Talafaasolopito o le Ekalesia
Taua a Mekisiko ma Amerika


“Taua a Mekisiko ma Amerika,” O Autu o le Talafaasolopito o le Ekalesia

“Taua a Mekisiko ma Amerika”

Taua a Mekisiko ma Amerika

I le va o le 1846 ma le 1848—i le taimi tonu na amata ai e paionia o le Au Paia o Aso e Gata Ai ona malaga i le vanu o Sate Leki Tele—sa tau ai e le Iunaite Setete o Amerika ma Mekisiko se taua lea na suia ai faafanua faaagafesootai ma faaupufai o le itu i Sisifo o Amerika i Matu. Sa lei gata na oo i le Au Paia aafiaga o lenei taua i a latou taumafaiga e toe masiiese atu ma toe faato’a nofoaga e nonofo ai, ae o nisi sa auai foi i fetauaiga o ni fitafita i le Autau a Mamona.

Sa amata le taua i se finauga i le va o atunuu e lua e faatatau i le Ripapelika o Texas, o se teritori telē i le ogatotonu o le konetineta lea sa finauina e Sipaniolo, Mekisiko, o le au papae na nofoia le atunuu mai le Iunaite Setete, ma Comanches (Initia Amerika). Ina ua ofo atu e le Konekeresi a le Iunaite Setete le avea o le Ripapelika o Texas ma ona setete ma ia taliaina, sa faaleaogaina e Mekisiko lea faaopoopoga. Sa faatupulaia finauga i tuaoi faataamilo i Rio Grande ma oo ai i ni fetauaiga a vaegaau, ma i le 1846 sa folafola mai ai loa e le Konekeresi le taua ia Mekisiko.

O le taimi lea, o le Au Paia o Aso e Gata Ai, o e sa lei leva ona tutuliese faamalosi mai i o latou aiga i Ilinoi, sa lagonaina le faalataina e le malo o le Iunaite Setete ma le toatele o tagata Amerika. I le amataga o le 1846, sa tuua e le toatele o le Au Paia o Aso e Gata Ai o latou aiga i Ilinoi ma talaane o Ilinoi i se faamoemoe e nofoia le itulagi o le Sate Leki Tele, lea sa avea ma se vaega o Mekisiko i lena taimi. I le sosoo ai ma le folafolaga o le taua, sa faatauanau ai e se taitai o le Au Paia o Aso e Gata Ai ia Peresitene James K. Polk e faatu se autau o fitafita a le Au Paia o Aso e Gata Ai mo le taua. O le a fesoasoani totogi o fitafita e faatupe ai le malaga a le Au Paia i sisifo. Sa uunaia e Polika Iaga tagata o le autau ia le faia ni “feupuaiga” ma tagata Mekisiko, ia “taulimaina pagota ma le faaaloalo sili,” ma ia le fasiotia se tasi i le mea sili e mafai ai.1 I le faaiuga, sa le’i auai lava le autau i se fetauaiga i le taua.

Sa osofaia e le Vaegaau a le Iunaite Setete ia Mekisiko i le amataga o le 1847 ma maua ai le Aai o Mekisiko i totonu o le tausaga. I le 1848, sa malilie ai atunuu e lua i le Maliega a Guadalupe Hidalgo, lea sa faamutaina ai le taua ma siitia atu ai se vaega tele o le teritori i le Iunaite Setete, e aofia ai le itulagi lea sa filifili le Au Paia o Aso e Gata Ai e nofoia. O se vaega o le eria sa tuu atu i le Iunaite Setete na avea ma Teritori o Iuta i le 1850. O le Au Paia o Aso e Gata Ai sa sosola ese mai le Iunaite Setete mo Sisifo ua toe oo mai foi i lalo o le pule faaupufai a le malo o le Iunaite Setete, ma o nisi o faigata na latou fetaiai i le taimi o le fia tausaga na muamua atu na toe oo ane foi. Na faateteleina le feitagai i le va o taitai o le teritori na tofia e le malo ma le Au Paia o Aso e Gata Ai i le taitaiga o le malo i le lotoifale ma i le saolotoga falelotu.2

O femalagaaiga na mafua mai i le faaopoopoga o teritori i sisifo faapea ai ma le Eliga Auro Tele i Kalefonia na faateleina ai feoaiga ma taavale ma fefaatauaiga i nuu o le Au Paia o Aso e Gata Ai.3 O le suiga o faataatiaga faalaufanua faaagafesootai ma faaupufai ina ua mavae le taua na matala ai avanoa fou mo le Au Paia a o latou taumafai e atiae ni pisinisi mautu ma ni aai tumau i le nofoaga o le a avea ma setete o Iuta, Nevata, Arisona, ma Kalefonia.4

Autu Fesootai: Eligā Auro Tele i Kalefonia (California Gold Rush), Autau Mamona, Mekisiko, Au Kolone i Mekisiko (Colonies in Mexico)