Talafaasolopito o le Ekalesia
O Le Tusi o Poloaiga


“O Le Tusi o Poloaiga,” O Autu o le Talafaasolopito o le Ekalesia

O Le Tusi o Poloaiga

O Le Tusi o Poloaiga

I nai masina muamua o le Ekalesia, na o le pau le ala na maua ai e tagata o le ekalesia faaaliga a le Alii ia Iosefa Samita na ala mai i kopi na tusilima i luga o pepa taitasi ia na tufa atu i le Au Paia o Aso e Gata-Ai. Na faalagolago taitai o le Ekalesia ma faifeautalai i nei kopi mo le taitaiga ma le uunaiga. I le latalata atu i le faaiuga o le 1831, na faia ai e Iosefa se konafesi e fuafua ai pe tatau ma pe faapefea ona lolomiina nei faaaliga. Na mananao o ia ma isi taitai o le Ekalesia ia mautinoa ua maua e tagata lautele o le Ekalesia ia kopi sao. I se faaaliga na maua e Iosefa i le konafesi, na faamaonia ai e le Alii le tuufaatasia o faaaliga ma na faaalia mai ai se faatomuaga mo le tusi o le a oo mai.1 Na tuuina atu le galuega i se komiti na taua o le Literary Firm ina ia vaaia le lolomiga o le tusi.2 Na masani ona taua e le Au Paia o Aso e Gata Ai faaaliga o “poloaiga,” ma na faaaogaina e le Literary Firm lenei upu i le autu o le tusi: “O se Tusi o Poloaiga,”

Ata
ata o le Tusi o Poloaiga o loo matala i le itulau autu, saini a Uilifoti Uitilafi i le isi itulau

O se Tusi o Poloaiga, lolomiina i Initipene, Misuri, i le 1833.

Amata le lolomiga i le 1832 i se fale lomitusi i Initipene, Misuri, na umia e Viliamu W. Phelps. Na toeitiiti lava maea le lolomiga ia Iulai 1833 ae osofaia loa e tagata leaga le fale lomitusi. Na lamatia le saogalemu o ni isi o le Au Paia i le faasaoina o itulau i le taimi o le osofaiga. O tagata na i ai i Misuri faapea foi i Katelani, Ohaio, na fusia faatasi itulau na faasaoina i ni nai tusi e le atoatoa, ae o le faamoemoe mo le lolomiina o le afe o kopi na le faataunuuina. Na toe amata e taitai o le Ekalesia se isi taumafaiga e lolomi faaaliga.3 Na faamanuiaina i latou i le 1835, ma lolomiina i Katelani i lalo o le ulutala O le Mataupu Faaavae ma Feagaiga o le Ekalesia a Iesu Keriso o le Au Paia o Aso e Gata Ai, lea na lagolagoina e le Au Paia o “se tulafono na tuuina i le ekalesia,” ma o se “tulaga faatonuina o le faatuatua ma le faatinoga.”4

Autu e Fesootai: Mataupu Faavae ma Feagaiga