Faaipoipoga Autaunonofo i Iuta

E tusa ai ma se faaaliga ia Iosefa Samita, o le faaipoipoga autaunonofo—o le faaipoipoga o se alii e toatasi i ni tamaitai se toalua pe sili atu—na amatalia i tagata o Le Ekalesia a Iesu Keriso o le Au Paia o Aso e Gata Ai i le amataga o le vaitau o le 1840 i Navu, Ilinoi. Sa muai faailoa mai faalilolilo i se vaega toalaiti o tagata o le Ekalesia, ma o tagata na auai sa talosagaina ia tausisia le le faalauaiteleina o a latou faatinoga. Ina ua siitia atu le Au Paia i Iuta, sa faalauiloa faalauaitele atu e taitai o le Ekalesia lea faiga, ma i le va o le 1852 ma le 1890, sa faatino aliali ai e le Au Paia le faiga o faaipoipoga autaunonofo.

I le aluga o tausaga na aoaoina faalauaitele ai faaipoipoga autaunonofo, sa faamoemoeina le Au Paia o Aso e Gata Ai uma e talia le mataupu faavae o se faaaliga mai le Atua. Ae peitai, sa le o tagata uma sa faamoemoeina e ola ai. E moni lava, o lenei faiga o faaipoipoga na le mafai ona faalelalolagi atoa ona o le aofai o alii i tamaitai. Sa manatu taitai o le Ekalesia o faaipoipoga autaunonofo o se poloaiga sa matele lava i le Ekalesia, ae na iloa foi, o tagata taitasi o e sa le’i faia lea faiga e mafai lava ona taliaina e le Atua. E masalo o le afa o i latou na nonofo i le Teritori o Iuta i le 1857 na oo i se olaga o se aiga autaunonofo e pei o se tane, avā, po o se tamaitiiti i se taimi o o latou olaga. E oo ane i le 1870, ua 25 i le 30 pasene o le faitau aofai o tagata ua nonofo i ni aiga autaunonofo, ma e foliga mai sa faaauau ona fai ifo le pasene i le isi 20 tausaga na sosoo ai.

Mo le toatele o e na faia, o faaipoipoga autaunonofo sa o se osigataulaga tele naua. E ui lava i tulaga faigata sa oo i ai ni isi, ae o le faamaoni o i latou na faatinoina faaipoipoga autaunonofo ua faaauau pea ona manuia ai le Ekalesia i ni auala e lemafaitauina. E ala i tuaa o nei Au Paia o le seneturi lona 19, ua oo mai ai le toatele o tagata auai, taitai, ma faifeautalai tuuto o le Ekalesia. E ui ina faasāina tagata o le Ekalesia i aso nei i le faiga o faaipoipoga autaunonofo, ae o le Au Paia o Aso e Gata Ai i aso nei e ava ma faamamalu i nei paionia o e na tuuina atu ni mea e tele mo lo latou faatuatuaga, aiga ma afioaga.

Mo nisi faamatalaga e uiga i le faiga o faaipoipoga autaunonofo i Iuta, tagai “Plural Marriage and Families in Early Utah,” Gospel Topics Essays, topics.ChurchofJesusChrist.org.

Punaoa o le Ekalesia

“Plural Marriage and Families in Early Utah,” Gospel Topics Essays, topics.ChurchofJesusChrist.org.

“The Manifesto and the End of Plural Marriage,” Gospel Topics Essays, topics.ChurchofJesusChrist.org.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Kathryn M. Daynes, More Wives Than One: Transformation of the Mormon Marriage System, 1840–1910 (Urbana: University of Illinois Press, 2001).

Jessie L. Embry, Mormon Polygamous Families: Life in the Principle (Salt Lake City: University of Utah Press, 1987).

Autu e Fesootai Ai: Joseph Smith and Plural Marriage, Anti-polygamy Legislation, Manifesto