Viiga

O le usuina o viiga i faigalotu taitoatasi ma faalauaitele e oo lava i tua anamua ma o se vaega taua o sauniga tapuai faaKerisiano Amerika i aso o Iosefa Samita. E tolu masina talu ona faatulaga le Ekalesia, ia Iulai 1830, na maua ai e Iosefa Samita se faaaliga mo lona faletua o Ema, ma faatonuina ai o ia ia faia se filifiliga o viiga paia mo le Ekalesia a Keriso. “Aua e fiafia loʼu agaga i le pese a le loto,” na folafola atu ai e le Alii. “Ioe, o le pese a le amiotonu o se tatalo mai ia te au” (MF&F 25:12). O lenei faaaliga ua faamautinoa mai ai le taua o musika o se vaega o le tapuaiga a le Ekalesia, ma o lona tofiaina o Ema Samita na fou ona sa seasea lava ona faatulagaina ni viiga e ni tamaitai.¹

ata o le tusipese o loo matala i le itulau autu

O se kopi o le tusipese muamua a le Ekalesia, na lolomiina i le 1835 faatasi ai ma viiga na filifilia e Ema Samita.

O uluai viiga Mamona na lolomiina i le 1832 i le nusipepa The Evening and the Morning Star na lolomiina e Viliamu W. Phelps ma i le 1834 i le The Messenger and Advocate. O nisi o nei viiga na aofia ai i le tusipese a Ema, O se Tuufaatasiga o Viiga Paia, mo le Ekalesia a le Au Paia o Aso e Gata Ai. O le tusipese, na lolomiina aloaia i le 1835, na saunia mo le lolomiina e Phelps, ma na faamaeaina le lolomiga i le amataga o le 1836 i Katelani. Na lava lona laitiiti e ofi ai i se taga ma na i ai le 90 o viiga. E i le va o le 30 ma le 40 o na viiga na tusia e le Au Paia o Aso e Gata Ai; o isi o ni viiga masani a le Porotesano. O le tusipese lona lua a Ema, na lolomiina i Navu i le 1841, e aofia ai le 304 viiga.² O nei tusipese ma isi uluai tusipese na aofia ai na o upu o viiga ae leai ni nota faamusika. Na filifilia e le Au Paia ni fati masani ia na usuina ai viiga.

O viiga o se uunaiga taua lea mo le aoaoina atu ma le faamalosia o aoaoga faavae a le Ekalesia. O le faatomuaga o le tusipese o le 1835 na taua ai faapea o le tuufaatasiga o loo i ai “‘Viiga Paia’ ua faafetaui i lo latou faatuatua ma le talitonuga i le talalelei.” O le tele o uluai viiga Mamona na tusia e le Au Paia o Aso e Gata Ai, e pei o Eliza R. Snow, Pale P.Palate, ma Viliamu W. Phelps. O isi viiga na aofia ai na tusia ma usuina e tagata i isi lotu, ma o nisi o viiga na suia e Phelps ina ia fetaui ma aoaoga a le Au Paia o Aso e Gata Ai. Talu mai lena tusipese muamua i le 1835, o autu e pei o Siona, le Afio Mai Faalua o le Faaola, le Toefuataiga o le talalelei, le Tusi a Mamona, ma mulimuli ane o le olaga i le muai olaga, o perofeta o aso e gata ai, ma aafiaga o paionia na faatumuina ai itulau o tusipese ma faatagaina ai le Au Paia o Aso e Gata Ai e faaleoina atu talitonuga e faamemelo i ai.

E ese mai tusipese na tuufaatasia e Ema Samita, o isi tusipese na tuufaatasia i nofoaga eseese ma mo ni faaaogaina faapitoa. O se tasi o uluai tusipese na lolomiina i Manaseta, Egelani, i le 1840 i lalo o le taitaiga a Polika Iaga, Pale P. Palate, ma Ioane Teila.³ O le au paia na malaga atu i Iuta mai Egelani na aumaia a latou lava tusipese ma viiga e pele ia i latou i le Vanu o Sate Leki. O le tusipese Manaseta na faaauau ona lolomiina i Egelani seia oo i le 1890. O le tuufaatasiga tele muamua lava o viiga e aofia ai nota o musika i le 1889 Latter-Day Saints’ Psalmody, na lolomiina i lalo o le taitaiga a Peresitene Ioane Teila. O faalapotopotoga a ausilali e pei o le Aoga Sa, Aualofa, ma le Peraimeri na amata ona lolomiina a latou lava tusipese i le 1880.⁴ Na lolomiina e le Misiona a Setete i Matu, e faamautu i Sikako, ni lomiga se 11 o Pese o Siona mai le 1908 i le 1925. O lenei tusi na avea ma se tusipese i le “misiona”.

Na faatuina e taitai o le Ekalesia se Komiti o Musika o le Ekalesia i le 1920 ina ia faaleleia ai musika ma le faia o tusipese. I le 1927, na tuufaatasia ai e le komiti ni viiga mai lomiga eseese i se voluma se tasi, Viiga o le Au Paia o Aso e Gata Ai. Ona oo lea, i le 1948, na lolomiina ai e le Ekalesia se tusipese toe iloiloina na faaautu Viiga: O Le Ekalesia a Iesu Keriso o le Au Paia o Aso e Gata Ai. I le lona 150 tausaga o le tusipese muamua a Ema Samita i le 1985, na lolomiina ai e le Ekalesia se tusipese fou, lea o loo faaaogaina i le aso, lea e aofia ai le tele o viiga lauiloa mai le Au Paia o Aso e Gata Ai, o ni viiga eseese na maua mai isi lotu Kerisiano, ma le tele o viiga na fatuina talu ai. E lolomi e le Ekalesia tusipese i le fia taseni o gagana, e tai pe a ma le 200 viiga ua faaliliuina mai le Igilisi e faapea foi viiga faaleatunuu ma faaletalafaasolopito e faapitoa lava i vaega eseese o le lalolagi. O le tusipese a le Ekalesia mo tamaiti—Tusipese a Tamaiti a le Au Paia o Aso e Gata Ai, na lolomiina muamua i le 1989—ua faaliliuina foi i le tele o gagana.

O musika faaleagaga o loo faaauau pea ona avea o se vaega taua i tapuaiga a le Au Paia o Aso e Gata Ai. O viiga a aulotu e tuufaatasia ai tagata, faamalosia ai le lotogatasi, ma aoao atu ai aoaoga faavae. I le 1985, na faamalosia ai e le Au Peresitene Sili le faaaogaina o viiga e le gata mo le lelei o musika, ae faapena foi le anotusi faaleaoaoga faavae o viiga: “Matou te faamoemoe o le a faaaoga le tusipese e taitai, faiaoga, faapea ma tagata o le Ekalesia o e e valaaulia e lauga, e saili ma sii mai ai tomatauga mamana ma matagofie ua tuuina mai i upu o viiga. … Matou te faamoemoe o le a avea le tusipese ma se tasi o tusi taua i o tatou aiga faatasi ma tusitusiga paia ma isi tusi faalelotu.”⁵

Punaoa o le Ekalesia

Emma Smith, comp., Collection of Sacred Hymns, 1835, josephsmithpapers.org.

First Presidency, “Preface,” Hymns of The Church of Jesus Christ of Latter-day Saints (Salt Lake City, 1985), ix–x.

Michael F. Moody, “Latter-day Saint Hymnbooks, Then and Now,” Ensign, Sept. 1985, 10–13.

Dallin H. Oaks, “Tapuai e Ala i Musika Music,” Liahona, Ian. 1995, 10–13.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Karen Lynn Davidson, Our Latter-day Hymns: The Stories and the Messages (Salt Lake City: Bookcraft, 1988).

Michael Hicks, Mormonism and Music: A History (Urbana: University of Illinois Press, 1989).

Autu Fesootai: Emma Hale Smith

Faamatalaga

1. Tagai Rachel Cope, “A Sacred Space for Women: Hymnody in Emma Hale Smith’s Theology,” Journal of Religious History (2017).

2. Michael Hicks, “Emma Smith’s 1841 Hymnbook,” Journal of the Book of Mormon and Other Restoration Scripture, vol. 21, no. 1 (2012), 12–27.

3. Brigham Young, Parley P. Pratt, and John Taylor, comps., A Collection of Sacred Hymns, for The Church of Jesus Christ of Latter-day Saints, in Europe (Manchester, England: W. R. Thomas, 1840).

4. Eliza R. Snow, comp., Hymns and Songs: Selected from Various Authors, for the Primary Associations of the Children of Zion (Salt Lake City: Deseret News, 1880); Deseret Sunday School Songs (Salt Lake City: Deseret Sunday School Union, 1909); Relief Society Song Book (Salt Lake City: General Board of Relief Society, 1919).

5. First Presidency, “Preface,” Hymns of The Church of Jesus Christ of Latter-day Saints (Salt Lake City, 1985), ix, x.