O Maa Vaai

Mo le faitau afe o tausaga, e toatele tagata i le lalolagi atoa ua taliaina le manatu e faapea, o meafaitino e mafai ona faaaogaina mo faamoemoega paia. Ua faamautu mai e le Tusi Paia, sa galue le Atua e ala i nei meafaitino e pei o le tootoo o Arona, o se gata apamemea, ma le atolaau o le feagaiga. Sa faamaloloina mulimuli ane e Iesu se tamaloa tauaso e ala i le niniina o feanuga i mata o le tamaloa.¹

Ua faamatalaina e le Tusi a Mamona se faamoemoega paia mo maa na atofaina faapitoa. I se tasi o fuaitau, sa ole atu ai le uso o Iareto i le Alii ia papai i tamai maa e 16, ia na “papae ma manino ... e pei lava o le tioata manino” (Eteru 3:1). Ina ua uma ona papai le tamatamaiaao o le Alii i maa, sa latou tuuina atu le malamalama mo sa Iareto a o latou faimalaga e sopoia le vasa. O loo tautala foi se isi fuaiupu e uiga i maa paia ia “faamalamalama atu e nei maa o i mata o tagata mea o le a e tusia” (Eteru 3:24).

I aso o Iosefa Samita, sa fai mai ai nisi o tagata sa ia i latou se meaalofa o le “vaai,” pe maua ni savali faalelagi pe e le mai le olaga nei, e ala i maa vaai. O nei talitonuga sa sau mai le Tusi Paia ma mai tu ma aga faaEuropa lea na aumaia i Amerika anamua e tagata fai mai. Sa taliaina e Iosefa Samita ma lona aiga nei talitonuga, ma sa i ai taimi sa faaaogaina ai e Iosefa ia maa sa ia mauaina i le eleele e fesoasoani ai i tuaoi e sue ni meafaitino na leiloloa pe sailia ai ni oa na tanumia.²

o le maa e mamanu o se lio laumiumi

O le maa vaai e anaina e Iosefa Samita.

Ina ua maua e Iosefa Samita ia papatusi auro i le 1827, sa ia mauaina ai foi se meafaigaluega faaliliu faatasi ma papatusi, “ni maa e lua i totonu o ni faavaa siliva” sa faaaogaina e “‘tagatavāai’ i aso anamua po o taimi ua mavae” (Iosefa Samita—Talafaasolopito 1:35). O lenei mea faigaluega sa taua i totonu o le Tusi a Mamona o “faaliliu upu.” I le taimi o le faaliliuga o le Tusi a Mamona, sa faapea ona faaaoga ai e Iosefa Samita ia mea faigaluega uma e lua—o faaliliu upu ma lana maa vaai—sa fesuisuiai lava. Sa latou galulue i le tele lava o le auala e tasi, ma o nisi taimi sa faaaogaina e le uluai Au Paia le faaupuga “Urima ma le Tumema” e faatatau atu i maa vaai faapea foi i faaliliu upu. Sa maua foi e le Perofeta nisi o faaaliga o loo maua i aso nei i le Mataupu Faavae ma Feagaiga e ala i nei meafaigaluega o faaaliga.³ Ao faasolo ina masani lelei Iosefa i mataupu faaleagaga, sa iu ina amata ona ia maua ia faaaliga e aunoa ma nei fesoasoaniga.⁴

Punaoa o le Ekalesia

“Book of Mormon Translation,” Gospel Topics, topics.lds.org.

 E. Turley, Robin E. Jensen, ma Mark Ashurst-McGee, “Joseph the Seer,”Ensign, Oke. 2015, 48–55.

“Seer stone,” josephsmithpapers.org.

Autu e Faatatau i Ai: Faaliliuga o le Tusi a Mamona, O Le Sailiga o Oa, O Le Faamasinoga o Iosefa Samita i le 1826

Faamatalaga

1. Esoto 8:5–6, 16–17; Numera 21:9; 1 Samuelu 4:3–6; Ioane 9:6.

2. Richard E. Turley, Robin E. Jensen, ma Mark Ashurst-McGee, “Joseph the Seer,”Ensign, Oket. 2015, 51.

3. James R. B. Vancleave, tusi ia Iosefa Samita III i le Lyndon W. Cook, ed., David Whitmer Interviews: A Restoration Witness (Orem, Utah: Grandin Book, 1991), 239–40.

4. I le amataga o le tautotoga o le 1830, na tuuina atu ai e Iosefa ia Oliva Kaotui le maa vaai e faaaogaina i le faaliliuga o le Tusi a Mamona. O Fineaso Iaga, o le sa fesoasoani e toe faatasia Oliva Kaotui ma le Ekalesia i le faaiuga o le vaitau o le 1840, sa ia aumaia le maa mai le faletua o Kaotui, ma o lea sa ia tuuina atu ai i lona uso o Polika Iaga. Ina ua maliu Polika Iaga, sa aumai e se tasi o ona faletua o Zina D. H. Young, se maa vaai e lanu sukalati mai lona fale na fetaui ona faamatalaga ma le maa sa faaaogaina e Iosefa e faaliliu ai le Tusi a Mamona, ma sa ia foaiina atu i le Ekalesia (tagai Richard E. Turley Jr., Robin S. Jensen, and Mark Ashurst-McGee, “Joseph the Seer,” Ensign, Oke. 2015, 53).