Aufono o le Limagafulu

E itiiti ifo ma le fa masina ae lei maliu o ia i le 1844, na talo ai e Iosefa Samita se aufono e talanoaina ai ni nofoaga na fuafuaina e aumau ai le Au Paia i eria ia na i fafo atu o le Iunaite Setete, e pei o Kalefonia ma Texas. Na talanoaina e le aufono e le gata e uiga i le ala o le a pulea ai e taitai o le Ekalesia nei nuu ae e uiga foi i le ala e faatuina ai se malo faapolotiki po o se malo e saunia ai mo le nofotupu o le meleniuma o Iesu Keriso. Na vaai Iosefa Samita ma ana uo i lenei aufono o le amataga o lea ituaiga malo. O le aufono na aofia ai pe a ma le 50 sui ia na masani lava ona ta’uaina o le “Malo o le Atua” po o le “Aufono o le Limagafulu.”¹

Na faamoemoe Iosefa Samita ina ia galue le aufono e ese mai le Ekalesia. Ao nafa le Ekalesia ma mataupu faaleagaga ma le faaolataga e faavavau o fanau a le Atua, o le Aufono o le Limagafulu o se faalapotopotoga faalemalo pe faalenuu e faatuina e “pulea tagata i mataupu lautele.” O le tele o uo sili a Iosefa na auai i le aufono, e aofia ai sui o le au Peresitene Sili, Korama a Aposetolo e Toasefululua, ma le Aufono Maualuga a Navu.² Na taliaina foi e Iosefa le toatolu tagata le lolotu Mamona i le aufono.

O le manao o le Au Paia o Aso e Gata Ai ia faataatia le faavae mo se malo lautele fou sa o se vaega i le tali atu i sauaga na latou oo i ai i Misuri. Na talitonu Iosefa Samita ma isi taitai o le Ekalesia o malo o le lotoifale, setete, ma le atunuu sa le naunau e puipuia pe na le mafai foi ona puipuia aia tatau a le Ekalesia o se vaega itiiti faalelotu. O se tasi o faamoemoega taua o le aufono o le faatuina lea o ni vaega e puipuia ai “aia tatau ma tapuaiga faalelotu” o le Au Paia o Aso e Gata Ai ma isi.³ O loo maua i tala o le aufono ni aoaoga malolosi mai ia Iosefa Samita e uiga i le saolotoga faalelotu. Na ia saunoa i “le taua o le tuuese mai ia i tatou o uiga uma o le faaituau ma le le onosai i talitonuga faalelotu o tagata.”⁴

I le taimi o le tautoulu o le 1844, na feiloai soo ai le aufono ia tusi se tulafono, e faailoa ai le taumafaiga a Iosefa Samita i le 1844 mo le peresitene o le Iunaite Setete, ma faailoa ai nofoaga mautu mo le faapotopotoina i Amerika i Sisifo. I le mavae ai o le maliu o Iosefa Samita, na toe faaauau le aufono i le 1845 ma le amataga o le 1846 i lalo o le taitaiga a Polika Iaga ina ia faia ni faaiuga e uiga i le malo o Navu, e fausia ni fesootaiga faalemalo ma Initia Amerika, ma ia saunia mo le malaga tele a le Au Paia o Aso e Gata Ai i Sisifo.

Na feiloai le aufono i Iuta mai lea taimi i lea taimi i le va o le faaiuga o le 1840 ma le 1860. Na toe faatulaga e Ioane Teila le aufono i le 1880, ae na le toe faia ni fono ae lei oo i le faaiuga o lena sefulu tausaga.⁵

Punaoa o le Ekalesia

R. Eric Smith and Matthew J. Grow, “Council of Fifty in Nauvoo, Illinois,” Perspectives on Church History, history.lds.org.

Matthew J. Grow, Ronald K. Esplin, Mark Ashurst-McGee, Gerrit J. Dirkmaat, and Jeffrey D. Mahas, eds., Administrative Records: Council of Fifty, Minutes, March 1844–January 1846. Vol. 1 of the Administrative Records series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2016).

Talaaga o le Soifuaga

O loo tuuina atu i lomiga nei nisi faamatalaga e uiga i lenei autu. O le faasino po o lou fesootai atu i lenei punaoa, matou te le faamaonia pe faamautinoaina ia anomea po o manatu o le tusitala.

Matthew J. Grow and R. Eric Smith, eds., The Council of Fifty: What the Records Reveal about Mormon History (Provo, Utah: Religious Studies Center, Brigham Young University, 2017).

Autu Fesootai: Departure from Nauvoo, Succession in Church Leadership

Faamatalaga

1. O se faaaliga na maua i le taimi o se fono a le aufono na faaigoaina le aufono “The Kingdom of God and his Laws, with the keys and power thereof, and judgement in the hands of his servants” (Matthew J. Grow, Ronald K. Esplin, Mark Ashurst-McGee, Gerrit J. Dirkmaat, and Jeffrey D. Mahas, eds., Administrative Records: Council of Fifty, Minutes, March 1844–January 1846. Vol. 1 of the Administrative Records series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey [Salt Lake City: Church Historian’s Press, 2016], 48).

2. Grow and others, eds., Administrative Records: Council of Fifty, Minutes, xx–xlv, 50 (note 110).

3. Grow and others, eds., Administrative Records: Council of Fifty, Minutes, 128.

4. Minutes, Apr. 11, 1844, in Grow and others, eds., Administrative Records: Council of Fifty, Minutes, 97–101, faalaugatasia le sipelaga ma faailoga.

5. Grow and others, eds., Administrative Records: Council of Fifty, Minutes, xx–xlv. Tagai foi i Autu: Joseph Smith’s 1844 Campaign for United States President, American Indians, American Legal and Political Institutions.