O Faiga Taufaasese a Hofmann
O MarkW. O Hofmann o se tagata fai fefaatauaiga tulaga ese ma o sē e poto e pepelo na faafoliga lona fiafia atu i tagata o le Au Paia o Aso e Gata ai ma talafaasolopito o Amerika e ala i le faatauina atu o faamaumauga faatalafaasolopito ua faamaonia, suia, ma taufaasese i le amataga o le vaitau 1980. I le 1985, na foliga mai na popole ina nei iloa ana faiga faatogafiti, na faaaoga ai e Hofmann ni pomu na gaosia i le fale e fasiotia ai ni tagata se toalua, e aofia ai se tasi o ana paaga.
O le tele o taufaasese a Hofmann na taulai atu i talafaasolopito o le Au Paia o Aso e Gata ai. Na muai avea Hofmann o se tagata o le Ekalesia a Iesu Keriso o le Au Paia o Aso e Gata ai o lē na faalilolilo ona le toe talitonu i le Atua. I le 20 ma ona tupu tausaga o lona matua, na amata ona ia fiafia i galuega faalefaasolopito e uiga i le talafaasolopito o le Ekalesia ma na masani i faamaumauga ia na ta’ua i tala o talafaasolopito ae e lei mauina lava, e pei o le kopi o faailoga ma mataitusi o le Tusi a Mamona lea na ave e Matini Harisi i le polofesa lauiloa o Charles Anthon.1 I le 1980 na fai mai Hofmann na ia mauaina se kopi o lenei tusitusiga ma gaugau ma tuuina i totonu i va o itulau o le King James Bible o le seneturi lona 17. O tagata atamamai na latou iloiloina le pepa o faamatalaga na talitonu ua faamaonia e faave i luga o tusilima na ogatusa ma isi tusitusiga na faamaonia a Iosefa Samita faatasi ai ma faamatalaga o faailoga ma mataitusi a Anthon. O le taliaina o lenei faiga taufaasese na amataina ai le galuega a Hofmann o se tagata fai fefaatauaiga o tusi ma tusitusiga e le masani ai.
O le tele o metotia eseese na fesoasoani ia Hofmann e faatalitonu ai isi tagata atamamai e faapea o ana galuega taufaasese na moni. Na ia filifili ma le faaeteete galuega faatino e taulai ai i tusitusiga na iai muamua, ma na ia suesueina loloto i o latou faamatalaga. Na ia gaoia pepa ma isi meatotino mai fale teuoloa, faia lana lava vaitusi ma faafoliga ua tuai, ma toe faia ma le faaeteete ia faailoga e fesoasoani ai i ana taufaasese ia sao atu i le siakiina ma le faamaoniga o faamatalaga. Na ia suesueina faalilolilo le tusitusi a le tusitala ma toe gaosia i se tulaga na maofa ai i le matautia o lona lelei. O lana suesuega faasolopito ma ona tomai i tusitusiga na mafai ai ona ia tusia tusitusiga e atagia ai le faatulagaina o sitaili, lagona o tusiga, ma anotusi. Na ia faia ni tala faatalitonuina gofie i uluai tusiga ma faamaoniga o tusitusiga, o nisi taimi e tuuina muamua iai ni mea taufaasese ia foliga faatuatuaina ina ia mulimuli ane talitonu i ai o se tusiga maoae. Na ia maua tusitusiga faamaonia e le taatele e ala i le taliaina o na tusiga o se totogi i faafetauaiga ona toe faatau uma lea o tusitusiga ua faamaonia ma tusiga taufaasese. O nisi taimi na te faia ai ni suiga laiti i tusitusiga faamaonia poo tusiga ina ia mafai ona siitia ai o latou tau. O le tele o tagata atamamai mai matata eseese na latou faamaonia ma le le iloaina o tusiga taufaasese a Hofmann.
O faiga taufaasese a Hofmann na aofia ai tusitusiga mai uluai faiga faapolokiki a Amerika ma tusitala lauiloa, e amata mai i tusiga lē lauiloa na iai saini taufaasese i tusiga pupuu. Na fai e Hofmann faiga taufaasese i le tele o tusiga e fesootai i le Ekalesia, e aofia ai tusi a Iosefa Samita, Lusi Maka Samita, ma Tavita Uitimera, faatasi ai ma le toatele o isi. Sa ia gaosia le tele o faiga taufaasese e taulai atu i itu faatupu vevesi i talafaasolopito o le Ekalesia, ma le faamoemoe e faatupu ai finauga. Na ia faia se faamanuiaga taufaasese lea sa tatau ona tuuina atu e Iosefa Samita i lona atalii o Iosefa SamitaIII e filifilia ai o ia e fai ma sui o lona tama i le lumanai. Sa ia faia foi se tusi taufaasese i le 1830 mai ia Matini Harisi (sa iloa foi o le “tusi faa-salamander”), lea na faamatalaina ai o Iosefa Samita sa auai i faiga faa-faataulaitu.2 E le gata sa olegia e Hofmann taitai o le Ekalesia ma le au fai talafaasolopito i ana taufaasese ae na faapena foi ma lona aiga ma uo, o tagata teu faamaumauga ma tagata faigaluega i faletusi, ma isi tagata popoto. Na mauaina e le Ekalesia le tele o pepa o faamatalaga mai ia te ia, ma na avea ana taufaasese o se vaega na talanoa uma iai tagata suesue ma tagata lautele.
I le 1985 na amata faatalatalanoa ai e Hofmann se fefaatauaiga e $1.5miliona o pepa o faamatalaga taufaasese i le Faletusi a le Konekeresi. I le taimi lea, o tupe faaalu a Hofmann i faigamalaga, tamaoaiga, tusi taua, ma mea taufaasese sa sili atu nai lo ana tupe maua. Na amata ona tagisā isi paaga ia Hofmann mo a latou aitema na ia taliaina totogi ae lei gaosia lava. I le fefe ma le atuatuvale nei iloa o ia, na momoli ai e Hofmann se afifi o se pomu na gaosia i le fale lea na fasiotia ai le tagata ao oloa o StevenF. Christensen. Na folafola atu e Hofmann ia Christensen se faaputuga o pepa o faamatalaga mai ia Aposetolo William McLellin o le na lei fiafia iai, peitai na le mafai ona gaosia na faamatalaga. Ina ia tatai ese mafaufau o tagata suesue mai ia te ia ma isi gaioiga faapisinisi a Christensen, na auina atu ai e Hofmann se pomu lona lua i le fale o J.Gary Sheet, o le paaga faipisinisi a Christensen, lea na fasiotia ai le toalua o Sheet, o Kathy. O le aso na sosoo ai, e latalata i le Temple Square, na pa ai le pomu lona tolu i totonu o le taavale a Hofmann ao lei alu ese atu e momoli lenei pomu i se tasi na le i mailoaina. O le pa o le pomu na vave tatai atu ai leoleo e saili ni faamaoniga o moliaga e fesootai ai Hofmann i le faapaina o pomu. Sa suesue e tagata atamamai faapitoa faiga taufaasese a Hofmann ma faamaonia ai sa ia faia ia foliga tuai le vaitusi. Na iu ai lava ina tautino i lona fasioti tagata ma faiga taufaasese ma tuuina atu i ai se faasalaga o le lima tausaga i le falepuipui, ma na fautuaina e le faamasino ia le toe tatalaina i tua.
O faalavelave matuia na fesootai ma faiga taufaasese a Hofmann o le maliliu ai lea o Kathy Sheet ma Steven Christensen. O faiga taufaasese na aliae mai ai ni luitau i galuega tusitusi ma tagata ao tusi ma tagata fai fefaatauaiga, tagata tusi talafaasolopito, ma tagata teu faamaumauga. Ao tau faafesootai e leoleo la latou suesuega o Hofmann i le tele o faiga taufaasese, o ana fesootaiga tau fefaatauaiga na faigata ai ona maua le lautele ma le nofoaga o lana galuega. I le mavae o le sefululua tausaga talu mai le faapapaina o pomu, mo se faataitaiga, o se pepa o faamatalaga na talitonuina e tagata atamamai o se solo moni na tusia e Emily Dickinson sa fesootai ia Hofmann. O masalosaloga sese na faaosofia e pepa o faamatalaga a Hofmann poo faamatalaga ia na mulimuli ane toe avea ma faamaoniga o ana faiga taufaasese na suia ai lava le faamatalaina o le talafaasolopito o le Au Paia o Aso e Gata ai.
Talu mai le vaitau o le 1980 na lomia ai e le Ekalesia le aotelega e uiga i ona uluai talafaasolopito, fesoasoani e fausia se malamalama maoae o nisi o talafaasolopito na le manino ia sa faatogafiti ona fai e Hofmann i ana faiga taufaasese e faasalalalu ai manatu le lelei e uiga i le Ekalesia. O tagata fai talafaasolopito ma tagata teu talafaamaumau na faateleina lo latou mataala i le faamaonia afuaga o pepa o faamatalaga ma talaaga faasolopito ma isi faamaoniga. O le lolomiina ma le faia o kopi faaeletonika o tusiga a Iosefa Samita ma le tele o isi faaputuga o pepa o faamatalaga taua lea na fesoasoani e faalauteleina ai le faavae o le mauaina o faamatalaga fou.