Faalapotopotoga Aloaia ma Faaupufai a Amerika

Sa matauina e le perofeta o le Tusi a Mamona o Nifae faapea o tusitusiga a Isaia e mafai ona faigata ona malamalama ai e aunoa ma se malamalama i le tala taoto ma le talafaasolopito o Ierusalema, lona nuu moni.¹ O upumoni na aoao mai e Isaia e i ai lona taua e faasopolia ai le lalolagi ae e patino lona matalalaga. E faapena foi, o le uluai talafaasolopito o le Ekalesia sa tupu i se matalalaga faatala taoto ma faaupufai faapitoa. O le malamalama i lenei matalalaga ua faafaigofie ai le tele o mea na tutupu i le talafaasolopito o le Ekalesia ona mulimuli ai.

Uluai Amerika o se Sue Faataitai

O Iosefa Samita le Matua, Lusi Maka Samita, ma isi uluai Au Paia sa fananau mai o ni tagata e i lalo o le pulega a Peretania i totonu o nuu mavaevae o Amerika. I le taimi o se Taua faaumiumi a Initipene, sa tauave e nuu mavaevae muamua le igoa o le Iunaite Setete ma latou faaaogaina se faigamalo faatemokarasi. I le va o le 1787 ma le 1789 sa fono ai sui mai setete ma tusia se auivi o se Faavae e faapaleni ai le paoa i le va o vaega eseese: le va o tagata, o setete eseese, ma le malo fou, po o le malo “tutotonu,” ma le va o le Konekeresi, le peresitene ma lana kapeneta, ma faamasinoga tutotonu. Na faamaioio mai i le Faavae faapea o le peresitene ma le toatele o sui auai o le Konekeresi sa tatau ona palotaina, ae na o alii e i ai a latou lava meatotino sa faataga ona palota i lena taimi. Sa tapu e le Faavae le malo tutotonu mai le faatuina o se tapuaiga aloaia poʻo le faʻalavelave i le saolotoga o faʻatinoga o lotu. I se tulaga lautele, o le malo tutotonu sa tau leai se paoa i lena taimi nai lo le mea ua i ai le Iunaite Setete i le taimi nei, ma ua tele atu le pule ua tuu atu i setete ma faiganuu i le lotoifale.

O le ituaiga o faigamalo sa faavaeina i le Iunaite Setete sa tulaga ese ma sa tele ina vaaia o se faiga faataitai. E toatele uluai tagata o le Ekalesia sa fananau ma sa nonofo ai i lea taimi, ae lei leva ona faavae le malo. Mo se faataitaiga ina ua faaipoipo Iosefa le Matua, ma Lusi Maka Samita, o Siaosi Uosigitone sa avea ma uluai peresitene o le atunuu. Ina ua ia tuua le tofi, sa avea ni pati faaupufai faatautava se lua ma se vaega taua o upufai a Amerika. E le gata i lea, sa tumau pea le i ai o fesili iloga e uiga i le paleni tonu o le paoa i le va o lala eseese o le malo, o matafaioi a malo tutotonu ma setete, ma le taliaina o faiganuu ua latou taulimaina le tulafono i o latou lava lima e aunoa ma se faatagaga.² Sa i ai pea lava foi fesili pe o le a mafai e le Iunaite Setete ona faatumauina le tutoatasi, pe o le a tumau le tutufaatasi o setete, pe faapefea ona fesootai le atunuu i isi malo, ma pe mafai e le faigamalo ua faatoa faatu ona faamautinoa le tulaga mau mo tagata lautele ma aia tatau mo vaega toalaiti i se faiga o loo mamanu i le toatele.

O Le Uluai Ekalesia ma le Faiga Faa-Amerika Ua i Lumamea.

E oo atu i le 1830 ua faatulagaina le Ekalesia, o faalapotopotoga faaupufai ma aloaia o le Iunaite Setete o loo i lumamea pea. E ui ina fai mai le malo fou e puipuia le saolotoga o tapuaiga, sa tele ina luiina e uluai Au Paia le tele o faamoemoega faalelotu o Amerika. Sa foliga e faapitoa le moni ina ua faapotopoto le Au Paia i se nofoaga e tasi ma sa amata ai ona fauina se faiganuu. Sa tele ina popole o latou tuaoi e uiga i le tosinaga o le a tele naua o le Au Paia o Aso e Gata Ai i luga o faiga palota i le lotoifale. I le tele o tulaga, o le tuuto atu o le Au Paia i le saolotoga faaletapuaiga a o fetaiai pea ma le tetee faifai pea sa tofotofoina ai le malosi o faalapotopotoga aloaia ma faaupufai a Amerika.

I Niu Ioka ma Ohaio, sa taumafai le au tetee o le Ekalesia e faaaoga faamasinoga ma le tulafono faifaamalosi e aunoa ma se faatagaga e faamaasiasi ai le Au Paia.³ A o feagai ai ma ia teteega, sa oo ina avea le Au Paia ma lagolago malosi mo le saolotoga faaletapuaiga ma taulimaina e tusa ai ma le tulafono mo e tuuaia. Peitai, tusa lava pe o la na latou manatu popole mo le Au Paia, sa lei lagona e taitai faafoe o le tulafono ma faamasino faapea ua faatagaina i latou e fesoasoani i ai a o feagai ma le tetee o tagata lautele.

I Misuri, sa matuai faapitoa ai le ogaoga o sauaga.⁴ I le 1833, sa tutuliesea ai le Au Paia mai le Itumalo o Siakisone e se au faatupu faalavelave faatulagaina lelei e tagatanuu taiulu i le lotoifale (o se vaevaega o pulega o se setete), lea sa latou nonofo ai. Ina ua uma ona maua e Iosefa Samita se faaaliga lea na ta’ua ai e le Alii e faapea sa ia “faatuina se faavae o lenei Laueleele e ala i lima o tagata popoto,” sa amata e le Au Paia se taumafaiga umi e talosagaina ai le malo mo se fesoasoani e faamautu a latou aia tatau.⁵ Sa amata ona latou talosagaina le kovana (po o le faatonu sili) o le setete. Peitai, sa faigata i le Au Paia ona maua se tali e le faaituau ona o le tele o tagata i le lotoifale, e aofia ai sui auai o fitafita volenitia ia sa faalagolago i ai le faigamalo o setete e tausisia le tulafono, e teena i latou. Sa mulimuli ane talosagaina e le Au Paia le peresitene o le I.S. o Matini Van Burden, ae sa fefe nei ona le mauaina paloto a tagata Misuri, o lea sa ia musu ai e lagolagoina i latou.

E oo atu i le 1844, ua oo ina le fiafia Iosefa Samita ma le Au Paia i le le mafai po o le le mananao o faigamalo o le setete ma le malo tutotonu e puipuia o latou aia tatau. Ina ua le folafola atu e sui tauva faaperesitene autu i lena tausaga e puipuia ia saolotoga faaletapuaiga ma isi o le Au Paia, sa faia faatosina e Iosefa Samita e tauva ai ia lava mo le tofi peresitene o le Iunaite Setete, e lagolago ai e le gata i le saolotoga faaletapuaiga, ae faapea foi faamoemoega e pei o le faamutaina o le faia o pologa, toe faatulagaina o falepuipui ma le faalauteleina faalemalo o tulaga o le mauaina o le maliliega o vaega Tagatanuu Initia Amerika.⁶ Peitai, a o lei oo i le palota, sa tagatavaleina Iosefa Samita e se vaega faatupu faalavelave o le autau i le lotoifale, lea sa faatulaga e leoina le falepuipui lea sa ia nofo ai ao faatalitali le faamasinoga, sa le mafai ona latou puipuia o ia.⁷

Malaga Agai i Sisifo, Feeseeseaiga, ma Faaiuga

Ina ua mavae le maliu o le Perofeta o Iosefa Samita, sa taitai e Polika Iaga ma isi Aposetolo le Au Paia agai i sisifo, i fafo o le Iunaite Setete ma o atu i le mea sa avea i lena taimi ma Teritori o Mekisiko. O le taimi lea, sa tau ai e le I.S. se taua ma Mekisiko, ma o le itu sa faamautu ai le Au Paia e lei leva ae avea ma teritori o le Iunaite Setete lea ua igoa o Iuta. E le pei o setete, lea sa tele lava ina pulea e ia lava, sa i ai ia teritori i lalo o le pulega tuusao a le malo tutotonu. O lona uiga, o taitai faaleteritori e pei o kovana ma faamasino sa tofia e le peresitene, nai lo le filifilia e tagatanuu i le lotoifale.

Sa tele ina tulai mai feteenaiga faaupufai i le va o le Au Paia ma le malo tutotonu. Sa tofia e le peresitene o le I.S. ia Polika Iaga e avea ma uluai kovana o Iuta, ae sa feeseeseai o ia ma le Au Paia ma isi o taitai faaleteritori. I le 1857 ma le 1858, sa foliga ua alagatatau se taua i le va o le Au Paia ma le malo tutotonu ina ua mavae ona auina atu e le peresitene se vaegaau i Iuta e taofi se fouvalega sa lipotia mai ae faatu se kovana fou e sui ai Polika Iaga. Sa toe tulai mai feteenaiga ina ua faia e le malo o le I.S. se faaiuga faaletulafono ia ta’u solitulafonoina ia faaipoipoga faaautaunonofo i le 1860. I le 1870 ma le 1880, sa faapitoa ona malolosi faaupufai ia fafine Mamona i le tetee i tulafono faasagatau i autaunonofo ma o i latou o nisi o uluai fafine i le Iunaite Setete ma le lalolagi na manumalo i le aia tatau e palota ai.

E faapei lava foi ina sa sailia e le Au Paia le faamasinoga tonu mai le setete ma taitai o le malo tutotonu ina ua mavae sauaga i Misuri, sa latou sailia le puipuiga mai le faiga faafaamasinoga a Amerika, sa finau atu e i ai la latou aia tatau e faaauau ai autaunonofo o se tu faaletapuaiga. Ina ua mavae ona teena e le Faamasinoga Maualuga a le I.S. a latou finauga i le 1879, sa faatino e tagata o le Ekalesia le le usitai aliali fai mai, o le usitai i tulafono a le Atua sa sili atu ona taua nai lo le usitai i tulafono le amiotonu. Ao faateleina le tulitulimataia e le malo tutotonu o faaiuga inaina e faasala ai le Au Paia o Aso e Gata Ai o e o faia autaunonofo, sa saili atu taitai o le Ekalesia mo se faaaliga e uiga i le ala e faaleleia ai le va o le poloaiga o la latou tu faaletapuaiga ma tulafono o le laueleele. Sa tatalo le Peresitene o le Ekalesia o Uilifoti Uitilafi ma sa maua ai le tali e ala i le faaaliga i le 1890, lea na taitai atu ai le Ekalesia ina ia faamutaina lea tu o faaipoipoga faaautaunonofo.

I le 1896, sa avea Iuta ma setete, sa faatagaina ai le toatele o tane ma fafine o le Au Paia o Aso e Gata Ai e auai ma le malolosi i le olaga faalemalo o Amerika. E ui ina sa faaauau pea ni nai tetee i le aofia ai o le Au Paia i tulaga faaupufai, e oo atu i le 1908 ua faamaonia e se komiti o le konekeresi le filifilia o Reed Smoot, o se tasi o le Korama a le Toasefululua, i le Senate a le Iunaite Setete. Talu mai lena taimi, ua malolosi le auai o le Au Paia o Aso e Gata Ai i tulaga faaupufai o Amerika, e le gata i le au palota ae faapea foi taitai sa filifilia. Sa tumau pea le tulaga o le Ekalesia i le le faapito’au i se itu faaupufai o Amerika, ae faasaoina le aia tatau e faia ai faamatalaga e uiga i fesili e faatatau i mataupu taua aoga.