“Laumua o le Ekalesia,” O Autu o le Talafaasolopito o le Ekalesia (2022)
“Laumua o le Ekalesia,” O Autu o le Talafaasolopito o le Ekalesia
Laumua o le Ekalesia
I le 1833, na fatuina ai e Iosefa Samita ma le Au Peresitene Sili le ata faataatia mo le Aai o Siona, o le aai o le a faapotopoto i ai le Au Paia o Aso e Gata Ai mo sauniuniga mo le Afio Mai Faalua o Iesu Keriso. O lenei aai sa fauina faataamilo i le felavasa’iga o malumalu e 24. Sa faamalamalama mai e le ata faataatia e faapea o nei fausaga o le a faaaogaina mo tapuaiga faalefaapotopotoga, taitaiga a le Ekalesia, ma aoaoga ma o le a maua ai avanoa mo korama ma faalapotopotoga eseese i totonu o le Ekalesia. Sa le’i fauina lava le aai ma ona malumalu ae sa avea pea ma se uluai ata faataatia mo se laumua mo le Ekalesia.1
I le va o le 1830 ma le 1847, i le avea ai ma uluai peresitene e toalua o le Ekalesia, o Iosefa Samita ma Polika Iaga, na siitia mai lea nofoaga i lea nofoaga, o aai na latou faia ai o latou fale e avea ma laumua mo le Ekalesia. Faatasi ai ma le taunuu atu o le Au Paia i le Vanu o Sate Leki, sa faia ni fuafuaga e fausia ai se malumalu, ma sa vave ona fausia e Polika Iaga se ofisa mo le Peresitene o le Ekalesia e sosoo ma lona fale i le Aai o Sate Leki, e tasi le poloka i sasae o le tulaga o le malumalu.2
I le aluga o tausaga, o le eria o loo siomia ai le poloka o le malumalu ua avea ma laumua o le Ekalesia, ua tuputupu a’e e ausia ai manaoga o se faalapotopotoga faatupulaia i le lalolagi atoa. O nei poloka i le Aai o Sate Leki ua avea ma nofoaga o avanoa mo tapuaiga, pulega, aoaoga, gaoioiga faitele, ma isi faamoemoega. O faafanua nei o loo faaali atu ai le eria o loo siomia ai le Lotoa o le Malumalu i ni taimi se tolu i le taimi o lona talafaasolopito. O ata o loo avatu faatasi ai o loo faaalia ai le tele o fale e sili ona lauiloa.
Ogatotonu o le Seneturi 19
1. O le Tulaga o le Fausiaina o le Malumalu o Sate Leki
Tulaga o le fausiaina o le Malumalu o Sate Leki. E lei leva ona taunuu le Au Paia o Aso e Gata Ai i le Vanu o Sate Leki, ae filifilia loa e Polika Iaga le nofoaga mo le malumalu. Na amata le fausiaina ia Fepuari 1853, ma sa faamaeaina le malumalu ma faapaiaina i le 1893.
2. Tapeneko Tuai
O le fausaga autu muamua na fausia i luga o le nofoaga o le Lotoa o le Malumalu o le uluai Tapeneko, lea na ta’ua mulimuli ane o le “Tapeneko Tuai” mo le avea ai ma se teuteuala mo le Tapeneko faaonaponei o loo latalata ane i ai. Sa fausia i le va o le 1851 ma le 1852 lea ua tu ai nei le Maota o Potopotoga. O Truman O. Angell, o le tusiata, na mamanuina le Tapeneko Tuai i puipui maualalalo, o se taualuga faatafatolu, ma se fola i lalo ifo o le maualuga o le eleele. Sa taulimaina e le fale le tusa ma le 2,500 tagata.
3. Tapeneko
O maatulimanu mo se Tapeneko fou e sui ai le Tapeneko Tuai sa faataatia ia Iulai 1864. Na mamanuina e William H. Folsom le fale, sa taitaia e Henry Grow lona fausaga, ma sa mamanuina e Truman O. Angell le faapaologa ina ua maea le fale. Sa taliina i le Tapeneko ni fonotaga masani e amata atu i le 1867 ma sa faapaiaina ia Oketopa 1875.
4. Maota o Faaeega Paia
Sa faapaiaina le Maota o Faaeega Paia i le aso 5 Me, 1855, e Heber C. Kimball mo faaeega paia mo e o soifua. Na faaigoaina e Polika Iaga o le Maota o le Alii ma sa manatu i ai o se malumalu le tumau. Mo le 34 tausaga, a o fausia isi malumalu, sa auauna atu le Maota o Faaeega Paia i le faitau afe o le Au Paia o Aso e Gata Ai. Sa toe aveesea ma tala i lalo i le 1889.
5. Maota o le Aufono
O le Maota o le Aufono sa avea ma laumua faalemalo o le Teritori o Iuta i le vaitau atoa o le 1850 ma o se fale o le pulega mo le Ekalesia i le va o le 1850 ma le 1883. Sa faaaogaina mulimuli i le 1888 a o le’i talaina i lalo. E silia ma le 2,000 le Au Paia o Aso e Gata Ai na maua faaeega paia i le fogafale i luga o le fale i le va o le 1851 ma le 1855.
6. Fale o Talafou a le Tesereta
O le Fale o Talafou a Tesereta sa muai fausia i le 1870 i le tulaga o loo i ai nei le Maota Faamanatu o Iosefa Samita ma sa i ai i le potu o talafou, ofisa, ma falelomitusi o le Deseret News, le nusipepa aupito leva i Iuta. O le uluai faasalalauga a le Ekalesia na faasalalauina i le 1922 mai se tama’i fale apa ma le leitio na faapipiiina i luga o le taualuga o lenei fale.
7. Lotoa o le Faleteuoloa ma le Sefuluai a Epikopo
O le Lotoa o le Faleteuoloa ma le Sefuluai a Epikopo sa avea ma vaega autu mo le aoina o le sefuluai, lea na tuuina atu i lea taimi e le Au Paia o Aso e Gata Ai e masani lava o ni foai agalelei o oloa tau faatoaga. E tele ni faaopoopoga na faia i le va o le 1860 ma le 1902, e aofia ai fale mo tagata malaga e le tagolima. Ina ua mavae le 1909, sa suia nei fausaga i ni fale o le lotoa mo le Iunivesite o le Au Paia o Aso e Gata Ai.
8. Fale o le Ofagapi, Fale Leona, ma Ofisa o le Pulega
O le Fale o le Ofagapi na uluai fausia i le 1855 o le maota autu o Polika Iaga i le Aai o Sate Leki ma sa avea foi ma maota o le Peresitene o le Ekalesia mai le 1898 i le 1918. I le va o le 1920 ma le 1959, sa faaaogaina ai e le Asosi o le Alualu i Luma o Tamaitai Talavou o se nofoaga mo tamaitai talavou, ma i le 1961 sa suia ai i se falemataaga. Sa fauina le Fale Leona i le 1856 o se fale mo avā a Polika Iaga ma mulimuli ane sa faaaogaina mo le pulega, aoga, ma fale nofotumau. O Ofisa o le Pulega, po o Ofisa o Peresitene, sa faaaogaina e taitai o le Ekalesia ma tagata faigaluega mai le 1853 i le 1917.
Popofou i le Ogatotonu o le Seneturi 20
9. Maota o Potopotoga
O le fausiaina o le Maota o Potopotoga na amata i le 1877 o se tapeneko mo le Siteki a Sate Leki. Ina ua maea i le 1882, sa avea o se nofoaga o faapotopotoga mo le Ekalesia, gaoioiga faaleagafesootai, ma faaleaoaoga.
10. Faaopoopoga o le Malumalu
Sa fausia le Faaopoopoga o le Malumalu i le 1893 e tuuina atu ai i tagata ulu o le malumalu ni nofoaga e faatalitali ai. I le 1960, o ona faapaologa eseese na suia e se fausaga o le faaopoopoga fou.
11. Ofisa o Faamatalaga ma le Falemataaga o Tesereta
O le Ofisa o Faamatalaga na muai fausia i le 1904 e auauna atu ai i tagata asiasi mai i le Lotoa o le Malumalu. Sa faalauteleina ina ia aofia ai le Falemataaga o Tesereta ma sa suia i le Nofoaga Autu mo Tagata Asiasi i Saute i le 1978.
12. Aoga a Sate Leki
Na uluai faavaeina o le Aoga a Sate Leki i le 1886, Kolisi o le Au Paia o Aso e Gata Ai—i se taimi mulimuli ane o le Iunivesite o le Au Paia o Aso e Gata Ai—na siitia atu i nofoaga eseese seia oo ina faamautu i le nofoaga o le Lotoa o le Malumalu i le 1901. Ina ua toe suia le nofoaga mo le aoga i le vaitau o le 1930 ma toe faaigoaina o le Kolisi Faapisinisi a le AAG, sa faaaoga e le Ekalesia potu e fai ma ofisa. O nei fale na tala i lalo i le 1962 e faaavanoa ai se avanoa mo le Maota o Ofisa o le Ekalesia.
13. Maota o le Epikopo
O le Maota o le Epikopo na maua ai le avanoa o le ofisa mo le Epikopo Pulefaamalumalu, Au Peresitene Aoao o le Aualofa, ma isi taitai o le Ekalesia mai le 1910 i le 1962.
14. Faletaalo o Tesereta
Na saunia e le Faletaalo o Tesereta ni fale mo gaoioiga faafiafia mai le 1910 i le 1962.
15. Faletalimalo o Iuta
Sa fausia le Faletalimalo o Iuta i lotoa o le Lotoa o le Sefuluai i le 1911 ma sa auauna atu o se faletalimalo tulaga maualuga o le aai o Sate Leki i le vaitau o le 1980. O le tele lava o le fale sa suia i le 1993 i ofisa o le pulega o le Ekalesia ma toe faaigoaina ai i le Maota Faamanatu o Iosefa Samita. O le tele o ona faleaiga ma fale ai sa faaauau pea o ni nofoaga mo tagata lautele.
16. Maota o le Pulega a le Ekalesia
Sa fausia le Maota o le Pulega a le Ekalesia i le 1917 ma tuuina i ai ofisa o le Peresitene o le Ekalesia ma isi taitai sinia. Sa fausiaina i le maamora lava lea e tasi e pei o fale o le Malumalu o Sate Leki ma le Maota Autu mo Konafesi.
17. Fale o Faifeautalai
O le Fale o Faifeautalai sa nonofo ai le sili atu ma le selau faifeautalai mo se polokalama faamasani ma aoaoga faamasani mo le vaiaso atoa. Sa tapunia i le 1960 a o faateleina aoaoga o gagana mo faifeautalai i iunivesite e lagolagoina e le Ekalesia.
Popofou o le Seneturi Lona 21
15. Maota Faamanatu o Iosefa Samita
Sa toe faafouina e le Ekalesia le Faletalimalo o Iuta e avea ma Maota Faamanatu o Iosefa Samita, o se fale o le ofisa e i ai vaega manaomia mo tagata asiasi ma tagata tafafao mai, e aofia ai faletetele e tali ai malo, auaunaga mo taumafataga, ma se fale tifaga.
18. Maota o le Aualofa
Sa fausia le Maota o le Aualofa i le 1956 e fai ai ofisa mo faalapotopotoga a ausilali, ma i le 1970 sa lagolagoina ai se nofoaga autu o punaoa mo tamaitai i le lalolagi atoa. Sa faaauau pea ona faaaoga e Au Peresitene Aoao o le Aualofa, Tamaitai Talavou, ma le Peraimeri le fale i le seneturi lona 21.
19. Maota o Ofisa o le Ekalesia
O le Maota o Ofisa o le Ekalesia e 28-fogafale sa fausiaina i le 1972 ma faapaiaina i le 1975 mo le lagolagoina o se aofaiga faatupulaia o matagaluega ma le au faigaluega a le Ekalesia.
20. Nofoaga Autu mo Konafesi
Ina ua maea lona faapaiaga i le 2000, sa suia e le Maota Autu mo Konafesi le Tapeneko i Sate Leki o se nofoaga autu mo le konafesi aoao. Mo se taimi, e na te lagolagoina ai le fale sili ona telē i le lalolagi e foliga i se ili, faatasi ai ma nofoa mo le silia ma le 21,000 tagata.
21. Falemataaga o Talafaasolopito o le Ekalesia
Na uluai fausia o le Falemataaga o Talafaasolopito ma Faatufugaga a le Ekalesia i le 1984, o le Falemataaga o Talafaasolopito o le Ekalesia o loo teuina ai faaaliga o uluai measina ma faatufugaga a le Au Paia o Aso e Gata Ai.
22. Potutusi o Talafaasolopito o Aiga
Na fausia i le 1985, ua saunia e le Potutusi o Talafaasolopito o Aiga ia auaunaga o sailiiliga o gafa ma faamaumauga mo tagata lautele.
Autu Fesootai: Vanu o Sate Leki, Malumalu o Sate Leki, Maota o Faaeega Paia, Public Relations, Broadcast Media