Auala o Nofoaafi

I le sefulufa o tausaga talu ona uluai ulufale le Au Paia o Aso e Gata Ai i le Vanu o Sate Leki, na amata ai le Taua a Amerika, na saili taitai o le malo o le Iunaite Setete ia faaleleia tamai auala o nofoaafi o le atunuu e fesoasoani i taumafaiga o le taua. O se tulafono fou na amata ai le fausiga tele o auala o nofoaafi, ua maua ai le silia ma le 100 miliona eka o fanua lautele na ofoina atu i kamupani e fola ai le auala.¹

Sa tele le Au Paia o Aso e Gata Ai i le Teritori o Iuta sa fefefe o le a avea le televave ona faalauteleina le auala o nofoafi ma le mea o le a aumaia ai e tagata ese amio paaa po o ni isi aafiaga faalelalolagi o le a faalavelave i le olaga faalelotu ma le olaga faaletamaoaiga i nuu o nonofo ai. Ae na vaai foi Polika Iaga i le ala e fesoasoani tele ai lenei auala fou o femalagaaiga i le galuega a le Ekalesia. Sa oo atu pule o kamupani fai auala nofoaafi ia Polika Iaga i le 1868 e uiga i le faaumaina o se laina o le a sosoo ai le Iunaite Setete i sasae ma le talafatai o le Pasefika— o se fesootaiga “faalekonetineta” lea. O Iaga sa faalauiloaina le oo mai o le auala o nofoaafi i Iuta i le amataga o le sefulu tausaga talu ai, ma sa ia uunaia le Au Paia ia saofaga atu i lona fausiga. Sa ia sainia ni konekarate ma kamupani o le Union Pacific ma le Central Pacific, ma folafola atu se faitau aofai e 5,000 tamaloloa e fesoasoani e faauma le silia ma le 350 maila o le auala.²

I le itiiti ifo ma se tausaga mulimuli ane, i le aso 10 o Me, 1869, sa faatulaga ai le sooga mulimuli o le auala i le Promontory Summit i Iuta i matu, ma faauma aloaia ai le auala o nofoaafi faalekonetineta. Sa viia e peresitene o kamupani o le Union Pacific ma le Central Pacific le Au Paia mo le faamamaeseina o papupuni faaiu. Sa vave manuia le galuega a le Ekalesia i le auala o nofoaafi, aua o le vaiaso na mulimuli ane ai, sa amata ai e le aufaigaluega a le Au Paia o Aso e Gata Ai le fausiaina o se auala sosoo e fesootai ai le laina faalekonetineta agai i le Aai o Sate Leki. Sa alualu i luma le feaveaiaina o oloa agai i Iuta ma mai i Iuta. Sa maea se laina auala o nofoaafi faaopoopo i le 1871 lea na faatinoina ai le lauina o maa mai le Little Cottonwood Canyon agai i le nofoaga o le Malumalu i Sate Leki. Sa faigofie ona feoai atu ma feoai solo i totonu faifeautalai i a latou misiona atofaina. O Au Paia Femalagaai sa le toe faia le malaga agai i Iuta e ala i taavale solofanua po o taavale toso, ua faamutaina ai vaitaimi o ia femalagaaiga i luga o le laueleele. O le mea na alu ai le tele o masina e sopoia ai i taavale solofanua i le 1847, lea ua mafai ona faataunuuina i le na o ni nai aso e ala i le auala o nofoaafi.

faapotopotoga o tagata ma nofoaafi

O le tuufaatasiga o le Union Pacific ma le Central Pacific Railroads i Promontory Summit i Iuta i matu i le aso 10 o Me, 1869.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu o le anomea po o manatu o tusitala.

Leonard J. Arrington, “Mormon Railroads,” in Great Basin Kingdom: An Economic History of the Latter-day Saints, 1830–1900 (Cambridge: Harvard University Press, 1958), 257–92.

Richard White, Railroaded: The Transcontinentals and the Making of Modern America (New York: W. W. Norton, 2011).

Faamatalaga

1. Tagai Richard White, Railroaded: The Transcontinentals and the Making of Modern America (New York: W. W. Norton, 2011), 24.

2. Leonard J. Arrington, Great Basin Kingdom: An Economic History of the Latter-day Saints, 1830–1900 (Cambridge: Harvard University Press, 1958), 258–65.