“O Le Tuua ai o Navu,” O Autu o le Talafaasolopito o le Ekalesia
“O Le Tuua ai o Navu”
O Le Tuua ai o Navu
I le va o Fepuari ma Setema o le 1846, e faitau afe le Au Paia o Aso e Gata Ai na tuua Navu, Ilinoi. O le tautoulu talu ai, na atiina ae ai e taitai o le Ekalesia ni fuafuaga mo se malaga tele, ma fuafuaina e faatulagaina le 25 vaega e tai 100 taavale solofanua o le a tuua i le tautotogo o le 1846. O le faateleina o sauaga, e ui i lea, na uunaia ai Polika Iaga ma isi taitai ia faia se ioega i le taimi o le tautoulu o le 1845, lea na manaomia ai tagata o le Ekalesia ia amata la latou malaga tele i lena taumalulu. I le va o le aso 4 o Fepuari ma le aso 1 o Mati, 1846, e tusa ma le 400 taavale solofanua na auina atu i vaa le pe tusa ma le 2,000 o le Au Paia o Aso e Gata Ai e kolosia le Vaitafe o le Misisipi i totonu o se tolauapiga i le Alavai o Suka, i Aioua. O le isi 12,000 o le Au Paia na kolosia Aioua i le taimi o le tautotogo ma le taumafanafana, ma o le fia selau na totoe na faatasi atu i le malaga tele ia Setema.1 Na osi feagaiga tagata o le Ekalesia e fesoasoani i e matitiva i totonu o i latou ina ia mafaia le malaga. Na taumafai taitai o le Ekalesia e faatau atu le Malumalu o Navu ma isi meatotino a le Ekalesia e fesoasoani ai i e matitiva, ae na le mafai ona latou maua se tasi e faatauina le malumalu.
O nisi ata tuai o le malaga ese atu na faapea mai na faamalosia e se aufaatupu faalavelave le Au Paia ia kolosi le Vaitafe aisa o le Misisipi i luga o le aisa. E ui na vave ona tuua e vaega muamua nai lo le uluai fuafuaga, o le ioega na faia i le tautoulu talu ai e taitai o le Ekalesia na taofia ai osofaiga a le aufaatupu faalavelave. O le tele o vaega na kolosia le vaitafe ma le filemu e faaaoga ai vaa, e ui o se vaega atonu na kolosia le aisa i le va o le aso 25 o Fepuari ma le aso 1 o Mati .2
Ao faagasolo le taumafanafana, na faateteleina le le onosai o fili o le Ekalesia i le eria i nai Au Paia o Aso e Gata Ai na totote i Navu. O feteenaiga i le va o e tetee i Mamona o le lotoifale ma tagatanuu o Navu—e aofia ai le toatele o tagata e le oni Mamona o e na lagona le alofa i le mala ua oo i le Au Paia—na taunuu i se tulaga leaga ia Setema o le 1846. Na osofaia e se vaega o ni nai selau o tagata faaauupegaina e tetee i Mamona ia Mamona ma tagata e le oni Mamona o le aai na taumafai e puipui i latou. Na feaveai e itu e lua ni nai pulu o fanafanua ma fana, ma na iu i le maliliu ai o ni tagata e le itiiti ifo ma le toatolu ma ni nai taseni na manunua. Na oo ane se komiti tutotonu e fai se fofo ia faauma ai le vevesi, ma na faamalosia loa Mamona ma e na alolofa ane ia i latou ia tuua vave loa le aai.3
O le tele o le Au Paia o Aso e Gata Ai na sosolaese i le taimi o le 1846 na agai atu i Council Bluffs, i Aioua i sisifo, ae o le toatele na nonofo solo i le eria na lata ane mo le tele o masina po o tausaga. Sa na o ni nai aiga na nonofo pea i Ilinoi.