Nauvoo Expositor

I le Aso Faraile, 7 Iuni, 1844, sa lolomi ai ma faasalalau e i latou ua liliuese mai le Ekalesia le lomiga e tasi o se nusipepa tetee sa latou faaigoaina o le Nauvoo Expositor. O i latou na lolomiina ma faasalalau o se tasi sa Fesoasoani Muamua i le Au Peresitene Sili, o Viliamu Law o le uso o Law, o Uilisone; Salesa Ivins; Salesa ma Ropati Foster; ma Falanisisi ma Chauncey Higbee.¹ O le au liliuese, o le toatele o i latou sa faatoa tape talu ai nei o latou igoa mai le ekalesia, sa lolomi ma faasalalauina le Expositor e gaepu ai feteenaiga i tu ma aoaoga sa latou teteeina malosi. I le faaaogaina o se gagana taufaama’ite, sa latou faaleoina ai lo latou le fiafia i le tu po o faiga o faaipoipoga faaautaunonofo, o aoaoga a Iosefa Samita i le natura o le Atua mai lana lauga talu ai o le King Follett, ma lona paluina faatasi o le pule faaletapuaiga ma faaleaai i Navu.²

I le Aso Toonai, 8 Iuni, ma le Aso Gafua na sosoo ai, le aso 10 Iuni, sa tauaofia ai le Aufono o le Aai o Navu e fuafua ai se kosi o le mea e fai. Sa tele ni mafuaaga eseese sa lagonaina e le aufono ua manaomia ona faatino. O le mea e sili ona taua, sa feagai le Au Paia ma sauaga i Misuri ma Ohaio ma, faatasi ai ma le faateleina o fefaloa’iga i Ilinoi, o lea sa popole ai sui o le aufono e uiga i le ono mafai e le Expositor ona faama’ite atili sauaga faasagatau i le Au Paia ma pule o le lomitusi.³ E le gata i lea, i le faamamaluina o aganuu o le seneturi lona 19 a Amerika, sa faamoemoeina ia alii e tali atu i osofaiga a tagata lautele o o latou uiga, o se malamalama faasamasamanoa faaagafesootai na faigata ona faapasi mea faatiga.⁴

I le faatagaga a le aufono o le aai, sa faatonuina ai e Iosefa Samita se leoleo o le tulafono, faatasi ai ma le lagolago a le Vaegaau a Navu, e faatamaia le ofisa lomitusi. I le afiafi o le Aso Gafua, aso 10 Iuni, sa aveesea ai e le leoleo ma lana vaega pe tusa ma le 100 alii ia le falelomitusi, faataape le masini ma susunuina kopi na totoe o le nusipepa.

Sa i ai i le Aufono o le Aai se mafuaaga e talitonu ai e tusa ma le tulafono a latou faaiuga. O le Uluai Suiga o le Faavae o le Iunaite Setete lea na faasa ai le faalavelaveina o falelomitusi, sa na o le malo tutotonu na faatatau i ai, ae le o setete ma faigamalo a nuu seia oo i le vaitau o le Suiga Lona Sefulufa i le 1868. I le taimi o fonotaga a le aufono, sa ta’ua ai e Iosefa Samita le taiala aloaia a Amerika ma le faamatalaga a Viliamu Blackstone (o se tusifafau faatosina o le tulafono masani), o loo faamatalatalaina ai nei faapogai ua faatagaina ai le faatamaiaina o le Expositor e faaaoga ai le mau faapea o se faalavelave i tagata lautele---o se mea sa faaolioli ai se tulaga matautia i le saogalemu ma le soifua manuia o tagata. E ui o le faatamaiaga o se falelomitusi e le masani ai le seneturi lona 19 i Amerika, ae sa tele tulaga, i luma mai ma tua atu o le taimi lea, i le lotoifale ma faigamalo a setete na taofia ai falelomitusi sa lei manaomia. E oo atu i le faaiuga o le 1929, sa faamaonia ai e se faamasinoga maualuga a se setete le tapunia o se falelomitusi sa manatu o se “faamaimau taimi” (e ui ina sa toe liliu mulimuli ane e le I.S. Faamasinoga Maualuga). Sa faia se faaiuga a sikola e faapea sa gaoioi le Aufono a le Aai o Navu e tusa ai ma le tulafono e faatamaia ia kopi o le nusipepa ae atonu ua soona sopo lana pule e ala i le faaumatiaina o le falelomitusi lava ia.⁵

O le faatamaiaina o le Expositor na tapili ai le afimumu o le fefinauaiga. I le tuaoi o Warsaw, Ilinoi, sa faaaoga ai e se faatonu o se nusipepa taulamua a le aneti-Mamona e igoa ia Tomasi Sharp lenei avanoa e faapotopoto mai ai tagatanuu o le Itumalo o Hancock e faasagatau i le Au Paia.⁶ I le taumafai ai e puipuia se taua a le atunuu, sa toe iloilo ai e le kovana Ilinoi o Tomasi Ford ia faamaoniga faaletulafono a le Aufono o le Aai o Navu mo le taofia o le nusipepa ma tonu ai e manaomia ona faamasinoina ia Iosefa Samita i Karefasi, le nofoa o le itumalo, i le tuuaiga o le “faatupu vevesi.”

E ui ina sa ia taliaina le folafolaga a Ford o le puipuiga ma ioe atu e pue faapagotaina o ia, sa lei tu atu lava Iosefa Samita i se faamasinoga e puipuia ana faaiuga o ia o se pulenuu. Sa osofaia e se vaega faatupu faalavelave le Falepuipui o Karefasi ma tagatavaleina ai o ia ma lona uso o Ailama.

Punaoa o le Ekalesia

“Elder Oaks Interview Transcript from PBS Documentary,” July 20, 2007, mormonnewsroom.org.

Dallin H. Oaks, “Joseph, the Man and the Prophet,” Ensign, May 1996, 71–73.

“Growing Conflict in Illinois,” Church History in the Fulness of Times Student Manual (2003), 263–271.

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le fesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Dallin H. Oaks and Marvin S. Hill, Carthage Conspiracy: The Trial of the Accused Assassins of Joseph Smith (Chicago: University of Illinois Press, 1979).

Dallin H. Oaks, “The Suppression of the Nauvoo Expositor,” Utah Law Review, vol. 9, no. 4 (Winter 1965), 862–903.

J. E. Hallwas, “Mormon Nauvoo from a Non-Mormon Perspective,” Journal of Mormon History (1990), 53–69.

Autu Fesootai: Deaths of Joseph and Hyrum Smith, American Legal and Political Institutions, Dissent in the Church, King Follett Discourse, Joseph Smith and Plural Marriage

Faamatalaga

1. Prospectus of the Nauvoo Expositor, May 10, 1844.

2. Nauvoo Expositor, June 7, 1844; Dallin H. Oaks and Marvin S. Hill, Carthage Conspiracy: The Trial of the Accused Assassins of Joseph Smith (Chicago: University of Illinois Press, 1979), xi–xiii.

3. Joseph Smith, “Proclamation, June 11, 1844,” josephsmithpapers.org; Nauvoo Neighbor, June 12, 1844, 2–3.

4. Tagai Bertram Wyatt-Brown, Southern Honor: Ethics and Behavior in the Old South (New York: Oxford University Press, 1982).

5. Dallin H. Oaks, “The Suppression of the Nauvoo Expositor,” Utah Law Review, vol. 9, no. 4 (Winter 1965), 862–903.

6. Oaks and Hill, Carthage Conspiracy, 14