ការសិក្សាសម្រាប់សិស្សថ្នាក់សិក្ខាសាលាដែលសិក្សានៅផ្ទះ ។ សម្រាប់ការពន្យល់កាន់តែស៊ីជម្រៅសូមមើល « បព្វជិតភាព និង កូនសោបព្វជិតភាព » ឬ « ពិធីបរិសុទ្ធ និង សេចក្តីសញ្ញា » នៅក្នុងវគ្គគោលលទ្ធិគ្រឹះនៃឧបសម័្ពន្ធនៅចុងបញ្ចប់នៃសៀវភៅសិក្សានេះ ) ។ បន្ទាប់ពីសកម្មភាពបានចប់ហើយ សូមសួរសំណួរខាងក្រោម ៖

តើពិធីបរិសុទ្ធណាមួយនៃដំណឹងល្អគឺជាពិធីបរិសុទ្ធនៃសេចក្តីសង្គ្រោះ ? ( នៅពេលសិស្សឆ្លើយ សូមសរសេរពិធីបរិសុទ្ធខាងក្រោមនេះនៅលើក្តារខៀន ៖ បុណ្យជ្រមុជទឹក ពិធីបញ្ជាក់ ការប្រគល់បព្វជិតភាពមិលគីស្សាដែក [ សម្រាប់បុរស ] អំណោយទានពិសិដ្ឋនៃព្រះវិហារបរិសុទ្ធ, និង ការផ្សារភ្ជាប់នៅក្នុងព្រះវិហារបរិសុទ្ធ) ។

សូមពន្យល់ថា គោលលទ្ធិ និង សេចក្ដីសញ្ញា ៨៤ បង្រៀនថាបំណងប្រាថ្នារបស់ព្យាការីម៉ូសេ គឺជួយមនុស្សដទៃទៀតឲ្យខិតកាន់តែជិតព្រះតាមរយៈពិធីបរិសុទ្ធនៃសេចក្តីសង្គ្រោះនៃបព្វជិតភាព ។ សូមអញ្ជើញសិស្សឲ្យមើល គោលលទ្ធិ និង សេចក្ដីសញ្ញា ៨៤:៦-១៧ ចុះឡើង ដើម្បីរកឲ្យឃើញពីរបៀបដែលម៉ូសេអាចប្រដេញរកសិទ្ធិអំណាចបព្វជិតភាពរបស់លោករហូតដល់អ័ដាមដែលជាអ្នកដែលបានទទួលវាមកពីព្រះ ។

តើអ្នករៀនអ្វីខ្លះអំពីបព្វជិតភាពមកពីខគម្ពីរទាំងនេះ ? ( សិស្សអាចរកឃើញគោលការណ៍ផ្សេងៗគ្នា ប៉ុន្តែត្រូវគូសបញ្ជាក់ឲ្យបា្រកដនូវចំណុចខាងក្រោមនេះ ៖ បព្វជិតភាពមកពីព្រះ ហើយត្រូវបានប្រគល់ឲ្យតាមរយៈការដាក់ដៃលើដោយអស់អ្នកដែលនៅក្នុងសិទ្ធិអំណាចនោះ) ។

ត្រង់ចំណុចនេះនៃមេរៀន សូមអញ្ជើញសិស្សឲ្យបង្ហាញគំរូនៃខ្សែស្រឡាយនៃសិទ្ធិអំណាចដោយអានវាក៏បាន ឬ សរសេរវានៅក្តារខៀនក៏បាន ។ សូមជួយសិស្សឲ្យយល់ថា តំណនៃសិទ្ធិអំណាចបព្វជិតភាពបង្ហាញពីសិទ្ធិអំណាចបព្វជិតភាពដែលត្រូវបានប្រគល់ឲ្យ ពីសំណាក់អ្នកកាន់បព្វជិតភាពម្នាក់ទៅដល់ម្នាក់ទៀត ចាប់តាំងពីព្រះយេស៊ូវគ្រីស្ទទៅឲ្យអ្នកកាន់បព្វជិតភាពនាសព្វថ្ងៃនេះ ។

ហេតុអ្វីអ្នកគិតថាវាសំខាន់ដែលអ្នកកាន់បព្វជិតភាពអាចប្រដេញរកសិទ្ធិអំណាចបព្វជិតភាពរបស់ខ្លួនរហូតដល់ព្រះវិញដូច្នេះ ? ( សូមមើល ហេព្រើរ ៥:៤ ) ។
តើអ្នកធ្លាប់មានបទពិសោធន៍អ្វីខ្លះដែលបានពង្រឹងដល់ទីបន្ទាល់របស់អ្នកអំពីបព្វជិតភាព ។

សូមឲ្យសិស្សពីរបីនាក់ឆ្លាស់វេនគ្នាអានសម្បថ និង សេចក្តីសញ្ញានៃបព្វជិតភាពនៅក្នុង គោលលទ្ធិ និង សេចក្ដីសញ្ញា ៨៤:៣៣-៤៤ឲ្យឮៗ ។

តើព្រះអម្ចាស់សន្យាអ្វីខ្លះចំពោះអ្នកទាំងឡាយដែលទទួលបព្វជិតភាព ហើយតម្កើងការហៅរបស់ខ្លួន ? ( សិស្សគួរតែរកឃើញគោលការណ៍ខាងក្រោមនេះ ៖ ប្រសិនបើអ្នកទាំងឡាយណាដែលទទួលបព្វជិតភាព តម្កើងការហៅរបស់ខ្លួន នោះព្រះនឹងញែកពួកគេចេញ ហើយប្រទានដល់ពួកគេនូវអ្វីៗទាំងអស់ដែលទ្រង់មាន) ។
តើមានវិធីមួយចំនួនណាខ្លះ ដែលអ្នកកាន់បព្វជិតភាពអើរ៉ុនតម្កើងការហៅរបស់ពួកគេក្នុងបព្វជិតភាព ?
តើនៅពេលណាដែលអ្នកត្រូវបានប្រទានពរដោយសារអ្នកកាន់បព្វជិតភាពម្នាក់បានតម្កើងការហៅរបស់ខ្លួន ?

ដើម្បីជួយសិស្សឲ្យចែកចាយការយល់ដឹងមួយចំនួនដែលពួកគេបានទទួលអំឡុងពេលការសិក្សារបស់ពួកគេនៅសប្តាហ៍នេះ អ្នកអាចសួរសំណួរមួយចំនួន ឬ ទាំងអស់ខាងក្រោមនេះ ៖ (កំណត់ចំណាំ ៖ នៅពេលអ្នករៀបចំផ្នែកនេះនៃមេរៀន អ្នកអាចរំឭកឡើងវិញនូវថ្ងៃទី ២ នៃមេរៀននៅក្នុងសៀវភៅមគ្គុទេសន៍ការសិក្សាសម្រាប់សិស្សថ្នាក់សិក្ខាសាលាដែលសិក្សានៅផ្ទះ ) ។

តើអ្នកបានរៀនអ្វីខ្លះអំពីសារៈសំខាន់នៃការព្យាយាមស្ដាប់ព្រះបន្ទូលរបស់ព្រះ ? ( សូមមើល គ. និង ស. ៨៤:៤៣-៤៥, ៥៤-៥៨ ) ។
តើការសិក្សាព្រះគម្ពីរដោយស្មោះត្រង់ និង ការអនុវត្តតាមព្រះបន្ទូលនៃព្រះបានធ្វើឲ្យជិវិតរបស់អ្នកផ្លាស់ប្តូរយ៉ាងណាខ្លះ ?
តើយើងមានទទួលខុសត្រូវអ្វីខ្លះចំពោះមនុស្សនៅលើពិភពលោកនេះ ។ ( សូមមើល គ. និង ស. ៨៤:៦១-៦២, ៨៥-៨៨) ។
តើអ្នកអាចជួយបំពេញករណីកិច្ចដើម្បីនាំយកដំណឹងល្អទៅកាន់ពិភពលោកទាំងមូលដោយរបៀបណា ?

គោលលទ្ធិ និង សេចក្តីសញ្ញា ៨៧

យ៉ូសែប ស្ម៊ីធព្យាករថាសង្គ្រាមនឹងចាក់ស្រោចមកលើគ្រប់ជាតិសាសន៍ទាំងអស់

សូមឲ្យសិស្សសង្ខេបពីអ្វីដែលពួកគេបានរៀនអំពីការព្យាករដែលមាននៅក្នុង គោលលទ្ធិ និង សេចក្ដីសញ្ញា ៨៧ ។

តើការសិក្សារបស់អ្នកអំពីវិវរណៈនេះបានពង្រឹងសេចក្តីជំនឿដែលថាព្រះអម្ចាស់អាចបើកសម្ដែងព្រឹត្តិការណ៍នាអនាគតតាមរយៈពួកព្យាការីរបស់ទ្រង់ដោយរបៀបណា ?
តើ គោលលទ្ធិ និង សេចក្តីសញ្ញា ៨៧ ពង្រឹងទីបន្ទាល់របស់អ្នកថាយ៉ូសែប ស្ម៊ីធគឺជាព្យាការីពិតយ៉ាងដូចម្តេច ?

សូមបញ្ជាក់ថាគ្រប់ការព្យាករណ៍នៅក្នុង គោលលទ្ធិ និង សេចក្ដីសញ្ញា ៨៧ ត្រូវបាន ឬ នឹងត្រូវបានបំពេញ ។ សូមអញ្ជើញសិស្សឲ្យអាន គោលលទ្ធិ និង សេចក្ដីសញ្ញា ៨៧:៨ ដើម្បីរៀនអំពីអ្វីដែលព្រះបានដឹកនាំយើងឲ្យធ្វើដូច្នោះ ដែលយើងនឹងបានត្រៀមខ្លួនសម្រាប់សង្គ្រាម និង គ្រោះមហន្ដរាយដែលនឹងកើតមានចំពោះផែនដីនៅថ្ងៃចុងក្រោយ ។

តើព្រះអម្ចាស់បានបញ្ជាយើងឲ្យធ្វើអ្វីខ្លះ ? ( សូមជួយពួកគេរកឃើញគោលការណ៍ខាងក្រោមនេះ ៖ យើងត្រូវឈរនៅទីបរិសុទ្ធ ហើយកុំរើចេញឡើយរហូតដល់ព្រះអម្ចាស់យាងមក) ។
តើទីបរិសុទ្ធមួយចំនួនណាខ្លះដែលអាចផ្ដល់សេចក្ដីសុខសាន្ដ និង សុវត្ថិភាពដល់យើងនោះ ?
តើអ្នកមានអារម្មណ៍ថាត្រូវបានប្រទានពរឲ្យសេចក្ដីសុខសាន្ដ និង សុវត្ថិភាពដោយការឈរនៅទីបរិសុទ្ធយ៉ាងដូចម្ដេច ?

សូមបញ្ចប់មេរៀននេះ ដោយថ្លែងទីបន្ទាល់អំពីសេចក្ដីពិតដែលអ្នកបានពិភាក្សា ។

មេរៀនបន្ទាប់ (គោលលទ្ធិ និង សេចក្តីសញ្ញា ៨៨-៨៩)

ដើម្បីរៀបចំសិស្សសម្រាប់ការសិក្សារបស់ខ្លួននៅក្នុង គោលលទ្ធិ និង សេចក្តីសញ្ញា ៨៨-៨៩, អ្នកអាចអញ្ជើញពួកគេឲ្យពិចារណាពីសំណួរខាងក្រោម ៖ តើអ្នកធ្លាប់មានអារម្មណ៍ថាឯកោ ឬ ព្រួយបារម្ភថាព្រះវរបិតាសួគ៌ពុំជ្រាបដឹងពីកាលៈទេសៈ ឬ សេចក្តីត្រូវការផ្ទាល់ខ្លួនរបស់អ្នកដែរឬទេ ? នៅពេលអ្នកសិក្សា គោលលទ្ធិ និង សេចក្តីសញ្ញា ៨៨, សូមស្វែងរកចម្លើយរបស់ព្រះអម្ចាស់ចំពោះអារម្មណ៍បែបនោះ ។ តើពាក្យ « អំពើអាក្រក់ទាំងឡាយ និង ផែនការទាំងឡាយ…ដែលមាននៅក្នុងដួងចិត្តមនុស្សដែលរួមគំនិតប្រព្រឹត្តិអំពើទុច្ចរិត (គ. និង ស. ៨៩:៤) នៅថ្ងៃចុងក្រោយបង្អស់មានន័យដូចម្តេច ? នៅពេលអ្នកសិក្សា គោលលទ្ធិ និង សេចក្តីសញ្ញា ៨៩, សូមស្វែងរកព្រះឱវាទរបស់ព្រះអម្ចាស់ដែលបានប្រទានមក ដែលអាចការពារអ្នកពីអំពើអាក្រក់ និង ផែនការទាំងនោះ ។