Iosefa Samita le Itiiti

O Iosefa Samita le Itiiti o le perofeta faavae ma le uluai Peresitene o Le Ekalesia a Iesu Keriso o le Au Paia o Aso e Gata Ai. I le va o lona fanau mai i totonu o se aiga lima vaivai i Vermont i le 1805, ma lona maliu i lima o se au faatupufaalavelave mai Ilinoi i le 1844, na lomia ai e Iosefa ni tusitusiga paia e tele, faavaeina ma faatulagaina aai, maua faaaliga na toefuataiina mai ai upu moni taua e uiga i le Atua ma le tagata, ma faatuina le Ekalesia toefuataiina a Iesu Keriso i lalo o le taitaiga a le Alii ma i luga o le pule na ia maua mai avefeau paia.

Atatosi o Iosefa Samita na saunia e Dan Weggeland.

Olaga Talavou

O le au Samita o se aiga vavalalata le mafutaga o au faifaatoaga nofo lisi o e na avea a latou mafatiaga tautupe ma mea na siitia soo ai. Sa nofo Iosefa i ni taulaga eseese se lima i Egelani Fou i luma mai o le 1816, le “tausaga na aunoa ma se tau mafanafana,” lea na lavea ai i taumalulu na faatuai mai. O le fia aai na iu ina o ese ai lona aiga mai i lea itu ma o atu i setete pito i luga o Niu Ioka lea na lauiloa, talu ai le tele o faigalotu toefaaolaola, o le “itu ua mu.”

E ui o i latou o ni tagata faamaoni ma le galulue malosi, o talafaamaumau mai i nisi o tuaoi o le au Samita na faapea ai sa lei taliaina atoatoa lelei le aiga i lo latou nuu fou. I ona muai tausaga i Niu Ioka, o le talavou o Iosefa Samita na faamafanafanaina i le filemu na ia vaaia i le natura ae na faapopoleina i le fefinauaiga na ia vaaia i tagata, maofa i le agalelei o le Atua ae le mautonu i ona lava vaivaiga.

Sa tosina atu Iosefa le alii talavou i le FaaKerisiano o le Feagaiga Fou, ae na le mautonu o ia i lotu faatautava i ona taimi. I le sailia ai o le faamagaloga ma le manao ia iloa le ekalesia e auai ai, na alu ai Iosefa i le vao e tatalo i se tasi taeao i le tau totogo o le 1820. I se togavao e lata ane i le faatoaga a lona aiga, na ia maua ai se faaaliga faavavega lea na faaali mai ai le Atua le Tama ma Iesu Keriso ia te ia i se afi faaniutu. O lenei aafiaga na ta’ua mulimuli ane o le Uluai Faaaliga.

Faavaeina o se Ekalesia

E vaai le Au Paia o Aso e Gata Ai i le Uluai Faaaliga o le amataga o le valaauga faaperofeta o Iosefa e ui sa ia le taumafai e talai atu pe maua ni tagata liliu i lena taimi. O ana tapenapenaga e faatuina se ekalesia na amata lelei i le tolu tausaga mulimuli ane, ina ua faaali i ai se agelu e igoa ia Moronae ia te ia i se tasi po ma tau i ai se faamaumauga natia na i ai le talafaasolopito paia o se nuu anamua FaaAmerika. E lei leva talu ona faaipoipo atu Iosefa ia Ema Hale i le 1827, ae faatuatuaina e le agelu avefeau Iosefa i papatusi, lea na ia faaliliuina i le mana o le Atua. Ina ua mavae le faaliliuina, na lomia e Iosefa le Tusi a Mamona, o se tuufaatasiga o tusitusiga paia anamua e pei o le Tusi Paia.

Mai le amataga, o le Tusi a Mamona na tosina mai ai tagata liliu ma faaosoina ai le faatuiese matautia. E lei pine ae feagai Iosefa ma ni fili tau lotu, o e na vaai i le i ai o se tusi paia faaopoopo o se mea e le mafai ona taliaina, ma ni fili fai manatu, o e na vaai i le tala faavavega o le faaliliuga o le tusi o se faiga faataulaitu matautia. Ae o le toatele o nisi na matua ootia i o latou feagai ai ma le tusi i le tatalo ma amata ona gauai atu i ona aoaoga.

Ao latalata ina faamaeaina le galuega i le Tusi a Mamona, na faatonuina e le Alii Iosefa Samita ia faatulagaina aloaia se ekalesia. O lea ekalesia, sa faavaeina i le aso 6 o Aperila, 1830, sa faavaeina i luga o le Tusi Paia, le Tusi a Mamona, faaaliga faifaipea, meaalofa faaleagaga mai le Atua, ma le toefuataiina o le pule o le perisitua mai anamua. I e na mulimuli i lea faatuatuaga, e tele atu mea sa tutupu nai lo le na ona faavaeina o se isi ekalesia: ua toe tuufatasia e le Atua Isaraelu na faataapeapeina, faataunuuina o feagaiga na faia i se taimi ua leva. Na musuia i valoaga a le Tusi a Mamona i tagatanuu o Amerika, e lei leva ae auina atu e Iosefa ni faifeautalai se toafa i se malaga e 1,500-maila le mamao e talai atu i nuu Initia i le itu i sisifo o le Vaitafe o Misisipi. O e na liliu mai i luga o le ala na iu i le faavaeina o paranesi a le ekalesia i Niu Ioka, Ohaio, ma Misuri.

Faaaliga

O Iosefa Samita, i le na o le 24 tausaga le matua ina ua faatulagaina le Ekalesia ma ua malamalama lelei i ona vaivaiga, sa masani ona saili atu mo le taitaiga faalelagi mo le Ekalesia faatoa faavaeina ma ona tagata auai. O le taitaiga na ia mauaina sa faamaumauina ma sa lomia mulimuli ane i se tusi o faaaliga, ua faaigoaina o le Mataupu Faavae ma Feagaiga. O ia faaaliga na faatonuina ai tagata o le Ekalesia e faapotopoto i Katelani, Ohaio, ma saunia ai mo le fausiaina o se aai e igoa ia Siona i Misuri i sisifo lea o le a mapu ai ma filemu e “mama i le loto”. O Siona sa tatau ona amiotonu: o le mativa o le a aveesea ma o le a manumalo le lelei. O Siona foi sa tatau ona matagofie: ma o le faatufugaga, aoaoga, ma le faalelotu o le a uluola faatasi. Na siitia atu Iosefa i Ohaio, ma muai amataina se polokalama faaletamaoaiga e faavae i luga o faaaliga na ia mauaina, ona ia malaga lea i Misuri e faataatia le maa tulimanu mo le uluai malumalu muamua na fuafuaina a le Ekalesia.

I uluai tausaga o le 1830, na aoaoina mai ai e faaaliga a le Alii ia Iosefa Samita se vaaiga lautele o le malo o le Atua i le olaga i tua atu o le oti na le o gatasi ma le aoaoga masani faaKerisiano o le vaevaeina o le lagi ma seoli; faatuina se Aoga a Perofeta, mo aoaoga faalelotu faapea ma le faalelalolagi; ma amataina se tu faasoifuamaloloina e taua o le “Upu o le Poto” lea na folafola mai ai foi faamanuiaga faaleagaga ia i latou e usitaia. O Iosefa ma ona fesoasoani na tusiaina foi se fuafuaga mo le aai o Siona, lea na i ai sona aafiaga tele i aai mulimuli ane i Amerika i Sisifo.

Ae o le fiafia o Iosefa e galue agai i Siona sa o lua ma faafitauli faaletagata lava ia ma faalenuu. O le toafa o le fanau a Iosefa ma Ema muamua e toalima na maliliu ao pepe meamea. Ma i Ohaio faapea ma Misuri, o faiga faatautee agai i le Ekalesia na oo i sauaga. I Ohaio, na valitaina ma faafulumoaina ai e fili ia Iosefa. I Misuri, o le inoino agai i le tuputupu ae o le Ekalesia, faatasi ai ma le fefefe i le vaai alofa o Mamona i pologa ma Initia Amerika, na uunaia ai au faatupu faalavelave e tuliesea tagata o le Ekalesia mai le Itumalo o Siakisone. O le leiloa ai o le nofoaga na fuafua mo Siona sa tiga tele ia Iosefa, o le na tele ni taumafaiga e toe faafoisia le Au Paia i Misuri i o latou fale. O manatu faapolokiki o Iosefa na iu ina tupuga mai i le I.S. O le folafolaga a le tulafono e puipuia tamai lotu ma le le mafai ai ona tausia e le malo o Amerika lena folafolaga.

Ao faamautu tagata o le Ekalesia i Misuri i luga o fanua le tumau i le ogatotonu o le 1830, na tinou Iosefa i le fausiaina o le Ekalesia i Katelani. Na ia faauuina aposetolo e toasefululua, lomia se aofaiga o faaaliga na tuuina mai e le Alii ia te ia, ma faamaeaina ma faapaiaina le malumalu muamua, po o le Maota o le Alii. O le faatumulia i le faaleagaga i le faapaiaga o le malumalu na aofia ai le faaali mai o Iesu Keriso ma le toe foi mai o le perofeta o Elia e faataunuuina le valoaga faaletusipaia.

Mafatiaga ma Faafitauli

O tau o le fausiaina o le malumalu, toesea o mea i Misuri, ma le malaga atu i Katelani na tuuina atu ai se avega mamafa tautupe i luga o le Ekalesia. I le 1837, na taumafai ai Iosefa ma nisi e faaleleia le tulaga o le tamaoaiga e ala i le faatuina o se faalapotopotoga tautupe e toatele faisea laiti nai lo o le laiti o faisea maumea e pei ona faalagolago i ai le tele o faletupe. O le naunau fiafia mo le galuega faatino sa maualuga, ae na le manuia le faalapotopotoga mulimuli ane i lena tausaga ao i ai le atunuu i se mafatiaga tautupe, na faanoanoa ai Iosefa ma le toatele i le nuu.

I lea taimi faigata, na auina atu ai e Iosefa faifeautalai muamua a le Au Paia o Aso e Gata Ai i Europa ma siitia atu le nofoaga autu o le Ekalesia i Misuri. Ae ina ua siitia atu le Au Paia iina i fainumera tetele, na faateleina ai le fefefe o tagata o le lotoifale i faatosinaga faaMamona. I le Aso Palota i le 1838, sa faaogaina ai auala faamalosi e tagatanuu o se tasi o itumalo i Misuri e taofia i latou mai le palota, ma na pasia e tagatanuu o se isi itumalo se tulafono e tuliesea ai Mamona o le nuu. Na sosoo ai ma sauaga faalauaitele e faasaga i le Au Paia, ma o a latou taumafaiga e puipuia i latou lava na faaaogaina o se mau e faamaonia ai se “faatonuga faaumatia” e le kovana o Misuri.

Ao taumafai e tausia le filemu ma le autau a le setete, na taofia ai Iosefa ma iu ina faasala ai i le oti. Ua nao le faatuiese faaaliali a se leoleo o le autau e faasaga i le faatonuga faaumatia na laveaiina ai lona ola. E ui e lei fasiotia, na faaauau pea ona faafalepuipuiina Iosefa e oo atu i le taumalulu o le 1838-39 ao tuliesea faamalosi lona toalua, fanau laiti e toa fa, ma tagata o le Ekalesia mai Misuri i luga o le Vaitafe aisa o Misisipi. O lana tusi faavauvau ia Mati i le 1839 mai le Falepuipui o Liperate o loo tumau pea ona aafiaga i Au Paia i ona aoaoga musuia e uiga i mafatiaga, le sa’o, ma le natura o le pule moni.

Aoaoga Fou i Navu

I le 1839, e toatele ni fai tulafono i Misuri na amata ona faasea i le tau o gaoioiga a le autau e faasaga i tagata Mamona ma fesiligia le atamai o le taofia o tagata e toatele. E ui ina i ai e na totoe na mananao e faasala Iosefa Samita, e oo atu ia Iulai ua tatalaina pe faatagaina foi o ia ma le toatele o isi pagota Mamona e sosola ese. Na faatasi atu Iosefa i tagata pele o le Ekalesia i Ilinoi, faamanuiaina e mamai mai se faamai pipisi o le malaria, ona faatuina lea o le aai o Navu, lea na vave ona tupu ao faamautu atu i ai tagata liliu mai i le isi itu o le Atalani e faatasi ma Au Paia mai le Iunaite Setete ma Kanata.

I Navu, na fiafia Iosefa i gaoioiga faapasi taimi e pei o le pii, siva, ma tala faatino—o gaoioiga ua manatu le toatele o lotu fou ua le tusa ai mo se faifeau ae ua faamalosia tele i le faalapotopotoga o le Au Paia o Aso e Gata Ai o se vaega o se olaga tamaoaiga, ma faatumulia i le Atua.

O upu moni mai uluai faaaliga a Iosefa na taitai atu i ni aoaoga ma tu e le ogatasi ma le vaaiga o le tele o taitai lotu i le taimi o Iosefa Samita. O se faaaliga i le 1833 na aoao mai ai “o le tagata na i ai foi i le amataga ma le Atua”; i Navu, na aoao atu Iosefa o tagata ola e mafai foi ona avea e pei o le Atua. O se faaaliga i le 1836 na faamautuina ia Iosefa o lona uso ua maliu o Alavini, lea na maliu e aunoa ma le papatisoina, e mafai ona maua faamanuiaga uma o le papatisoga; i Navu, na toefuatai ai e Iosefa le tu anamua o le papatisoga mo e ua maliliu. I le amataga o tausaga o le 1830, o le galue ai o Iosefa i le tusi o Kenese na ali ae ai fesili e faatatau i le fai ava e toatele; i Navu, na ia maua ai le faaaliga na toefuataiina ai le tu o le autaunonofo—o se aafiaga taua tele i le olaga faaMamona i tausaga o le 1800—i se faalapotopotoga pe tusa ma le 80 alii ma tamaitai, e aofia ai ma Aposetolo e Toasefululua.

O laasaga taua i le faatulagaina o le Ekalesia na tutupu foi i Navu. Na musuia Iosefa e faatuina se faalapotopotoga o tamaitai e taua o le Aualofa, ma aoao atu o le faalapotopotoga e taua i le galuega a le Alii. O lona toalua o Ema na auauna atu o le uluai peresitene o le Aualofa. Ina ua toe foi mai Aposetolo e Toasefululua mai se misiona i Peretania Tele, na tuuina atu i ai e Iosefa matafaioi taua na saunia ai i latou o ni taitai i le lumanai i totonu o le Ekalesia. I Navu, na aoao ai Iosefa e faapea o aiga e tuufaatasia i luga o le fogaeleele e mafai ona tuufaatasia mo le faavavau i le lagi e ala i feagaiga e faia i totonu o le malumalu, ua tuua ai le aiga ma le malumalu i le fatu o le Ekalesia toefuataiina.

O le tuufaatasiga o aoaoga fou a Iosefa ma ni popolega o nisi faapea ua tele naua lana pule faalemalo i le aai tuputupu a’e na oo atu ai i ni nai faafitauli ma ni tagata maualuluga i totonu o le Ekalesia faapea foi ma le faasagatau mai o tagata taualoa i taulaga tuaoi ma ni toe taumafaiga a taitai i Misuri e pueina pe aveese faamalosi. I toe tausaga o lona soifua, sa lafi ai Iosefa ma i lea taimi i lea taimi ma na mafaufau ai i nisi taimi e toe siitia teisi atu i sisifo, i se nofoaga e tau leai nisi i le laugatasi o Amerika (po o le teritori a Mesiko i le Iunaite Setete i Sisifo i na vaitaimi). I le tolu masina ae lei maliu o ia, na faatuina ai e Iosefa se faalapotopotoga e taua o le Aufono a le Limagafulu, ua faia ia puipuia le saolotoga tau lotu o le Au Paia o Aso e Gata Ai ma faataatiaina le faavae mo le malo moni lava o le Atua i luga o le fogaeleele. Na galulue faatasi Iosefa ma tagata o lea aufono e sailia nofoaga lelei e ono faamautu i ai.

Maliu

I le taumafanafana o le 1844, na faatonuina ai e le Aufono o le Aai o Navu le talepeina o le fale lomitusi o le Nauvoo Expositor, o se nusipepa na tetee i manatu o tagata na latou tuuaia i le faia o faamatalaga sese taufaaleaga. Na pasia e le aufono le filifiliga, ae i le avea ai ma pulenuu o Navu, o Iosefa Samita lava na tuuaia. O le talepeina o le fale lomitusi na feitai ai fili o Iosefa Samita, ma iu ai ina faaosofia i latou e saua. O faafitauli na iu ina tu ai Iosefa i le faamasinoga i fafo atu o Navu, ma o se nusipepa i lena eria na oo i se tulaga ua faafefeina ai i se taua o le faaumatiaga pe afai e musu e tuua le aai e tumu i Mamona. E ui i lona popole i lona ia lava saogalemu, na malie Iosefa e faamasinoina i Karefasi, Ilinoi e lata ane.

I le aso 25 o Iuni, na faatofa atu ai Iosefa i lona aiga. O lona afafine matua sa sefulu-tolu ona tausaga i lena taimi, ma o lona toalua o Ema sa lima masina o lona maitaga i le la atalii pito i laitiiti. E lua aso mulimuli ane, ae osofaia e se aufaatupu faalavelave le Falepuipui i Karefasi. Na vaai i ai Iosefa a o latou fasiotia lona uso o Ailama ona oti ai lea o ia ina ua fagaina e le itiiti ifo ma le faatolu i le fatafata ma le tua. Sa 38 ona tausaga.

O le toatele o fili a Iosefa na manatu ua tonu le fasiotiina e faasao ai le olaga masani o le lotoifale mai le faatosinaga a se faatuatuaga fou ma na faapea e oo atu ai i le pau o le Ekalesia na ia faatulagaina. O usoga o le Au Paia o Aso e Gata Ai a Iosefa, e faatusatusa ia i latou, na vaai ia Iosefa o se maturo o le na faamauina lana molimau i lona toto, ma na latou faasaoina ma tautino e faamaoni i aoaoga, sauniga, ma le pule na ia fesoasoani e toefuatai.

Autu Fesootai: Joseph Smith’s First Vision Accounts, Book of Mormon Translation, Joseph Smith Translation of the Bible, Joseph and Emma Hale Smith Family, Joseph Sr. and Lucy Mack Smith Family, Joseph Smith and Plural Marriage, Joseph Smith’s 1826 Trial, Prophecies of Joseph Smith, Revelations of Joseph Smith, Joseph Smith’s 1844 Campaign for United States President, Deaths of Joseph and Hyrum Smith, Emma Hale Smith, Joseph Smith’s Leg Surgery