គោលលទ្ធិ និង សេចក្តីសញ្ញា ១០៩-១១២ ( មេរៀនទី ២៤ )

ការរៀបចំសម្ភារសម្រាប់គ្រូបង្រៀនដល់សិស្សដែលសិក្សានៅផ្ទះ

សេចក្ដីសង្ខេបនៃមេរៀនសិក្សានៅផ្ទះប្រចាំថ្ងៃ

ខាងក្រោមនេះគឺជាសេចក្ដីសង្ខេបនៃព្រឹត្តិការណ៍ គោលលទ្ធិ និង គោលការណ៍ដែលសិស្សបានរៀននៅពេលពួកគេបានសិក្សា គោលលទ្ធិ និង សេចក្ដីសញ្ញា ១០៩-១១២ ( មេរៀនទី ២៤ ) មិនមែនត្រូវយកមកបង្រៀនជាផ្នែកនៃមេរៀនរបស់អ្នកនោះទេ ។ មេរៀនដែលអ្នកបង្រៀនផ្ដោតលើគោលលទ្ធិ និង គោលការណ៍តែពីរបីទាំងនេះប៉ុណ្ណោះ ។ សូមធ្វើតាមការបំផុសគំនិតពីព្រះវិញ្ញាណបរិសុទ្ធ នៅពេលអ្នកគិតពីតម្រូវការរបស់សិស្ស ។

ថ្ងៃទី ១ (គោលលទ្ធិ និង សេចក្តីសញ្ញា ១០៩)

នៅពេលសិស្សបានសិក្សាការអធិស្ឋានឧទ្ទិសឆ្លងនៃព្រះវិហារបរិសុទ្ធខឺតឡង់ នោះពួកគេបានឃើញហេតុផលមួយចំនួនដែលយើងសាងសង់ព្រះវិហារបរិសុទ្ធ ។ ពួកគេបានរៀនថា ប្រសិនបើយើងថ្វាយបង្គំដោយភាពសក្តិសមនៅក្នុងព្រះវិហារបរិសុទ្ធ នោះព្រះអម្ចាស់នឹងបង្ហាញអង្គទ្រង់ដល់ពួកយើង បំពាក់យើងដោយព្រះចេស្តា និង ជំនួយរបស់ទ្រង់ ព្រមទាំងប្រទានពរដល់យើងដូច្នេះអំពើទុច្ចរិតនឹងពុំអាចឈ្នះលើយើងបានឡើយ ។ បទពិសោធន៍របស់ពួកបរិសុទ្ធនៅឯការឧទ្ទិសនៃព្រះវិហារបរិសុទ្ធខឺតឡង់ គឺវាស្រដៀងគ្នាយ៉ាងខ្លាំងទៅនឹងអ្វី ដែលបានកើតឡើងចំពោះសាវកពីបុរាណនៅបុណ្យថ្ងៃទីហាសិប ( សូមមើល កិច្ចការ ២) ។

ថ្ងៃទី ២ (គោលលទ្ធិ និង សេចក្តីសញ្ញា ១១០)

ផ្នែកនៃពរជ័យដែលបានទទួលដោយពួកបរិសុទ្ធនៅក្នុងព្រះវិហារបរិសុទ្ធខឺតឡង់ នោះព្រះយេស៊ូវគ្រីស្ទបានបង្ហាញព្រះកាយទ្រង់ដល់យ៉ូសែប ស៊្មីធ និង អូលីវើរ ខៅឌើរី ។ សិស្សបានរៀនថាប្រសិនបើយើងគោរពប្រតិបត្តិតាមព្រះបញ្ញត្តិរបស់ព្រះអម្ចាស់ ហើយរក្សាព្រះដំណាក់របស់ទ្រង់ឲ្យបានបរិសុទ្ធ នោះទ្រង់នឹងបង្ហាញអង្គទ្រង់ដល់ពួកយើងនៅក្នុងព្រះវិហារបរិសុទ្ធរបស់ទ្រង់ ។ សិស្សក៏បានរៀនផងដែរថាម៉ូសេ អេលីយ៉ាស និង អេលីយ៉ា បានបង្ហាញខ្លួននៅក្នុងព្រះវិហារបរិសុទ្ធខឺតឡង់ ហើយបានប្រគល់កូនសោនៃបព្វជិតភាពឲ្យព្យាការី យ៉ូសែប ស៊្មីធ និង អូលីវើរ ខៅឌើរី ។ សិស្សបានរៀនថា កូនសោនៃកិច្ចការផ្សព្វផ្សាយសាសនា ក្រុមគ្រួសារដ៏អស់កល្ប និង កិច្ចការព្រះវិហារបរិសុទ្ធ រៀបចំខ្លួនយើងសម្រាប់ការយាងមកជាលើកទីពីររបស់ព្រះអម្ចាស់ ។

ថ្ងៃទី ៣ (គោលលទ្ធិ និង សេចក្តីសញ្ញា ១១១)

ចេញពីវិវរណៈដែលបានប្រទានឲ្យព្យាការីយ៉ូសែប ស្ម៊ីធនៅក្នុងក្រុងសាលិម រដ្ឋម៉ាស្សាឈូសេត នោះសិស្សបានរៀនថាព្រះអម្ចាស់អាចនាំមកនូវសេចក្តីល្អសម្រាប់កិច្ចខិតខំដ៏ស្មោះត្រង់របស់យើង ។ ពួកគេក៏បានរៀនផងដែរថា យើងអាចទទួលបានការណែនាំរបស់ព្រះអម្ចាស់តាមរយៈសេចក្តីសុខសាន្ត និង ព្រះចេស្តានៃព្រះវិញ្ញាណរបស់ទ្រង់ ។

ថ្ងៃទី ៤ (គោលលទ្ធិ និង សេចក្តីសញ្ញា ១១២)

តាមរយៈព្រះឱវាទរបស់ព្រះអម្ចាស់ចំពោះថូម៉ាស ប៊ី ម៉ាស្ស នោះសិស្សបានរៀនថា ប្រសិនបើយើងបន្ទាបខ្លួន នោះព្រះអម្ចាស់នឹងដឹកនាំយើង និងប្រទានចម្លើយចំពោះការអធិស្ឋានរបស់យើង ។ ព្រះអម្ចាស់បានប្រាប់ប្រធានម៉ាស្សថា ក្នុងនាមជាប្រធាននៃកូរ៉ុមនៃពួកសាវកដប់ពីរនាក់ នោះលោកបានកាន់កូនសោដើម្បីដឹកនាំកិច្ចការនៃពួកដប់ពីរនាក់ នៅក្នុងការប្រកាសប្រាប់ដំណឹងល្អនៅក្នុងគ្រប់អស់ទាំងសាសន៍ ។ កូនសោទាំងនេះត្រូវបានស្តារឡើងវិញជាលើកចុងក្រោយបង្អស់ នៅក្នុងគ្រាកាន់កាប់ត្រួតត្រានៃពេលពេញកំណត់ ។ សិស្សក៏បានរៀនផងដែរថាពួកគេត្រូវតែស្មោះត្រង់ ដើម្បីទទួលបានការសន្យានៃពរជ័យរបស់ព្រះអម្ចាស់ ។

សេចក្តីផ្ដើម

នៅក្នុងផ្នែកនៃពាក្យអធិស្ឋានឧទ្ទិសឆ្លងសម្រាប់ព្រះវិហារបរិសុទ្ធខឺតឡង់ នោះព្យាការីយ៉ូសែប ស្ម៊ីធ បានអធិស្ឋានសម្រាប់សុខុមាលភាពរបស់មនុស្សដទៃ ។ បន្ទាប់ពីព្រះវិហារបរិសុទ្ធត្រូវបានឧទ្ទិសឆ្លង នោះព្យាការីពីគ្រាកាន់កាប់ត្រួតត្រាជំនាន់ដើមបានប្រគល់កូនសោបព្វជិតភាពទៅលើព្យាការីយ៉ូសែប ស៊្មីធ និង អូលីវើរ ខៅឌើរី រួមទាំងកូនសោនៃការផ្សារភ្ជាប់ ។

យោបល់សម្រាប់ការបង្រៀន

គោលលទ្ធិ និង សេចក្ដីសញ្ញា ១០៩:៤៧-៥៣

យ៉ូសែប ស្ម៊ីធបានសូមព្រះវរបិតាសួគ៌ឲ្យជួយពួកបរិសុទ្ធនៅក្នុងរដ្ឋមិសសួរី

សូមអញ្ជើញសិស្សឲ្យគិតអំពីនរណាម្នាក់ដែលពួកគេស្គាល់ ដែលកំពុងប្រឈមមុខនឹងឧបសគ្គ ឬ រងទុក្ខតាមរបៀបមួយចំនួន ។ ក្រោយពីពួកគេមានពេលអានគ្រប់គ្រាន់ដើម្បីគិតហើយ សូមសួរសំណួខាងក្រោមនេះ ៖

តើមានវិធីណាខ្លះដែលអ្នកអាចជួយសម្រាលការរងទុក្ខរបស់នរណាម្នាក់ ?

បន្ទាប់ពីសិស្សបានចែកចាយយោបល់មួយចំនួន សូមរំឭកពួកគេថាពួកបរិសុទ្ធនៅក្នុងរដ្ឋមិសសួរី បានរងទុក្ខយ៉ាងខ្លាំងដោយសារអំពើដ៏សាហាវព្រៃផ្សៃនៃពួកជនកំណាចនៅក្នុងឃុំចាកសុន ។ ពួកបរិសុទ្ធដ៏ល្អទាំងនោះត្រូវបានចងចាំនៅក្នុងការឧទ្ទិសឆ្លងព្រះវិហារបរិសុទ្ធខឺតឡង់ ។ សូមអញ្ជើញសិស្សឲ្យអានផ្នែកនៃការអធិស្ឋានឧទ្ទិសឆ្លងដែលបានកត់ត្រាទុកនៅក្នុង គោលលទ្ធិ និង សេចក្ដីសញ្ញា ១០៩:៤៧-៤៩ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលអ្វីមួយដែលយើងអាចធ្វើដើម្បីជួយមនុស្សដទៃអំឡុងពេលលំបាក ។

នៅឯការឧទ្ទិសឆ្លងនៃព្រះវិហារបរិសុទ្ធខឺតឡង់ តើព្យាការីយ៉ូសែប ស្ម៊ីធបានធ្វើអ្វីខ្លះសម្រាប់ពួកបរិសុទ្ធនៅក្នុងរដ្ឋមិសសួរី ?

សូមអញ្ជើញសិស្សម្នាក់ធ្វើជាអ្នកសរសេរ ។ សូមឲ្យសិស្សផ្តល់គោលការណ៍មួយ ដែលយើងអាចរៀនពីការអធិស្ឋានរបស់ព្យាការីនៅក្នុងខគម្ពីរទាំងនោះ ។ នៅពេលសិស្សឆ្លើយ អ្នកសរសេរអាចសរសេរគោលការណ៍ខាងក្រោមនេះ ៖ ការអធិស្ឋានរបស់យើងអាចនាំជំនួយ និង ផ្តល់កម្លាំងដល់អស់អ្នកដែលខ្វះខាត ។

តើនៅពេលណាដែរ ដែលអ្នកបានទទួលអារម្មណ៍ ឬ បានឃើញអំណាចនៃការអធិស្ឋានជួយមនុស្សម្នាក់ដែលត្រូវការជំនួយ ? ( អ្នកអាចបង្ហាញថាការអធិស្ឋានបែបនោះភាគច្រើនបានទទួលចម្លើយតាមរយៈការបំផុសគំនិត ដែលយើង ឬ មនុស្សដទៃទៀតបានទទួលអំពីអ្វីដែលយើងអាចធ្វើដើម្បីជួយមនុស្សដទៃ ។ អ្នកក៏អាចចែកចាយបទពិសោធន៍ពីរបៀប ដែលអ្នកបានឃើញគោលការណ៍នេះបានបំពេញនៅក្នុងជីវិតរបស់អ្នក ) ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១០៩:៥០ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលមនុស្សដទៃទៀតដែលព្យាការីបានអធិស្ឋានសម្រាប់ពួកគេ ។

តើមានរណាខ្លះទៀតដែលព្យាការីបានអធិស្ឋានសម្រាប់ពួកគេនោះ ?
តើអ្នកគិតថាហេតុអ្វីបានជាយើងគួរតែអធិស្ឋានសម្រាប់មារសត្រូវរបស់យើង ?
តើយើងអាចរៀនអ្វីខ្លះមកពី គោលលទ្ធិ និង សេចក្ដីសញ្ញា ១០៩:៥០ អំពីរបៀបដែលការអធិស្ឋានរបស់យើងអាចជះឥទ្ធិពលលើមនុស្សដទៃ ? ( បន្ទាប់ពីសិស្សឆ្លើយហើយ សូមឲ្យអ្នកសរសេរសរសេរគោលការណ៍ខាងក្រោមនេះនៅលើក្តារខៀន ៖ ការអធិស្ឋានរបស់យើងអាចជះឥទ្ធិពលដល់មនុស្សឲ្យប្រែចិត្ត ។ បន្ទាប់មកសូមអញ្ជើញអ្នកសរសេរឲ្យអង្គុយចុះវិញ ) ។

សូមឲ្យសិស្សពិចារណាពីសំណួរខាងក្រោម ៖

តើវាប្រែជាយ៉ាងដូចម្តេចដែរ ប្រសិនបើមនុស្សដែលយើងអធិស្ឋានឲ្យពុំព្រមជ្រើសប្រែចិត្តនោះ ?

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១០៩:៥១-៥៣ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលឃ្លាដែលទទួលស្គាល់ព្រះឆន្ទៈរបស់ព្រះអម្ចាស់ និង សិទ្ធិជ្រើសរើសរបស់មនុស្សដទៃ ។ សូមអញ្ជើញសិស្សឲ្យរាយការណ៍ពីអ្វីដែលពួកគេរកឃើញ ។ ( ពីមុនសិស្សអានខគម្ពីរទាំងនេះ អ្នកអាចពន្យល់ថា នៅពេលព្រះគម្ពីរលើកឡើងនូវឃ្លាដែលថាព្រះអម្ចាស់ត្រដាងព្រះហស្ដរបស់ទ្រង់ នោះវាសំដៅលើការបង្ហាញព្រះចេស្ដារបស់ទ្រង់ ) ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១០៩:៥៣ ឲ្យឮៗម្តងទៀត ។ សូមឲ្យសិស្សក្នុងថ្នាក់ផ្ទៀងតាម រកមើលអ្វីដែលព្រះវរបិតាសួគ៌នឹងធ្វើចំពោះអស់អ្នកដែលប្រែចិត្ត ។ ( អ្នកត្រូវតែពន្យល់ថា សេចក្តីក្រោធរបស់ព្រះជាញឹកញាប់ត្រូវបានបង្ហាញនៅក្នុងការដាក់ទោស ឬ រកទុក្ខនូវបទពិសោធន៍ដែលយើងជួបប្រទះ ដោយសារតែអំពើបាបរបស់យើង ស្របតាមសេចក្តីយុត្តិធម៌របស់ទ្រង់ ។ ឃ្លា « នៅពេលព្រះអង្គទតទៅលើព្រះភក្ត្រនៃអ្នកដែលទ្រង់បានចាក់ប្រេងតាំង » សំដៅលើព្រះឆន្ទៈរបស់ព្រះវរបិតាសួគ៌ ប្រទានសេចក្តីមេត្តាករុណាដោយសារតែពលិកម្មដ៏ធួននៃព្រះរាជបុត្រារបស់ទ្រង់គឺព្រះយេស៊ូវគ្រីស្ទ ) ។

ហេតុអ្វីបានជាព្រះវរបិតាសួគ៌បង្វែរសេចក្តីក្រោធរបស់ទ្រង់ចេញពីអស់អ្នកដែលប្រែចិត្តដូច្នេះ ? ( សិស្សអាចប្រើពាក្យផ្សេងៗគ្នា ប៉ុន្ដែសូមជួយពួកគេរកឃើញគោលការណ៍ខាងក្រោមនេះ ៖ ដោយសារតែពលិកម្មដ៏ធួនរបស់ព្រះយេស៊ូវគ្រីស្ទ នោះសេចក្តីក្រោធរបស់ព្រះវរបិតាសួគ៌នឹងត្រូវបែរចេញពីអស់អ្នកដែលប្រែចិត្ត) ។

ដើម្បីជួយសិស្សឲ្យឃើញពីការពិពណ៌នានៅក្នុង ខ ៥៣សូមអញ្ជើញពួកគេឲ្យធ្វើចំណុចខាងក្រោមនេះ ៖

សូមស្រមៃពីសមាជិកពីមុនម្នាក់របស់ពួកជនកំណាច ដែលប្រឆាំងនឹងពួកមរមនឈរនៅចំពោះព្រះភក្ត្រព្រះដើម្បីត្រូវបានជំនំជម្រះ ។ ឥឡូវសូមស្រមៃពីប៉ុន្មានឆ្នាំមុន ពីមុនបុគ្គលនេះស្លាប់ គាត់ពិតជាបានប្រែចិត្ត ហើយបានសុំការអភ័យទោស ហើយបានប្រោសលោះតាមរយៈដង្វាយធួនរបស់ព្រះយេស៊ូវគ្រីស្ទ ។ ដោយសារព្រះយេស៊ូវគ្រីស្ទបានរងទុក្ខសម្រាប់អំពើបាបរបស់បុគ្គលនេះ នោះព្រះវរបិតាសួគ៌នឹងបង្វែរការដាក់ទោសចេញ ហើយប្រទាននូវសេចក្តីមេត្តាករុណាដល់អ្នកមានបាបដែលប្រែចិត្ត ។

តើឥរិយាបថអ្វីខ្លះដែលចាំបាច់សម្រាប់មនុស្សឲ្យអធិស្ឋានដោយស្មោះសរ ដើម្បីឲ្យមារសត្រូវរបស់ពួកគេអាចត្រូវបានបែរចេញពីសេចក្តីក្រោធរបស់ព្រះវរបិតាសួគ៌ពីពួកគេ ?

សូមលើកទឹកចិត្តសិស្សឲ្យអភិវឌ្ឈន៍ឥរិយាបថនេះ ចំពោះអស់អ្នកដែលបានធ្វើឲ្យពួកគេអន់ចិត្ត ឬ បានបណ្តាលឲ្យពួកគេឈឺចាប់ ។ សូមឲ្យសិស្សស្រមៃពីមនុស្សដែលប្រែចិត្តបែបនេះ កំពុងឈរនៅពីមុខព្រះភក្ត្រព្រះវរបិតាសួគ៌ ។ សូមអញ្ជើញសិស្សឲ្យអធិស្ឋានដូចជាយ៉ូសែប ស្ម៊ីធបានអធិស្ឋាន សម្រាប់មនុស្សដែលធ្វើឲ្យពួកគេអន់ចិត្ត ឬ ធ្វើអំពើបាបទាស់នឹងពួកគេ ។

គោលលទ្ធិ និង សេចក្ដីសញ្ញា ១១០:១៣-១៦

អេលីយ៉ាប្រគល់កូនសោនៃការផ្សារភ្ជាប់ឲ្យយ៉ូសែប ស៊្មីធ និង អូលីវើរ ខៅឌើរី

សូមរំឭកសិស្សថានៅចុងសប្តាហ៍នៃការឧទ្ទិសឆ្លងព្រះវិហារបរិសុទ្ធខឺតឡង់ នោះព្រះយេស៊ូវគ្រីស្ទបានបង្ហាញអង្គទ្រង់ដល់យ៉ូសែប ស៊្មីធ និង អូលីវើរ ខៅឌើរី នៅក្នុងព្រះវិហារបរិសុទ្ធ ។ សូមអញ្ជើញសិស្សឲ្យមើលនៅក្នុងសេចក្តីណែនាំកណ្ឌនៃ គោលលទ្ធិ និង សេចក្តីសញ្ញា ១១០ ហើយរកមើលកាលបរិច្ឆេទនៃការនិមិត្តនោះ ។ បន្ទាប់ពីពួកគេរកឃើញហើយ សូមពន្យល់ថានៅចុងសប្តាហ៍នៃថ្ងៃទី ៣ ខែ មេសា ឆ្នាំ ១៨៣៦ គឺជាបុណ្យរំលងសម្រាប់ជនជាតិយូដានៅទូទាំងពិភពលោក ។ អស់ពេលជាច្រើនសតវត្សរ៍មកហើយ ពួកគ្រួសារនៃសាសន៍យូដាបានទុកកៅអីទំនេរ នៅឯពិធីជប់លៀងនៃបុណ្យរំលងរបស់ពួកគេ ដោយផ្អែកលើការព្យាករមួយដោយម៉ាឡាគី នៅក្នុងព្រះគម្ពីរសញ្ញាចាស់ ដោយមានការចូលរួមរបស់អេលីយ៉ាដើម្បី « បង្វែរចិត្តពួកឪពុកមកឯកូន និង ចិត្តកូនមកឯឪពុកវិញ » (ម៉ាឡាគី ៤:៦) ។

សូមអញ្ជើញសិស្សម្នាក់ឲ្យអាន គោលលទ្ធិ និង សេចក្ដីសញ្ញា ១១០:១៣-១៦ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម រកមើលរបៀបដែលការព្យាកររបស់ម៉ាឡាគីត្រូវបានបំពេញនៅក្នុងព្រះវិហារបរិសុទ្ធខឺតឡង់ ។ សូមឲ្យសិស្សរាយការណ៍ពីអ្វីដែលពួកគេរកឃើញ ។

ប្រធានយ៉ូសែប ហ្វីលឌិង ស៊្មីធ បានបង្រៀនថាអេលីយ៉ាបានប្រគល់ដល់យ៉ូសែប ស្ម៊ីធនូវ « អំណាចនៃការផ្សារភ្ជាប់នៃបព្វជិតភាព ដែលគ្រប់អ្វីៗទាំងអស់នឹងត្រូវបានចងភ្ជាប់នៅលើឋានសួគ៌ ព្រមទាំងនៅលើផែនដីផងដែរ ។ វាបានផ្តល់សិទ្ធិអំណាចដល់យ៉ូសែប ស្ម៊ីធ ដើម្បីធ្វើពិធីបរិសុទ្ធទាំងអស់នៅក្នុងព្រះវិហារបរិសុទ្ធរបស់ព្រះ ដែលចាំបាច់សម្រាប់សេចក្តីសង្គ្រោះទាំងអ្នកនៅរស់ និង មរណជន » (Doctrines of Salvation, បានបោះពុម្ព ប្រ៊ូស អរ ម៉ាក់ខនឃី ភាគទី ៣ [ ឆ្នាំ ១៩៥៤–៥៦ ], ២:១១៨ ) ។

តើយើងកំពុងផ្តល់អ្វីខ្លះដល់បុព្វការីជនដែលបានចែកឋានរបស់យើង នៅពេលយើងជួយធ្វើពិធីបរិសុទ្ធទាំងនេះនៅក្នុងព្រះវិហារបរិសុទ្ធជំនួសពួកគាត់នោះ ? ( សូមគិតពីការសរសេរគោលការណ៍ខាងក្រោមនេះនៅលើក្ដារខៀន ៖ យើងផ្តល់សេចក្តីសង្គ្រោះដល់បុព្វការីជនរបស់យើង នៅពេលយើងធ្វើកិច្ចការពង្សប្រវត្តិ និង ព្រះវិហារបរិសុទ្ធសម្រាប់ពួកគេ) ។

សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោមដោយអែលឌើរ រីឆាដ ជី ស្កត កូរ៉ុមនៃពួកសាវកដប់ពីរនាក់ឲ្យឮៗ ។ អ្នកអាចនឹងផ្ដល់ច្បាប់ចម្លងនៃសេចក្ដីថ្លែងការណ៍នេះដល់សិស្ស ។ សូមឲ្យពួកគេស្តាប់រកមើលពរជ័យ ដែលអាចប្រទានមកដល់អស់អ្នកដែលជួយនៅក្នុងកិច្ចការពង្សប្រវត្តិ និង កិច្ចការព្រះវិហារបរិសុទ្ធ ។

រូបភាព
អែលឌើរ រីឆាដ ជី ស្កត

« កិច្ចការអ្វីដែលអ្នកធ្វើនៅក្នុងព្រះវិហារបរិសុទ្ធ គឺជាពេលដែលចំណាយបានល្អ ប៉ុន្ដែការទទួលពិធីបរិសុទ្ធជំនួសជីដូនជីតាផ្ទាល់ខ្លួនរបស់អ្នក នឹងធ្វើឲ្យពេលវេលាក្នុងព្រះវិហារបរិសុទ្ធកាន់តែពិសិដ្ឋ ហើយថែមទាំងទទួលបានពរជ័យកាន់តែអស្ចារ្យទៀតផង ។…

« តើមនុស្សវ័យក្មេងដូចជាអ្នកចង់បានវិធីដ៏ប្រាកដមួយ ដើម្បីលុបបំបាត់ឥទ្ធិពលរបស់មារសត្រូវមានក្នុងជីវិតរបស់អ្នកឬទេ ? សូមជ្រមុជខ្លួនអ្នកទៅក្នុងការស្រាវជ្រាវរកជីដូនជីតាអ្នក រៀបចំឈ្មោះរបស់ពួកគាត់សម្រាប់ពិធីបរិសុទ្ធជំនួសដ៏ពិសិដ្ឋដែលមាននៅក្នុងព្រះវិហារបរិសុទ្ធ រួចហើយទៅព្រះវិហារបរិសុទ្ធ ដើម្បីឈរជាអ្នកទទួលពិធីបរិសុទ្ធនៃពិធីបុណ្យជ្រមុជទឹក និងអំណោយទាននៃព្រះវិញ្ញាណបរិសុទ្ធជំនួសពួកគាត់ ។ នៅពេលអ្នកធំឡើង អ្នកនឹងអាចចូលរួមក្នុងការទទួលពិធីបរិសុទ្ធផ្សេងទៀតផងដែរ ។ ខ្ញុំគិតមិនឃើញនូវកិច្ចការពារដ៏មហិមាពីឥទ្ធិពលរបស់មារសត្រូវក្នុងជីវិតរបស់អ្នកនោះឡើយ » ( « The Joy of Redeeming the Dead » Ensign ឬ Liahona, ខែ វិច្ឆិកា ឆ្នាំ ២០១២ ទំព័រ ៩៣–៩៤ ) ។

តើពរជ័យអ្វីខ្លះដែលនឹងប្រទានឲ្យដល់អស់អ្នកដែលធ្វើកិច្ចការព្រះវិហារបរិសុទ្ធ និងកិច្ចការពង្សប្រវត្តិ ?
តើពេលណាដែលអ្នក ឬ នរណាម្នាក់ដែលអ្នកស្គាល់បានជួបបទពិសោធន៍នៃពរជ័យទាំងនេះ ?

សូមអញ្ជើញសិស្សឲ្យពិចារណាពីអ្វីដែលពួកគេអាចធ្វើដើម្បីបង្កើនកិច្ចខិតខំរបស់ពួកគេនៅក្នុងកិច្ចការពង្សប្រវត្តិ និង កិច្ចការព្រះវិហារបរិសុទ្ធ ។

មេរៀនបន្ទាប់ ( សាសនាចក្រប្តូរទៅរដ្ឋមិសសួរីភាគខាងជើង គោលលទ្ធិ និង សេចក្តីសញ្ញា ១១៣–១២០)

ដើម្បីរៀបចំសិស្សសម្រាប់ការសិក្សារបស់ខ្លួនអំឡុងពេលនៃសប្តាហ៍នេះ អ្នកអាចអញ្ជើញពួកគេឲ្យពិចារណាសំណួរខាងក្រោមនេះ ៖ តើសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានទទួលឈ្មោះរបស់ខ្លួនដោយរបៀបណា ? តើច្បាប់ដង្វាយមួយភាគក្នុងដប់ត្រូវបានណែនាំប្រាប់នៅពេលណា ? សូមពន្យល់ថានៅក្នុងមេរៀនបន្ទាប់ ពួកគេនឹងបានរៀនពីចម្លើយចំពោះសំណួរទាំងនេះ និង អំពីរបៀបដែលយើងអាចអំពាវនាវដល់ព្រះសុំជំនួយឲ្យបន្តនៅពិតស្មោះត្រង់ចំពោះសេចក្តីជំនឿ និង សេចក្តីសញ្ញារបស់យើង ។