Oliva Kaotui

Na soifua mai i Veromotamont i le 1806, o Oliva Kaotui o le tamaitiiti lona valu ma o le uii a Viliamu ma Repeka Fuller Kaotui. Na ia soifua ae i se aiga lotu lea na onosaia le tele o faigata i le taimi o lona talavou, e pei o le leaga o faatoaga ma ni nai siitia solo. Ae lei oo i lona aso fanau lona tolu, na maliu lona tina i le mamapala, le mai lava lea na iu ina maliu ai o ia. Ua tau mai e faamaumauga na soifua Kaotui faatasi ma ni tagata o aiga mo le tele o vaitau o se alii talavou, atonu mo mafuaaga tautupe. Ao talavou, na ia auai i le aoga, suesueina le Tusi Paia ma maua ni tomai i le tusitusi ma le gagana lea o le a aoga ia te ia mulimuli ane i le olaga.¹

Atatosi o Oliva Kaotui

Atatosi o Oliva Kaotui,

I le 1828, ina ua 20 tausaga o Oliva Kaotui, na ia siitia atu i Niu Ioka i sisifo, lea na ofoina ai ia te ia se avanoa o se faiaoga e latalata i Palamaira. O iina na ia faalogo ai i tala e uiga ia Iosefa Samita ma papatusi auro. O uluai faamaumauga o le talafaasolopito na tusia e Iosefa Samita faapea na faaali le Alii ia Kaotui ma “faaali ia te ia papatusi i se faaaliga ma le moni foi o le galuega.”² Ina ua mavae se taimi puupuu o nofototogi i matua o Iosefa Samita i Manaseta, na ia naunau loa e malaga i Haramoni, Penisilevania, e feiloai ia Iosefa lava ia. Toeitiiti lava o le taimi na ia taunuu ai, sa amata ai ona galue Kaotui o se tusiupu a Iosefa i le faaliliuga o le Tusi a Mamona. Na maua e Kaotui le pule o le perisitua mai ni avefeau agelu, na avea ma se tasi o Molimau e Toatolu o papatusi o le Tusi a Mamona, na fesoasoani e taitaia le lolomiina o le Tusi a Mamona, ma o se tagata muamua o le Ekalesia i le aso 6 o Aperila, 1830. I ona aafiaga i nei mea na tutupu faavavega, na mulimuli ane tusia e Kaotui, “O le a ou vaai pea lava i lenei faaalia o le agalelei o le Faaola ma le ofo ma le agaga faafetai ao faatagaina au e ola.”³

Toefuataiga o le Perisitua Arona

Atavali o le toefuataiga mai o le Perisitua Arona e ala mai ia Ioane le Papatiso. O Oliva Kaotui o loo tootuli i le itu taumatau.

I le 1830, na taitai atu ai e Kaotui se vaega o faifeautalai e toafa i nofoaga o Initia Amerika i le nofoaga lea na taua o le tuaoi i sisifo o le Iunaite Setete. Na latou ui atu i Ohaio, lea na taitai atu ai le latou talaiga i se liuga tele lea na fesoasoani e faatuina Katelani o se nofoaga autu o le Ekalesia.⁴ O le lua tausaga mulimuli ane, sa faaipoipo ai Kaotui ia Elisapeta Ana Uitimera. E toaono le fanau a le ulugalii, ae na o se tamateine, o Maria Louise, na soifua seia matua. O Elisapeta ma Maria Louise na maliliu e lua aso e va ai i le 1892 ma na tanumia faatasi. E leai nisi tupuaga a Oliva Kaotui.⁵

I le taimi o le popofou o le Ekalesia, na auauna atu ai Kaotui ma le faamaoni o se Toeaina Lona Lua, le Fesoasoani i le Peresitene o le Ekalesia, ma se fesoasoani lagolago i le Au Peresitene Sili.⁶ Na ia faia foi se matafaioi taua i le saunia o faaaliga a Iosefa Samita mo le lolomiina i le Tusi o Poloaiga ma, mulimuli ane, o le Mataupu Faavae ma Feagaiga. Faatasi ai ma Iosefa Samita ma Sini Rikitone, na tatala ai e Kaotui faitotoa o le Maota o le Alii i Katelani i le 1836 ma faafeiloaia le Au Paia o Aso e Gata Ai i le sauniga o le faapaiaga. Na ia pulefaamalumalu i faagasologa o se tasi o peresitene o le perisitua maualuga ma molimauina le faaali mai o Iesu Keriso ma auauna agelu i le malumalu i se vaiaso talu ona uma le faapaiaga.

I se tausaga mulimuli ane, o faafitauli tautupe i Katelani, e aofia ai le pau o le faletupe o le Sosaiete o le Saogalemu i Katelani, na pagatia ai tulaga tautupe a Oliva Kaotui ma na ia tali atu e ala i le tuliloaina o ana lava mea nai lo le faaauau ona faapaiaina ana meatotino i le Ekalesia.⁷ Na luiina e Kaotui taitai o le Ekalesia e ala i le tuuaia o i latou i le sese ona pulea tupe ma le faasalalauina o tala faapea o Iosefa Samita na agasala i le mulilua.⁸ I le 1838, na valaau e Iosefa le aufautua maualuga ia suesue tuuaiga a Kaotui. Na iu ina faaiu le aufono ma fuafuaina ni nai moliaga e faasaga ia Kaotui, ma iu ina palota e lagolago le tele o na moliaga ma tape le igoa o Kaotui.⁹ O se faaaliga mulimuli ane na faatonuina ai Ailama Samita ia suitulaga ia Kaotui o se Peresitene Lagolago o le Ekalesia.¹⁰

Na faaalu e Kaotui nai isi tausaga na sosoo ai e suesue ma galue faaloia i Katelani, ma iu ai i le taliaina o se loia i Faamasinoga a Ohaio. Ona ia see atu lea i se selau maila i sisifo i Tiffin, Ohaio, lea na ia faaauau ai le faaloia mo le isi fitu tausaga. A o i ai i Tiffin, na ia fetusiai ma le Au Paia o Aso e Gata Ai ia na faamoemoe e toefaatasia ma ia i totonu o le Ekalesia. O le uso o Polika Iaga (le uso-faaletulafono o Kaotui) o Fineaso Iaga na asiasi atu ia Kaotui ma iloa ai “sa i ai lona manao e fia faatasi ma ana uo tuai.”¹¹ I le faalogo ai i nei lipoti ma isi foi, na uunaia ai loa e Iosefa le Korama a le Toasefululua e toe valaaulia Kaotui i le lotu. Na tau atu e Kaotui i sui o le Toasefululua o lona alu ese o se taunuuga tele lava mai le Au Paia paaa i Misuri na faafefeina o ia ae le mai ni masalosaloga patino i Aposetolo po o isi taitai.¹² Na faamoemoe Kaotui o lana molimau lolomiina o le Tusi a Mamona sa tatau ona mafai ai ona onosaia ona faaletonu ma lona tagata. Mo se taimi, na foliga mai o le a mafai ona toe faatasi mai Kaotui ma le Au Paia i Navu. Na maua e Iosefa Samita ma faitauina se tusi mai ia Kaotui i ni itula ae lei fasiotia i le Falepuipui o Karefasi.¹³

I le 1847, na siitia atu ai Kaotui i Wisconsin, ma le faamoemoe o se suiga o le tau o le a manuia ai lona soifua maloloina. O iina na ia tamoe ai mo le sui o le setete ae na faiaina i le palota i le 40 palota ma na vave lava ona fuafua e auai i kamupani a paionia Mamona e malaga atu i Iuta. Na lauga atu Kaotui i se konafesi i Aioua lata ane ma tuuto atu lana lagolago i le Korama a le Toasefululua. I ni aso mulimuli ane, na palota ai le Aufono Maualuga e toe taliaina Kaotui i le faaaogaina atoatoa. O Osone Hyde o le Korama a Aposetolo e Toasefululua na toe papatisoina, toe faamauina, ma toe faauuina Kaotui, lea na faia ni fuafuaga e toe faatasia ma le Au Paia i Iuta. E ui i lea, na faaauau ona vaivai lona malosi, ma na ia maliu i le 1850, ae lei mafai ona ia malaga i sisifo.¹⁴

Punaoa o le Ekalesia

Jeffrey G. Cannon, “Oliver Cowdery’s Gift: DC 6, 7, 8, 9, 13,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 15–19.

“Oliver Cowdery,” josephsmithpapers.org.

Larry C. Porter, “The Testimony of Oliver Cowdery,” Ensign, Dec. 1996, 40.

Talaaga o le Soifuaga

O lomiga nei ua tuuina atu ai nisi faamatalaga e uiga i lenei autu. I le faasinoina po o le fesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Alexander L. Baugh, ed., Days Never to Be Forgotten: Oliver Cowdery (Provo, Utah: Religious Studies Center, Brigham Young University, 2009).

John W. Welch and Larry E. Morris, eds., Oliver Cowdery: Scribe, Elder, Witness (Provo, Utah: Neal A. Maxwell Institute for Religious Scholarship, Brigham Young University, 2006).

Faamatalaga

1. Larry E. Morris, “Oliver Cowdery’s Vermont Years and the Origins of Mormonism,” i le John W. Welch and Larry E. Morris, eds., Oliver Cowdery: Scribe, Elder, Witness (Provo, Utah: Neal A. Maxwell Institute for Religious Scholarship, Brigham Young University, 2006), 11–16.

2. “History, circa Summer 1832,” 6, josephsmithpapers.org.

3. “Letter I,” Latter Day Saints’ Messenger and Advocate, vol. 1, no. 1 (Oct. 1834), 16.

4. Tagai i Autu: Book of Mormon Translation, Witnesses of the Book of Mormon, Restoration of the Aaronic Priesthood, Restoration of the Melchizedek Priesthood, Endowment of Power, Book of Commandments, Doctrine and Covenants, Early Missionaries.

5. Ronald E. Romig, “Elizabeth Ann Whitmer Cowdery: A Historical Reflection of Her Life,” i le Alexander L. Baugh, ed., Days Never to Be Forgotten: Oliver Cowdery (Provo, Utah: Religious Studies Center, Brigham Young University, 2009), 327–38.

6. “Journal, March–September 1838,” 20, josephsmithpapers.org.

7. Ae lei pau le faletupe, o Oliva Kaotui le tagata muamua lava na foai i le faaliliuga o le Tusi a Mamona ma i le Ekalesia. I le 1829 na ia tuuina atu se vaega o lona totogi o se faiaoga ia Iosefa ma Ema Samita mo se totogi amata o se fale i Haramoni, Penisilevania, lea na faia ai le tele o le faaliliuga. Tagai Historical Introduction to “Agreement with Isaac Hale, 6 April 1829,” josephsmithpapers.org.

8. “High Council Minutes, 12 April 1838,” i le Minute Book 2, 123–24, josephsmithpapers.org. Na tali atu Iosefa Samita i lenei tuuaiga i se faamatalaga lea na faamalieina ai le aufono faapea e lei nofosala o ia i soo se faiga sese. Tagai Autu: Fanny Alger.

9. “High Council Minutes, 12 April 1838,” i le Minute Book 2, 118–26, josephsmithpapers.org.

10. Tagai Mataupu Faavae ma Feagaiga 124:91–96.

11. Phineas Young letter to Willard Richards and Brigham Young, Dec. 14, 1842, Brigham Young Office Files, Church History Library, Salt Lake City.

12. Oliver Cowdery letter to Brigham Young and other members of the Twelve, Dec. 25, 1843, Brigham Young Office Files, Church History Library, Salt Lake City.

13. Scott H. Faulring, “The Return of Oliver Cowdery,” i le Welch and Morris, Oliver Cowdery: Scribe, Elder, Witness, 327.

14. Faulring, “The Return of Oliver Cowdery,” 350–51.