O Le Sailiga o Oa

E masani ona taumafai le aufaitio ia Iosefa Samita e faaleaga o ia e ala i le tauina o ia o se tagata eli tupe po o se tagata saili oa. Nai lo o le teenaina o le tuuaiga, sa faailoa mai e Iosefa i lana talafaasolopito aloaia e faapea, sa faafaigaluega o ia e Josiah Stowell i le 1825 e fesoasoani i se taumafaiga sailiga oa i Penisilivania i matu.¹ Sa manaomia e Stowell lana fesoasoani ona sa faaigoa Iosefa e nisi o ona tuaoi o se “tagatavaai”—o se tasi e mafai ona vaai i totonu o se maa faapitoa ma maua ai mea na leiloloa pe na natia.²

O le “vaai” ma “tagatavaai” sa avea ma vaega o le aganuu lea na soifua ae ai Iosefa Samita. Sa talitonu nisi o tagata i le amataga o le seneturi lona 19, sa mafai e tagata taitoatasi sa faameaalofaina ona vaai i mea na leiloloa e ala i meafaitino e pei o maa. Sa taliaina e Iosefa Samita ma lona aiga, e pei o le toatele o tagata na siomia i latou, nei tu ma aga na masani ai nei tagata.

I le vaitau o le 1820, o le malie o le manatu e faapea, o loo tanumia i le eleele ni oa a le Au Sipaniolo na taitai atu ai tagata saili oa e tanumia i le eleele e pei o Josiah Stowell e lesitala le fesoasoani a tagatavaai e pei o Iosefa i a latou sailiga mo ni oa.³ Sa faatuatuaina e Stowell ia Iosefa, sailia lana fesoasoani i le sailiga o oa, ma faapea foi ona talia lana fautuaga e taofi le sailiga oa. Sa manatu Iosefa Samita le Matua, o le tomai o lona atalii e paia ma sa faamoemoe o le a tuu lona faaaogaina e sue ai oa o le lalolagi.⁴ Ao sauni Iosefa e faaliliu le Tusi a Mamona, sa poloaiina o ia e aua nei toe aafia ma i latou o e sa sailia oa ae ia faaaoga lana meaalofa e faaliliu ma saili ai faaaliga.

E ui sa le o se mea sa le masani ai i le vaitaimi ma le nofoaga sa i ai Iosefa Samita le fetaui ma tagata o e sa faapea mai e faaaogaina maa e sue ai meafaitino na leiloloa pe natia, ae o le faaaogaina o se maa a se tagatavaai e faaliliu ai se tusitusiga anamua sa lei faalogo muamua i ai [se tasi]. Sa tuuina mai e le Atua ia Iosefa Samita le mana e faaliliu ai le Tusi a Mamona, lea sa toe sui ai e Iosefa le faaaogaina o le maa a le tagatavaai i galuega e faaleagaga lona natura.

Punaoa o le Ekalesia

Richard E. Turley Jr., Robin S. Jensen, and Mark Ashurst-McGee, “Joseph the Seer,”Ensign, Oke. 2015, 48–55.

“Seer stone,” josephsmithpapers.org.

Autu e Faatatau i Ai: Tusi a Mamona, O Maa Vaai, Faamasinoga o Iosefa Samita 1826

Faamatalaga

1. Iosefa Samita, “History, 1838–1856, volume A-1 [23 December 1805–30 August 1834],” 7–8,josephsmithpapers.org; tagai atu Elders’ Journal, vol. 1, no. 3 (July 1838), 43, josephsmithpapers.org.

2. Tagai i le O Autu o le Talafaasolopito o le Ekalesia e faatatau i ai “Faamasinoga o Iosefa Samita 1826” ma le “O Maa Vaai.”

3. Alan Taylor, “The Early Republic’s Supernatural Economy: Treasure Seeking in the American Northeast, 1780–1830,”American Quarterly, vol. 38, no. 1 (Tautotogo 1986), 6–34.

4. William D. Purple, “Joseph Smith, the Originator of Mormonism,”Chenango Union,vol. 30, no. 33 (Me 2, 1877), 3.