Faaliliuga a Iosefa Samita o le Tusi Paia

A o faaliliuina le Tusi a Mamona, sa iloa e Iosefa Samita ma Oliva Kaotui sa eseese o la manatu i le uiga o se fuaitau i le Tusi Paia. Sa la “malilie faatasi e faamautu” le fesili “e ala i le Urima ma le [Tumema ].” O le taunuuga, na maua ai e Iosefa se faaaliga na tuu mai ai le faaliliuga o se tala na tusia e le aposetolo anamua o Ioane, o loo tusia i se lautusi pa’umanu ae na leiloa i le talafaasolopito. O lea aafiaga i le amataga i le sailia o faaaliga lea na faalauteleina ai le anotusi o se fuaitau o le Tusi Paia o se mamanu taua. Pe tusa ma le tasi le tausaga mulimuli ane, i le taimi o le taumafanafana o le 1830, sa maua ai e Iosefa ma Oliva e ala i se faaaliga se tala o se faaaliga a Mose e le o maua i le Feagaiga Tuai. O lea faaaliga na faailoga ai le amataga o taumafaiga a Iosefa Samita e saunia se faafouga musuia po o le faaliliuga o le Tusi Paia. Mo le isi tolu tausaga na sosoo ai, sa faaauau pea ona galue Iosefa i lana “faaliliuga fou o le Tusi Paia,” ma manatu i le galuega faatino o se “lala o [lona] valaauga” o se perofeta a le Atua.¹

atavali o ni alii se toalua o loo galulue faatasi i pepa i luga o se laulau

O se faailoaga faatusiata o Iosefa Samita ma Sini Rikitone o loo galulue i le faaliliuga o le Tusi Paia.

E lei faaaogaina e Iosefa Samita ni punavai Eperu ma le Eleni, lomifefiloi, po o se malamalama po o ni gagana faatusi paia e saunia ai se anotusi fou faa-Peretania. Ae, sa ia faaaogaina se kopi o le Tusi Paia a King James e fai ma vaega amata mo lana faaliliuga, ma faalau atu ai suiga musuia ma faaopoopoga i tusiupu o e sa tusia muamua i ni pepa ma mulimuli ane ai o ni tusigamanatu i le si’ina o le Tusi Paia lava ia. O ana faafouga e mafai ona tuu i ni faavasegaga eseese. O lana uluai galuega i le faaliliuga na tulai mai ai ni fuaitau uumi na faaalia mai ia sa faalau atu e Iosefa i ana tusiupu e pei ona ia faia pe a maua mai faaaliga i le Mataupu Faavae ma Feagaiga.² O nei fuaitau i nisi taimi e matua faateleina ai lava le anotusi faatusi paia. O le faataitaiga sili ua iloa o lenei ituaiga o faafouga o loo maua nei i le tusi a Mose i le Penina Tau Tele. Sa faia foi e Iosefa Samita ni mau suiga laiti sa faaleleia atili ai le kalama, gagana faaonaponei, faasa’o o vaega o aoaoga faavae, pe faamalamalama ai foi ni mea o feteenai. A o galue ai o ia i nei suiga, sa tulai mai i le tele o taimi sa ia sailia faamatalaga aloaia a le au sikola o le tusi paia, ma suesueina i lona mafaufau o se vaega o le faagasologa faafaaaliga.³

Sa faaauau e Iosefa mai le Kenese 1 i le Feagaiga Tuai seia oo ina taitaiina o ia e se faaaliga i le 1831 e se’e atu i le Feagaiga Fou. Na uma loa lava le Feagaiga Fou, sa toe amata e Iosefa mai le mea sa ia tuua ai i le Kenese ma faamaea ai lana galuega i le Feagaiga Tuai ia Iulai 1833. Sa tau mafaufau Iosefa i le faaliliuina o le Apokalifa, o se vaega o tusi sa taliaina o se tusitusiga paia e le Katoliko ma Kerisiano Masani ae na teena e le Au Porotesano. Sa faatonuina Iosefa i se faaaliga e aua nei faaliliua tusitusiga faaapokalifa e ui o na tusitusiga o loo i ai “mea e tele … e moni.”⁴

O le galuega a Iosefa Samita i le faafouga o le Tusi Paia na afua mai ai le tele o faaaliga o loo maua nei i le Mataupu Faavae ma Feagaiga. Atonu o le mea aupito ofoofogia o nei mea na tupu ina ua taumanatunatu Iosefa Samita ma Sini Rikitone pe faapefea ona faaliliu le Ioane 5:29, o se fuaitau o loo ta’ua ai le toetu o e ua oti, ma sa faamanuiaina i se vaaiga faafaaaliga o tikeri o le mamalu i le olaga a sau (MFF 76).⁵ E tele tala faapea na tulai mai i le taimi o le faagasologa o le faafouga o le Tusi Paia, na uunaia ai faaaliga e faatatau i le Mataio 13; 1 Korinito 7; ma le Tusi o Faaaliga.⁶

Ina ua mavae le maliu o Iosefa Samita, sa tuua ai lava tusitusiga o le faaliliuga o le Tusi Paia i lona faletua o Ema seia oo ina ia tuuina atu i lana tama o Iosefa Samita III, o le sa taitaia le Ekalesia Toefaatulaga a Iesu Keriso o le Au Paia o Aso e Gata Ai. Sa lolomi e le Ekalesia Toefaatulaga (ua ta’ua nei o le Nuu o Keriso) ia lomiga fou a Iosefa i le 1867 i lalo o le igoa O Tusitusiga Paia, Na Faaliliuina ma Faasa’oina e le Agaga o Faaaliga, ae na vave ona lauiloa le voluma o le “Voluma Musuia o le Tusi Paia.”⁷ Sa faaalia e Polika Iaga, i le taimi lea ua Peresitene o le Ekalesia, lona le talitonu i le sao lelei o le Voluma musuia, ona e lei maua sona avanoa e toeiloilo ai e ia lava ia punavai o tusitusiga. E ui i lona taulimaina o se kopi sa tusilima o nisi o faasa’oga o tusitusiga, ae sa lei lolomiina e le Ekalesia i lalo o le taitaiga a Polika Iaga se voluma.⁸

I le vaitau o le 1960, sa tofu suesueina ai e sikola o le  RLDS o Richard P. Howard ma le sikola RLDS o Robert J. Matthews ia tusitusiga ina ia faamautu ai voluma ua lolomiina e faaaoga ai anotusi faapogai. Sa faaavanoa mai e le Ekalesia Toefaatulaga ia tusitusiga ma tuuina mai i le Ekalesia AAG le faatagaga e lolomi ai ma faasalalau ia fuaitau o ni vaefaamatalaga i le lomiga i le 1979 a le AAG  o le Tusi Paia. O suesuega faifaipea mai lea taumafaiga tuufaatasi na oo atu ai i le lolomiga o le faasa’oga atoa o le Tusi Paia i le 2004 ma sa toe avea ai o se vaega o Pepa a Iosefa Samita.⁹

Punaoa a le Ekalesia

“Bible Revision Manuscripts,” josephsmithpapers.org.

Elizabeth Maki, “Joseph Smith’s Bible Translation: MFF 45, 76, 77, 86, 91,” i le Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 99–104.

David Rolph Seely, “The Joseph Smith Translation: ‘Plain and Precious Things’ Restored,” Ensign, Aug. 1997, 9–16.

( Robert  J. Matthews, “Joseph Smith’s Efforts to Publish His Bible ‘Translation,’” Ensign, Jan. 1983, 57–64; Bible Dictionary, “Joseph Smith Translation.”)

Talaaga o le Soifuaga

O lomiga nei o loo tuuina atu ai nisi faamatalaga e uiga i lenei autu. I le faasinoina po o le faafesootaia o oe i nei punaoa, matou te le faamaonia pe faamautinoa atu le anomea po o manatu o tusitala.

Scott H. Faulring, Kent P. Jackson, and Robert J. Matthews, eds., Joseph Smith’s New Translation of the Bible: Original Manuscripts (Provo, Utah: Religious Studies Center, 2004).

Robert J. Matthews, “A Plainer Translation”: Joseph Smith’s Translation of the Bible (Provo, Utah: Brigham Young University Press, 1975).

Autu Fesootai: The Vision (DC 76), Book of Mormon Translation, Book of Abraham Translation

1. Joseph Smith, “History, 1838–1856, Volume A-1 [23 December 1805–30 August 1834],” 15, 175, josephsmithpapers.org; “Visions of Moses, June 1830 [Moses 1],” in Old Testament Revision 1, josephsmithpapers.org.

2. “Bible Used for Bible Revision,” Historical Introduction, josephsmithpapers.org. O tusiupu sa fesoasoani ia Iosefa Samita i le faasa’oga o le Tusi Paia sa aofia ai Oliva Kaotui, Ioane Uitimera, Ema Samita, Sini Rikitone, Feterika G. Viliamu, ma e foliga mai ma Jesse Gause. (“Revelation, 15 March 1832 [DC 81],” Historical Introduction, josephsmithpapers.org.)

3. Haley Wilson and Thomas Wayment, “A Recently Recovered Source: Rethinking Joseph Smith’s Bible Translation,” Journal of Undergraduate Research, Mar. 2017, jur.byu.edu. (Tagai i le MFF 9:7--9

4. “Revelation, 9 March 1833 [MFF 91],” in Revelation Book 2, 55, josephsmithpapers.org

5. Joseph Smith and Sidney Rigdon, “Vision, 16 February 1832 [DC 76],” in Revelation Book 2, 1–10, josephsmithpapers.org.

6. Robert J. Matthews, “Doctrinal Connections with the Joseph Smith Translation,” in Leon R. Hartshorn, Dennis A. Wright, and Craig J. Ostler, eds., The Doctrine and Covenants: A Book of Answers (Salt Lake City: Deseret Book, 1996), 27–42; Kerry Muhlestein, “One Continuous Flow: Revelations Surrounding the ‘New Translation,’” in Andrew H. Hedges, J. Spencer Fluhman, and Alonzo L. Gaskill, eds., The Doctrine and Covenants: Revelations in Context (Provo, Utah: Religious Studies Center, Brigham Young University, 2008), 40–65.

7. Robert J. Matthews, “A Plainer Translation”: Joseph Smith’s Translation of the Bible: A History and Commentary (Provo, Utah: Brigham Young University Press, 1985), 168–69.

8. Sa kopiina e se tagata o le Ekalesia o John M. Bernhisel ni vaega o se tusitusiga o le Feagaiga Tuai ma se tusitusiga e ese ai o le Feagaiga Fou pe tusa o se tausaga talu ona maliu Iosefa Samita ina ua tuu atu e Ema Samita ia Bernhisel ia tusitusiga mo se vaitau pe tusa ma le tolu masina. O le kopi a Bernhisel, e ui ina sa taumafai i ai ma le faamaoni, ae sa faaauau ai pea lava ni faaliliuga sese (Matthews, “A Plainer Translation,” 117–40.)

9. Tagai Scott H. Faulring, Kent P. Jackson, ma Robert J. Matthews, eds., Faaliliuga Fou a Iosefa Samita o le Tusi Paia: Uluai Tusitusiga (Provo, Utah: Religious Studies Center, Brigham Young University, 2004); “Bible Revision Manuscripts,” josephsmithpapers.org.