Taua Muamua o le Lalolagi
E oo ane i le faaiuga o le seneturi lona 19, ua faalautele atu e malo malolosi i Europa, Asia i Sasae Tutotonu, ma Amerika i Matu o latou pisinisi, auai faafitafita, ma lo latou mauaina o teritori i se vaega tele o le kelope. I le va o le 1877 ma le 1913, na finauina ai e le Austro-Hungarian, Russian, ma Ottoman Empires mo le pulea o se vaega tele o le Penisula i Balkan. Sa faatutu e isi malo i Europa ni vaega aufaatasi mo le puipuiga e puipui faasaga i le sosolo atu o nei malo ma faapea ona faaalu ai le malosi o punaoa i le faafetauiga o lo latou malosi faafitafita.1 Ao malaga taamilo Archduke Franz Ferdinand o Austria i le eria o Balkan i Bosnia ma Herzegovina ia Iuni 1914, sa osofaia ai le latou solo taavale e tagata fasioti tagata na sailia se tutoatasi o Yugoslavia.2 O le maliliu ai o Ferdinand ma lona faletua o Sophie, na oo atu ai i se faasologa o poloai i le va o setete o Europa ma le faatuina o ni vaega eseese se lua, o le Triple Alliance (lea sa ta’ua mulimuli ane o le “Central Powers”) ma le Triple Entente (lea sa ta’ua foi o le “Allied Powers”).3 I le aso 28 o Iulai, na faaoso ai e Austria-Hungary le taua i Serbia, lea na faaosoina ai fitafita o aufaatasi e faapotopoto e sauniuni mo le taua. Ina ua teena e Rusia ma Farani ia poloaiga a le malo o Siamani e taofi ia faatinoga faafitafita, na folafola atu e Siamani le taua e faasaga i nei atunuu e lua.4 I totonu o ni masina, na aafia uma ai setete o Europa i le feteenaiga. O le taua na tosoina mai ai vaegaau mai konetineta uma sa nofoia ma faasolo atu i atualuma tetele e lima o Europa i Sasa’e ma Sisifo, Aferika, Sasa’e Tutotonu, ma Italia.5 Ina ua mavae tausaga e fa o fetauaiga i le va o Setema ma Novema 1918, ona gauai atu lea o tagata o setete o le Central Powers i se maliega ma le vaega o le Entente, o lea na faamutaina ai le taua.6
O le toatele o le Au Paia o Aso e Gata Ai i lena taimi sa nonofo i le Iunaite Setete i sisifo, ae o le toatele i Peretania, Kanata ma Siamani sa tigaina i aafiaga matautia o le feteenaiga. Ma le isi, o le feteenaiga o le taimi muamua lea na oo ai se aofaiga toatele o le Au Paia o Aso e Gata Ai i itu eseese o le taua. Sa augani atu le Peresitene o le Ekalesia o Iosefa F. Samita i le Au Paia o Aso e Gata Ai ina ia tumau le tutufaatasi pe a feagai ma feteenaiga faavaomalo. Sa talitonu o ia o le alia’e mai o le taua o le sese lea o taitai saua o le malo, ae le o tagata lautele na faamalosia e faaauupegaina.7 I le talosaga a Peresitene Samita, na ofoina ai e Charles W. Penrose, o se fesoasoani i le Au Peresitene Sili se tatalo mo le filemu i le taimi o le konafesi aoao o Oketopa 1914.8
Ao faateteleina le feitaga’i, na aveese mai ai e le Misiona a Europa le toetoe o faifeautalai uma mai fafo ma na fofogaina ai e le Au Peresitene Sili se taofiga lē tumau o le auina atu o faifeautalai i fafo seia oo ina uma le taua.9 Ao ulufale atu alii talavou e tautua i le militeli, o tamaitai na maua ai le silia i le 40 pasene o faifeautalai uma o le Au Paia o Aso e Gata Ai, o le pasene aupito maualuga lea talu mai le 1898, i le taimi sa uluai vaetofia ai tamaitai o ni faifeautalai faamisiona.10
O lesitalaga sa eseese e fua i le atunuu moni o le Au Paia o Aso e Gata Ai. O Siamani sa lesitalaina alii uma i le va o le 17 ma le 50 tausaga le matutua e tautua i le militeli, ma faamalosia nisi o faifeautalai Siamani e o i le taua.11 I Peretania, lea na toeitiiti 6,000 tagata o le Ekalesia na nonofo ai, e silia ma le miliona alii na tali atu i valaau mo fitafita volenitia i totonu o masina na fai ai le taua. I ni isi o paranesi, e sili atu ma le afa o alii sa tautua i le taua.12 I Kanata, sa aoao faamasani ai le Aposetolo i le lumanai o Hugh B. Brown o se taitai i le militeli ma aumaia fitafita fou o Au Paia o Aso e Gata Ai i iunite o vaegaau faalelotoifale na auina atu i Farani.13 O le toatele o alii o le militeli o le Au Paia o Aso e Gata Ai na lesitala i totonu o le Iunaite Setete, ae maise lava i Iuta. Ina ua ulu atu le Iunaite Setete i le taua, e 5,000 fitafita fou mai Iuta na o atu i Farani, o le toatele o i latou na o mai mai pitonuu o tagata malaga mai Italia ma Eleni, nai lo le mai i uarota ma siteki o le Au Paia o Aso e Gata Ai. E oo ane i le faaiuga o le taua, ua toatele alii o le Au Paia o Aso e Gata Ai na lesitala nai lo le taimi muamua, ma le silia i le lima pasene o le faitau aofai o Iuta na tautua i le militeli.14
Na lagolagoina e le Ekalesia taumafaiga o le taua e ala i le galulue faatasi ma faalapotoptoga e pei o le Koluse Mumu, Tama Sikauti a Amerika, ma polokalama a le malo o le Iunaite Setete. Na aoina e le Aualofa ia foai o luutaga o saito ma meaai tuuapa lea na sapalaiina ai le United States Food Administration i le silia ma le 16 tone o oloa. Sa saofaga atu le Ekalesia i le Koluse Mumu i sapalai o mea faafomai lea na tuuina atu ai le silia i le 250 miliona o fusi faafomai i falemai i le lotoifale ma falemai a le ami.15 O Mutuale a Tamaitai Talavou ma Alii Talavou na faalauiloaina ia War Saving Stamps lea na fesoasoani i le suegatupe a le malo. O Tama Sikauti sa tufatufaina le silia ma le 30 miliona o tusitusiga e lagolago ai le taua, aoina o faatau faaaitalafu, ma le faiga o togalaau i le faitau selau o eka o faatoaga sa le’i faaaogaina e toto ai meaai faaopoopo.16 I Peretania, na faatulagaina ai e tamaitai ni komiti mo toomaga e aoina ma tiliva lavalava ma tusi faitau mo ftiafita, asiasi i tagata manunu’a i falemai a le ami, ma faatau atu fua o faatoaga e lagolago ai fitaftia na tauina le taua.17 O le toatele tele o tagata manunua ma maliliu—sa i le va o le 9 ma le 10 milliona tagata maliliu ma le isi 20 i le 21 miliona o tagata manunu’a—ma o le aafia ai o le lalolagi atoa i le feteenaiga na faaosofia ai se vaega o le Au Paia e taofiofi le auai i le taua ma, i ni nai mataupu, na teena ai le lesitala ma avea ai o ni tagata tetee ma le iloa i le faamasinoga.18
O le faaletonu o le tausia o faamaumauga i militeli eseese o le taua na taofia ai le faitauina o se numera tonu o fitafita ma tagata lautele o le Au Paia o Aso e Gata Ai na manunu’a ma maliliu; o ni taumatematega o le aofai o fitafita o le Au Paia o Aso e Gata Ai na maliliu sa i le va o le 600 ma le 700. O tulaga o femalagaaiga o le toatele o le Au Paia o Aso e Gata Ai na lesitala mo le tautua faamiliteli na atili faafaigata ai lo latou aafiaga i le taua.19 Mo le Au Paia o Aso e Gata Ai i le tele o vaega o le lalolagi, o le taua na faateteleina ai lagona o le lotonuu. I Europa ma Amerika i Matu atoa, o le Au Paia o Aso e Gata Ai o e sa tautatala e uiga i sauaga a le malo sa amata ona faaalia lo latou tautino ma le lototoa i o latou atunuu moni.20 I ni isi o vaega o le Au Paia o Aso e Gata Ai, o le lototoa na mafua ai ni feeseeseaiga i le va o tagata o le ekalesia e eseese atunuu na o mai ai, ma sa fautuaina e Peresitene Iosefa F. Samita le Au Paia o Aso e Gata Ai uma ia talia tagata uma o soo se atunuu i o latou afioaga ma tausisia le lagolagoina o tagata fai mai “i le agalelei aupito sili ona mama.”21 A’o toe tatalaina eria i Europa i le galuega faafaifeautalai ina ua uma le taua, sa molimauina e le Au Paia o Aso e Gata Ai le tuputupu a’e lea sa le’i faamoemoeina i le salafa o atunuu sa taulamua i le taua, lea na faalauteleina ai le aapa atu o le Ekalesia i le faavaomalo i tua atu o ona tapulaa o le seneturi lona 19.
Autu e Fesootai i Ai: Taua Lona Lua o le Lalolagi, Iosefa F. Samita, O le Le Faaituau i Faiga Faaupufai, Faama’i o le Fulu i le 1918