Sa Tanu [Danites]

I le 1838, sa sosola ese mai ai Iosefa Samita ma isi tagata o le Ekalesia mai tagata faatupu faalavelave i Ohaio ma masii atu ai i Misuri, i le mea ua faavae ai ni faiganuu e le Au Paia o Aso e Gata Ai. Sa talitonu Iosefa Samita o tetee mai tagata ua liliuese mai le Ekalesia ma isi fili na faavaivaia ai ma iu ai ina faatamaia la latou faiganuu i Katelani, Ohaio. E oo atu i le taumafanafana o le 1838, na vaaia e taitai o le Ekalesia le tulai ae o faamata’u faapena i lo latou nuu i Misuri.

I le pitonuu o le Au Paia o Aso e Gata Ai o Fa Uesi, sa faatulagaina ai e nisi o le Au Paia o Aso e Gata Ai se vaega sa ta’ua o “Afafine o Siona” po o le “Sa Tanu” o lona faamoemoega o le puipuia lea o le faiganuu mai e ua liliuese ma le Au Paia o Aso e Gata Ai ua tape igoa mai le ekaleisa, faapea foi ma isi tagata o Misuri. Sa faafefe e Sa Tanu ia tagata liliuese mai le Ekalesia ma isi tagata o Misuri, mo se faataitaiga, sa latou lapataia nisi o tagata liliuese e tuua le Itumalo o Caldwell. I le taimi o le tautoulu o le 1838, ina ua faatetele le lili o tagata i le taimi ua lauiloa nei o le Taua a Mamona-Misuri, sa oo ina avea sa Tanu o se vaega o le vaegaau lea e toatele i le Au Paia o Aso e Gata Ai. O nei vaegaau sa tau faasaga i le au tetee a Misuri, ma oo ai ina maliliu ni nai tagata i itu uma e lua. E le gata i lea, o Mamona sa faafiapule ma taulimaina tulafono e i latou lava, e aofia ai ma Sa Tanu, sa latou osofaia ni taulaga se lua lea na faapea o ni nofoaga tutotonu ia o gaoioiga a i latou sa Mamona a ua tetee, ma susunuina fale ma gaoia oloa.¹ A o tulimataia e le au aneti-Mamona faafiapule ma fasiotia i nisi taimi le Au Paia o Aso e Gata Ai sa lei auai i le taua, o le mea autu sa faia e Sa Tanu o le faaleaga pe faatamaia ia meatotino ia sa latou popole e mafai ona faaaoga e o latou fili.²

I se tulaga lautele na ioe le au tusitalafaasolopito faapea na faamaonia e Iosefa Samita le au Sa Tanu ae atonu e lei logoina o ia i a latou fuafuaga uma ma na te lei faamaonia ai uma a latou gaoioiga. Sa na o le lima masina sa i ai le au Sa Tanu, mai ia Iuni e oo atu ia Oketopa 1838, ma sa na o le lua itumalo na olaola ai i matusisifo o Misuri. E ui ina sa puupuu le i ai o sa Tanu, ae sa taunuu i se talafatu faaumiumi ma le faateleina e uiga i se sosaiete faalilolilo o Mamona faafiapule.

Punaoa o le Ekalesia

“Peace and Violence among 19th-Century Latter-day Saints,” Gospel Topics Essays, topics.lds.org

“Danites,” josephsmithpapers.org.

Folasaga Faasolopito i le “Vaega 2: 8 Iulai–29 Oketopa 1838,” in Mark Ashurst-McGee, David W. Grua, Elizabeth A. Kuehn, Brenden W. Rensink, and Alexander L. Baugh, eds., Documents, Volume 6: Fepuari 1838–Aokuso 1839. Vol. 6 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 169–75.

Autu Fesootai: Mormon-Missouri War of 1838, Extermination Order, Hawn’s Mill Massacre

Faamatalaga

1. Alexander L. Baugh, A Call to Arms: The 1838 Mormon Defense of Northern Missouri (Provo, Utah: Joseph Fielding Smith Institute for Latter-day Saint History and BYU Press, 2000), 36–43.

2. Folasaga Faasolopito i le Vaega 2: 8 July–29 October 1838,” in Mark Ashurst-McGee, David W. Grua, Elizabeth A. Kuehn, Brenden W. Rensink, and Alexander L. Baugh, eds., Documents, Volume 6: February 1838–August 1839. Vol. 6 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historian’s Press, 2017), 169–75. O le faalapotopotoga na muai faaigoa o le Sosaiete a le Afafine o Sione O igoa uma ia e lua e faasino i fuaitau faa-Tusi Paia. Tagai Mika 4:13 ma le Faamasino 18.