Kamupani Taavale Toso

O paionia o Au Paia o Aso e Gata Ai e faimalaga atu i le Vanu o Sate Leki e tele lava e ala i taavale toso e o’o i le ogatotonu o le vaitau o le 1850, ina ua moomia se ala femalagaai sili na maualalo le tau a e vave lea na tonu ai ia Polika Iaga e faatonu taitai e faatulaga kamupani taavale toso. E nai lo le faaaogaina o taavale lea sa tele ina toso e povi, o paionia taavaletoso e latou te tosoina lava e i latou taavale laupapa. E taugofie atu taavale toso ma o kamupani taavale toso e mafai ona saoasaoa nai lo taavale e toso e povi.

O Paionia i Taavale Toso na tusia e Minerva Teichert

Ata o paionia taavale toso, saunia e Minerva Teichert

O le femalagaai ai i taavale tosolima na amata i le 1856 ma faaauau e oo atu i le 1860. O le Kamupani o Tupe Faaagaaga mo le Malaga ese atu (TFFM) na saunia tupe nono e fesoasoani ia i latou o e e le mafai ona gafatia na totogi le faigamalaga. Na’o le 10 o le silia ma le 350 o kamupani faimalaga a Au Paia o Aso e Gata Ai e faimalaga e ala i taavale toso.¹

O le tele o kamupani taavaletoso e faataunuuina le faigamalaga e aunoa ma se faalavelave. Ae peitai, o kamupani e lua na taitaia e Iakopo G. Uili ma Eteuati Matini, e manatuaina e Au Paia o Aso e Gata Ai mo le malaga faanoanoa na tuai o lena vaitau. I le 1856 o afa o le taumalulu na maileia ai kamupani a Uili ma Matini faapea ma kamupani taavale toso a Hunt ma Hoketi, i luga o laufanua o lea ua igoa nei o Uaiomi. E latalata i le 1,500 tagata na aafia ai i luga o le ala, a e pe a ma le 250 o i latou o e na maliliu ina ua tigaina i le siosiomaga na o’o i ai, aisā o lima ma vae, ma le leai o ni meaai. O se taumafaiga laveai na limalima ai le fia afe o tagata o le Ekalesia i Iuta e saunia meaai ma fesoasoaniga, ma le silia ma le 300 tagata laveai na tuu lamatia lo latou lava saogalemu e faafetaui kamupani nei i le ala ma fesoasoani ia latou oo atu i le Vanu o Sate Leki, na faasaoina ai le silia ma le 1,200 ola. E ui lava o ni isi o faamatalaga o le laveai ma mea na tutupu mulimuli ane na tele ina faatele tala,² o lenei laveai na musuia ai augatupulaga o Au Paia o Aso e Gata Ai mo le tali vave atu, ma le naunau lototele a le au laveai na lamatia ai o latou lava ola, ma le lagolago ma le agalelei a tagata o le alalafaga mo e na faasaoina mai.

I le faatusatusa ai ma mea na oo i kamupani a Uili ma Matini, o le toatele o e na maliliu o isi kamupani taavale toso e lei sili atu nai lo kamupani taavale e toso e manu ma faaauau pea e e na pulea tupe faaagaaga mo le malaga ese atu (TFM) ona fesoasoani atu i e malaga e ala i taavale tosolima. E oo atu i le 1860, e tusa ma le 3,000 taavale toso paionia na faataunuuina ma le manuia le faigamalaga.

Punaoa o le Ekalesia

Paulo H. Pitasone, “Na Latou O Mai e ala i Taavale Toso,” Ensign, Aok. 1997, 30–37.

“Nofoaga Faatalaaga o Uaiomi,” Nofoaga Faasolopito, history.ChurchofJesusChrist.org.

Lisi o Tusi

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Anetelea D. Oloseni, O Le Tau Na Matou Totogiina: O le Tala Le Mafaatusalia a Paionia i taavale toso a Uili ma Matini (Aai o Sate Leki: Tusi a Tesareta, 2006).

LeRoy R. Hafen ma Ann W. Hafen, Taavale Toso agai i Siona: O le Tala Tulagaese i le Faigamalaga i Sisifo, 1856–1860 (Linikone: Falelomitusi a le Iunivesite a Nebraska, 1992).

Faamatalaga

1. Tagai “Lisi Atoa o le Kamupani,” Faamaumauga o Malaga Paionia Mamona i Luga o le Laueleele, history.ChurchofJesusChrist.org. Tagai i Autu: Malagaese Atu; Ala na Uia e Paionia.

2. O le tu lauiloa a talavou laiti e toatolu i le aveina o le kamupani atoa e kolosia le Vaitafe o Vaisuamalie, tigaina mai ai mai aafiaga o le laveaiga, ma le folafolaina atu i ai o le ola e faavavau e faavae i lea faatinoga agalelei e tasi, ua foliga mai ua faateleina. Tagai Chad M. Orton, “O le Kamupani Taavale Toso a Matini i le Vaisuamalie: O Se Isi Vaaiga,” Aoaoga i le IPI, vol. 45, nu. 3 (2006), 5–37.