Maota o Faaeega Paia

I le va o le ese mai Navu i le 1846 ma le faapaiaga o le malumalu o St. George i le 1877, e le’i i ai se malumalu mo Au Paia o Aso e Gata Ai e faatinoina ai papatisoga mo e ua maliliu, faaeega paia, ma faamauga.¹ A e na faatagaina e Polika Iaga le faataunuuina o ni isi o sauniga o le malumalu i fafo mai o malumalu a o faatagatanuuina e Au Paia le Lauelele Tele ma fausia malumalu i St. George, Logan, Manti ma le Aai o Sate Leki. I le faia o lea, na ia mulimuli ai i se mamanu na faavaeina mai i se faaaliga na tuuina ia Iosefa Samita i le 1841, lea na faatagaina ai le Au Paia e faatino ni isi o sauniga i fafo mai o malumalu “i aso o lo outou mativa, lea e le mafai ai ona outou fauina se fale ia te a’u.”² I Navu, na faatagaina ai e Iosefa papatisoga mo e ua maliliu ia faia i vaitafe lata ane mo se taimi pu’upu’u ma mulimuli ane na ia faatinoina ai faaeega paia muamua i le potu pito i luga o lona faleoloa.³

Ua na’o se numera itiiti o sauniga o le malumalu na faatinoina i le va o le 1847 ma le 1850 a o malaga le Au Paia ma amata ona nofoia Sisifo.⁴ Na amata ia Fepuari 1851, le faatinoina o faaeega paia ma faamauga fai soo i totonu o le Fale o le Aufono, le fale muamua i Iuta mo le atunuu lautele. O le fogafale a lalo na faia ai gaoioiga faalauaitele, e aofia ai siva, faafiafiaga ma fonotaga faalelotoifale faitulafono ma faamasinoga. O le fogafale pito i luga sa faaaogaina mo faaeega paia ma faamauga e oo atu ia Aperila 1854.⁵

O le Fale a le AuFono i le Aai o Sate Leki.

Mulimuli ane na filifili ai Polika Iaga e moomia se nofoaga malu mo le faatinoina o sauniga paia. Ae o le a tele ni tausaga a o le’i mae’a se malumalu o le Aai o Sate Leki.⁶ I le 1854, na faatonuina ai e Peresitene Iaga le fausiaina o se fale i le tulimanu matusisifo o le poloka o le malumalu e mafai ai e le Au Paia ona maua faaeega paia ma faamauina ai a latou faaipoipoga. I le maea ai ia Aperila 1855, o lenei fale fogafalelua sa ta’ua o le Maota o Faaeega Paia. Na avea lea, i upu a le tusiata o Truman Angell, o se “Malumalu Pro Tem.”⁷

O le Maota o Faaeega Paia, o le fale muamua lea na faataoto ai tulaga manaomia sa mafaufau i ai mo le faatinoina o faaeega paia ma faamauga ma avea ai ma se musumusuga mo tulaga iloga o totonu ma le faataotoga o malumalu o le lumanai. I le 1856 na fausia ai se vai maa papatisoga ma faapaia ai o se faaopoopoga i le itu i sisifo o le fale mo sauniga mo e o soifua ma sauniga sui.⁸ O se isi faaopoopoga na fausia mulimuli ane i lena tausaga e faaopoopo ai se avanoa mo tagata faigaluega o le malumalu e saunia ai mo le latou galuega ma saunia ai ma taumafa ai taumafataga.⁹

Atapue o le Maota o Faaeega Paia, circa 1885.

I le va o le 1855 ma le 1889, na faatinoina ai e le Au Paia le silia ma le 54,000 faaeega paia, 68,000 faamauga, ma le 134,000 papatisoga mo e ua maliliu i le Maota o Faaeega Paia.¹⁰ Peitai, na aoao mai Polika Iaga e faapea, o ni isi o sauniga o le malumalu, e aofia ai faaeega paia e avea ma sui o e ua maliliu, e le mafai ona faatinoina se’i iloga ua maea se malumalu. O le sauniga muamua faapea na faatinoina i totonu o le Malumalu o St. George i le 1877.¹¹

A o faasolo ina avanoa malumalu o St. George, Logan, ma Manti mo galuega o sauniga, na faaitiitia ai le manaomia o le Maota o Faaeega Paia, e ui sa faaaoga pea e Au Paia i Sate Leki ona sa le’i mafai pea ona malaga i isi malumalu. Peita’i, i le 1889, o le faapaiaina o faaipoipoga o autaunonofo i le Maota o Faaeega Paia ua avea ma tulaga o finauga i le talafaasolopito o le Ekalesia i mataupu tau tulafono ma taua faapolokiki i le va ma le malo o le Iunaite Setete.¹² Na filifili Uilifoti Uitilafi e faatamaia le fale ia Oketopa o se faailoga o le ogaoga ia te ia o le faaitiitia o faaipoipoga autaunonofo.¹³ Na tala i lalo le Maota o Faaeega Paia i le gasologa o le lua vaiaso na sosoo ai.

Autu e Fesootai: Fausiaina o Malumalu, Faaeega Paia o Malumalu, Papatisoga mo e ua Maliliu, Faamauga