“Valoaga a Iosefa Samita,” O Autu o le Talafaasolopito o le Ekalesia
“Valoaga a Iosefa Samita”
Valoaga a Iosefa Samita
E ui o le tele o faaaliga na maua e Iosefa Samita na aumaia ai faatonuga, fautuaga, ma aoaoga faaleaoaoga faavae pe toe aumai ai tala paia mai aso anamua, e laitiiti o loo aofia ai valoaga patino faasolopito e uiga i mea o loo loma.1 O valoaga sa masani ona taulai atu i mea tutupu i le lalolagi atoa e tau atu i le Afio Mai Faalua o Iesu Keriso po o taumafaiga patino ia na poloaiina le Au Paia e auai ai.
O se tasi o valoaga aupito lauiloa faameleniuma a Iosefa Samita e fesootai i le Taua Faalemalo a Amerika. I le aso 25 Tesema, 1832, sa maua ai e Iosefa Samita se faaaliga na valoia ai se taua i le va o setete i matu ma setete i saute o le I.S. o le a amata i Karolaina i Saute, ma o taua ma fouvalega i le lalolagi atoa o le a iu ina taunuu i le “iuga o Atunuu uma” i le taimi o le Afio Mai Faalua o Iesu Keriso. I le taimi na maua ai le faaaliga, sa aofia ia Karolaina i Saute ma le malo o faigamalo o le Iunaite Setete i se fefinauaiga, ae sa foia filemu ia Mati na sosoo ai. Na mavae ni tausaga mulimuli ane, sa toe faamamafa mai e Iosefa lana valoaga e faapea o le a tulai mai se taua i Karolaina i Saute ona o felafolafoaiga i le mataupu i pologa, e pei ona sa i ai i le toeitiiti atoa le 20 tausaga talu ona maliu Iosefa Samita.2
Sa valoia soo foi e Iosefa Samita e faatatau i le taunuuga i le lumanai o Le Ekalesia a Iesu Keriso o le Au Paia o Aso e Gata Ai ma lana matafaioi i aso e gata ai. Atonu o le valoaga aupito faapelepele o nei valoaga sa i ai i se tusi i le 1842 lea na faatuatusi i le faatonu o le nusipepa i Sikako o Ioane Wentworth. “E leai se lima eleelea e mafai ona taofia le galuega mai lona alualu i luma,” sa faamautinoa e Iosefa, e ui i mafatiaga ua fetaiai ma le Ekalesia talavou. “E mafai ona matamataita sauaga, e mafai ona tuufaatasi le au faatupu faalavelave, e mafai ona faapotopoto autau, e mafai ona osofai mai talapepelo taufaaleaga, ae o le a agai pea i luma ma le le fefe le upumoni a le Atua, e viia, ma tutoatasi, seia oo atu i konetineta uma, ma asia itulagi uma, faatumulia ai atunuu uma, ma lagona e taliga uma, seia oo ina faataunuuina faamoemoega o le Atua, ma fetalai mai ai le Ieova Silisili ua mae’a le galuega.”3
O le tele o valoaga a Iosefa Samita o faamatalaga faafaaaliga e uiga i le finagalo o le Alii mo le Ekalesia, lea sa malamalama i ai le Au Paia sa faalagolago i lo latou faatuatua ma le faitalia o le tagata.4 O le tele o nei valoaga sa faataunuuina a o agai atu i luma i le faatuatua le Au Paia e faataunuu. I isi tulaga, sa tauivi le Au Paia e taufaafetaui ia faigata sa latou fetaiai a o latou tulimataia faamoemoega musuia.
Mo se faataitaiga, o le uluai malamalama o le Au Paia o Aso e Gata Ai i valoaga e faatatau i le Siona i le lumanai sa taulai i le fauina o se aai i le Itumalo o Siakisone, Misuri. Ina ua uma ona tutuliese i latou mai le laueleele, sa fesoasoani nisi faaaliga latou te malamalama ai i o latou aafiaga ma maua ai auala fou e faasosolo atu ai lo latou malosi agai i le faamaeaina o le galuega a le Alii. Sa faamautinoa ai foi ia i latou faapea a oo mai “o latou fili i o latou luga, ma faalavelaveina i latou mai le faatinoina o lena galuega,” o le a “le toe manaomia e le Alii lena galuega” ma talia la latou taulaga.”5 E ui ina sa tofotofoina lo latou faatuatua ona ua aveesea le laueleele o Siona, ae sa faaauau pea ona galulue tagata o le Ekalesia e fauina Siona i isi nofoaga ma auala.6
Sa oo le Au Paia i Katelani i se tofotofoga o le faatuatua sa fesootai ma se tasi o faamatalaga faavaloaga a Iosefa Samita. I le faaiuiuga o le 1836 e oo atu i le tautotogo o le 1837, sa ta’u atu ai e Iosefa Samita i le Au Paia o le a manuia faaletamaoaiga ia Katelani pe afai o le a latou tausia poloaiga ma lagolagoina se faapotopotoga fou tautupe i le lotoifale e ta’u o le Sosaiete mo le Saogalemu o Katelani.7 Ina ua gau le faletupe, sa manatu nisi o le Au Paia o upu a Iosefa Samita o se valoaga ua le manuia. Sa vaavaai atu isi mo faamanuiaga a le Atua e ui i lo latou tofotofoga faaletamaoaiga.8 O Oliva Granger, o le sa taliaina se tofiga na te taulimaina aitalafu uma a le Ekalesia i le gaogaosa o se faaletonu tele faaletamaoaiga, sa faamautinoa mulimuli ane e le Alii e faapea “o lana taulaga o le a sili atu ona paia ia te au, nai lo lona faatelega.”9
O nisi o tala aupito musuia mai le talafaasolopito o le Ekalesia o loo faamatala ai taumafaiga a le Au Paia o e sa faaaoga le faatuatua i faamatalaga na faaalia a Iosefa Samita ma galue e faataunuuina. I le aso 26 Aperila, 1838, sa maua ai e Iosefa Samita se faaaliga sa faatonuina ai Aposetolo e Toasefululua e o ese mai Fa Uesi mo se misiona i Egelani i le tausaga e tasi. Ina ua tutuliese le Au Paia mai Misuri i lena tautoulu, sa ta’ua e nisi o se valoaga sese. E ui i le feagai ai ma sauaga sa oo mai po o le faafalepuipuiina i le toe foi i Misuri, sa naunau lava Polika Iaga e galue e tusa ai ma le valoaga. Sa ia taitaia le Toasefululua i se malaga faalilolilo e toe foi i Fa Uesi, Misuri, ma i le vaeluapo i le pogisa i le aso 26 Aperila, 1839, sa latou tuua faafaatusa mo la latou misiona i le faataunuuina o le poloaiga.10
Sa naunau pea Iosefa Samita i le saolotoga e ta’u atu ai ona manatu. Ina ua ta’u atu e se tagata ia te ia sa latou manatu o se perofeta e tautala i taimi uma o se perofeta, sa faasalaveia e Iosefa faapea “o se Perofeta sa na o se Perofeta i le taimi na te faatino ai o se perofeta.”11 O le taimi lava foi lea, sa lei fe’alofa’i o ia e saunoa atu ma le lotoa ina ua avatu ia te ia e le Alii ia faatonuga faaalia, ma sa ia tu i ana saunoaga faaperofeta. O le meaalofa o le valoaga o se itu taua o le valaauga ma le talatuu o Iosefa Samita.
Autu e Fesootai: Joseph Smith Jr., Emma Hale Smith