Heber J. Grant

O Heber J. Grant o le Peresitene lona fitu o Le Ekalesia a Iesu Keriso o le Au Paia o Aso e Gata Ai. Na soifua mai i le Aai o Sate Leki i le 1856, na tausia Grant e lona tina, o Rachael Ridgeway Ivins Grant, ina ua maliu lona tamā, o Jedediah Grant (o se fesoasoani ia Polika Iaga) ae faatoa na o ni nai aso le matua o Heber. Na valaauina Heber e avea ma se peresitene o le siteki i le 23 o ona tausaga ma faauuina o se Aposetolo i le lua tausaga mulimuli ane. I le aluga o le 36 tausaga o le auaunaga faaaposetolo, sa ia galue faatasi ai ma Tagatanuu o Amerika, ma faauuina le toatele o ni taitai perisitua; faatulagaina ma pulefaamalumalu i le misiona muamua i Iapani; ma pulefaamalumalu i misiona a Peretania ma Europa. O se tasi o mea iloga na tupu i lana auaunaga faaaposetolo na oo mai i le 1893, ina ua ia sailia le fesoasoani faalelagi mamana e faamautu ai ni nonogatupe e faasaoina ai le Ekalesia. I lena taimi, sa i ai pea le Ekalesia i ni faaletonu o mea tautupe mai aafiaga o tulafono e tetee i autaunonofo ma tupe teu faafaigaluegaina lē manuia; o taumafaiga a Grant na puipuia ai le Ekalesia mai le faaletonu o mea tautupe i le taimi o se faalavelave tau i le tamaoaiga i le atunuu atoa.¹ I le avea ai ma se Aposetolo ma mulimuli ane o se peresitene o le Ekalesia, na faamamafa atu e Grant le tausia o le Upu o le Poto ma folafola atu o le usiusitai ma le faamaoni i ai o le a aumaia ai i le Au Paia o Aso e Gata Ai le malamalama ma le molimau sili atu.

atatosi o Elder Heber J. Grant

Atatosi o Elder Heber J. Grant.

O se itu iloga o le soifuaga ma le galuega a Grant o lona tuuto atu lea i le Upu o le Poto. O lona talitonuga maumaututu na pogai mai i lona aafiaga a o avea ma se alii talavou i se taimi sa lei matuai faamamafaina ai le tausia lelei o le Upu o le Poto i le Ekalesia. Sa sailia e Heber se aiaiga faavae o le inisiua o le olaga ina ia mautinoa ai o le a tausia lona tina pe afai e maliu laitiiti o ia, e pei o lona tama. Ina ua faafitia e le au fai inisiua le aiaiga faavae o se inisiua ona o lona tino vale, sa faatonuina e lana fomai ni “ipu pia e fa i aso taitasi” e fesoasoani ia te ia e faaopopo ai le mamafa. Sa le‘i umi ae avea lena faiga o se mausa. I le naunau ai e mulimuli i le fautuaga a le Upu o le Poto “inisiua po o le leai o se inisiua,” sa ia le toe inu ai ma tuu faiga faapisinisi ma faleoloa ma fale pia. Mai lena taimi agai i luma, sa taulamua ai o ia i le lagolagoina o le Upu o le Poto i tagata faigaluega, uo, ma uso a tagata o le Ekalesia. I le vaitaimi o le tapu, sa ia saunoa soo ai e uiga i faamanuiaga folafolaina i le Upu o le Poto ma uunaia isi ia aloese mai le tapaa ma le ava malosi. Mulimuli ane i le avea ai ma Peresitene o le Ekalesia, sa ia faia ai le le toe faaaogaina o ava malosi o se vaega o le mauaina o se pepa faataga o le malumalu ma uunaia ai mo le faasaina.²

I le avea ai ma le Peresitene o le Ekalesia mai le 1918 i le 1945, na vaaia ai e Heber J. Grant le faalauteleina o le Ekalesia i fafo atu o eria e toatele ai le Au Paia o Aso e Gata Ai e faasolo atu i Mauga Papa. Na ia faamautinoa atu i le Au Paia, o le malaga ese mai nofoaga autu o potopotoga o le seneturi lona 19 na fetaui lelei lava ma aoaoga a le Ekalesia, ma i le 1923 na ia faatulagaina ai le Siteki o Los Angeles, o le siteki muamua lea i se aai na toalaiti ai le Au Paia o Aso e Gata Ai. Na faapaiaina e Grant malumalu i Laie, Hawaii; Cardston, Alberta, Kanata; ma Mesa, Arisona. Na ia vaaia foi le faatuina o inisitituti o mataupu faalelotu, o se polokalama o aoaoga o mataupu faalelotu mo le Au Paia o Aso e Gata Ai o loo auai i kolisi ma iunivesite, ma isi taumafaiga e faamalolosia tagata o le Ekalesia ao latou aooga, faigaluega, ma aumau i le salafa o le lalolagi.

Ao taitaia e Grant le Ekalesia, na toatele tagata o le ekalesia na puapuagatia i mea tautupe ona o le Pau Tele o le Tamaoaiga. I le mavae ai o le faataitaia o ni nai auala eseese e fesoasoani ai i tagata o le ekalesia ia sao mai le umi o le faaletonu o le tamaoaiga, na faatulaga ai e le Au Peresitene Sili le Fuafuaga o le Saogalemu o le Ekalesia, lea na taua mulimuli ane o le polokalama o le uelefea a le Ekalesia, e faatelevave ai taumafaiga a le Ekalesia i le tau tuumamaina o le pagatia i tulaga o le tamaoaiga.

Mo nisi faamatalaga e uiga i mea na tutupu ma autu i le soifuaga o Heber J. Grant, tagai i vitio O Perofeta o le Toefuataiga i le history.ChurchofJesusChrist.org

Punaoa o le Ekalesia

Aoaoga a Peresitene o le Ekalesia: Heber J. Grant(2002).

Heber J. Grant, faaaliga faatekinolosi, talafaasolopito. ChurchofJesusChrist.org.

Jed Woodworth, “The Word of Wisdom: MF&F 89,” i le Matthew McBride and James Goldberg,eds., Revelations in Context: The Stories behind the Sections of the Doctrine and Covenants (Aai o Sate Leki: O Le Ekalesia a Iesu Keriso o le Au Paia o Aso e Gata Ai, 2016), 183–191.

Sherrie Mills Johnson, “Heber J. Grant: O Se Perofeta mo Taimi Faigata,” Liahona, Ian. 2004, 57–61.

Lisi o Tusi

O lomiga nei o loo tuuina atu nisi faamatalaga e uiga i lenei autu. I le faasinoina po o le fesootaiina o oe i nei punaoa, matou te le lagolagoina pe faʻamaonia mea o loʻo i ai po o manatu o tusitala.

Ronald W. Walker, Qualities That Count: Heber J. Grant as Businessman, Missionary, and Apostle (Provo, Utah: Brigham Young University Press, 2004).

Francis M. Gibbons, Heber J. Grant: Man of Steel, Prophet of God (Salt Lake City: Deseret Book, 1979).

Ronald W. Walker, “Grant, Heber J.,” i le Encyclopedia of Mormonism, 4 vols. (New York: MacMillan, 1992), 2:564–68.

Autu Fesootai: Upu o le Poto (MF&F 89), Iapani, Prohibition

Faamatalaga

1. Tagai i le Autu: Antipolygamy Legislation.

2. Ronald W. Walker, Qualities That Count: Heber J. Grant as Businessman, Missionary, and Apostle (Provo: BYU Studies, 2004), 51–54. Tagai Autu: Prohibition.