Fausiaina o Malumalu

O malumalu o se vaega o le aafiaga o le Au Paia o Aso e Gata Ai talu mai toeitiiti lava le faavaeina o le Ekalesia.¹ O ni nai faaaliga na maua e Iosefa Samita a o lei oo i le 1833 na tau mai ai le mea e faatau ai fanua ma le auala e fausia ai se “maota o le Alii” lea e mafai ona afio ai le mamalu o le Atua.² E faatatau i faaaliga ma le itiiti ifo ma le tasi le faaaliga vaaia, na faatonutonu ai e Iosefa ma ona fesoasoani i le Au Peresitene Sili le fausiaina o le uluai maota o le Alii i Katelani, Ohaio.³ O lea malumalu ma isi na fuafuaina i Independence, i Fa Uesi, ma Atamu-onai-Amani sa faamoemoe mo tapuaiga lautele ma isi gaoioiga e aofia le faataunuuina o faatinoga uma tau lotu ma faalenuu a le Au Paia o Aso e Gata Ai. A o fausia ai isi malumalu faaopoopo, na muamua i Navu ma mulimuli ane i Iuta, na amata ona sili atu lo latou taulai atu i sauniga paia ua iloa ai i le taimi nei.

Na suia fuafuaga o fola o le malumalu i tupulaga taitasi a o vaaia e taitai ma tagata o le Ekalesia avanoa mo le faaleleia. O le Peresitene o le Ekalesia o Ioane Teila na faatagaina le toe mamanuina o le fuafuaga o le fola o le Malumalu i Sate Leki i le vaitau o le 1880. Na aveesea e Iosefa F. Samita potu faapotopoto tetele mai malumalu na fausia i le vaitau o le 1910. I le 1953 na atiae ai e Tavita O. Makei le faaaogaina o le ata pue e faigofie ai ona maua e i latou e le tautatala i le faaPeretania galuega o le malumalu. Sa faateleina e Spencer W. Kimball le faaaogaina ma faaitiitia tau o le fausiaina ma le tausiaina o malumalu. O mamanu faalekamuta mo malumalu e atagia mai ai mamanu o taimi na fausia ai.

atatusi o le itu i sasae o le Malumalu o Sate Leki

Atatusi faalekamuta o le itu i sasae o le Malumalu o Sate Leki.

Na vaavaaia e Peresitene o le Ekalesia mea uma tau mamanuina o malumalu, fausiaina, ma le faaaogaina. O Peresitene eseese sa auai i auiliiliga o le fausiaina o Malumalu e tele lava ona faavae i luga o a latou lava aoaoga ma iloa ma le fuainumera o malumalu o loo fausiaina. Na galulue soosoo tauau Iosefa Samita ma tufuga William Weeks i le tele o auiliiliga o le fausiaina o le Malumalu o Navu.⁴ Sa mulimuli Polika Iaga i le mamanu a Iosefa e ala i le galulue soosoo tauau ma tufuga i malumalu na fausia i Iuta, lea na atagia mai ai mamanu ma fuafuaga o le fola o le Malumalu i Navu.⁵ Sa setiina e Iosefa F. Samita ma Ipa J. Kurene paketi mo malumalu na fausia i lalo o a laua taitaiga ma tuuina atu le tele o faatagaga lautele mo fuafuaga atoa ma mamanu. Na valaau Gordon B. Hinckley mo le tele o malumalu laiti atu i eria mamao o le lalolagi ua faateteleina i le faaiuga o le seneturi 20. E ala i musumusuga, na ia tuuina atu foi le uluai aitia mo le fuafuaga o le fola lea o le a faaaoga e tufuga mo nei malumalu fou.⁶

fausiaina o le Malumalu i Hawaii

Malumalu i Hawaii o loo fausiaina, pe tusa o le 1919.

O tagata o le Ekalesia sa i ai le poto masani ma le aoaoga i le tusiata fale ma le faakamuta sa tele ina taitaia le mamanuina o malumalu. O tusiata o malumalu i le seneturi 19 e pei o Truman O. Angell ma William H. Folsom sa tusia i luga o o la tomai o ni kamuta. I le amataga o le seneturi 20, sa lagolago ai e le Ekalesia se tauvaga mamanu mo malumalu e pei o Cardston, Laie, Mesa, ma Idaho Falls. O tusiata fale na malo i nei tauvaga sa aoaoina uma i aoga tusiata fale. I le afa lona lua o le seneturi 20, o se tagata faigaluega o le Ekalesia sa vaaia le mamanu o malumalu ma sa saunia e se vaega o tagata faigaluega pepa mo le fausiaina. Talu ai nei lava, na saunia ai e pisinisi faakonakarate pepa mo le fausaga i lalo o le taitaitga a tusiata fale a le Ekalesia.

Talu mai tausaga o le 1830, o sefuluai ma foai a isi tagata o le Ekalesia na faatupeina le fausiaina o malumalu. O tagata o le Ekalesia i le seneturi 19 sa foai o latou taimi ma meatotino e fausia ai malumalu ia na atagia mai ai a latou osigataulaga ma le faapaiaga atoatoa. O le manatu o le faaaogaina o galuega foai e fausia ai malumalu sa toe faaaogaina foi i le vaitau o le 1950 e ala i se polokalama o galuega faafaifeautalai, lea na faafaigaluega ai le tele o tagata o le Ekalesia i le lotoifale o ni faifeautalai i le fausiaina o falesa, faleaoga, ma malumalu i le lalolagi atoa. I le faaiuga o le seneturi 20 ma le amataga o le seneturi 21, o kamupani faufale sa tele ina faatinoina galuega, e galulue i lalo o konakarate ma le Ekalesia ma i lalo o le faatonuga a le Epikopo Pule Faamalumalu ma tagata faigaluega a le Ekalesia.

O le tele o suiga i le teuina o malumalu, mamanu, ma le fausiaina sa tupu a o faateleina le numera o malumalu. I le 1980, e 17 malumalu sa faaaogaina; o le oso i luga i vaitau e 1980 ma le va o le 1998 ma le 2001 sa oo mai ai le numera i luga atu o le 100, lea na mafai ai e le toatele o Au Paia ona nonofo i totonu o le 200 maila (320 kilomita) mai se malumalu. E oo atu ia Aperila 2019 ua lagolagoina e le Ekalesia le 162 o malumalu o loo faaaogaina, ma le isi 47 ua faasilasilaina po o loo fausiaina.

Punaoa o le Ekalesia

Paul L. Anderson, “First of the Modern Temples,” Ensign, Jul. 1977, 6–11.

“Temple,” Glossary, josephsmithpapers.org.

LIsi o Punaoa

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

C. Mark Hamilton, Nineteenth-Century Mormon Architecture and City Planning (New York: Oxford University Press, 1995).

Paul L. Anderson, “Mormon Architecture and Visual Arts,” in Terryl L. Givens and Philip L. Barlow, eds., The Oxford Handbook of Mormonism (New York: Oxford University Press, 2015).

Autu Fesootai: Kirtland Temple [Malumalu o Katelani], Nauvoo Temple, Salt Lake Temple, Temple Dedications and Dedicatory Prayers, Angel Moroni

Faamatalaga

1. “Temple,” Glossary, https://josephsmithpapers.org/topic/temple.

2. Tagai Mataupu Faavae ma Feagaiga 36 (Dec. 1830), 42 (Feb. 1831), 84 (Sept. 1832), 88 (Dec. 1832), 95 (Jun. 1833), and 94 (Aug. 1833).

3. Tagai i le Autu: Malumalu o Navu [Malumalu o Navu]

4. Tagai i le Autu: Malumalu o Navu [Malumalu o Navu]

5. C. Mark Hamilton, Nineteenth-Century Mormon Architecture and City Planning (New York: Oxford University Press, 1995), 39.

6. Aoaoga a Peresitene o le Ekalesia: Gordon B. Hinckley (2016), 309–11.