Faalauiloaga Kolomipiana o le 1893

Na talimalo le aai o Sikako, Ilinoi, i se faamanatuga faaleaganuu i le 1893 lea na faamatalaina e e na faamaopoopoina ma le autusitala iloga e faapea o se tasi lenei o mea sili na tupu o le seneturi na aofia ai tagata o aganuu eseese. Mo le ono masina, o le Faalauiloaga o Kolomipiana a le Lalolagi, lea na faamanatuina ai le lona 400 tausaga o le tulaueleele o Kolisitofa Kalamupasa i le atu Amerika, na lolofi mai ai le fia miliona o tagata asiasi mai le kelope i lona nofoaga e maila le lautele, silia ma le 200 fale, ma le faitau selau o faalauiloa, ma ni fonotaga tetele ma ni faatasiga faafiafia.

E silia ma le fitu afe tagata o le Au Paia o Aso e Gata Ai mai le Laueleele o Iuta na autovaa mai i ai i le faalauiloaga i le faamoemoe e avea ma sui auai, o lo latou talitonuga faalefaatuatuaga ma tu masani o le lotoifale, e fesoasoani e aveesea ai le faailoga tagata sa i ai, ma talosagaina le avea ai ma setete.¹ O lo latou auai i le gasologa o mea na tutupu iina na aumaia ai le faamaoniga fiafia a e na auai, taui o faalauiloaga, ma se tauleleia i mata o le au tusitala i se taimi o le matamataita faasaga i le Au Paia, o e na tautino atu i le na’o le tolu tausaga talu ai e faamutaina le faatinoga o faaipoipoga toatele.² O le tulaga tauleleia na latou mauaina na faaosofia ai taitai o le Ekalesia ma tagata o le au paia e faatupula’ia a latou taumafaiga faaleva-i-fafo ma le fausia o fesootaiga lelei i le lautele o le lotoifale o alalafaga.³

I le lua tausaga a o lumanai le faalauiloaga, na malo ai le palemene o Iuta i le tauofoga mai le Faalauiloaga e fau se “Fale o Iuta” i luga o le nofoaga o le faalauiloaga ma taulima a latou lava mea e faalauiloa. Na tofia e le palemene se komisi na tusia le ata o le fale ma nai mea e faalauiloa e faailoa atu ai faalauiloa a Iuta, faalefaatoaga, faalemaina, mea gaosi, faatufugaga, o elieliga, faaleaoaoga, galuega faatino a tamaitai.⁴

tagata o siomia ai le faatagata o Polika Iaga

O tagata na auai o loo pu’eina se ata faataaliolio i e faatagata o Polika Iaga i luma o le Fale o Iuta i le Faalauiloaga a le Lalolagi o le 1893.

Faaopoopo atu i mea na fausia e faalauiloa, sa auai Au Paia o Aso e Gata Ai i fonotele o mea na tutupu ma tauvaga. O taitai mai le Aualofa, Tamaitai Talavou o le Mafutaga o le Alualu i Luma, ma Mafutaga a le Peraimeri na auai atu i le Konekaresi a le Lalolagi o Sui Tamaitai, lea sa latou feiloai ai i fonotele faatasi ma mafutaga iloga a tamaitai, e aofia ai le Fono Tele a Tamaitai o le Iunaite Setete.⁵ I le maea ai o se tasi o fonotaga, na faia ai ni saunoaga e lei fuafuaina a taitai mo aia a tamaitai e palota ai, sa faaalia ai le viia o galuega a tamaitai o le Au Paia o Aso e Gata Ai, ma mulimuli ane filifilia ai Emeline B. Uele, o le failautusi aoao o le Aualofa ma le faatonu o le Fautua a Tamaitai, o se tasi o peresitene faamamaluina e toalua o fonotaga.⁶ Sa atia’e e Uele ma isi tamaitai o le Au Paia o Aso e Gata Ai ni sootaga tumau faatasi ma isi taitai tamaitai.

O se tauvaga a aufaipese logologoa na valaaulia ai le Aufaipese a le Tapeneko e auai, ma e ui na muamua iai le faalotolotolua, ae na filifilia ai e Eveni Setefano, o le faatonu se 250 o le 400 o le aufaipese volenitia e pepese i Sikako.⁷ Sa faatulaga e le aufaipese ni faafiafiaga faagasolo atu i le ala o nofoaafi e sailia ai seleni mo le malaga faapea mea e nonofo ai, o se faatulagaga mo malaga faakonaseti na mulimuli ane ai. I luma o se faapotopotoga e 10 afe, na usuina ai e le Aufaipese ni pese filifilia mo le tauvaga o leo tuufaatasi, lea na tauia ai latou i le tulaga lua o le pine siliva. Na viia e le autusitala nusipepa le faaaliga aemaise lava le tomai faafaatonu o Setefano ma le faatinoga logomalie faapolofesa a le vaega volenitia uma. E lei umi lava mulimuli ane i le maea ai o le tauvaga, na pepese ai le Aufaipese i le sauniga e faapaia ai le Logo o le Saolotoga i Sikako. O le lagiina e le Aufaipese o le vii o le atunuu na faasimaina ai lona talatuu o se vaega pepese iloga o viiga lotonu’u.⁸

Aufaipese a le Tapeneko o loo faafiafia

O le Aufaipese a le Tapeneko o loo faafiafia i le Falefaafiafia, Sikako, 1893.

O se tasi o mea aupito tele na tupu o le Palemene o Talitonuga Faalelotu a le Lalolagi, o se fonotele na talimalo i sui mai le 10 o talitonuga faalelotu tumasani: Konafisiani, Tao, Sinito, Hinitu, Puta, Taini, Soroasitiani, Iuta, Kerisiano, ma Isalama. E ui na faamatalaina e le fonotele ia lava e auai uma le kelope, e toatele vaega, e aofia ai Tagata Amerika e tupuga mai Aferika, Amerika Latina, Initia Amerika, ma isi malo o tagatanuu, sa tau leai ni isi na sui mai ai, ma sa lei aofia ai le Au Paia o Aso e Gata Ai. I le maea ai o ni taumafaiga malosi e faaauai, na maua se valaaulia e B.H. Roberts, o le Fitugafulu e saunoa, a e na toe tofia i le gasologa o le fonotaga i se nofoaga itiiti.⁹ I le mavae ai ona teena e e na talimalo le talosaga a Robert e saunoa atu i le faalapotopotoga tele, na faamaui ese mai ai e Robert ia lava. Ae, sa ia faatasi ai ma le Au Peresitene Sili, i fonotaga ma faafofoga ai i taitai o talitonuga faalelotu mai le salafa o le lalolagi, o ni isi o a latou tumasani faatoa latou faalogo i ai mo le taimi muamua. O le Peresitene o le Ekalesia o Uilifoti Uitilafi, o lona fesoasoani muamua o George Q. Cannon, ma isi o e na auai na tu’ua le Palemene ma se faaaloalo loloto mo talitonuga faalelotu o le lalolagi ma faafetaia ni isi o mataupu iloga e talitutusa ma aoaoga a Iesu Keriso.¹⁰

I le gasologa o le Faalauiloaga, na faafiafiaina ai e le Fale o Iuta tagata asiasi atu ma maua se taulaiga lelei mai komiti o taui ma le toatele o le autusitala. O le faamanuiaina o faalauiloaga a Iuta, mea na tutupu o fonotaga, ma faafiafiaga a le aufaipese, na tuua ai e le toatele o le Au Paia o Aso e Gata Ai ua uunaia ma naunautai e faalautele a latou fesootaiga faaleva-i-fafo i le toefoi atu ai i le Aai o Sate Leki. Ua amata e taitai ma tagata o le Ekalesia ona talanoa i tulaga o le faaaloalogia o tulaga faatauaina o aiga ma le lautele o isi vaega o talitonuga tautapuaiga. Ua faaauau e le Ekalesia ona auai i isi Faalauiloaga tetele a le Lalolagi na mulimuli mai e oo atu i le seneturi lona 21.¹¹

Lisi o Tusi

• Reid L. Neilson, Exhibiting Mormonism: The Latter-day Saints and the 1893 Chicago World’s Fair (New York: Oxford University Press, 2011).

• Reid L. Neilson, “Mormonism’s Blacksmith Orator: B. H. Roberts at the 1893 World’s Parliament of Religions,” Mormon Historical Studies, vol. 12, nu. 1 (2011), 53–84.

• Edwin A. McDaniel, Utah at the World’s Columbian Exposition (Aai o Sate Leki: Salt Lake Lithographing, 1894).

• Norman Bolotin and Christine Laing, The World’s Columbian Exposition: The Chicago World’s Fair of 1893 (Urbana: University of Illinois Press, 1992).

Autu Fesootai: Iuta, Women’s Suffrage, Tabernacle Choir, Emmeline B. Wells, B. H. Roberts

Faamatalaga

1. Tagai Autu: Iuta

2. Tagai i le Autu: Manifeso

3. Reid L. Neilson, Exhibiting Mormonism: The Latter-day Saints and the 1893 Chicago World’s Fair (New York: Oxford University Press, 2011), 7–8.

4. Neilson, Exhibiting Mormonism, 60.

5. Tagai i le Autu: Relief Society, Young Women Organizations, Primary, Retrenchment, Women’s Suffrage.

6. Tagai i le Autu: Emmeline B. Wells.

7. Tagai i le Autu: Tabernacle Choir.

8. Neilson, Exhibiting Mormonism, 117–37.

9. Tagai i le Autu: B. H. Roberts.

10. Neilson, Exhibiting Mormonism, 172; Reid L. Neilson, “Joseph Smith and Nineteenth-Century Mormon Mappings of Asian Religions,” in Reid L. Neilson and Terryl L. Givens, eds., Joseph Smith Jr.: Reappraisals after Two Centuries (New York: Oxford University Press, 2009), 216–20; tagai foi i Autu: Wilford Woodruff, George Q. Cannon.

11. Tagai Neilson, Exhibiting Mormonism; J. B. Haws, The Mormon Image in the American Mind: Fifty Years of Public Perception (New York: Oxford University Press, 2013), 23–25.