Eliga Auro Tele i Kalefonia [Gold Rush]

O se vaega o tagata matutua [ua litaea] o Fitafita a le Autau a Mamona na taumafai ina ia toefaatasia ma le Au Paia o Aso e Gata Ai i Iuta lea na maua tala mai ia Polika Iaga ina ia nonofo i Kalefonia mo se taimi ma galulue ona o le le lava o taumafa i le Vanu o Sate Leki. Na maua e nei tagata matutua [ua litaea] ni galuega i le fausiaina o se fale ili laupapa mo John Sutter i le auala i saute o le Vaitafe o Amerika i Coloma.¹

mauaina o le auro i le Falegaosi Mea a Sutter

O le ata o le mauaina o le auro i le Falegaosi Mea a Sutter na saunia e le tusi ata o Valoy Eaton.

I se tasi o taeao ia Ianuari 1848, sa iloilo ai e le paaga a Sutter, o James Marshall, le fausiaina o se alavai taamilo ae ona matauina ai ni mea ninii i le ala vai. Sa ia aoina mai ia mea i lona pulou ma faaali atu i isi tagata faigaluega. Na taumafai le vaega e ūina se tasi o na mea, nuti i le samala, ma togi i totonu o se afi. O suesuega taitasi na faaalia ai ua mautinoa ua latou mauaina le auro.²

O se tasi o tagata matua o le autau, o Henry Bigler, na faamaumauina le mauaina o le auro i lana api talaaga. Sa ia saili foi i ituvai mo isi auro, ma i totonu o ni nai aso na ia aoina mai ai le silia nai lo lona totogi o le masina. Na faasoa atu e Bigler le talafou i isi Au Paia o Aso e Gata Ai, ma na vave ona salalau atu le tala e latalata i le falegaosi mea ma i San Francisco. O le toatele e lei umi ae lolofi atu i nofoaga i le Vaitafe o Amerika e saili mo le auro. O le tolauapiga o maina a le Au Paia na latalata i Sacramento, o le uluai tolauapiga tele i lona ituaiga i Sierras, na taua o le “Motu o Mamona.”

Na tuua e le toatele o le autau matutua mo le Vanu o Sate Leki i le taimi o le taumafanafana o le 1848, ae o isi na filifili e nonofo pea i Kalefonia. O Samuel Brannan, o se faipisinisi o le Au Paia o Aso e Gata Ai, sa avea le avanoa o le mauaina o le auro e faalautele ai lana pisinisi faatau oloa, aveina o le auro i San Francisco ma alaga atu i luga ma lalo o se tasi o auala autu, “Auro! Auro! Auro, mai le Vaitafe o Amerika!” I totonu o vaiaso, o le tele o tagata nuu o San Francisco na tuua mo fanua auro, ma o Brannan sa faagaoioia le faleoloa e tasi i le va o le Vaitafe o Amerika ma le aai.³

Sa faateteleina le eliga auro tele i le tausaga na sosoo ai, i le mavae ai o le saunoaga a le peresitene o le Iunaite Setete o James K. Polk e uiga i le auro i Kalefonia i lana savali Faaletausaga ia Tesema 1848. E faitau afe tagata suesue na malaga atu i le atunuu o le auro o Kalefonia. Na filifili le toatele e uia ni auala fita e taamilo i taufaasiusiuga o Amerika i Saute, i Panama, po o i luga i Mekisiko a o uia e le silia ma le afa o tagata suesue auala sopo i le konetineta o Amerika i Matu. Sa sili ona latalata tagata o le Au Paia o Aso e Gata Ai i le Vanu o Sate Leki i fanua auro nai lo isi tagata Amerika ma sa maua talafou e uiga i le auro i le tele o masina ao lei faia le savali a Polk.

E ui lava i le faatosinaga o le auro i Kalefonia ma le itiiti o meaai i le Vanu o Sate Leki, na usitai le toatele o le Au Paia i le apoapoaiga a Poliga Iaga ina ia fausia Siona i ma faataamilo i Iuta nai lo le tulitulimatagauina o manuia faaletagata lava ia i fanua auro. Na folafola mai e taitai o le Ekalesia i tagata o le a faaleleia a latou tulaga.⁴ E ui lava o le toatele o le au 49—o na tagata Amerika na lolofi atu i Kalefonia i le 1849—e lei sopoia le Vanu o Sate Leki i le latou auala i sisifo, ae e toatele na sopoia. E masani ona latou taunuu i le vanu e naunau e faatau meaai lelei ma faatau atu ni sapalai faaopoopo lea na tumu ai taavale toso lima. O nuu fou o le Au Paia o Aso e Gata Ai i le itulagi lea na aafia i le faatamaoaigaina tele mai fefaatauaiga ma le au 49. A o lei faaitiitia le lolofi atu i le eliina o le auro, na auina atu e Iaga ni nai alii i se “Misiona Auro,” e tasi le tausaga o tupe maua na faamoemoe e manuia ai le Ekalesia. I le maea ai o galuega faigata ma le le lava o mea na maua, na tuua e faifeautalai o auro ia maina mo aiga po o isi talaiga faamisiona.⁵

O le eliga auro tele na taitai atu ai i se suiga tetele faaagafesootai ma faaletamaoaiga i le Iunaite Setete lea na avea ai Kalefonia ma se nofoaga autu o pisinisi i le lalolagi. O le malaga tele i sisifo lea na faamalosia e le lolofi atu i le [eliina] o le auro na taofia ai foi le manatu sese faapea e mafai e le Au Paia ona tumau i le vavae ese mai le vaega o totoe o le malo.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Kenneth N. Owens, Gold Rush Saints: California Mormons and the Great Rush for Riches (Spokane, Washington: Arthur H. Clark, 2004).

J. S. Holliday, The World Rushed In: The California Gold Rush Experience (Norman: University of Oklahoma Press, 2002).

Autu e Fesootai i ai: Mormon Battalion, Samuel Brannan, Pioneer Economy

1. Tagai i le Autu: Mormon Battalion.

2. Kenneth N. Owens, Gold Rush Saints: California Mormons and the Great Rush for Riches (Spokane, Washington: Arthur H. Clark, 2004), 109–10.

3. Mark A. Eifler, Gold Rush Capitalists: Greed and Growth in Sacramento (Albuquerque: University of New Mexico Press, 2002), 38–51.

4. Tagai i le Heber C. Kimball, July 19, 1863, in George D. Watt and others, eds., Journal of Discourses, 26 vols. (London: Latter-day Saint Book Depot, 1854–86), 10:247.

5. Owens, Gold Rush Saints, 226–44, 309.