Faigamalaga

O Au Paia o Aso e Gata Ai mumua na talia le valaau a le Alii ia faapotopoto i Siona e ala i le o ese mai o latou atunuu ma o mai i nofoaga tutotonu e faapotopoto—muamua i Ohaio, Misuri, ona sosoo lea ma Ilinoi, ma mulimuli ane i Amerika i Matu i Sisifo.¹ O i latou o e na faimalaga ai na mulimuli i le tele o auala e tau atu i Siona.² O faigamalaga o se faailo taua lea o le soifuaga o olaga o Au Paia o Aso e Gata Ai i popo—o i latou uma o e na auai i le Ekalesia na lagonaina le toso o faigamalaga, e le gata i le tuua o a latou lava aiga po o le faamavae atu ia i latou o e ua tuua o latou aiga. Na faatulaga e le Ekalesia taumafaiga faamaopoopo maualuga e fesoasoani i aiga mo nofoaga fou o le a iai e aofia ai faatulagaina o vaega e malaga faatasi ai, faatupeina o le malaga, ma le toe faamasani o le aumalaga i a latou alalafaga fou faatasi ma le Au Paia.

I le va o le 1840 ma le 1890, e silia ma le 85,000 Au Paia na malaga atu i Navu, Ilinoi, ma i Sisifo. O le toatele (tusa ma le 55,000) na tuua le atu Peretania, o le isi 25,000 na tuua Sikatinavia, ma le tusa ma le 6,000 na tuua Europa tutotonu. O isi na taunuu mai Motu o le Pasefika, Initia, le Malo o Otomani, ma Aferika i Saute. O le naunautai o le Au Paia e ositaulaga ma faasoa atu o latou punaoa na mafai ai sea faigamalaga—i lona aotelega, na latou le taliaina le tuua o se tagata mativa atu.³

I le taimi muamua, sa totogi lava e Au Paia o Aso e Gata Ai a latou lava tupe faaalu e faapotopoto ai i Siona, a e i le mavae ai ona oo atu faifeautalai muamua i Peretania Sili i le 1837, na faamaopoopo atili ai e taitai o le Ekalesia faigamalaga ma isi fuafuaga. Toatele tagata liliu mai Peretania maumea na ofo atu e faatupe faigamalaga a Au Paia matitiva mo Navu. I le va o le 1840 ma le 1846, o kamupani malaga e lagolagoina e le Ekalesia na fesoasoani i le 4,000 o tagata liliu mai na malaga mai Egelani i le Iunaite Setete.⁴ I le mavae ai o le latou tuua o Navu, na tonu ai i le Au Paia o le a avea le Teritori o Iuta e fai ma nofoaga mo le faamaopoopoina o tagata liliu mai.⁵

I le sili atu ma le 40 tausaga na sosoo ai, e latalata i le afa o tagata malaga liliu mai na totogi tupe malaga i tupe nono na saunia mai Tupe Faaagaaga Malaga (TFM), o se mafutaga faasosaiete na faatuina i le Vanu o Sate Leki i le 1849 e “aumaia e matitiva i le nofoaga lenei.”⁶ Na ave e Epikopo Eteuati Hunter tupe foai muamua e $5,000 e toe foi atu i Aioua, lea na ia faaaoga ai seleni e faaoofu ai le aumalaga. A taunuu loa i le Vanu o Sate Leki, ona moomia lea o tagata malaga e toe totogi tupe nono ia mafai ai e tagata malaga i le lumanai ona faatino le faigamalaga.⁷

Na faatulaga e tagata e faagaoioia le TFM se kamupani e ao mai seleni ma faasoa atu tupe, faatau mea e faaaoga, faatulaga vaa, ma faatonutonu ia sui mo tagata malaga o loo i ofisa o le misiona ma ofisa i falefaatalitali. O liverpool, Egelani, na auauna o ni nofoaga o femalagaaiga e faamaopoopo ai e sui o le Ekalesia sui mai Europa, faatulaga a latou faigamalaga, ma ao mai tupe amata. E lua pe tolu masina a o lei tuuvaa atu, e tuu ai i luga e le ofisa malaga i totonu o le niusipepa o le Fetu Mileniuma e faalauiloa ai nofoa ua maea ona faatulaga o le vaa, ma le lisi o faatonuga o le malaga.⁸ E i luga loa o le vaa, ona faatulaga lea e kamupani i ni isi o taimi e faitau selau ma selau, i ni vaega e ta’ua o uarota, e tofu ma se peresitene ma ni fesoasoani, mo le faigamalaga.⁹

O tekinolosi fou o le ea ua suia i ai aafiaga o faigamalaga: ua suia e vaa e alu i le ea ia vaafolau, ma suia e nofoaafi ia taavale e toso e manu.¹⁰ Na faaauau pea faigamalaga na lagolagoina e le Ekalesia e oo atu i le 1887, ina ua tuueseeseina e le malo o le Iunaite Setete pisinisi a Ekalesia i lalo o tulafono e tetee i autaunonofo.¹¹ Na faaauau pea ona faimalaga atu aiga taitasi mo le isi luasefulu tausaga o muamua, a e i le fautuaina ai e taitai o le Ekalesia le faamalolosia o paranesi ma siteki i atunuu i fafo, na taulai atu ai le vaaiga i le faalauteleina o le Ekalesia i alalafaga i le lalolagi atoa, ma o le faimalaga atu o se vaega patino o le aafiaga faapaionia o le Au Paia o Aso e Gata Ai ua faaitiitia.¹²

Lisi o Tusi

O lomiga nei o loo tuuina atu ai nisi faamatalaga e uiga i lenei autu. I le faasinoina atu po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Fred E. Woods, iloiloina. ma tuufaatasia., Au Paia e ala i le Sami website, saintsbysea.lib.byu.edu.

Fred E. Woods, “Faapotopotoina i Siona: 1840–1890,” i totonu o le Brandon S. Plewe, iloiloina., Faafanuaina Taumamona: O Se Faafanua o le Talafaasolopito o Au Paia o Aso e Gata Ai (Provo, Iuta: Iunivesite o Polika Iaga Lomiga, 2012), 104–5.

Gustive O. Larson, “O Le Tala o le Tupe Faaagaaga mo Faigamalaga,” Iloiloga Faatalafaasolopito o le Vanu o Misisipi, vol. 18, nu. 2 (Sete. 1931), 184–94.

Conway B. Sonne, Au Paia i luga o Sami: O se Talafaasolopito o Faigamalaga i luga o le Sami a Mamona, 1830–1890 (Aai o Sate Leki: Iunivesite o Iuta Lomiga, 1983).