Lorenzo Snow

O Lorenzo Snow sa avea ma Peresitene lona lima O Le Ekalesia a Iesu Keriso o le Au Paia o Aso e Gata Ai. I le 1836 sa ia taliaina ai se valaaulia mai lona tuafafine o Eliza R. Snow, e sau i Katelani e suesue ai i le faaEperu ma le Au Paia o Aso e Gata Ai, ma sa le’i leva ae auai o ia i le Ekalesia. Sa faauuina o ia o se Aposetolo i le 1849. Sa avea Snow ma se faifeautalai faamanuiaina, na talai atu ma vaaia le galuega faafaifeautalai i le Iunaite Setete, Peretania, Italia, Malta, Palesitina, ma Hawaii. Sa ia taliaina faaipoipoga autaunonofo i Navu, ma i Iuta sa faafalepuipuiina ai o ia mo le 11 masina ona o le tetee i tulafono e le lagolagoina ai le faiga o toalua e toatele lea na pasia e le Konekeresi a le Iunaite Setete. O Snow sa faaipoipo i tamaitai e toaiva ma maua ai se fanau e toa 42.

Lorenzo Snow

Ata pue o Lorenzo Snow a’o auauna atu o se sui auai o le Korama a le Toasefululua.

Sa lagolagoina Lorenzo Snow o se Peresitene o le Ekalesia i le 1898. I le tolu tausaga o avea ai ma Peresitene, sa faaauau lava ona tauivi le Ekalesia ma faafitauli tautupe, o se taunuuga, o se vaega, ona o le faatosinaga a le malo o le Iunaite Setete i le vaitami o le 1880 e le lagolagoina ai le faiga o toalua e toatele. Sa musuia e le Alii ia Peresitene Snow e toe faatuuto tagata o le Ekalesia ia ola i le tulafono o le sefuluai ina ia mafai ona faamautu ai tulaga tautupe a le Ekalesia ma totogi ai ona aitalafu. Na maliu Snow ia Oketopa 1901, i na oni nai aso talu ona uma lana saunoaga faaiu i le konafesi aoao.

Sosoo Mai ina ua Maliu Uilifoti Uitilafi.

I le maliu ai o Peresitene Uilifoti Uitilafi i le 1898 na tulai ae ai le fesili pe o le a le umi e tatau ona faatali ai le Korama a Aposetolo e Toasefululua ona faatoa toe faatulaga ai lea o le Au Peresitene Sili. O taitai na muamua atu sa faatalitali mo le va o le 18 masina ma le tolu tausaga. Sa faailoa atu e Uitilafi lona faamoemoe ina ia vave ona toe faatulaga e le Korama a le Toasefululua le Au Peresitene pe a maliu ina ia aloese ai taitai o le Ekalesia mai faafinauga ia na tutupu i tolopooga na muamua atu.¹ I le aso 13 o Setema, 1898 i na oni nai aso talu ona mae’a le maliu o Uitilafi, sa fono ai Aposetolo soifua e toa 14 i le Malumalu o Sate Leki. O le faamoemoega o le fonotaga, o le sailia lea o se auala e faatupe ai aitalafu a le Ekalesia, ma na silafia e le Au Aposetolo, o le faia o lea mea na latou manaomia ai se suafa o se sui fou e sui ia Uitilafi. Sa toe faamanatu atu e Elder Francis Lyman le fautuaga a Peresitene Uitilafi ma fautuaina ai le aufono ia le gata ina maua se sui ae ia lagolagoina foi Snow e avea ma Peresitene o le Ekalesia. Sa tuu atu e Iosefa F. Samita le fesili ina ia palotaina, ma na autasi le Au Aposetolo i le lagolagoina o Snow.

Ina ua uma le palota, sa faasoa atu e Peresitene Snow se aafiaga paia sa ia maua i le Malumalu o Sate Leki. O ni nai aso na muamua atu, sa alu ai o ia i le malumalu, ma le lagona lofituina i le manatu o le taitaia o le Ekalesia. Sa tatalo o ia i le fata faitaulaga ina ia iloa le finagalo o le Alii e faatatau i le fesili o le faatulagaina o le Au Peresitene ma ni igoa o ni fesoasoani. Sa ia molimau atu i ona uso e faapea, “sa tali mai lana tatalo, i le faailoa manino mai e le Alii ia te ia o le mea e tatau ona ia faia.” Sa ia ta’u atu i le Au Aposetolo sa potopoto ai, sa ia taofia lana aafiaga ia te ia lava sei vaai muamua pe, “sa ia te outou foi lea lava agaga lea na faaali mai e le Alii ia te a’u.” Sa faafetai o ia ona sa autasi ia sui o le Korama a le Toasefululua. Sa ia faaopoopo atu, “E tusa ai ma le malamalama ua tuuina mai ia te a’u, ou te tuuina atu ai nei suafa o George Q. Cannon e avea ma o’u fesoasoani muamua, ma Iosefa F. Samita e avea ma o’u fesoasoani lua.”²

O le tolusefulu lima tausaga mulimuli ane, na lomia ai e LeRoi o le atalii o Snow se tusiga e uiga i nei mea na tutupu i le Improvement Era.³ O le faamatalaga a LeRoi sa faavae i se tala na tusia e le tama teine a le afafine o Peresitene Snow o Allie Pond. Na toe faamatalaina e Pond e faapea, sa faamatala atu e lona tamamatua ia te ia e faapea, na faaali mai Iesu Keriso ia te ia i totonu o le malumalu i lena po ina ua uma lana tatalo. E leai se tala tuusao ua iloa na tuua e Peresitene Snow e faatatau i lenei faaaliga vaaia maoae.

Mo ni faamatalaga atili e uiga i mea na tutupu ma autu i le soifuaga o Lorenzo Snow, tagai i vitio Prophets of the Restoration i le history.ChurchofJesusChrist.org.

Punaoa o le Ekalesia

Aoaoga a Peresitene o le Ekalesia: Lorenzo Snow (Salt Lake City: The Church of Jesus Christ of Latter-day Saints, 2012).

Lorenzo Snow, Sermon on Our Divine Potential, Apr. 4, 1866, history.ChurchofJesusChrist.org.

Lorenzo Snow papers, circa 1841–1847, circa 1868–1894, Church History Library, Salt Lake City.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Eliza R. Snow Smith, Biography and Family Record of Lorenzo Snow (Salt Lake City: Deseret News Company, 1884).

Lorenzo Snow, The Italian Mission (London: W. Aubrey, 1851).

Autu Fesootai: Eliza R. Snow, Italy, Succession of Church Leadership

Faamatalaga

1. Sa faailoa atu e Uitilafi ona moomooga i le amataga lava o le 1892 i se faatalatalanoaga faalilolilo ma Lorenzo Snow. O le nofouta ai o le a le umi ona maliu lea, sa uunaia ai e Uitilafi ia Snow ina ia vave ona faatulaga le Au Peresitene ma ia filifilia George Q. Cannon ma Iosefa F. Samita e avea ma fesoasoani. Tagai Lorenzo Snow, “An account of a private interview with President Woodruff,” Dec. 3, 1892, Church History Library, Salt Lake City; tagai foi i le Autu: Succession of Church Leadership.

2. Journal History of The Church of Jesus Christ of Latter-day Saints, Sept. 13, 1898, 4–5, Church History Library, Salt Lake City

3. LeRoi C. Snow, “An Experience of My Father’s,” Improvement Era, vol. 36, no. 11 (Sept. 1933), 677, 679.