“O Lautusi Tusitusia o le Tusi a Mamona na Leiloloa,” O Autu o le Talafaasolopito o le Ekalesia
“O Lautusi Tusitusia o le Tusi a Mamona na Leiloloa”
O Lautusi Tusitusia o le Tusi a Mamona na Leiloloa
Ia Iuni 1828, na faatagaina ai ma le musua e Iosefa Samita lana tusiupu o Matini Harisi e ave ia itulau e 116 o uluai tusitusiga o le Tusi a Mamona ona toe faafoi ane ai lea. Sa folafola atu e Harisi e puipuia ia itulau ma o le a na o ni tagata patino lava o le aiga e faaali i ai, peitai e lei pine ae leiloloa atu ia itulau ma e lei toe maua lava. Sa sailia e Iosefa se taitaiga mai le lagi pe faapefea ona faaauau le faaliliuga o loo totoe ma sa ia aoaoina e ala mai i se faaaliga le auala e faamaea ai le faaliliuga o le Tusi a Mamona e aunoa ma le toe faia o le anotusi sa i ai i le tusitusiga ua leiloloa.1
O se mea itiiti o loo iloa e uiga i anotusi o lautusi tusitusia na leiloloa na aumai mai ia Iosefa Samita ma le perofeta o le Tusi a Mamona o Nifae. Na tusia e Iosefa e faapea o itulau na leiloloa o loo i ai le tusi a Liae. E faapei o le tele o le Tusi a Mmona, o le talafaamaumau a Liae o se tuufaatasiga na faia e le perofeta o Mamona o mea sa ta’ua e Iosefa o papatusi a Liae. Sa faamalamalama mai e le atalii o Liae o Nifae e faapea, o lenei talafaamaumau o loo i ai tala o miti a Liae, faaaliga na vaaia, valoaga, ma aoaoga i lana fanau. Na tuufaatasia ma faapupuu e Nifae ia talafaamaumau a Liae a o lei fatuina lana lava talafaasolopito.2 E tusa ai ma nisi o sikola, o le faapuupuuga a Nifae e aofia ai uluai mataupu o le Tusi a Mamona. O isi na taumatemate faapea o lautusi na leiloloa e le gata ina i ai le tusi a Liae ae faapea foi anomea na tusia e isi, atonu o Mamona po o se tasi sa ola i se taimi i le va o Liae ma le Tupu o Peniamina.3
I le taimi na leiloloa ai lautusi tusitusia, e lei iloa e Iosefa Samita ma Matini Harisi le faapuupuuga na faia e Nifae. O le taunuuga, ina ua iloa e Iosefa ua leiloloa ia Harisi ia lautusi tusitusia, sa mafaufau Iosefa ua ia toilalo i lona tiute paia. E lei toe faaauauina e Iosefa le faaliliuga mo le tusa ma le iva masina. Mulimuli ane, ina ua lata ina la taunuu ma lana tusiupu fou o Oliva Kaotui i le faaiuga o le talafaamaumau, sa ole atu Iosefa mo se faaaliga pe toe faaliliu ia itulau na leiloloa. O le faaaliga (tagai Mataupu Faavae ma Feagaiga 10) na faapea mai o papatusi a Nifae o loo i ai se tala e tai pei o le tusi a Liae ae e tele ina taulai atu i le talafaasolopito faaleagaga o le aiga o Liae. Na aoaoina e Iosefa e faapea e tatau ona ia faaliliuina ia papatusi a Nifae seia taunuu i le mea na maea ai ia lautusi tusitusia na leiloloa.4 Na faasa mai foi i le faaaliga ia Iosefa ona toe faaliliuina le tusi a Liae ma sa lapataia o ia e uiga i fili o loo i ai lautusi tusitusia ua leiloloa, o e e ono taumafai e fesuiai ia mea o tusia ai, ona faalumaina lea o le lomiga o le a lomia o le Tusi a Mamona. Sa matuai popole tele Iosefa e uiga i le avanoa e ono mafai ai ona fesuiai le tusitusiga ma o lea i le faatomuaga o le Tusi a Mamona, sa ia lapataia ai le au taupulepule leaga ia le teenaina le galuega a le Atua. E leai se tasi na sau i luma ma lautusi tusitusia na leiloloa.5
O Autu e Fesootai I Ai: Book of Mormon Translation