Au Peresitene Sili

Ina ua faatuina e Iosefa Samita le Ekalesia ia Aperila 1830, na taua ai o ia e se faaaliga “o se tagata vaai, o se Faaliliu upu, o se Perofeta, o se Aposetolo a Iesu Keriso, o se Toeaina o le Ekalesia.”¹ E faapena lava, na lagolagoina e tagata o le Ekalesia Iosefa o le toeaina muamua ma Oliva Kaotui o le toeaina lona lua, o tofiga muamua lava ia mo taitai o le Ekalesia. Ia Novema o le 1831, o se isi faaaliga ia Iosefa Samita na faatuina ai le tofiga o le “peresitene o le perisitua maualuga.” O lenei peresitene o le a “pei o Mose” ma o le a avea “o se Tagatavāai, o se talifaaaliga, o se faaliliu-upu, ma se perofeta, ua i ai meaalofa uma a le Atua e faaee mai e ia i luga o le ulu o le ekalesia.”² I se konafesi i le aso 25 o Ianuari, 1832, na tofia ai Iosefa Samita o le peresitene o le perisitua maualuga.³

I le pe a ma le ono vaiaso talu le tofiaina o Iosefa Samita, na ia filifilia ai ni alii se toalua—o Iese Gause ma Sini Rikitone—o ona fesoasoani i le “au peresitene o le Perisitua maualuga.”⁴ Na faaauau ona avea Gause ma se fesoasoani seia oo ia Tesema 1832, ina ua tape lona igoa mai le Ekalesia mo ni mafuaaga e le o taua.⁵ Ia Ianuari 1833, na suitulaga ai Feterika G. Williams ia Gause i le au peresitene.

E lua masina talu le tofiga o Williams, ae maua e Iosefa Samita se faaaliga na taua ai faapea o Rikitone ma Williams e “tutusa” ma ia “i le umiaina o ki o le Malo Mulimuli lenei.”⁶ E faapena lava, i se aufono a faitaulaga sili i Katelani, Ohaio, i le aso 18 o Mati, 1833, na faauuina ai e Iosefa ia Rikitone ma Viliamu “ia tutusa ma ia i le umiaina o Ki o le Malo ma le Au Peresitene o le Perisitua maualuga.”⁷ O nei alii e toatolu na taua o le au peresitene o le perisitua maualuga ma na galulue i lalo o le taitaiga a Iosefa Samita. O se isi faaaliga na faatonuina ai faapea, i le avea ai ma se au peresitene, na i ai ia i latou le “pule e faamalumalu … i Mataupu uma o le ekalesia.”⁸

Ina ua faatulaga e Iosefa Samita aufono maualuga i Katelani, Ohaio, ma le Itumalo o Clay, Misuri, i le 1834, na i ai se au peresitene a aufono maualuga taitasi. O le au peresitene i Katelani na i ai Iosefa Samita, Sini Rikitone, ma Feterika G. Williams, o sui lava ia o le au peresitene o le perisitua maualuga. O le au peresitene i Misuri na i ai Tavita Uitimera, Viliamu W. Phelps, ma Ioane Uitimera. Ina ia iloa le eseesega o nei au peresitene o aufono maualuga e lua, na amata ona taua e taitai ma tagata o le Ekalesia le au peresitene o le perisitua maualuga o le “Au Peresitene Sili.” O le taua muamua lava na tusia ai le Au Peresitene Sili na oo mai i se faaaliga na lolomiina i le Mataupu Faavae ma Feagaiga o le 1835.⁹

E ui lava na tuuina atu se faatonuga faaleperisitua e Iosefa Samita i le 1835 na taua ai faapea “o faitaulaga sili pulefaamalumalu e toatolu” e faia ai “se korama o le au peresitene o le ekalesia,” na i ai taimi na sili atu ai ma le toatolu tagata i le Au Peresitene Sili.¹⁰ Ia Tesema 1834 mo se faataitaiga, na faauu ai Oliva Kaotui “i le tofi o le fesoasoani i le Peresitene o le Perisitua Maualuga ma Paia,” ma o le aso na sosoo ai, na faauu ai Ailama Samita ma Iosefa Samita le Matua “i le tofi o le Au Peresitene o le perisitua maualuga.”¹¹ O Polika Iaga, Tavita O. Makei, ma Spencer W. Kimball na sili atu foi ma le lua ona fesoasoani i se taimi i a latou au peresitene.

Ina ua mavae le maliu fasia o Iosefa Samita ia Iuni 1844, na faaleaogaina le Au Peresitene Sili ma na tuu atu ai le taitaiga o le Ekalesia i le Korama a Aposetolo e Toasefululua, faatasi ai ma Polika Iaga o le Peresitene.¹² I le aso 27 o Tesema, 1847, i le sili atu ma le lua tausaga talu le maliu o Iosefa Samita, na toefaatulaga ai e Polika Iaga le Au Peresitene Sili, ma avea ai Heber C; Kimball ma Uiliata Risati ma ona fesoasoani. E faapea foi, o Peresitene Ioane Teila ma Uilifoti Uitilafi na faatalitali mo le sili atu ma le lua tausaga talu le maliliu ai o i laua na muamua ia i laua ina ia toefaatulaga le Au Peresitene Sili ma taitaia mo se taimi le Ekalesia o se Peresitene o le Korama a Aposetolo e Toasefululua. Na amata mai ia Lorenzo Snow i le 1898, ona toefaatulagaina vave lava Peresitene fou o le Ekalesia pe a maliu le perofeta talu ai.

Punaoa o le Ekalesia

Robin Scott Jensen, “Jesse Gause: Counselor to the Prophet: DC 81,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 155–57.

“Account of Meetings, Revelation, and Blessing, 5–6 December 1834,” josephsmithpapers.org.

“Minutes, 18 March 1833,” i le Minute Book 1, josephsmithpapers.org.

“Note, 8 March 1832,” Historical Introduction, josephsmithpapers.org.

“Revelation, 11 November 1831–B [DC 107 (partial)],” i le Revelation Book 1, 122–23, josephsmithpapers.org.

Faamatalaga

1. Mataupu Faavae ma Feagaiga 21:1; tagai foi “Revelation, 6 April 1830 [DC 21],”i le Revelation Book 1, 28, josephsmithpapers.org; spelling and punctuation standardized.

2. “Revelation, 11 November 1831–B [DC 107 partial],” i le Revelation Book 1, 123, josephsmithpapers.org; spelling standardized.

3. “Minutes, 26–27 April 1832,” 24, josephsmithpapers.org.

4. Tagai “Note, 8 March 1832,” i le Revelation Book 2, 10–11, josephsmithpapers.org; spelling standardized.

5. Robin Scott Jensen, “Jesse Gause: Counselor to the Prophet: DC 81,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 155–57.

6. “Revelation, 8 March 1833 [DC 90],” 1, josephsmithpapers.org. O aso nei, ua tuuina atu i tagata o le Au Peresitene Sili ma le Korama a Aposetolo e Toasefululua ki o le malo, ae ua na o le Peresitene o le Ekalesia le tagata e mafai ona faaaogaina atoatoa uma ki o le perisitua. Tagai i Autu e fesootai “Quorum of the Twelve” and “Succession of Church Leadership [Faasologa o le Taitaiga i le Ekalesia].”

7. “Minutes, 18 March 1833,” i le Minute Book 1, 17, josephsmithpapers.org.

8. “Revelation, between circa 8 and circa 24 March 1832,” josephsmithpapers.org.

9. “Revelation, 1 November 1831–A [DC 68],” i le “Revelations,” Evening and Morning Star, Oct. 1832 (June 1835), 73, josephsmithpapers.org.

10. “Instruction on Priesthood, between circa 1 March and circa 4 May 1835 [DC 107],” i le Mataupu Faavae ma Feagaiga, 1835, 84, josephsmithpapers.org.

11. “Account of Meetings, Revelation, and Blessing, 5–6 December 1834,” i le Joseph Smith, “History, 1834–1846,” 17, 20, josephsmithpapers.org.

12. Tagai i le Autu e fesootai “Succession of Church Leadership [Faasologa o le Taitaiga i le Ekalesia].”