“Taumafaiga Faalauiloa a Iosefa Samita i le 1844 e Tauva mo le Peresitene o le Iunaite Setete,” O Autu o le Talafaasolopito o le Ekalesia
“Taumafaiga Faalauiloa a Iosefa Samita i le 1844 e Tauva mo le Peresitene o le Iunaite Setete,”
Taumafaiga Faalauiloa a Iosefa Samita i le 1844 e Tauva mo le Peresitene o le Iunaite Setete
Sa tautino atu e Iosefa Samita lona avea ai ma sui tauva mo le peresitene o le Iunaite Setete ia Fepuari 1844. Sa feagai Iosefa lava ia faapea foi le Au Paia i se tulaga lautele o ni tausaga o le faamaasiasia ma le sauaina i Misuri faapea ma Ilinoi. Sa tusi atu Iosefa i alii e toalima sa faamoemoe e avea ma sui tauva mo le tofi peresitene i le palota o le 1844, ma fesiligia alii taitasi po o le a se mea o le a ia faia e puipuia ai aia tatau faaletagatanuu o le Au Paia o Aso e Gata Ai pe afai o le a filifilia o ia. O le toatolu o nei alii na tali atu i ai, ae leai se tasi o i latou na folafola mai e fesoasoani i le Au Paia. O le taunuuga, na faatu e le Korama a Aposetolo e Toasefululua ia Iosefa Samita e avea o se sui tauva. Sa ia talia le faatu ma faaauau ai e amatalia se taumafaiga faalauiloa faaupufai. I le faamatalaina o ana mafuaaga mo le taliaina o le filifiliga, sa ta’u atu ai e Iosefa Samita i le lautele, “Semanu ou te le tuuina atu lava lo’u igoa e faaaoga e a’u uo i soo se mea e avea ai ma peresitene o le Iunaite Setete po o se sui tauva mo lena tofi pe ana mafai e a’u ma a’u uo ona maua le avanoa o le olioli i o matou aia tatau faaletapuaiga ma faalemalo o ni tagatanuu o Amerika.”1
Sa aoteleina le aiaiga faavae autu o le taumafaiga faalauiloa a Iosefa i se tamaitusi sa faaigoaina General Smith’s Views on the Power and Policy of Government. [O Manatu Lautele o Samita i le Paoa ma Aiaiga Faavae o le Malo.] O le faamanaina o le malo tutotonu e puipuia aia tatau o vaega toaitiiti faaletapuaiga o le ute lea o lana taumafaiga faalauiloa, ae sa ia faasoa faalauaitele ona manatu i le tele o mataupu o fefinauaiga. O lana aiaiga faavae autu sa aofia ai se talosaga ina ia faamutaina le faiga ua faatupulaia a le atunuu o falepuipui, ia faaitiitia le toatele o Sui o le Maota, faatuina se faletupe fou a le atunuu, ma faalauiloa le faalauteleina faaleatunuu i le taliaina o le maliega a tagata Initia Amerika. Sa talosagaina foi e Iosefa le faamutaina o le faia o pologa i le Iunaite Setete e le malo e ala i le faaaogain ao tupe e maua mai le faatauina atu o laueeleele o le malo i sisifo o le Iunaite Setete e faatau mai ai le saolotoga o tane ma fafine o loo fai ma pologa.2
O Manatu Lautele o Iosefa Samita i le Paoa ma Aiaiga Faavae o le Malo.
Sa faailoa aloaia e taitai o le Ekalesia le paoa o faasalalauga lolomi e faasalalau atu ai la latou savali i le atunuu, o lea sa latou lolomiina ai ma tufatufa atu le fiaafe o kopi o le tamaitusi o taumafaiga faalauiloa a Iosefa Samita. I le Aai o Niu Ioka, sa amata ai e taitai o le Ekalesia se nusipepa sa faaigoaina o le Prophet [Perofeta] lea sa tuuto i le lipotia o le avea o Iosefa ma sui tauva ma sa faatusatusa ai ona tulaga faaaiaiga faavae i isi sui tauva i le tauvaga. E le gata i savali lolomi o le taumafaiga faalauiloa, ae sa silia ma le 300 tagata o le Ekalesia sa faia misiona faatatau i le palota i vaega eseese o le atunuu.
O le le filifilia o Ioane Tyler e lana pati o lona uiga sa leai se faamoemoe, o lea na tele ai le avanoa o le tauvaga i le tofi peresitene i le 1844. Peitai, sa lei foliga mai ai se sui tauva e tamoe i tua atu o le faiga pati e lua e mafai ona manumalo i le tauvaga. Sa manatu nisi faapea o le taumafaiga faalauiloa sa le o se taumafaiga maua’i e filifili ia Iosefa Samita, ae o se taumafaiga na fuafua e fafagu ai tagata lautele i le mala o feagai ma le Au Paia o Aso e Gata Ai i le lotolotoi o sauaga o loo tulai mai i se atunuu e talagugutu i le maualuga uiga ese o le saolotoga. E ui ina sa faaalia aloaia e le Au Paia faapea e oo lava i se taumafaiga faalauiloa le manuia mo le tofi peresitene ae e mafai ai lava ona faalauiloa le silafia e aoga, ma sa tauanau pea e taitai o le Ekalesia lo latou faamoemoe e filifilia o ia. Sa latou filifilia ni au palota mai setete taitasi, o se gaoioiga sa toetoe e leai se uiga faalevafealoai lautele, ae nai lo lena, o le a avea ma auala e faaliliu ai palota e talia ma palota faitaulia pe a faapea e manuia le taumafaiga faalauiloa ia lava le lagolago e maua i soo se setete o le 24 setete sa avea o se vaega o le Iunaite Setete i lena taimi. Sa talitonu lava taitai o le Ekalesia e mafai ona malo Iosefa Samita pe afai o le finagalo lea o le Atua, ae sa leai lava so latou talitonuga o le a ia malo. Ona o lena mea, sa latou tulitulimatai isi fuafuaga e fesoasoani ai i mafatiaga ma sauaga sa lagonaina e le Au Paia, e aofia ai le talosagaina o le Konekeresi o le Iunaite Setete ia fai le aai o Navu ma teritori o le malo tutotonu, ma talosagaina le Konekeresi ia avea Iosefa o se taitai sili i le Ami a le Iunaite Setete, ma vailiili ai le avanoa e tuua atoa ai le Iunaite Setete. O le mea lea, o le taumafaiga faalauiloa a Iosefa mo le peresitene o se tasi o metotia tautalafeauga sa vaili e taitai o le Ekalesia e aumaia ai i le Au Paia le filemu ma le puipuiga e tatau ai mo i latou e tapuai i le Atua e tusa ai ma o latou lava lotofuatia ifo.3