Feiloaiga a Matini Harisi ma Tagata Atamamai

Ia Fepuari 1828, na malaga ai Matini Harisi i le Aai o Niu Ioka faatasi ma se tusitusiga o nisi o tusiga mai papatusi o le Tusi a Mamona, ma le faamoemoe e faaali atu ia i latou o tagata atamamai i nisi o faalapotopotoga e sili ona maualuga le aoaoina i le Iunaite Setete.¹ Na faamatalaina e Harisi le tala o lenei malaga i le tele o taimi i lona olaga, e masani lava i tagata e faatalanoaina o ia o e na mananao ia iloa e uiga i ona uluai aafiaga i le Ekalesia. O Salesa Anetone, o se tasi o polofesa na feiloai ma Harisi, na tuua foi ni tala o le la feiloaiga ma Harisi, e faamaonia ai faapea o le fonotaga na faia moni lava. Ae o ni feeseeseaiga i le va o nei tala faasolopito ua tuua ai ni fesili e uiga i le malaga e lei taliina.

atatosi o Matini Harisi

Ata vali o Matini Harisi na saunia e Lewis A. Ramsey.

O le Uunaiga a Harisi

Mo se faataitaiga, ua faasino ni punaoa i ni nai uunaiga talafeagai mo le malaga. O nisi o tala ua faapea mai na poloaiina e le Alii Harisi e faia le malaga, ao isi ua faasino ia Iosefa Samita po o Harisi lava ia o le pogai.² Atonu na faamoemoe Harisi o le faamaoniga a tagata atamamai o le a faamalieina ai lona faletua o Lusi, lea na faasolo ina le talitonu i le galuega faatino o le faaliliuga, po o le fesoasoani ia te ia lava ia lagona le saogalemu o ia lava ae lei faia le filifiliga faaiu e fesoasoani i le faatupeina o le faaliliuga. O isi punaoa ua faapea mai na faamoemoe Harisi e saili le fautuaga a tagata atamamai pe faapefea ona tali atu i le faaliliuga lava ia.

Feiloaiga ma Tagata Atamamai

I le taimi o le malaga a Matini Harisi, e foliga mai e lei iloa tele e Iosefa Samita po o Harisi le gagana i luga o papatusi. E tusa ai ma le tala mulimuli ane a Iosefa, o le agelu na tuuina mai papatusi ia te ia na tauina mai o se faamaumauga a Amerika anamua. Nai lo le sailia o se tagata atamai e i ai se malamalama faaAikupito (faatoa iloa mulimuli ane e Iosefa e faapea o le gagana i luga o papatusi na taua o le ”faaAikupito toefaatulagaina”), atonu foi na sailia e Harisi le fautuaga a tagata atamamai e i ai le atamai i mea faaanamua a Amerika.³

Ao malaga atu Harisi i le ala i le Aai o Niu Ioka, na ia malolo i Alapani, Niu Ioka, e asiasi ia Luteru Bradish, o se alii e malaga soo ma le aiga ma e i ai sootaga patino i Palamaira. Na manino lava le sailia e Harisi o le manatu o Bradish po o ai e asia e faatatau i le faaliliuga. Ona ia faaauau ai lea i le Aai o Niu Ioka e feiloai ma Samuelu L. Mitchill, o se tagata atamai i gagana ma o se sikola sili o le aganuu o Amerika anamua.⁴ Na asiasi foi Harisi ia Salesa Anetone, o se polofesa talavou o le kalama ma gagana i le Kolisi o Kolomupia i le Aai o Niu Ioka. Sa aoaoina Anetone i le faaEleni ma le Latina ae sa aoina mai foi ni tala o Initia Amerika mo le lolomiina ma sa naunau e iloilo le tusiga na aumai e Harisi ia te ia.⁵

Feiloaiga ma Salesa Anetone

E tusa ai ma le molimau a Harisi, na iloiloina e Salesa Anetone ia faailoga tusitusi ma saunia se faamatalaga ua sainia e folafola atu ai le moni o na tusitusiga, ae na ia saeiina le faamatalaga ina ua ia iloaina le ala na maua ai e Iosefa Samita ia papatusi. Na fautuaina e Anetone Harisi e aumai ia te ia papatusi moni lava, ae na musu Harisi, ma faaopoopo atu o lena vaega o papatusi ua faamauina. Sa tali mai Anetone, “E lē mafai ona ou faitauina se tusi ua faamauina.” I ni faamatalaga mulimuli ane, na faafiti Anetone e lei faamaonia faailoga tusitusi ma na finau mai na ia fautuaina Harisi ia aua nei faaaogaina ana tupe i le faaliliuga ma le lolomiga. Na ia faapea mai foi na faaali atu e Harisi ia te ia na o faailoga tusitusi na kopiina ae o Harisi, i nisi o ana tala, na faapea mai na ia aumaia foi se faataitaiga o le faaliliuga a Iosefa Samita o tusitusiga anamua.

atatosi o Salesa Anetone

Atatosi o Salesa Anetone.

Taunuuga o le Malaga

E ui lava i mea na tutupu i le taimi o le feiloaiga ma Anetone, na foi mai Harisi ua sili atu le mautinoa nai lo le taimi muamua e faapea o papatusi ma faailoga tusitusi e moni lava, ma na ia faaaluina ma le naunautai lona taimi ma le malosi i le lagolagoina o Iosefa Samita. Na ia saunoa faatasi ma Iosefa i le asiasiga ia Anetone o se faataunuuina o le valoaga a Isaia (o loo taua foi i le Tusi a Mamona lava ia) “le tusi ua faamaufaailogaina, ua avatu i le ua iloa faitau, ua faapea atu, Sei faitau mai ia lenei tusi; a ua fai mai o ia, Ou te le mafai, aua ua faamaufaailogaina” (Isaia 29:11).

Punaoa o le Ekalesia

Matthew McBride, “The Contributions of Martin Harris: DC 3, 5, 10, 17, 19,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants, (Salt Lake City: The Church of Jesus Christ of Latter-day Saints, 2016), 1–9.

Iosefa Samita, “History, circa Summer 1832,” 5, josephsmithpapers.org.

Talaaga o le Soifuaga

O lomiga nei o loo tuuina atu nisi faamatalaga e uiga i lenei autu. I le faasinoina po o le fesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Michael Hubbard MacKay and Gerrit J. Dirkmaat, From Darkness unto Light: Joseph Smith’s Translation and Publication of the Book of Mormon (Provo, Utah: Brigham Young University, Religious Studies Center, 2015), 39–59.

Richard E. Bennett, “Martin Harris and Three Wise Men” (Brigham Young University devotional, June 29, 2010), speeches.byu.edu.

Stanley B. Kimball, “The Anthon Transcript: People, Primary Sources, and Problems,” BYU Studies, vol. 10, no. 3 (Tautotogo 1970), 325-52.

O Autu e Fesootai I Ai: Book of Mormon Translation

Faamatalaga

1. E ui lava o ni nai tusitusiga o faailoga tusitusi o le Tusi a Mamona i le vaitaimi o le soifuaga o Iosefa Samita o loo i ai pea nei, ua ioeina e tagata atamamai lautele e le o uluai “tusitusiga a Anetone” ia na ave e Matini Harisi i Niu Ioka (tagai “Appendix 2: Copies of Book of Mormon Characters, Introduction,” josephsmithpapers.org.

2. O le faamaumauga muamua lava o le malaga, na maua i le talafaasolopito a Iosefa Samita i le 1832, o loo faapea mai na tau atu e Harisi ia Iosefa Samita “na tau atu e le Alii ia te ia ua tatau ona ia alu i le Aai o Niu Ioka faatasi ma ni faailoga tusitusi” (History, circa Summer 1832, 5, josephsmithpapers.org). Tagai foi i le Oliver Cowdery, “Letter IV,” Messenger and Advocate, vol. 1, no. 5 (Fepuari 1835), 80; History, 1838–1856, Volume A-1 [23 December 1805–30 August 1834], 9, josephsmithpapers.org.

3. Michael Hubbard MacKay and Gerrit J. Dirkmaat, From Darkness unto Light: Joseph Smith’s Translation and Publication of the Book of Mormon (Provo, Utah: Brigham Young University, Religious Studies Center, 2015), 42–43.

4. Stanley B. Kimball, “The Anthon Transcript: People, Primary Sources, and Problems,” BYU Studies, vol. 10, no. 3 (Tautotogo 1970) 332-34.

5. MacKay and Dirkmaat, From Darkness unto Light, 49–51.