Talafaasolopito o le Ekalesia
Taua Sipaniolo-Amerika

“Taua Sipaniolo-Amerika,” O Autu o le Talafaasolopito o le Ekalesia

“Taua Sipaniolo-Amerika”

Taua Sipaniolo-Amerika

Ua faatulaga e tagata tetee i totonu o Cuba se osofaiga i le 1895 e faasaga ia Sepania, lea na mafua ai se taua, e ui lava o le faamoemoe ia maua le tutoatasi faaleatunuu, ae na i’u lava ina avea ma taua tele.1 O manatu sa i le Iunaite Setete ma Europa sa tumau i le fevaevaeai se’ia oo ina goto faafuasei le vaa manuao o le Neivi a Amerika USS Maine i le Ava o Havana i le 1898.2 Na lē manuia le tele o talosaga faale-va-o-malo e faamautu saogalemu le tutoatasi o Cuba, ma ia Aperila 25 na folafola ai loa e le Iunaite Setete le taua faasagatau ia Sepania. Mo le sili itiiti atu i le tolu masina, na tau ai le Iunaite Setete ma Sepania se taua sa tele lava i fuava’a neivi i itulagi e lua e latalata i motu e pulea e Sepania o: Cuba ma Puerto Rico i le Atukaripeane, ma Filipaina ma Guam i le Pasefika. Na malie le malo o Sepania i se faatulagaga ia Aokuso lea na taitai atu ai i se maliega aloaia e faaiuina ai le taua i le tausaga mulimuli ane.3

Na amataina e le Iunaite Setete i le auina atu o le vaegaau masani pe a ma le 28,000 fitafita ae na mulimuli ane talosaga se vaega tele o volenitia lesitala lea na aofia ai le faitau selau o tagata tau a le Au Paia o Aso e Gata Ai.4 O le itumalo o Iuta na mauaina lona tulaga faalesetete i le lua tausaga na muamua atu, ma e tele tagatanuu na aliali mai e naunau e faailoa atu lo latou loto atunuu. Mai le faitau selau mai Iuta o e na o atu, e toaitiiti na maliliu i le taua pu’upu’u.5

O le taua Sipaniolo-Amerika na fatuina ai ni avanoa fou mo le Ekalesia. O Elias S. Kimball, o le sa auauna atu o le peresitene o le Misiona o Setete i Saute, sa valaaulia e le Au Peresitene Sili e tofia o se failotu i vaegaau a le Iunaite Setete. Na auauna atu Kimball o se failotu i Cuba i le 1898, o le taimi muamua mo le tele o failotu Au Paia o Aso e Gata Ai na mulimuli mai ai.6 Na pulea ai e le Iunaite Setete ia atumotu o Filipaina, Guam, ma Puerto Rico i le maea ai o le taua, ma aumaia ai Au Paia o Aso e Gata Ai o Amerika i Matu i se tulaga vavalalata i fesootaiga faafaifeautalai i eria fou.7 Faapitoa lava, o le finauga taatele faatatau i le aiaina e Amerika o Cuba ma le atu Filipaina na mafua ai le tali mai mai nisi o tagata iloga o le Ekalesia lea na latou faailogaina le tautua a le militeli ma le tuputupu a’e o le tulaga faalemalo o le Iunaite Setete. I le taimi lea o le Au Paia o Aso e Gata Ai i le gasologa o le seneturi 19 na latou teenaina le galulue faatasi ma le Iunaite Setete, o latou o e na tupuga mai ai, na latou vaai i le Taua Sipaniolo-Amerika o se avanoa vaaia e faailoa atu ai le loto atunuu ma lagolagoina le faigamalo a le atunuu.8

Faamatalaga

  1. David F. Trask, O Le Taua ma Sepania i le 1898 (Lincoln: Iuniveste o le Aufaasalalau a Nebraska, 1996), 1–3.

  2. O le mafuaaga o le goto o le Mainee tumau o se faafinauga faapolokiki ma o loo finauina e le au faitusitalafaasolopito i le agai atu i le seneturi lona 21. E silia ma le 260 tagata o auvaa na maliliu i le maea ai o se mea na pa na galulu ai le vaega i luma o le vaa e latalata i nofoaga e malolo ai. Tagai i le Trask, O Le Taua ma Sepania, xii.

  3. Trask, O Le Taua ma Sepania, 444.

  4. “Foi Mai o Volenitia,” Improvement Era, Sete. 1899, 870–71. O le fuainumera tonu o Au Paia o Aso e Gata Ai o e na auai i le taua e le mailoa. O le Improvement Era o loo ta’ua ai e 354 tagata o le militeli, e ono le o aofia ai isi o e na lei tautua i le Vaega A, B, po o le C o le Meatau Mama a Iuta. O tagata fitafita o Iuta na mulimuli ane faamamaluina mo la latou auaunaga i le Taua Sipaniolo-Amerika e silia ma le 700, o loo maualalo lava le numera nai lo le mea atonu na aofia ai Au Paia o Aso e Gata Ai na tautua ai i le militeli a le Iunaite Setete mai fafo atu o Iuta.

  5. James I. Mangum, “O Le Taua Sipaniolo-Amerika ma Filipaina,, i le Robert C. Freeman, ed., Au Paia i Taua o le Seneturi Lona Sefulu ma le Iva (Provo, UT: Nofoaga Tutotonu o Suesuega Faaletapuaiga, 2007), 188; “Foimai o Volenitia,” 871; tagai foi i Autu: Autau a Mamona, Taua Mekisiko-Amerika.

  6. Mangum, “O Taua Sipaniolo-Amerika ma Filipaina,” 168.

  7. “Filipaina,” Vaaiga i le Atunuu, newsroom.ChurchofJesusChrist.org.

  8. Robert H. Hellebrand, “Saunoaga i Konafesi Aoao i le gasologa o Taimi o Taua,” i totonu o Patrick Q. Mason, J. David Pulsipher, Richard L. Bushman, eds., Taua ma le Filemu i o Tatou Taimi: O Vaaiga Mamona (Aai o Sate Leki: Greg Kofford Books, 2012), 132.