Navu (Komese), Ilinoi

Ina ua uma ona tutuliese tagata o le Au Paia mai Misuri i le faaiuga o le vaitau o le 1830, sa latou maua se sulufaiga i totonu ma faataamilo i le taulaga laitiiti o Kuinisi, Ilinoi. Ona latou feagai ai lea ma se filifiliga: pe tatau ona latou faapotopoto e toe fauina se aai ma afaina ai i sauaga, pe tatau ona latou faasalalau i totonu o le aofaiga tetele atu ina ia taumamao ai mai le fetaua’i? O le iloa o tulaga matautia o le faapotopotoina ae faalagolago i le poloaiga e faia ai, sa faatagaina ai e Iosefa Samita ia taitai o le Ekalesia e faatau mai se vaega tele o se laueleele mai ia Isaako Galland. O le laueleele sa tu i autafa o le Vaitafe o Misisipi ma sa aofia ai se tamai taulaga o Komese, Ilinoi. E lei pine ae galulue le Au Paia i le faamatuina o taufusi, totoina o faatoaga ma togalaau aina suamalie, fauina o fale ma auala, faatutu pisinisi, ma talia lea vaega ma lea vaega o tagata liliu e malaga mai vaega eseese o le Iunaite Setete ma Egelani. Sa toe faaigoa e Iosefa le aai o Navu, o se upu Eperu e faaliliuina ai i nisi taimi o “matagofie.”¹

Sa sailia e Iosefa Samita ma isi taitai o le Ekalesia ma sa to mai ai se maliega malosi mo le aai mai le setete ma le faamoemoe o le a puipuia ai i latou mai ituaiga o faiga amioletonu sa latou feagai talu ai. Mai le 1842 seia oo i lona maliu i le 1844, sa avea Iosefa Samita ma pulenuu o le aai. I lona taunuuga, toeitiiti oo i le 10,000 le faitau aofai o tagata, ma avea ai o se tasi o aai aupito tele i le setete.

Sa maua e Iosefa Samita se faaaliga ia Ianuari 1841, na poloaiina ai le Au Paia e toe amata a latou taumafaiga e fauina se malumalu. O lea o se taulaiga tutotonu o gaoioiga i Navu o le galulue i le malumalu maa malualii, sa tu i luga o se maupuepue ma tilotilo mai ai i le aai. Sa saofaga atu e le Au Paia le leipa, oloa, ma tupe i le galuega faatino. Sa poloaiina foi i latou e le faaaliga e fau le Fale o Navu, lea o le a api ai tagata asiasi mai i le aai. Sa i fafo se togalaau tele sa avea ma malae fono e faapotopoto ai mo fonotaga faalauaitele, e aofia ai ma konafesi faaleafatausaga a le Ekalesia.

I Navu sa folasia atu ai e le Alii ni sauniga iloga ma aoaoga e ala ia Iosefa Samita. O uluai papatisoga mo e ua maliliu sa faatinoina i le Vaitafe o Misisipi sa lata ane, ma mulimuli ane i le vaipapatiso o le Malumalu o Navu, lea sa faapaiaina a o fauina le fale. O uluai faaeega paia o le malumalu sa tuuina atu i ni vaega toalaiti i le potu i le falealuga o le Faleoloa Piliki Mumu o Iosefa Samita, ma o uluai faamauga o faaipoipoga i malumalu mo le olaga nei ma le faavavau atoa, e aofia ai uluai faamauga o faaipoipoga faaautaunonofo faamaumauina, sa faatinoina i fale e le i faalauaiteleina a o lei maea le malumalu. I se saunoaga na tuuina atu i le taimi o le konafesi faaiu, sa folafola atu ai e Iosefa Samita se lauga mamana, e tele ina faaigoa o le lauga a King Follett, e uiga i le natura paia ma gafatia o le tagata.

O Navu o le nofoaga foi lea o suiga taua i le faalapotopotoga a le Ekalesia. Ina ua mavae le toefoi atu o Aposetolo e Toasefululua i Navu ina ua maea se misiona faamanuiaina i le Atu Peretania, sa tuuina atu ia i latou e Iosefa Samita se pule ua tele atu e faatautaia ai pisinisi a le Ekalesia, faamatuu atu ia i latou ia sauniga o le malumalu, ma saunia i latou e taitai le Ekalesia pe a mavae lona maliu. Sa faatulagaina le Aualofa i Navu i le aso 17 Mati, 1842, o se laasaga na manatu Iosefa Samita e tatau ai ina ia faamaea ai le faatulagaga o le Ekalesia.

I Navu, sa toatele naua le faitau aofai o le Au Paia, o le faateleina o le maliega mo le aai, ma le vaegaau toatele a le aai sa puipuia ai le Au Paia mai le tele o sauaga sa latou feagai ai i Ohaio ma Misuri. Peitai, sa tumau pea lava le femisaa’i. Na amata i le 1842, sa i ai taumafaiga e toe faafoi mai Iosefa i Misuri, e le gata e ala i se faiga faaletulafono e faaaunuua ai pe pue faamalosi. Sa atinae ni tetee i le Ekalesia i ni nuu sa siosiomia ai ma totonu o nisi o Au Paia o Aso e Gata Ai i Navu ua faaesea. I le faafetaia’ia o nei luitau, sa amata ai e Iosefa Samita ma isi ona fuafua e amatalia nisi pitonuu faaopoopo e mamao ese i sisifo.

I le taumafanafana o le 1844, sa tagatavaleina ai Iosefa ma Ailama Samita i Karefasi, Ilinoi, pe tusa ma le 20 maila i sasae o Navu. Sa faanoanoa le Au Paia i le maliu o lo latou Perofeta ma sa palota ma le lofituina e lagolago ia Aposetolo e Toasefululua e taitai le Ekalesia i lona toesea. E ui i le ogaoga o le uunai mai fafo e tuua ia Navu, ae sa faamaea lava e le Au Paia le malumalu, lea na maua ai e le faitau afe o latou faaeega paia. Ona, amata lea ia Fepuari 1846, ona latou tuua le aai, ma sa latou tuua foi o latou fale ma lo latou malumalu.²

I le taimi o le seneturi 20, sa maua ai e le Ekalesia le tele o nofoaga o le talafaasolopito iloga i Navu.³ I totonu o nei nofoaga sa i ai le nofoaga mo le malumalu, e ui o le malumalu lava ia sa faataumaoia e se afi, o se asiosio, ma faaiu ai i le tuuina i lalo. I le 2002, sa faamaea ai e le Ekalesia le toe fauga o se Malumalu o Navu Ilinoi i le tulaga lava lea e tasi.⁴ O le taimi nei, o loo talimalo Navu i le tele o tagata asiasi mai le salafa o le lalolagi e maimoa i nofoaga o loo faagaoioia e Le Ekalesia a Iesu Keriso o le Au Paia o Aso e Gata Ai ma le Nuu o Keriso (sa avea muamua ma Ekalesia Toefaatulagaina a Iesu Keriso o le Au Paia o Aso e Gata Ai), ua avea ai Navu ma nofoaga paia e mafai e tagata o nei faatuatuaga e lua ona tomanatu i lo latou talafaasolopito amata.

Autu Fesootai: Quincy, Illinois, Settlement; Nauvoo Temple; Female Relief Society of Nauvoo; King Follett Discourse; Nauvoo Expositor; Deaths of Joseph and Hyrum Smith; Succession of Church Leadership; Departure from Nauvoo