Faamanuiaga Faapeteriaka

Ua faamatala mai e le Tusi Paia ma le Tusi a Mamona ni peteriaka anamua ia na faaeeina atu ni tofi i luga o a latou fanau e ala i le tuuina atu ia i latou o ni faamanuiaga. Mo se faataitaiga, na faamanuia e Iakopo ana fanau laiti o Efaraima ma Manase i ni tofi faapitoa, ma i ona toe taimi, na faapotopoto ai e Liae lona aiga ina ia tuu atu ni faamanuiaga ma vavalo atu e uiga i lo latou lumanai.¹ E pei ona taitaia ai e faaaliga na tuuina atu ia Iosefa Samita, o uluai Au Paia o Aso e Gata Ai na faafouina le tu faaletusipaia o tama e faamanuiaina a latou fanau, o nisi taimi e ta’ua o ni “faamanuiaga faapeteriaka.”²

Na tuuina atu e Iosefa Samita le tu faaanamua ia aafia ai ia peteriaka faauuina, o e na ia taua i nisi taimi o ni “faifeau faaevagelia” ma na vaetofia e tuuina atu faamanuiaga i tagata ua maliliu o latou tama pe le o ni tagata o le Ekalesia. Na ia aoao atu faapea “o le alii aupito i matua o le Toto o Iosefa po o le fanau a Aperaamo … e tatau ona avea ma peteriaka mo le manuia o fanau a le Au Paia e pei ona i ai ia Iakopo i le tuuina atu o ana faamanuiaga faapeteriaka i ona Atalii.”³ O lenei faamanuiaga na muamua lava oo atu ia Iosefa Samita Le Matua, lea na faauuina e Iosefa Samita o se Peteriaka i le Ekalesia i Katelani, Ohaio, ia Tesema 1834.⁴ Na faapotopoto e Iosefa Le Matua tagata o lona aiga, tuuina atu i ai ni faamanuiaga ma folafola atu i ai lo latou laina o le feagaiga i le Aiga o Isaraelu, ma faamauina i ai tofi faaleagaga e faalagolago i folafolaga o le feagaiga. Na vave lava ona ia tuuina atu faamanuiaga i le Au Paia o Aso e Gata Ai e ese mai i lona aiga.⁵

I le vaitau o masina ia na taitai atu i le faapaiaga o le Malumalu o Katelani, e toatele le Au Paia o Aso e Gata Ai na mauaina faamanuiaga faapeteriaka. Na latou faia ni fonotaga tetele lea na maua ai e ni nai tagata faamanuiaga mai ia Iosefa Le Matua, ma na latou faamanatuina nei taimi i faafiafiaga, musika, ma molimau.⁶ E ui o le tu o le faia o fonotaga o faamanuiaga faapeteriaka na mou atu i le mavae ai o le faapaiaga o le malumalu, o le tele o le Au Paia na faaauau pea ona valaaulia Iosefa Le Matua (ma mulimuli ane, isi peteriaka) i o latou fale ina ia maua ni faamanuiaga faapitoa.

Na amata i le 1837, ona amata faauuina isi peteriaka, ma na aliae ai se eseesega i le va o le Peteriaka i le Ekalesia atoa ma na peteriaka na tofia i paranesi po o siteki.⁷ Ina ua mavae le maliu o Iosefa Samita Le Matua, na faaigoa mai i se faaaliga ia Ailama Samita o le isi Peteriaka o le Ekalesia “e ala i le faamanuiaga ma ala foi i le aia tatau,” ma na faaauau ai pea ona tuufaasolo mai, i atalii o Iosefa Le Matua ma a latou fanau (sei vagana ai ni nai suiga laiti) na auauna atu o ni Peteriaka o le Ekalesia seia oo ina faailoa mai o Eldred G. Samita o se tagata matua e le suia i le 1979.⁸ O le valaaulia o peteriaka o le lotoifale o loo faaauau pea i le aso.

I le 1835, na amata ai ona faamaumau e Oliva Kaotui faamanuiaga faapeteriaka o se tusiupu i se api o tusi. Na amata ona aoina mai e le Ekalesia faamanuiaga faapeteriaka ma teuina talu mai lena taimi.⁹ Na atiina ae se faiga i le amataga o le senituri lona 20 lea na fautuaina ai e taitai o le lotoifale, e masani lava o epikopo, ia peteriaka mo se faamanuiaga, ma na teuina e peteriaka faamanuiaga i le Ekalesia. Na faaauau lenei taumafaiga e ui lava i le maoae o le tuputupu ae o le Ekalesia ma e faitau miliona faamanuiaga ua faatinoina. I le 2015, na faalauiloa ai e le Faletusi o Talafaasolopito o le Ekalesia se uepisaite e faataga ai tagata o le Ekalesia ona talosaga mo kopi o a latou faamanuiaga faapeteriaka ma faamanuiaga a o latou tuua ua maliliu.

Punaoa o le Ekalesia

James E. Faust, “Faamanuiaga Faaleperisitua,” Liahona, Ian. 1996, 73–76.

Dallin H. Oaks, “Faamanuiaga Faaleperisitua,” Liahona, Ian. 1996, 73–76.

“Patriarch,” josephsmithpapers.org.

“Patriarchal Blessings,” Church History Library.

Lisi o Tusi

O lomiga nei o loo tuuina atu ai nisi faamatalaga e uiga i lenei autu. I le faasinoina po o le fesootaia o oe i nei punaoa, matou te le faamaonia pe faamautinoa atu le anomea po o manatu o le tusitala.

Matthew C. Godfrey, “A Season of Blessings: The Function of Blessings in Kirtland, Ohio, 1834–1835,” Mormon Historical Studies, vol. 18, no. 1 (Spring 2017), 25–42.

Faamatalaga

1. Tagai Kenese 48:8–21; 49:28; Faaliliuga a Iosefa Samita, Kenese 50:24–38 [i le Bible appendix]; 2 Nifae 4:1–12.

2. “Blessing from Joseph Smith Sr., 9 December 1834: Historical Introduction,” josephsmithpapers.org; Jonathan A. Stapley, The Power of Godliness: Mormon Liturgy and Cosmology (New York: Oxford University Press, 2018), 59–75. Tagai foi James E. Faust, “Patriarchal Blessings,” (Brigham Young University devotional, Mar. 30, 1980), speeches.byu.edu.

3. “Discourse, between circa 26 June and circa 2 July 1839, as Reported by Willard Richards,” 22, josephsmithpapers.org; faasaoina faailoga.

4. Tagai Autu: Joseph Sr. and Lucy Mack Smith Family [Aiga o Iosefa le Matua ma Lusi Maka Samita], Joseph Smith Sr. Na tuuina atu foi e Iosefa Samita Le Itiiti le tele o faamanuiaga na ta’ua o “faamanuiaga faapeteriaka”; tagai “Blessing for James Ivins, 7 January 1840,” josephsmithpapers.org.

5. “Instruction on Priesthood, between circa 1 March and circa 4 May 1835 [DC 107],” 85, josephsmithpapers.org. Mo nisi faamatalaga i le atinaega faasolopito o le ofisa o le peteriaka, tagai i le Gary Shepherd and Gordon Shepherd, Binding Earth and Heaven: Patriarchal Blessings in the Prophetic Development of Early Mormonism (University Park, PA: The Pennsylvania State University Press, 2012) and Irene M. Bates and E. Gary Smith, Lost Legacy: The Mormon Office of Presiding Patriarch (Urbana: University of Illinois Press, 1996).

6. Bates and Smith, Lost Legacy, 38–39; Matthew C. Godfrey, “A Season of Blessings: The Function of Blessings in Kirtland, Ohio, 1834–1835,” Mormon Historical Studies, vol. 18, no. 1 (Spring 2017), 25–42.

7. O Isaako Morley sa avea ma peteriaka lona lua ma o le tagata muamua na tofia i se nofoaga faapitoa: Far  Uesi, Missouri (tagai “Minute Book 2,” 85, josephsmithpapers.org). O le Peteriaka o le Ekalesia sa faasino i ai uma faalagiga o le “Peteriaka Pulefaamalumalu” ma le “Peteriaka o le Ekalesia”; tagai Edward L. Kimball, Lengthen Your Stride: The Presidency of Spencer W. Kimball (Salt Lake City: Deseret Book, 2005), 259; “The Sustaining of Church Officers,” Ensign, Nov. 1979, 18.

8. Mataupu Faavae ma Feagaiga 124:91–96; “The Sustaining of Church Officers,” Ensign, Nov. 1979, 18. Tagata uma sei vagana ai George F. O Richards, lea na auauna atu o se Sui Peteriaka i le va o le 1937 ma le 1942, o ni tagata na tupuga mai i le tama o Iosefa Samita Le Matua, o Asael Smith; tagai Bates and Smith, Lost Legacy, Appendix B: “Mormon Presiding Patriarchs.”

9. “Blessing from Joseph Smith Sr., 9 December 1834: Historical Introduction,” josephsmithpapers.org.