Korama a Fitugafulu

O le Fitugafulu o se tofi i le Perisitua Mekisateko. Talu mai le 1986, o sui auai o Korama a Fitugafulu o ni pulega aoao po o itulagi o e fesoasoani i le faatautaiga o le Ekalesia i le lalolagi atoa. Peitai, mo le tele o le talafaasolopito o le Ekalesia, sa tofu siteki ma a latou lava korama a fitugafulu.

O sui auai muamua o fitugafulu sa faauuina i le aso 28 Fepuari, 1835, ina ua amata e Iosefa Samita ona valaau ma faauu ia faifeautalai faapitoa e “teuteuina le tovine mo le toe taimi.”¹ O le masina lava lea, sa lagolago atu ai Oliva Kaotui, Tavita Uitimera, ma Matini Harisi ia Iosefa Samita i le filifiliina o Aposetolo e Toasefululua, o se korama perisitua a faitaulaga sili e toasefululua, o e e pei o Aposetolo i le Feagaiga Fou, sa poloaiina e folafola atu le talalelei i le lalolagi uma. E tusa ai ma se faatonuga e uiga i le perisitua o loo aofia ai i le Mataupu Faavae ma Feagaiga, o fitugafulu foi sa “valaauina e folafola atu le talalelei, ma ia avea o ni molimau faapitoa i Nuuese ma i le lalolagi uma,” e faaaoao i Fitugafulu sa tofia e Iesu e talai atu ia Isaraelu i le tami o soifua ai o Ia i le lalolagi.²

Sa faamalamalamaina atu ai foi e le faatonuga faapea o fitugafulu “ua fatu ai se korama, e tutusa i le pule a le Toasefululua” ae peitai o fitugafulu e tatau ona gaoioi i lalo o le taitaiga a Aposetolo, ua na o i latou ia o loo umia “ki”, e folafola atu ai le talalelei ia Iutaia ma Nuuese.³

Sa faia isi korama faaopoopo o fitugafulu a o faauuina isi alii na faaopoopo i ai. Ina ua mavae le maliu o Iosefa Samita i le 1844, o le tele o toeaina i lalo o le 35 tausaga sa faauuina o ni fitugafulu, ma sa faatuina ni isi korama fou e taulima ai tulaga ua faateleina. E oo atu i le 1846, ua oo atu le aofaiga o korama a fitugafulu i le 35. Na iu ina oo le aofaiga o korama i le faitau selau. O le toatele o faifeautalai i le afa lona lua o le seneturi lona 19 o ni sui o nei korama a fitugafulu i le lotoifale.⁴ O se aufono e taitoafitu sa filifilia mai sui auai o korama taitasi e pulefaamalumalu i se korama. I se aotelega, o korama a fitugafulu sa pulefaamalumalu ai ni alii se toafitu e aofia ai le Aufono Muamua o Fitugafulu. O nei alii sa lagolagoina o ni Au Pulega Aoao e sosoo ma le Korama a Aposetolo e Toasefululua i le pule. I le 1907, sa aoao mai ai e Iosefa F. Samita e faapea o le Aufono Muamua a Fitugafulu e galulue o ni “fesoasoani i Aposetolo e Toasefululua” ma i se tasi itu, o “aposetolo a le Alii o Iesu Keriso” sa auina atu e talai le talalelei i le lalolagi atoa.⁵

A o faateleina le faitau aofai o tagata o le Ekalesia i le salafa o le lalolagi, sa oo ina faigata mo le Toasefululua ona faataunuu uma o latou tiute tauave faalepulega. I le 1941, sa amata ai e le Au Peresitene Sili ona tofia ni nai alii e avea ma “fesoasoani i le toasefululua.” I le 1961, sa faatonuina ai e Peresitene Tavita O. MaKei sui auai o le Aufono Muamua o Fitugafulu ina ia faauuina i le tofi o le faitaulaga sili ma tuu atu i ai le pule e tatau ai e “faatulaga tatau ai mea uma e faatatau i le siteki ma uarota, i lalo o le taitaiga a Aposetolo e Toasefululua.”⁶ Ia Oketopa 1975, sa fofoga mai ai e Peresitene Spencer W. Kimball le faavaeina o le Korama Muamua a Fitugafulu e fai ma tino faaopoopo o le Au Pulega Aoao, ma sa faatumuina le korama i le Aufono Muamua o Fitugafulu, o Fesoasoani i le Toasefululua, ma isi Fitugafulu na faatoa tofia. Ia Oketopa 1986, sa faatonuina ai e Peresitene Ezra Taft Benson ia taitai o iunite ia le toe faaauauina ia korama o fitugafulu i iunite ma ia le toe tofia ma faauuina alii i le tofi o le fitugafulu. O taitai i lena taimi sa faatonuina sui sa i ai i korama a fitugafulu i iunite e auai i korama a toeaina pe faauuina foi i latou e avea ma faitaulaga sili.

Talu mai le 1986, na tumau ai le tofi o le Fitugafulu o se tofi i le au pulega aoao ma le eria nai lo o se pulega i le lotoifale. O sui auai o Fitugafulu e masani lava ona malolo mai le galuega i le 70 tausaga o le matua, ma o le taimi lea e tuuina atu ai ia te i latou le tulaga o le malolo ma le mamalu. O le faavaeina o se Korama “Muamua” o Fitugafulu sa faafou ai le mamanu o Korama o Fitugafulu na i ai i aso popofou o le Ekalesia, i le na o se tulaga aoao e ese mai i se tulaga faalelotoifale. Ia Aperila, 1989, sa faavaeina ai le Korama Lua o Fitugafulu. I le 1995, na fofogaina ai e Peresitene Gordon B. Hinckley le lē toe faaauauina ai o sui faaitūlagi i le Toasefululua ae faalauiloa mai tofi faalelotoifale, lea na ta’ua muamua o “Au Pulega o Eria” ma mulimuli ane ta’ua ai o “Fituagfulu Pule Eria” ma, i le mavae o le 2005, o ni “Fitugafulu Eria.”⁷ I le va o le 1997 ma le 2004, na valaauina ai e le Au Peresitene Sili ia Fitugafulu Pule Eria i Korama Lona Tolu e oo i le Lona Lima ma tuu i latou i lalo o le taitaiga a le Au Peresitene o le Korama Muamua o Fitugafulu Sa faaauauina pea fetuunaiga i korama ma le fatuina o korama faaopoopo.⁸ I le 2020, na fofogaina ai e le Au Peresitene Sili ni korama fou se fa, ua oo ai i le sefululua le aofaiga atoa o korama a Fitugafulu.⁹

O Fitugafulu i le taimi nei e lagolagoina le Korama a le Toasefululua ma le Au Peresitene Sili i le faatautaiga o le Ekalesia i le lalolagi atoa, avea o ni sui auai o Au Peresitene o Eria, faatulagaina siteki, ma aoao atu le Au Paia o Aso e Gata Ai i taimi o konafesi aoao ma faalelotoifale.