Kamupani Soofaatasi (“Faatulagaga Soofaatasi”)

O le Kamupani Soofaatasi o se faalapotopotoga faaletaitaiga sa vaaia le faaaluga o tupe a le Ekalesia i le va o le 1832 ma le 1834. Ia Mati 1832, na poloaiina ai e le Alii ia Iosefa e faatuina le faalapotopotoga lenei ina ia faamaopoopo ai “taumafaiga o Tusiga ma Fefaatauaiga” a le Ekalesia i Ohaio ma Misuri.¹ Sa taloina e Iosefa se fono a faitaulaga sili ia Aperila 1832 i Misuri mo lea faamoemoe. I le fono, sa maua ai e Iosefa se isi faaaliga na ta’u mai ai o ia, Sini Rikitone, Newel  K. Whitney, Eteuati Paterika, Sini Gilbert, Oliva Kaotui, Ioane Uitimera, William  W. Phelps, ma Matini Harisi o le a avea ma vaega o le faalapotopotoga. Sa faamalamalama atili i le faaaliga faapea o nei alii e mafai ona faaaogaina se vaega o tupe sa aoina mo mea e tatau ai mo i latou lava, ma soo se tupe totoe o le a faaaoga mo faamoemoega o le Ekalesia. O i latou sa nafa ma aitalafu a le kamupani.

O alii e toaiva sa tofia i le Kamupani Soofaatasi sa i ai se meatausi patino. E toaono e “tausimea i faaaliga” (o se vaega sa faaigoaina o le “Kamupani o Tusiga”) ma sa latou vaaia gaoioiga lolomi ma faasalalau a le Ekalesia. O Paterika ma Gilbert o epikopo ia e toalua i le Ekalesia, ma o Gilbert o se sui lagolago ia Paterika. Faatasi ai, o lenei toatolu sa puleaina ia faleteuoloa a le Ekalesia i Ohaio ma Misuri. I le 1833, e toalua sui faaopoopo o—Feterika G. Viliamu ma Ioane Johnson—na faaopoopo i le kamupani e ala i faaaliga. O Viliamu, o se uso o le au peresitene o le pulega a le Ekalesia, sa umia ni fanua tetele i Ohaio, e pei foi o Johnson. O a la meeatotino na avea ma punaoa o le Kamupani Soofaatasi.

Mo le lua tausaga, o le tele o pisinisi a le Ekalesia sa faia e ala i le Kamupani Soofaatasi, e aofia ai le faatauina mai o le fanua o le a fauina ai le Maota o le Alii i Katelani. Ina ua tutuliese le Au Paia mai le Itumalo o Siakisone, Misuri, i le tautoulu 1833, sa leiloa ni vaega taua se lua o le kamupani a le Ekalesia: ofisa lomitusi a Phelp ma le faleteuoloa o Gilbert. E le gata i lea, o le Kamupani Soofaatasi sa i ai ni aitalafu mai le faatauga o oloa mo faleteuoloa, o se lomitusi fou i Katelani, ma le fanua mo atina’e i Katelani. I le aso 10 Aperila, 1834, sa tonu ai i sui auai o le Kamupani Tuufaatasi e soloia le kamupani ma i ni nai vaiaso mulimuli ane, sa le toe faagaoioia le Kamupani Soofaatasi. O le aufono maualuga i Katelani, sa faatuina ia Fepuari 1834, sa tauaveina le matafaioi o le pulea fefaatauaiga ma taumafaiga o tusiga ma faasalalauga a le Ekalesia.

I nisi o lomiga o le Mataupu Faavae ma Feagaiga, o le “Kamupani Soofaatasi” sa faaigoaina o le “Faatulagaga Soofaatasi,” ma sa faaopoopo i ai igoa faailo e sui ai igoa o sui auai. E le gata i lea, o le gagana e uiga i le faamoemoega o le kamupani sa suia ina ia faasino i se tulaga lautele atu mo le tausiga o e matitiva. Na faia lenei mea ina ia puipuia ai le faasinomaga o sui auai o le kamupani ma tausisia ai le le faalauaiteleina o ona faamoemoega. O igoa o tagata taitasi sa toefuatai i le Mataupu Faavae ma Feagaiga i le 1980, ae o le upu faatulagaga o loo faaaogaina pea nai lo le kamupani i vaega 78, 82, 92, 96, ma le 104. Na afua ai ona fenumiai le kamupani ma le faatulagaga soofaatasi, o se faiga mo le ola ai i le tulafono o le faapaiaga lea sa faavaeina mulimuli ane e Polika Iaga i Iuta.

Punaoa o le Ekalesia

Matthew C. Godfrey, “Newel K. Whitney and the United Firm: MFF 70, 78, 82, 92, 96, 104,” i le Matthew McBride and James Goldberg, eds., Faaaliga i le Matalalaga: O Tala i tua atu o Vaega o le Mataupu Faavae ma Feagaiga (Salt Lake City: The Church of Jesus Christ of Latter-day Saints, 2016), 142–47.

“Revelation, 12 November 1831[MFF 70],” josephsmithpapers.org.

Revelation, 8 March 1833[MFF 90]1, josephsmithpapers.org

“Revelation, 26 April 1832 [DC 82],” josephsmithpapers.org.

“Revelation, 23 April 1834 [DC 104],” josephsmithpapers.org.

Talaaga o le Soifuaga

O loo tuuina atu i lomiga nei nisi faamatalaga e uiga i lenei autu. O le faasino po o lou fesootai atu i lenei punaoa, matou te le faamaonia pe faamautinoaina ia anomea po o manatu o le tusitala.

Max H Parkin, “Joseph Smith and the United Firm: The Growth and Decline of the Church’s First Master Plan of Business and Finance, Ohio and Missouri, 1832–1834,” BYU Studies, vol. 46, no. 3 (2007), 5–66.

Autu Fesootai: Mataupu Faavae ma Feagaiga

Faamatalaga

1. “Faaaliga, 1 Mati 1832[MFF 78],” 1, josephsmithpapers.org;tagaifoi Mataupu Faavae ma Feagaiga 78:3--4; matau o le gagana i uluai tusiga o lenei faaaliga sa suia mo le lomiga.