“Toe Faatulagaina o le 1856--57,” Autu o le Talafaasolopito o le Talalelei
“Toe Faatulagaina o le 1856–57”
Toe Faatulagaina o le 1856–57
Pe tusa ma le fitu masina mai ia Setema 1856 e oo ia Aperila 1857, na talai atu ai Polika Iaga ma isi taitai o le Ekalesia i le Teritori atoa o Iuta e amata ai le tautinoga malosi atu faalelotu i le Au Paia o Aso e Gata Ai. O lenei vaitau o gaoioiga faafaigalotu, lea na iloga o le “Toe Faatulagaina a Mamona,” na tu e avea ma mea na tupu mo le toatele o e na lipotia mai aafiaga faafouina faaleagaga ma le faaleleia o le naunautai i totonu o o latou nuu ma alalafaga.1
I a latou taumafaiga e fausia le malo o le Atua ma saunia mo le Afio Mai Faalua o Iesu Keriso, e masani lava ona faailoa mai e le Au Paia o Aso e Gata Ai le lē fiafia i le iloa o mea sese i le ola ai i le talalelei toefuataiina. A o latou atiaeina ni nuu i eleele e le masani ai o le Teritori o Iuta, na latou aafia ai i le tele o faafitauli ma mala faalenatura i le amataga, ae maise lava i faatoaga na mamate, afi sosolo, mala o sē, ma le oge i le taumalulu. Sa mafaufau Polika Iaga i nei luitau o ni faasalaga faalelagi, ma i le konafesi aoao ia Oketopa 1855 na ia uunaia ai le Au Paia ina ia salamo “ina ia lē toe aoaiina i [latou].”2 O le tautotogo na sosoo ai, na ia valaau mo lauga ina ia pa tetele ai “taalili ia faititili” ma uunaia ai se salamo tele. Ia Setema 1856 na logoina ai e Polika ni isi o Aposetolo i fuafuaga e “faia se fanuga tele” i le teritori atoa.3 I ni nai aso, na faalauiloa ai e Jedediah M Grant, o se fesoasoani i le Au Peresitene Sili le taumafaiga i se konafesi i matu o le Aai o Sate Leki. I le taimi lava na maea ai le talaiga a Grant, sa toe papatisoina ai ni tagata o le Au Paia e 500 e faailoga ai lo latou tautinoga ua faafouina.4
E tai tutusa lava lauga na tuuina atu i nofoaga uma. I ni isi o eria o, “faifeautalai i le fale” sa asiasi atu i fale o uarota taitasi ma se lisi o fesili ua mamanuina e uunaia ai le suesueina ma le usitaia o tulaga faatonuina maualuga. “Sa e mana’o i se mea e lē a oe lea?” o se tasi o na fesili na tuuina atu, e faaleo atu ai se tasi o Poloaiga e Sefulu. O isi sa faamamafa le faaaloalo mo aia tatau i mea totino ma le faamaoni i aiga ma le Ekalesia: “Na e faailogaina ea se manu e te le’i iloaina e lē a oe lea? … O e tatalo i lou aiga i le po ma le ao ma auai atu i se tatalo faalilolilo?” Sa uunaia foi e faifeautalai i le fale ia alii ina ia faaipoipo atu i isi ava e faailoa atu ai lo latou tautinoga tele i le faatuatua.5
O lauga faanatinati ma le faaailoga tau lotu na faateleina ai le auai i le lotu ma foai o le sefuluai. O le lima masina i le toe faatulagaina, na faailoa mai e Polika Iaga le taliaina e le Atua o le salamo a tagata. Ina ua faamaeaina e faifeautalai i le fale a latou malaga ia Aperila 1857, o le toatele o Au Paia o Aso e Gata Ai i le Aai o Sate Leki ua maea ona toe papatisoina.6
O se taunuuga e lei faamoemoeina na faaalia ina ua maea le vaitau o le toe faatulagaina. I nisi o taimi, sa lapatai atu ai Polika Iaga, Jedediah Grant, ma isi taitai e faasaga i tagata faatuiese ma tagata e liliuese. O tusiga i luga o fuaitau faatusipaia, aemaise i le Feagaiga Tuai, na aoao foi e nei taitai e faapea o nisi o agasala sa matuai leaga lava ma e na o le masaa o le toto o le tagata agasala e mafai ai ona oo mai le faamagaloga. O lipoti o le tele o faamatalaga ma talafaatupu o “fouvalega a Mamona” i faigamalo a le malo na oo atu ai i le peresitene o le Iunaite Setete, o le na faia se faatinoga faamiliteli e taofia ai ni manatu o le fouvalega. O le taufaamatau i feteenaiga faaauupegaina na faateteleina le malosi i le va o vaega eseese, ma i nisi o eria o le Teritori a Iuta na tulai mai ai se vevesi matautia. O lea vaitau, sa iloga o le Taua a Iuta, na faamutaina ina ua faatulagaina e taitai o le malo se maliega ma Polika Iaga ma isi taitai o le teritori.7
A o faaitiitia ai le popole e uiga i le fia aai ma le ola, na toatele le Au Paia o Aso e Gata Ai na aloese mai le sitaili o le tala’i faamalosi i le ogatotonu o le vaitau o le 1850. Na fetuunai e Polika Iaga aiaiga faavae ina ia sili atu ai le taulimaina o numera faatupulaia o tagata malaga ma lauga atu i le tulia esea o isi mai le teritori. Sa faaauau pea e le Au Paia ona uunaia le tasi ma le isi agai i le faatotonugalemuina o o latou nuu i le faatuatua ma le tuuto, o se vaega o le toe faatulagaina lea na faatupulaia i le tele o tagata malaga i Sisifo o Amerika Matu.8
Autu Fesootai: Se ma Gogo, Taua a Iuta, Fasiotiga i le Mauga o Meadow