“Luisa Barnes Pratt,” O Autu o le Talafaasolopito o le Ekalesia
“Luisa Barnes Pratt”
Luisa Barnes Pratt
Sa soifua i le 1802 i Masatusa, sa faaipoipo Luisa Barnes ia Addison Pratt ina ua 28 [ona tausaga]. Sa faailoa atu i laua i Le Ekalesia a Iesu Keriso o le Au Paia o Aso e Gata Ai e le uso o Luisa ma lona tuagane faaletulafono, o Karolaine ma Ionatana Crosby. Sa papatisoina le au Pratt i le 1838 i Masatusa. A o agai atu i Misuri ina ia faapotopoto faatasi ma le Au Paia, sa laua faalogo ai i sauaga e faasaga i le Au Paia o Aso e Gata Ai i Misuri, ma filifili ai e nonofo ai pea i Initiana seia oo i le 1841, lea na latou me’i atu ai i Navu. Sa auai Luisa i le Aualofa i Navu i le aso 12 o Me, 1842, tausia lana fanau na mamai i le misela, ma foai atu i tupe faaagaga a fafine mo le Malumalu o Navu.
Atapue o Luisa Barnes Pratt
Na amatalia i le 1843, na toeitiiti atoa le sefulu tausaga o lagolago e Luisa faifeautalai i le taimi na valaauina ai Addison e auauna atu i se misiona i motu o le Pasefika. Ina ua alu ese atu Addison mo lana misiona, sa tuuina atu e Luisa mea na manaomia e lona aiga ma siitia atu i latou mai Navu i Uinita Kuata ma mulimuli ane ai i le Aai o Sate Leki. A o malaga atu i Uinita Kuata, sa feiloai o ia ma isi tamaitai e tatalo ma tuuina atu le felagolagomai i le tasi ma le isi.1 Ina ua taunuu atu o ia, sa oo o ia i ni tofotofoga, e aofia ai le nonofo i totonu o se falepalapala susū, mapeva lona tulivae, ma’i i le pala o tainifo, ma le toulu o ona nifo pito i luma.
Sa foi mai Addison mai lana misiona i le 1848 ma feiloai ma Luisa i le Aai o Sate Leki. O le tausaga na sosoo ai, sa valaauina ai o ia i se misiona lona lua i Tahiti. Ia Me 1850, na faimalaga ai Luisa ma le la fanau teine e toafa ina ia auai ma ia mo le lua tausaga i Tubuai, lea na latou aoaoina ai le gagana, saunoa i fonotaga, ma talai atu le talalelei. Sa faatasi atu foi ma i latou ia Ionatana ma Karolaine Crosby. A o nonofo ai faatasi ma tamaitai o Tubuai i le Pasefika i Saute, na aoao e Luisa i latou i le faaPeretania ma tomai faatausiaiga. Sa ia aoao atu foi le talalelei ia i latou ma faamanuia i latou i taimi sa latou mama’i ai.2
Sa toe foi mai Luisa ma Addison mai le la misiona i le 1852 ma sa nononfo mo se taimi i San Bernadino, Kalefonia. Ae sa ia lagonaina le “fusia i maea o le alofa i le ekalesia” ma sa naunau lava ina ia faatasi ma le Au Paia i Iuta. I le 1858 sa ia tuua ai lona fale manaia i Kalefonia ma valavala ai ma Addison, o lē na amata ona masalosalo e uiga i le Ekalesia.3 Sa faamautu o ia i Beaver, Iuta, ma nofo ai lava iina mo aso na totoe o lona soifuaga, ma auauna atu o se fesoasoani ma se failautusi o le Aualofa i le lotoifale. Sa tumau pea lo la vavalalata ma lona uso o Karolaine, ma sa la tuaoi i Beaver. Na maliu Luisa i le aso 8 o Setema, 1880 i le niumonia.
O aafiaga o le soifuaga o Luisa na fesoasoani ia te ia e atinae ai se “uiga faaalia malosi o le ola tutoatasi” a o nofo ese o ia mai lana tane mo le afa o le la olaga faaipoipoina. Sa faiaoga o ia i se aoga ma faigaluega o se su’isu’i mo fesoasoani tautupe. O lana apitalaaga ma tusi talaaga sa masani ona lipotia mai ai ni taamilosaga o le mata’u ma le lotovaivai lea na tuuina atu ai le toafilemu ma le faamoemoe. “Sa lagona le vaivai o lo’u loto i le taimi muamua, ae sa ou naunau e faalagolago i le Alii ma tu atu ma le toa i luma o faafitauli o le olaga,” sa ia tusia ai a’o nofo ai i Navu. I Tubuai sa ia tusia ai, “E itiiti ni mea tatou te iloa e mafai ona tatou faia, seiiloga tatou te taumafai malosi i se taimi umi.”4