Aiga o Iosefa ma Ema Hale Samita

Na onosaia e le aiga o Iosefa ma Ema Samita ni faigata ma ni faalavelave matuia, e aofia ai le sauaina faalemalo ma le faalelotu, na faamalosia mai lo latou aiga ma na leai se mea e nonofo ai, le maliliu faafuasei o se fanau e toafitu, ma le maliu faamaturo o Iosefa lava ia.¹ I taimi o faigata, na liliu atu tagata o le aiga i le tasi ma le isi mo le malosiaga. I le taimi a o i ai o ia i le falepuipui i Liperate, mo se faataitaiga, na tusi atu ai Iosefa ia Ema ma ofoina atu ia te ia le faamalosiauga e ui lava i le faavauvau i lo la valavala ai. Na ia faatonuina foi o ia e faatatau i le la fanau: “Tau atu ia i latou e alofa Tama ia i latou i se alofa atoatoa, ma o loo ia faia mea uma na te mafaia ia alu ese mai ai i le au faatupu faalavelave, ae alu atu ia i latou.“² I o latou tausaga mulimuli ane, na tumau pea le lotogatasi o fanau a Samita na soifua pea ma na lagolagoina e le tasi le isi i la latou auaunaga i le ekalesia. Na latou puipuia le igoa lelei o lo latou tina ma tausia o ia seia oo i lona maliu i le 1879.

Ina ua mavae le faaipoipoga a Iosefa ma Ema i le 1827, na nonofo le aiga mo sina taimi i Manaseta faatasi ma le aiga o Iosefa, ona siitia atu ai lea i Haramoni, Penisilevania. E lei feola le la fanau muamua e toatolu e sili atu i se aso, ma e faatoa amata ona la tausia la laua lava fanau ina ua toe siitia atu Iosefa ma Ema i Ohaio ma la vaetamaina ai le masaga. I Ohaio, na faapaleni ai e Iosefa lona olaga faaleaiga ma le galuega autu faaletaitai ao ia taitaia se lotu na vave lava le faatupulaia faatasi ai ma ni paranesi i le Iunaite Setete atoa ma se nuu ua malosi lava o le Au Paia o Aso e Gata Ai i Misuri. O se faaletonu o le tamaoaiga i le atunuu, le le manuia o le Kamupani o le Kirtland Safety Society Banking, ma le faatupulaia o taufaamatau i le saogalemu o Iosefa na tuliesea ai le aiga mai Ohaio i Misuri i le amataga o le 1838, ae o le faateleina o le tetee agai i le Au Paia i Misuri sa na o le faateleina i le tausaga atoa na sosoo ai seia oo ina tuueseeseina le aiga e le matautia o le au faatupu faalavelave. Na maua e Ema le malutaga faatasi ma isi Au Paia i Ilinoi ao falepuipui Iosefa i Misuri. I le amataga o le 1839, na toe faatasia ai Iosefa ma le aiga ina ua mavae le faatagaina e sola ese mai nisi toe faafalepuipuiina.

I Ilinoi, na faatasi atu ai le aiga i le atiina ae o le aai o Navu, ma o Iosefa ma Ema foi na taitaia vaega faalenuu ma faalelotu mo nai isi tausaga. Ao i ai i Navu, na faatinoina e Iosefa le autaunonofo e pei ona faatonuina ai o ia e se faaaliga. Na ia faaipoipo i le tele o isi fafine, e ui e leai se faamaoniga tonu na i ai ni fanau a Iosefa i ona toalua e toatele.³ O le autaunonofo i Navu na faatinoina faalilolilo, ma e lei faalauiloaina pe na nonofo i se tulaga lautele ma nisi o ona toalua e toatele. O le mea lea, o fanau a Samita, e lei vaai lava i le faatinoina o autaunonofo. E faapitoa lava, o Iosefa lll, Alesana, ma Tavita na talitonu o le aoaoga faavae e lei amata mai i lo latou tama.⁴

I le maliu o Iosefa i le 1844, na vaaia e Ema meatotino a Iosefa, lea na aofia ai ni nai mea taua e pele. O uluai tusitusiga na maua mai le faaliliuga a Iosefa Samita o le Tusi Paia (e aofia ai le tusi a Mose i le Penina Tautele) ma tusi taai faaAikupito e fesootai i le tusi a Aperaamo na i ai uma lava i le vaaiga a Ema. Na nofo pea Ema i Navu faatasi ma le fanau ina ua malaga atu tagata o le Ekalesia i le Vanu Tele. O lona toalua lona lua, o Lewis Bidamon, na faasaoina le uluai tusitusiga o le Tusi a Mamona mai i le mea na tanu ai i se maatulimanu o le Maota o Navu. A o faaauau e le aiga o Samita le taitaiga i le Ekalesia Toefaatulagaina a Iesu Keriso o le Au Paia o Aso e Gata Ai, le Ekalesia Toefaatulagaina (na mulimuli ane taua o le Nuu o Keriso) na faasaoina le tele o nei mea taua e oo mai i le taimi nei. Na lagolagoina e le aiga o Samita le galuega ma le faaaliga a Iosefa ma na tuua e le gata o se talatuu tumau mo lo latou tupuaga ae faapea foi o se molimau taua tele o le uluai aafiaga o le Au Paia o Aso e Gata Ai.

Iosefa Samita le Itiiti .(1805–44)

(Tagai “Joseph Smith and His Papers: An Introduction,” josephsmithpapers.org.)

Emma Hale Smith Bidamon (1804–1879)

(Tagai “Emma Hale Smith,” Church History Topics.)

Atalii e Lei Faaigoaina (1828)

Na fanauina e Ema se atalii ia Iuni 15, 1828. ae na maliu le tamaitiiti i le aso lava lena. O se tuugamau i le fanua o le aiga o Hale i Haramoni, Penisilevania, e faitauina “E Manatua ai Se Atalii Pepe o Iosefa ma Ema Samita ia Iuni 15 1828.“ I se Tusi Paia a le aiga, na tusia ai e se tausoga le igoa o “Alavine“ e faailoa ai lenei tamaitiiti, ae na faamaonia mulimuli ane e Ema e lei faaigoaina lava le tamaitiiti.⁵

Masaga e Lei Faaigoaina (1831)

I le 1831, na fanauina ai e Ema se masaga, o se teine ma se tama, ae na maliliu uma tamaiti i le taimi na fananau ai. O le aso na sosoo ai, na fanauina ai foi e se uo o Iulia Clapp Murdock se masaga, ae na maliu o ia i le ono itula talu ona fanau. O le toalua o Iulia, o John Murdock, i le tuua ai o se tasi ua maliu le ava ma se fanau e toalima e tausia, na tuuina atu le masaga ia Ema ma Iosefa mo le vaetamaina. E foliga mai e lei faaigoaina lava e Ema lana masaga na maliliu. Ina ua fesiligia e lona tina-faaletulafono, o Lusi Maka Samita, faamatalaga mo se talafaasolopito o le aiga, e lei taua e Ema lana tama muamua ma le masaga. I se faatalanoaga ma lana tama matua o Iosefa Samita lll, na faamatalaina e Ema faapea o nei tamaiti e toatolu e lei lava le taimi na feola ai e faaigoaina ai. E ui na faailoaina e se Tusi Paia a le aiga le masaga o “Luisa” and “Thadeus,” o nei igoa na faamaumauina e se tausoga mulimuli ane e aunoa ma se fesootaiga i la latou punaoa.⁶

Iosefa Murdock Samita (1831-1832)

Na vaetamaina e Iosefa ma Ema ia Iosefa Murdock Samita ma lona tuafafine masaga, o Iulia, mai le la uo o John Murdock i le taimi lava na maliu ai le tina o pepe. Na maua le pepe o Iosefa i le misela i le amataga o le 1832, ma ao tausia o ia i se tamai moega, na sau se osofaiga e tagata leaga, na tosoina lona tama vaetamaina o Iosefa mai le potumoe i le po malulu ma fasia o ia seia matapogia. E itiiti ifo ma se tausaga le matua, na maliu Iosefa Murdock Samita i ni nai aso mulimuli ane. Na tuuaia e Iosefa Samita le maliu o lona atalii vaetamaina i le taiaina e le malulu o le po, lea na fetauia ma le malamalama faafomai o lena taimi.⁷

Iulia Murdock Samita Dixon Middleton (1831-1880)

Ina ua tuuina atu e le tama moni o Iulia, o John Murdock, o ia ma lona tuagane masaga mo le vaetamaina, na talosagaina e Ema Samita Murdock e aua le tauina i tamaiti lo la vaetamaina ina ia la maua se lagona atoatoa o i laua moni lava o le aiga o Samita. E ui i lea, na iloa e Iulia le mea moni i le lima o tausaga, mai se tuaoi “leaga”. Na ia faaipoipo atu ia Elisha Dixon i se taimi ae lei oo i le 1850, ma ina ua maliu o ia i le 1853 sa siitia atu loa Iulia i Navu. Na liliu atu Iulia i le Katoliko i le tolu tausaga mulimuli ane ina ua faaipoipo i se Katoliko, o John Middleton. E lei maua lava sana fanau ma na nofo latalata i Navu ina ua maliu i le 1880.⁸

Ata pue o Iulia Murdock Samita Dixon Middleton.

Iosefa Samita lll (1832-1914)

Na fanau Iosefa Samita lll ia Novema 6, 1832, i le faatoa taunuu atu o lona tama, o Iosefa Samita le Itiiti, i Katelani mai se asiasiaga i le Aai o Niu Ioka ma Boston. I le ono tausaga mulimuli ane, na molimau ai e “Iosefa Laitiiti” le avea faafalepuipui o lona tama i Misuri, i le taimi lea na faamalosia ai o ia mai lona tama e se leoleo, ma faafefe o ia e “tui o [ia]” i se pelu.⁹ Ao tamaitiiti, na ia asiasi atu ai ma lona tina i le Falepuipui o Liperate ma nonofo ai iina mo se po faatasi ma lona tama ma isi pagota. Na nofo i lona olaga tama i Navu ma na papatisoina e lona tama ia Novema 1843.

I le sefulu tausaga ina ua mavae le maliu o lona tama i le 1844, na tumau pea le le auai o Iosefa lll i nai isi lotu na finauina le tuuina atu o le pule mai le Perofeta o Iosefa Samita. I le taimi a o soifua Iosefa Samita le Itiiti. na ia, tuuina atu ia Iosefa lll ni nai faamanuiaga, o se tasi o na faamanuiaga na mulimuli ane finauina faapea e aofia ai le folafolaga o le pulefaamalumalu i le Ekalesia.¹⁰ I le 1856, na oo atu ai ni alii se toalua e suitulaga i se taumafaiga e Toefaatulaga le lotu ia te ia ma se faaaliga tusia. Na taua mai e le pepa e faapea o Iosefa Samita lll e suitulaga i lona tama e ala i le gafa, ae sa teena e Iosefa le valaaulia e taitai se lotu toefaatulagaina. O faamanuiaga a lona tama ma se aafiaga faaleagaga na iu ina faamalosia o ia e auai i le taumafaiga e Toefaatulaga le lotu ma pulefaamalumalu i le Ekalesia Toefaatulagaina a Iesu Keriso o le Au Paia o Aso e Gata Ai (lea ua taua nei o le Nuu o Keriso).¹¹

Mo le isi 54 tausaga, na taitaia ai e Iosefa lll le Ekalesia Toefaatulagaina o se peresitene-perofeta ma fausia ni aulotu o uluai Au Paia e lei malaga atu i Sisifo. I le iloaina mo lona amiosao ma le malamalama i mea tau polokiki, na ia saili ai e faataunuu le faaaliga faalelotu a lona tama ma atiina ae se faalapotopotoga o se lotu e tumau, le lona lua le tele o i latou o e faapea o Iosefa Samita le faavae autu. A o ia faatumauina se sootaga lelei ma ona tausoga ma le Peresitene o le Ekalesia i Iuta, o Iosefa F. Samita, na teena e Iosefa lll faapea na faatinoina e lona tama le autaunonofo ma na le ioeina gaoioiga a faifeautalai ma le finauina o tulaga faatalafaasolopito.¹² Na ia aumaia ona uso o Alesana ma Tavita i ni tulaga sinia faataitai ma faamautinoa le ala o lona atalii e sosoo ma ia o se peresitene o le ekalesia.¹³ Na ia faaipoipo faatolu ma na faalua ona maliliu ona faletua, muamua ia Emeline Griswold i le 1856, ona sosoo lea ma Peta Madison i le 1869, ae mulimuli ia Ata Rachel Clark i le 1898. O Iosefa lll o se tama o se fanau e 17 . Na ia maliu i se mai oso o le fatu i le 1914.¹⁴

Feterika Granger Williams Samita (1836-1862)

E itiiti se faamatalaga o maua i le tama lona lima a Ema lava ia, o Feterika Granger Williams Samita, na fanau ia Iuni 20, 1836, i Katelani ma na faaigoaina ia Feterika G. Williams, se tasi o fesoasoani o Iosefa Samita. Sa nofo Feterika i Navu i le tele o lona olaga o se faifaatoaga ma se faipisinisi, na faaipoipo atu ia Ana Marie Jones i le 1857, ma na maliu (atonu i le fatafatavaivai) i le 1862.¹⁵

Ata pue o Feterika Granger Williams Samita.

Alesana Hale Samita (1838-1909)

Na faaigoaina i le uo ma o se loia e talitonuina e le Au Paia o Alesana Doniphan, na fanau Alesana Hale Samita i le taimi o le faateteleina o sauaga i Misuri. Na siiina e Ema Alesana e valu-masina-le matua e kolosi le Vaitafe aisa o le Misisipi i le 1839 e sosola mai le “poloaiga [amioleaga] e faaumatia Mamona” a le kovana Misuri o Lilburn W. Bogg Na ola ae le tama i le naunau i le talitonuga i le Tusi a Mamona ma i le galuega faaperofeta a lona tama. A o tagata matua, na mulimuli Alesana i lona uso matua o Iosefa lll i le taumafaiga e Toefaatulaga le lotu ma na auauna atu i ni tofiga maualuluga i le Ekalesia Toefaatulagaina.¹⁶

Na faaipoipo atu Alesana ia Elisapeta Akenese Kendall i le 1861, lea na ia maua ai se fanau e toaiva. E lei pine talu ona fanau mai le la tama muamua, o Feterika Alesana, ae maliu Feterika Granger Williams Samita le uso matua o Alesana, lea na faapopoleina ai Alesana i le taunuuga e faavavau o lona uso. Na lipotia mai, lona aafiaga muamua na mulimuli mai, o se musumusuga a le Agaga Paia lena na faafilemuina ai lona agaga. Na ia lagonaina le mautinoa faapea “o le tulaga o Feterika o loo lelei.”¹⁷

Na auauna atu Alesana i ni misiona se tele mo le Ekalesia Toefaatulagaina, ma na asiasi atu i Iuta i nisi taimi ma feiloai ma tausoga i le Ekalesia a Iesu Keriso o le Au Paia o Aso e Gata Ai. E ui i nisi o finauga malolosi i ni eseesega faalelotu i nisi taimi, na ia faatumauina se va lelei agai i ona tausoga i fafo o le taumafaiga Toefaatulagaina. Na ia auauna atu o se fesoasoani i lona uso, o Iosefa lll, i le AAGT i le Au Peresitene Sili ma na faauuina o se peresitene o le AAGT i le Korama a leToasefululua i le 1890. Na maliu o ia i le 1909 i Navu ao auauna atu o se peteriaka.¹⁸

Tona Kalo Samita (1840-1841)

Na fanau Tona Kalo Samita ia Iuni 13, 1840, i Navu ma na ola mo na o le 14 masina, na maliu i le malaria i le mavae ai o ni aso o le uso o lona tama lea na igoa ai, o Tona Kalo Samita, le uso laitiiti o Iosefa Samita. O Alesana Samita, o se isi atalii o Iosefa ma Ema Samita, na lipotia mai e faapea ae toeitiiti lava maliu lo latou tina o Ema i le 1879, na vaai ai Ema i se faaaliga lea na taitaiina atu ai o ia e Iosefa Samita i se maota i le lagi i se fale pepe lea na ia opoina mai ai Tona Kalo laitiiti. Ina ua ia fesili ia Iosefa e uiga i isi o le la fanau ua maliliu, na folafola atu e Iosefa o le a ia, pe a mavae le olaga faaletino, tausia uma lana fanau o e e lei feola ia matutua.¹⁹

Atalii e Lei Faaigoaina (1842)

Na lipotia mai na fanauina e Ema se atalii ia Fepuari 6, 1842, i Navu, ma na tanumia le tamaitiiti i le aso lava lena.²⁰

Tavita Ailama Samita (1844-1904)

Na maitaga Ema ia Tavita Ailama Samita ina ua maliu Iosefa i le 1844. E iloaina o ia mo ana tauloto, pese, ma le tusiata, na mulimuli ane auauna atu Tavita i le tele o misiona mo le Ekalesia Toefaatulagaina, o nisi o na misiona na auina atu ai o ia i Iuta, lea na ia asiasi atu ai i aiga ma isi Au Paia o Aso e Gata Ai. I le popole ai e uiga i tala i autaunonofo a lona tama, na finau ai Tavita ma lona tausoga o Iosefa F. Samita ma na faatalanoaina ni fafine o e na tau maia na faamauina ia Iosefa Samita. O nei misiona na amata ai le aoina mai o ni punaoa taua i le faia o toalua e toatele i Navu.²¹

E lei umi ona foi mai se misiona i Iuta, ae faaletonu le mafaufau o Tavita, ma na tuuina atu ai loa o ia e lona uso o Iosefa lll i se fale mo gasegase o le mafaufau i Elgin, Ilinoi, i le 1877. Na tusi atu Iosefa lll i se uo lelei a Tavita, “I le mavae ai o ni mafaufauga i se taimi umi, tatalo ma i le faavauvau, na ou aveina atu ai loa Tavita i le Falemai i Elgin mo togafitiga.” . . Ua ou matuai faanoanoa ai lava, ae ua faia lava le mea sili e pei ona ou manatu ai nei.”²² O tagata faigaluega i le falemai o mafaufau i Elgin na matauina le faavauvau o Tavita, le manao e tuua na o ia, le fiafia i le pisa, le manatuaina ni mea faavaitaimi, ma le talitonuga o isi ua umia se pule e le mailoa i ona luga. Atonu na aafia o ia mai tulaga i aso nei e fesootai i le leaga o le mafaufau ma le galogalo o mea. Na faamoemoe uo ma aiga o le a faasolo ina lelei le soifua maloloina o Tavita, ae na lipotia mai e tagata faigaluega o le falemai o mafaufau le leai o se suiga taua i ona uiga i le 27 tausaga na ia nofo ai iina. Na aafia Tavita mai le mai suka i masina mulimuli o lona olaga, ma ae toe tolu masina oo i lona aso fanau lona 60 , ae maliu o ia i le faaletonu o fatugao.

Autu e Fesootai: Joseph Smith Jr., Emma Hale Smith